Birleşen Milletler Guramasynyñ Nýu-Ýorkdaky ştab-kwartirasynda 2025 ýylyñ BMG-niñ Dostluk oýunlaryna badalga berildi.

Bu waka 2025-nji ýylyñ "Halkara parahatçylyk we ynanyşmak ýyly" diýlip yglan edilmeginiñ çäklerinde BMG-niñ Baş Assambleýasynyñ 78/325 belgili "BMG-niñ Dostluk oýunlary" atly kararnamasyna laýyklykda, Türkmenistanyñ BMG-niñ ýanyndaky Hemişelik wekilhanasy tarapyndan geçirilýän giñ gerimli sport çäresiniñ başyny başlatdy.
Oýunlar Nýu-Ýorkdaky diplomatik wekilhanalaryñ wekillerini, BMG-niñ sekretariatynyñ we ýöriteleşdirilen edaralarynyñ işgärlerini birleşdirdi. Şu ýyl Oýunlar dünýäniñ 110 ýurdundan 800-den gowrak gatnaşyjyny ýygnady.

Eýýäm Oýunlaryñ birinji gününde futbol ýaryşynyñ topar duşuşyklarynda gatnaşyjylar ýokary topar ruhuny hem-de sagdyn çekeleşmäni görkezdiler.

9-njy aprelde ýoga, küşt we ylgamak boýunça ýaryşlar geçirildi. BMG-niñ ştab-kwartirasynyñ Demirgazyk meýdançasynda dürli ýurtlaryñ we edaralaryñ wekilleri akyl-paýhas we fiziki ugurlarda bäsleşip, Oýunlaryñ esasy maksadyy bolan parahatçylygy we ynanyşmagy ýatlatdylar.
13-nji aprelde tomaşaçylar badminton boýunça yaryşa tomaşa etdiler.
Oýunlar maý aýynyñ ortalaryna çenli dowam edip, öñde basketbol, tennis, woleýbol we stoluñ üstünde oýnalýan tennis boýunça ýaryşlar garaşýar. Oýunlar Ýapylyş dabarasy we ýeñijileriñ sylaglanmagy bilen tamamlanar.

BMG-niñ Dostluk oýunlary baradaky makalalar  Oýunlaryñ resmi saýtynda elýeterlidir.

Türkmenistanyň sambo boýunça milli ýygyndysy Daşkentde badalga alan Aziýanyň we Okeaniýanyň çempionatynyň ilkinji gününde üstünlikli çykyş etdi. Türkmen türgenleri ýygyndymyzyň baýraklarynyň umumy gaznasyna iki kümüş we dört bürünç medaly goşmagy başardy – diýip, «Türkmenistan: Altyn asyr» neşiri habar berýär.

Abraýly yklym ýaryşlary sebitiň 23 ýurdundan 600-den gowrak türgeni ýygnady. Bäsleşik ýetginjeklerden başlap weteranlara çenli ähli ýaş toparlaryny gurşap alýar. Gatnaşyjylar erkekleriň we zenanlaryň arasynda sport we söweş sambosy, şeýle-de SVI-1 (doly kör) we SVI-2 (pes görýän) toparlarda gözi görmeýän türgenleriň arasyndaky sambo ugurlarynda bäsleşýärler.

Türkmen toparynda kümüş medallary sport sambosynda Muhammetmyrat Bäbekow (58 kg çenli agram derejesi) we söweş sambosynda Bezirgen Begenjow (98 kg çenli) gazandylar.

Finala tarap ýolda Bäbekow mongolýaly samboçy Munhbat Genenedaram bilen çärýek finalynda (2:1) we ýarym finalda gyrgyzystanly Kimal Obolbekow bilen (2:1) bilen duşuşyp, olary ynamly ýeňmegi başardy. Ahyrky duşuşykda türkmen türgeni ýaryşy kabul edýän ýurduň pälwany özbegistanly Ilhom Parmonowdan 3:5 hasaby bilen ýeňildi.

