The Athletic-iň habaryna görä, "Mançester Sitiniň" baş tälimçisi Josep Guardiola klubyň ýolbaşçylary bilen täze şertnama baglaşmak barada ylalaşdy. Şertnama bir ýyl möhlet bilen, ýene bir möwsüm uzaltmak mümkinçiligi bilen baglaşylar.

53 ýaşly hünärmeniň häzirki şertnamasy indiki ýylyň tomsunda tamamlanýar. Hyzmatdaşlygyň uzaldylmagy barada ýakyn günlerde resmi taýdan yglan ediler diýlip garaşylýar.

2016-njy ýylda baş tälimçi wezipesine bellenen gününden bäri Guardiola "şäherlileri" alty gezek Angliýanyň çempiony we Çempionlar ligasynyň ýeňijisi etdi. Ispan hünärmeniniň ýokary netijeleri klubyň hyzmatdaşlygy dowam etdirmek kararyna täsir etdi.

Türkmenistanyň türgeni Döwletjan Ýagşymyradow 29-njy noýabrda Saud Arabystanynda ol PFL ligasynyň final söweşinde amerikaly Impa Kasanganai bilen duşuşar, bu ýerde çempion guşagy we 1 million dollar baýrak üçin ýaryşylar.

Ýagşymyradow yzly-yzyna alty ýeňiş gazandy. Onuň soňky üstünligi awgust aýynda Golliwuddaky PFL 8 turnirinde bolup, ol awstraliýaly Rob Wilkinsone garşy eminleriň biragyzdan çykaran karary bilen 30-27 hasabynda ýeňiş gazandy.

Türkmen türgeni PFL-de çykyş etmekde görkezen tejribesi nazara alynyp onuň ýeňiş gazanmaga ähli mümkinçiliklere eýe diýip aýdyp bolar.
 

Türkmenistanyň samboçylary Astanada şäherinde geçirilen 49-njy sambo boýunça dünýä çempionatynda alty medal gazandylar

Gazagystanda geçirilen uly ýaryşda 311 000 ABŞ dollary möçberinde baýrak gaznasy bolup, dünýäniň 80 ýurdundan 470 töweregi türgen gatnaşdy. Olar erkekler we zenanlar arasynda sport we söweş sambo boýunça, şeýle hem SVI-1 (doly kör türgenler) synpynda kör erkekler üçin sambo boýunça 31 sany medal toplumy üçin bäsleşdiler.

Üç gün dowam eden ýaryşlaryň netijesinde türkmen samboçylary 1 altyn, 2 kümüş we 3 bürünç medal gazandylar.

Çempionatyň birinji gününde Ak bugdaý etrabynyň Baş sport we bedenterbiýe müdirliginiň sport mekdebiniň tälimçi-mugallymy Zarina Abdyrahmanowa (54 kg agram derejesi) we Türkmenistanyň Milli söweş sungat federasiýasynyň türgeni Gülzada Jorakuliýewa (72 kg çenli) söweş sambosynda iki sany bürünç medal gazandylar. 

Ikinji ýaryş gününde 26 ýaşly sport ussady Muminjan Arzykulyýew altyn medal gazandy. Ol 71 kg agram derejesinde söweş sambosynda dünýä çempiony boldy, bu agram derejesinde 24 türgen medal üçin bäsleşdi. M.Arzykulyýew sport bilen işjeň meşgullanýar we şol bir wagtda 5-nji sport mekdebinde sambo tälimçisi wezipesi işleýär.

Dünýä çempionatynyň soňky gününde Türkmenistanyň toparynyň gaznasy ýene iki kümüş we bir bürünç medal bilen doldy.

Kümüş medal gazananlar: Lebap welaýatynyň Baş sport we bedenterbiýe müdirliginiň Çärjew etrabynyň 1-nji sport mekdebiniň tälimçi-mugallymy Bägül Nurýewa (50 kg çenli söweş sambo) we Lebap welaýatynyň Baş sport we bedenterbiýe müdirliginiň Dänew etrabynyň tälimçi-mugallymy Sabina Agajanowa (80 kg-dan ýokary söweş sambo). Bürünç medal gazanan bolsa Lebap welaýatynyň Baş sport we bedenterbiýe müdirliginiň Çärjew etrabynyň 3-nji sport mekdebiniň tälimçi-mugallymy Kambar Umarow (71 kg çenli sport sambo).

Indiki, 50-nji sambo boýunça dünýä çempionaty 2025-nji ýylda Aşgabatda geçiriler. 

16-njy noýabrda Aşgabat şäherindäki Gyşky oýunlar sport toplumynda ýaýdan nyşana ok atmak boýunça höwesjeňler ýaryşy geçirildi, oňa metbugat ulgamynyň wekilleri – habarçylar, fotohabarçylar we meşhur bloglaryň awtorlary gatnaşdylar.

Türkmenistanyň Milli Ýaý atyjylyk federasiýasynyň howandarlygynda ýoldaşlyk ýaryşy sportuň bu görnüşini ýaşlaryň arasynda wagyz etmäge gönükdirildi. Iki topara bölünen ýaryşa gatnaşyjylar ussat ýaýdan ok atyjylardan sapak alyp, ýaryşa jogapkärçilikli girişdiler.

Ýaryş üç tapgyrdan ybaratdy. Birinji tapgyrda oňa gatnaşyjylar dürli reňkli tegelek kagyz nyşanlara ok atdylar. Ikinji tapgyrda mergenleriň wezipesi çylşyrymlaşýar, indi olar top görnüşindäki göwrümli nyşanlara ok atmalydylar. Ahyrky tapgyrda uzak aralykdan ullakan nyşana ok atyldy.

Ýaryşyň dowamynda toparlar gezekli-gezegine öňe saýlandylar. Netijede çekeleşikli göreşde habarçylar we fotohabarçylar topary ýeňiş gazandy. Ýeňijilere ýaryşyň hemaýatkärleri – «Älem Sport», «Çopan» we «Resmi Kepil», şeýle hem ýaryşyň guramaçylarynyň höweslendiriji baýraklary gowşuryldy.

Türkmenistanyň Milli Ýaý atyjylyk federasiýasynyň başlygy Wepa Sähedow ýaryşa gatnaşyjylary üstünlikleri bilen gutlady, «Pähim-paýhas ummany Magtymguly Pyragy» şygary ýylynda geçirilen ýaryşda ýeňşiň ähmiýetini aýratyn belledi.

Ýaryş ýaýdan nyşana ok atmak sportunyň ösmegine we metbugat bileleşiginiň özara gatnaşyklary berkitmäge ýardam eden şanly waka boldy.

Ýaryşyň guramaçysy Şirin Žožiýewa:

– Sportuň iň gyzykly görnüşleriniň biri bolan ýaýdan nyşana ok atmagy öwrenmek isleýänler üçin gapymyz mydama açyk. Sportuň bu görnüşi bilen meşgullanmaga hiç wagt giç däl. Islendik ýaşda gelibem gowy netijeler gazanyp bolar. Ýaýdan nyşana ok atmak kaddyňy dikeldýär, mergenligi we ünslüligiňi ösdürýär – diýdi.

Anyk maglumatlar Milli Ýaý atyjylyk federasiýasynyň resmi saýtynda berlendir.