Türkmenistanyň milli futbol ýygyndysy Aziýa-2027 Kubogynyň saýlama ýaryşyny Hytaýyň Taýbeýine garşy oýnamak bilen başlar. Duşuşyk 25-nji martda Gaosýunda geçiriler we ol Aşgabat wagty bilen 15:30 başlanar.

Bije çekişligiň netijeleri boýunça Türkmenistanyň milli ýygyndysy D toparça düşdi, bu ýerde onuň bäsdeşleri Taýland we Şri-Lankanyň ýygyndylary hem bolar.

Saýlama oýunlaryň çäklerinde Mergen Orazowyň topary alty oýny geçirer: 2025-nji ýylda bäş we 2026-njy ýylyň martynda bir oýun. Alty saýlama toparçanyň ýeňijileri Saud Arabystanynda geçiriljek Aziýa-2027 Kubogynyň jemleýji tapgyryna gatnaşmak üçin ýollanma alarlar.

Türkmenistanyň agyr atletikaçylary 30-njy aprelden 5-nji maý aralygynda ýaşlaryň arasynda Limada (Peru) geçiriljek dünýä çempionatynda çykyş ederler.

Halkara agyr atletika federasiýasynyň (IWF) saýtynda çap edilen deslapky berlen düzümiň sanawyna türkmen türgenleriniň 15-si girdi – olaryň hatarynda 7 oglan, 8 gyz bar.

Halkara Olimpiýa komitetiniñ Ýerine ýetiriji komiteti Los-Anjelesde 14-30-njy iýuly aralygynda geçiriljek 2028-nji ýylyñ XXXIV tomusky Olimpiýa oýunlarynyñ maksatnamasyna sportuň boks görnüşini girizmegi teklip etdi. Bu baradaky karar 2023-nji ýylda döredilen täze World Boxing halkara guramasynyñ ykrar edilmeginiñ netijesi boldy.

Halkara Olimpiýa komitetiniñ prezidenti Tomas Bah bu teklibiñ şu hepde Kosta-Nawarinoda (Gresiýa) geçiriljek bu sport edarasynyñ 144-nji sessiýasynda goldanyljakdygyna ynam bildirdi.

Pariždaky Olimpiýa oýunlarynda boks boýunça ýaryşlary Halkara Olimpiýa komitetiniñ ýörite toparynyñ gözegçiliginde geçirildi. Bu karar türgenlere ýaryşa gatnaşmaklaryny kepillendirdi.

Türkmenistanyň Küşt federasiýasy täzelik girizmek bilen Gran Pri ýaryşlarynyň täze tapgyryny esaslandyrdy — ol oýunlary hakyky wagt düzgüninde onlaýn ýaýlyma bermegi ýola goýdy – diýip, «Türkmenistan: Altyn asyr» neşiri habar berýär.

Bu tapgyr Türkmenistanyň we paýtagtyň bäş sebitinde geçiriljek nusgawy formatdaky alty ýaryşdan ybarat bolar. Aşgabadyň ýöriteleşdirilen küşt we şaşka mekdebinde badalga alan ilkinji tapgyr 127 gatnaşyjyny – açyk derejede 83 adam, aýallar derejesinde hem 44 aýal-gyzy özünde jemledi.

Tutuş tapgyryň netijelerine görä, paýtagtymyzda pleý-off ýaryşyň soňky tapgyryna gatnaşjak her dereje boýunça 16 sany iň oňat oýunçy kesgitlener. Ýeňiş gazanan küştçiler halkara ýaryşlary üçin milli ýygyndymyzyň esasyny düzjek Türkmenistanyň 2026-njy ýyldaky Ýokary ligasyna gönümel ýollanma alarlar.

Ýaryşyň esasy aýratynlygy, Türkmenistanyň küşt taryhynda ilkinji onlaýn ýaýlym berilmegi boldy. Küşt mallarynda we tagtalarynda ýörite sensorlaryň bolmagy bilen, küşt tagtasyndaky her bir hereket dessine sanlylaşdyrylýar we DGT LiveChess programmasy arkaly onlaýn platformalara iberilýär.

Tomaşaçylar her bir göçümi, oýunçylaryň wagtyny yzarlap, Lichess platformasyndaky oýunlary hakyky wagtda seljerip bilýärler.

Häzirki wagtda açyk derejede 7 tagta we aýal-gyzlar derejesinde 3 tagta onlaýn ýaýlyma berilýär. Türkmenistanyň Küşt federasiýasy bir wagtda onlaýn ýaýlyma bermek üçin tagtalaryň sanyny köpeltmegi meýilleşdirýär. Taslama üçin tehniki goldaw Gollandiýanyň DGT kompaniýasy we Türkmenistanyň «Imdat Elektronika» IT kompaniýasy tarapyndan berilýär.

Guramaçylaryň pikiriçe, bu girizilen tehniki täzelik — küşt ýaryşynyň tomaşaçylaryň giň köpçüligi üçin ajaýyp sport görnüşine öwrülmeginde gazanyljak möhüm ädimdir.