Begenjow ýarym finalda gyrgyzystanly Bekbolsun Kerimbekowy ynam bilen ýeňip (8:0), finalda gazagystanly samboçy Raýhan Madä garşy durup bilmedi we netijede 1:4 hasaby bilen ýeňildi.

Türkmen ýygyndysynyň baýraklar gaznasyna bürünç medallary erkekleriň sport sambosyndan Sapar Döwletow (64 kg çenli) we toparyň zenan samboçylaryndan: Aziza Nazarowa (50 kg çenli), Zuleýha Hudaýberdiýewa (54 kg çenli) we Merjen Joraýewa (59 kg çenli) dagy getirdiler.

Döwletow Mohammed Albaker Algarrawydan üstün çykyp, ýaryşy ýeňiş (10:0) bilen başlady, soňra ýarym finalda geljekki çempion gazagystanly Jandos Beýsenbaewden (0:6) ýeňildi, emma bürünç medal üçin göreşde günorta koreýaly samboçy Li Seungany 2:0 hasaby bilen ýeňdi. Nazarowa, Hudaýberdiýewa we Joraýewa ýarym final tutluşyga ýetip bilmediler we öz agram derejelerinde üçünji ýeri eýelediler.

Türkmenistanyň «Arkadag» futbol klubynyň tälimçiler topary we futbolçylary Kuweýtiň «Al-Arabi» klubyna garşy AFK-nyň Çagyryş ligasynyň ýarym finalyndaky jogap duşuşygynda, ilkinji oýnuň şowsuz bolandygyna garamazdan, ýagdaýy özgertmäge çynlakaý taýýarlyk görýärler. Öý eýelerine finala çykmak üçin üç ýa-da ondan köp gol tapawudy bilen ýeňiş gazanmak zerur bolup durýar – diýip, Turkmenportalyň habarçysy habar berýär.

«Birinji oýun biziň garaşan ýagdaýymyzda geçmedi, emma her nämede bolsa duşuşyk iki oýundan ybarat, şonuň üçin biz ertirki duşuşykda ýagdaýy özgerdip biljegimize bil baglaýarys – diýip, «Arkadagyň» baş tälimçisi Ahmet Allaberdiýew duşuşykdan öňki metbugat maslahatynda beýan etdi.

Tälimçiniň sözlerine görä, milli ýygyndymyz üçin oýunda şikes alan Resul Hojaýewden başga toparyň ähli oýunçylary şu günki gün üçin iň amatly düzümde aýgytlaýjy duşuşyga taýýarlyk görýär. Tälimçi klubda ýokary derejeli oýunçylaryň jemlenendigini we olaryň meýdança ýeke-täk maksat bilen – diňe ýeňmek maksady bilen çykjakdyklaryny belledi.

«Arkadagyň» goragçysy Guýçmyrat Annagulyýew toparyň hyjuwly ruhdadygyny tassyklady: «Biziň ýagdaýymyz gowy, hyjuwly ruhumyz ýokary. Biziň maksadymyz örän anyk – ertir diňe ýeňiş gazanmaly». Futbolçynyň pikiriçe, üstünligiň açary «jebislik we komadalaýyn oýny görkezmek» bolar.

Öňde duran duşuşykda aýratyn orny janköýerler eýelemelidir. «Duşuşyk münberdäki öz janköýerlerimiziň goldaw bermeginde geçer, biz çynlakaý goldawa garaşýarys. Janköýerlerimize topara ynanýandyklary üçin minnetdarlyk bildirýäris we olaryň ynamyny ödemäge çalşarys» — diýip, Allaberdiýew nygtady.

AFK-nyň Çagyryş ligasynyň 1/2 finalynyň jogap duşuşygy çarşenbe güni, 16-njy aprelde geçiriler. Duşuşygyň başlanýan wagty Aşgabat wagty bilen 15:30-da.

Mälim bolşy ýaly, ilkinji ýarym final duşuşygynda «Arkadag» myhmançylykda 0:2 hasaby bilen ýeňlişe sezewar bolupdy.

Türkmenistanyň Milli elektron sport federasiýasynyň (TMESF) prezidenti Mekan Eýeberdiýew Aziýanyň kibersport federasiýasynyň (AESF) müdiriýetiniň düzümine girdi, şeýle-de Merkezi Aziýanyň kibersport birleşiginiň wise-prezidenti wezipesine saýlandy. Bu barada TMESF-iň saýtynda habar berilýär.

Onlaýn görnüşde geçirilen saýlawlar AESF-iň Birinji saýlaw Baş assambleýasynyň barşynda boldy. Çärelere Aziýa ýurtlarynyň milli kibersport federasiýalarynyň ýolbaşçylary, şeýle-de Aziýanyň Olimpiýa geňeşiniň (OCA) baş direktorynyň orunbasary Winod Tiwari gatnaşdy.

Mundan başga-da, 2025-nji ýylyň fewral aýynda sebitiň ýurtlarynyň sanly sporty ösdürmek boýunça tagallalaryny utgaşdyrmak maksady bilen, resmi taýdan Merkezi Aziýanyň kibersport birleşigi döredildi. Bu guramada geçirilen saýlawlaryň netijesinde TMESF-iň Baş sekretary Nazar Udeumyradow Birleşigiň Baş sekretary wezipesine bellendi.

TMESF-de aýtmaklaryna görä, bu bellenmeler Türkmenistanyň halkara kibersport jemgyýetiniň eýeleýän ornunyň pugtalandyrylýandygyny we sebitde, şeýle hem tutuş Aziýa derejesinde hyzmatdaşlyk, tejribe alyşmak we sport başlangyçlaryny ösdürmek üçin täze mümkinçilikleriň açylýandygyny görkezýär.

«Ahal» futbol kluby Türkmenistanyň futbol çempionatynyň 6-njy tapgyrynyň duşuşygynda «Merwi» ynamly ýeňmegi başardy. Duşuşyk Aşgabadyň «Köpetdag» stadionynda geçirilip, ol 3:0 hasaby bilen tamamlandy.

«Merwiň» derwezesine gollary Daýanç Meredow (50-nji minutda), Ybraýym Amangeldiýew (58) we Nazar Towakelow (66) dagy geçirdiler.

«Ahal» şu möwsümde dördünji ýeňşini gazandy we 12 utuk toplap, Ýokary liganyň ýaryş tertibiniň birinji ornunda ornaşdy. Ikinji ýerde barýan «Altyn Asyr» iki utuk yza galýar.

«Merw» bolsa yzly-yzyna üçünji gezek ýeňilmek bilen, 4 utugy bilen ýaryş tertibinde ýedinji orunda galýar.

Tapgyryň beýleki duşuşyklarynda Aşgabadyň «Altyn Asyr» topary «Şagadam» bilen 1:1 hasaby bilen deňme-deň oýnady, «Nebitçi» bilen «Köpetdagyň» duşuşygynda bolsa hasap (0:0) açylmady.

Indiki tapgyrda 19-njy aprelde «Altyn Asyr» myhmançylykda «Merw» bilen duşuşar, «Şagadam» topary öz meýdançasynda «Köpetdagy» kabul eder, «Ahal» bolsa myhmançylykda «Aşgabat» bilen duşuşar.

Türkmenistanyň küşt boýunça zenanlar ýygyndysynyň wekilleri Jahan Rejepowa we Bägül Ezizowa 1-10-nji aprelde Almatyda geçirilen Aziýanyň zolaklaýyn çempionatynda (zolak 3.4) degişlilikde 4-nji we 6-njy orunlary eýelediler.

Aýratyn-da 14 ýaşly Jahan Rejepowa tapawutlandy, ol FIDE-niň zenan ussady (WFM) diýen adyna mynasyp boldy we zenan halkara ussadynyň (WIM) birinji kadasynyň talaplaryny ýerine ýetirdi. Bu barada Türkmenistanyň Küşt federasiýasynyň metbugat gullugy habar berdi.

Ýaryş 2025-nji ýylyň FIDE-niň Dünýä kubogy ugrunda resmі saýlama tapgyry bolup, oňa Merkezi Aziýanyň bäş ýurdundan we Owganystandan 131 ussat küştçi, şol sanda 87 erkek we 44 zenan küştçi gatnaşdy.

Aziýanyň küşt federasiýasynyň wise-prezidenti we Gazagystanyň küşt federasiýasynyň birinji wise-prezidenti Darmen Sadwakasowyň ýapylyş dabarasyndaky çykyşynda türkmen gyzlarynyň, aýratyn-da 14 ýaşly Jahan Rejepowanyň ýokary halkara derejede özüni güýçli tarapdan görkezmek bilen, kämillige ýeten oýun derejesiniň bardygyny belläp geçdi.

Ýaryşyň dowamynda Rejepowa Gazagystanyň ýygyndy toparyndaky oýunçylary goşmak bilen, güýçli bäsdeşleriň garşysyna birnäçe täsirli ýeňişleri gazandy. Ol Budapeşt-2024 Olimpiadasynda kümüş medal alan küştçüler bilen geçiren oýunlarynda 2 mümkin bolan utukdan 1,5 utuk toplamak bilen, şol sanda zenan grossmeýsteri Liýa Kurmangaliýewany (FIDE reýtingi – 2249) ýeňdi we ýaryşda birinji saýlanan zenan grossmeýsteri Aluа Nurman (2347) bilen deňme-deň oýnady.

Üstünlikli çykyşynyň netijesinde Rejepowa özüniň FIDE reýtingini 137 utuk ýokarlandyrdy we ony 2150 derejä çykardy. Mümkin bolan 9 utukdan 6,5 utuk gazanyp, ol 4-nji orny eýeledi we ýeňiş münberinden we Dünýä kubogyna ýollamadan diňe bir ädimlikde galdy.

Türkmenistanyň beýleki wekili, halkara zenan dalaşgäri Bägül Ezizowa (1941) 6 utuk bilen 6-njy orny eýeledi.

Erkekleriň arasyndaky ýaryşda türkmen küştçüsi, ýakynda grossmeýster adyny alan Saparmyrat Atabaýew (2530) 6 utuk bilen 9-njy orny eýeledi. Ol soňky tapgyrda Muhammadzohid Suýarow bilen geçiren oýnunda emele gelen deňme-deň ýagdaýy saklap bilmedi.

Çempionatyň netijelerine görä, Dünýä kubogyna ýollamalary üç zenan küştçi: Afruza Hamdamowa (Özbegistan) – 7,5 utuk, Elnaz Kaliahmet (Gazagystan) – 7 utuk we Meruert Kamalidenowa (Gazagystan) – 7 utuk; şeýle-de dört erkek küştçi gazandylar: Aldiýar Ansat (Gazagystan) – 7,5 utuk, Satbek Ahmedinow (Gazagystan) – 7 utuk, Alişer Suleýmenow (Gazagystan) – 7 utuk we Muhammadzohid Suýarow (Özbegistan) – 7 utuk.

Aşgabat şäherinde 1-8-nji aprel aralygynda Bütindünýä saglyk güni mynasybetli "Sport – parahatçylygyň ilçisi" atly ýokary okuw mekdepleriniň woleýbol ýaryşy geçirildi.

Ýaryşda Ýagşygeldi Kakaýew adyndaky Halkara nebit we gaz uniwersitetiniň "Nebitçi" woleýbol topary çykyş eden ähli duşuşyklarynda 3-0 hasaby bilen ýeňiş gazanmagy başardy. Olar yzygiderli "Binagär", "Oguz han" we "Ýüpek ýoly" toparlaryny ýeňip, finala çykdylar.

Final oýnunda "Nebitçi"-niň woleýbolçylary Türkmen döwlet bedenterbiýe we sport institutynyň "Talyp sport" toparyny 3-0 hasap bilen ýeňip, ýaryşyň çempiony bolmagy başardylar.

Türkmenistanyň wekiliýeti Duşenbe şäherinde geçirilen Aziýanyň Olimpiýa geňeşiniň (AOG) we Olimpiýa raýdaşlygynyň (OR) Sebitleýin forumyna gatnaşdy.

Çäre Bahreýn döwletinde 2025-nji ýylyň üçünji Aziýa ýaşlar oýunlaryny, 2026-njy ýylda Er-Riýad şäherinde Ýapyk binalarda we söweş sungaty boýunça Aziýa oýunlaryny, 2026-njy ýylda Aiçi we Nagoýa ýapon şäherlerinde geçiriljek XX tomusky Aziýa oýunlaryny geçirmek meselelerini ara alyp maslahatlaşmak üçin Günbatar we Merkezi Aziýanyň 22-den gowrak döwletleriniň Milli olimpiýa komitetleriniň (MOK) wekillerini ýygnady.   

Mundan başga-da, gatnaşyjylar Halkara olimpiýa komitetiniň maksatnamalaryny hem-de 2028-nji ýylda Los-Anjelesde
geçiriljek XXXIV tomusky Olimpiýa oýunlaryna türgenleriň taýýarlygyny ara alyp maslahatlaşdylar. 

Açylyş dabarasynda Täjigistanyň sport ministri Zulfikor Gulahmadzoda çykyş edip, bu forumyň netijeleriniň täze üstünlikler we Olimpiýa hereketiniň çäklerinde netijeli hyzmatdaşlyk üçin berk esas döretjekdigine ynam bildirdi.
 
Forumyň çäklerinde sagdyn durmuş ýörelgelerini wagyz etmek, sporty ösdürmek hem-de bu ägirt uly halkara çäresine gatnaşyjy-wekiliýetleriň arasynda dostlugy pugtalandyrmak maksady bilen “Dostlukly ylgamak” çäresi (“Fun Run”) geçirildi.
 
Forumyň birinji tapgyry Gündogar, Günorta we Günorta-Gündogar Aziýanyň Milli olimpiýa komitetleriniň wekilleriniň gatnaşmagynda Thimphu şäherinde (Butan) geçirildi.

Türkmenistanyň çempiony «Arkadag» futbol kluby AFK-nyň Çagyryş ligasynyň ýarym finalynyň myhmançylykda geçiren ilkinji oýnunda Kuweýtiň «Al-Arabi» futbol klubyndan ýeňlişe sezewar boldy.

El-Kuweýtde geçirilen duşuşyk 2:0 hasabynda meýdança eýeleriniň ýeňşi bilen tamamlandy. Ýeňiji toparyň düzüminde gollary Kristofer Jon (72-nji minutda) we Salman Al Awali (90+4) geçirdiler.

Jogap duşuşygy 16-njy aprelde Arkadagda geçiriler.

Mälim bolşy ýaly, ýarym finala barýan ýolda türkmen kluby Hindistanyň «Ist-Bengal» toparyny 3:1 umumy hasaby bilen ýeňip, çärýek finaly ynamly geçmegi başarypdy. «Al-Arabi» kluby bolsa çärýek finalda iki duşuşygyň jemine görä Omanyň «Al-Sib» toparyny 3:2 umumy hasaby bilen ýeňip, ýarym finala çykypdy.

«Arkadag» futbol kluby 9-njy aprelde El-Kuweýtde Aziýa Futbol Konfederasiýasynyň (AFK-nyň) Çagyryş ligasynyň ýarym final oýnunyň birinji duşuşygyny ýerli «Al-Arabi» kluby bilen geçirer.

Bu toparlar eýýäm şu ýylky Çagyryş ligasynyň toparçalaýyn tapgyrynda duşuşypdylar. 2024-nji ýylyň 1-nji noýabrynda El-Kuweýtde geçirilen oýun 3:2 hasaby bilen meýdança eýeleriniň ýeňşi bilen tamamlanypdy.

Ýarym finala çenli ýolunda türkmen kluby çärýek final oýunlaryny ynamly geçip, Hindistanyň «Ist-Bengal» toparyny jemi 3:1 hasaby bilen ýeňdi. Kalkuttada geçen birinji duşuşykda Wladimir Baýramowyň tälim berýän türgenleri 1:0 hasaby bilen ýeňiş gazanypdylar, Arkadag şäherindäki öz meýdançasynda geçirilen jogap duşuşygynda bolsa bu kluby 2:1 hasaby bilen ýeňipdiler.

«Al-Arabi» iki duşuşygyň jeminde Omanyň «Al-Sib» klubyny 3:2 hasaby bilen ýeňip, ýarym finala çykdy.

Gündogar zolagyndaky beýleki ýarym final duşuşygy 10-njy aprelde Kambojanyň «Prea Han Riç Swaý Rieng« we Indoneziýanyň «Madura Ýunaýted» toparlarynyň arasynda geçiriler.

Çagyryş Ligasynyň ýarym final jogap duşuşyklary 16-njy aprelde Türkmenistanda we 17-nji aprelde Indoneziýada geçiriler. Aziýanyň ähmiýeti boýunça üçünji klublar ýaryşynyň final oýny 2025-nji ýylyň 10-njy maýynda geçirmek meýilleşdirilýär.

«Waşington Kepitalzyň» russiýaly hüjümçisi Aleksandr Oweçkin Milli hokkeý ligasynyň dowamly çempionatlaryndaky 895-nji şaýbasyny geçirip, bu kanadaly rowaýaty hokkeýçi Ueýn Gretskiniň rekordyny täzeledi.

Täze rekord ýekşenbe güni «Nýu-Ýork Aýlenders» bilen oýunda hasaba alyndy. Şol oýunda Oweçkin bir gezek tapawutlanmagy başardy.

«Beýik» (The Great One) lakamy bilen tanalýan Ueýn Gretski özüniň MHL-däki soňky, 894-nji şaýbasyny 1999-njy ýylda geçiripdi. Şondan bäri 26 ýyllap onuň «ebedi» diýlip häsiýetlendirilen rekordyny täzelemek hiç kime başartmady.

5-nji aprelde Aleksandr Oweçkin MHL-iň dowamly çempionatlaryndaky 894-nji şaýbasyny derwezä ýollap, Ueýn Gretskiniň rekordyny gaýtalapdy. Indi bolsa bu rekord russiýaly hokkeýçä degişli.

Türkmenistanyň Prezidenti Serdar Berdimuhamedow 7-nji aprelde ýurtda Bütindünýä saglyk güni mynasybetli geçirilen köpçülikleýin welosipedli ýörişe gatnaşdy. Ýöriş Aşgabadyň günorta böleginde — Köpetdagyň ajaýyp dag etegi boýunça uzaýan Saglyk ýolunyň başlanýan ýerinde badalga aldy. Bu barada Türkmenistanyň Döwlet habarlar agentligi ýazýar.

Bellenilişi ýaly, welosipedli ýörişe Hökümet agzalary, Mejlisiň, ministrlikleriň, pudaklaýyn dolandyryş edaralarynyň, harby we hukuk goraýjy edaralaryň, Aşgabat şäheriniň häkimliginiň, jemgyýetçilik guramalarynyň, köpçülikleýin habar beriş serişdeleriniň, ýokary okuw mekdepleriniň ýolbaşçylary, Türkmenistanyň Halk Maslahatynyň, Mejlisiň wekilleri, daşary döwletleriň we halkara guramalaryň diplomatik wekilhanalarynyň ýolbaşçylarydyr işgärleri, Döwletliler köşgünde terbiýelenýänler, Ýaş olimpiýaçylary taýýarlaýan mekdebiň hem-de umumybilim berýän mekdepleriň okuwçylary, welosport boýunça Türkmenistanyň ýygyndy toparynyň türgenleri, talyplar, jemgyýetçilik wekilleri gatnaşdylar.

Ir bilen hemmeler uly ruhubelentlikde Prezident Serdar Berdimuhamedowy mübäreklediler. Sungat ussatlary Bütindünýä saglyk güni mynasybetli ajaýyp aýdym-sazly çykyşlary ýerine ýetirdiler.

Döwlet Baştutany köpçülikleýin welosipedli ýörişe badalga berip, oňa gatnaşyjylaryň hatarynyň öňüni çekdi. Türkmenistanyň Prezidentiniň göreldesine eýerip, dabara gatnaşyjylaryň ählisi Saglyk ýolunyň ýanyndan Aşgabadyň giň şaýollary boýunça uzaýan ugur bilen sazlaşykly hereket edip başladylar.

Welosipedli ýörişiň dowamynda döwlet Baştutany Ministrler Kabinetiniň Başlygynyň oba hojalyk toplumyna gözegçilik edýän orunbasary T.Atahallyýewe ýurtda ekologik abadançylygy mundan beýläk-de gowulandyrmak hem-de tokaý zolaklaryny yzygiderli giňeltmek maksady bilen toplumlaýyn we uzak möhletleýin wezipeleri öz içine alýan Milli tokaý maksatnamasynyň çäklerinde ýerine ýetirilýän işleriň barşyny hemişe gözegçilikde saklamagy tabşyrdy. Şeýle-de Ministrler Kabinetiniň Başlygynyň Aşgabat şäherine gözegçilik edýän orunbasary B.Annamämmedowa paýtagty mundan beýläk-de abadanlaşdyrmak, onuň ekologik abadançylygyny üpjün etmek, bagy-bossanlyga büremek, şäheriň ýaşaýjylarynyň sport we bedenterbiýe bilen meşgullanmaklary üçin amatly şertleri döretmek boýunça alnyp barylýan işleri gözegçilikde saklamak barada tabşyryklary berdi.

Welosipedli ýörişe gatnaşýanlaryň hatary Aşgabadyň ajaýyp ýollary — Arçabil we Bitarap Türkmenistan şaýollary boýunça hereketini dowam etdi.

Ýörişiň geçýän ýolunda döredijilik toparlarynyň ýerine ýetirmeginde ajaýyp kompozisiýalar ýaýbaňlandyryldy. Ýörişiň dowamynda Türkmenistanyň Prezidenti işjeň we sagdyn durmuş ýörelgelerine eýermekde hemmelere görelde bolup, hemişe bolşy ýaly, ýokary beden hem-de sport taýýarlygyny görkezdi.

Bütindünýä saglyk güni mynasybetli köpçülikleýin welosipedli ýöriş şäheriň merkezi böleginde — Ruhyýet köşgüniň ýanynda tamamlandy. Döwlet Baştutany bu ýerde welosipedli ýörişe gatnaşyjylara ýüzlenip, halk köpçüligini, aýratyn-da, ýaşlary mundan beýläk-de bedenterbiýe, sport bilen yzygiderli meşgullanmaga çekmek, jemgyýetde sagdyn durmuş ýörelgelerini berkitmek boýunça toplumlaýyn işleri dowam etdirmegiň zerurdygyny nygtady. Şunda Türkmenistanyň Prezidenti sporty ösdürmegiň beden taýdan sagdyn, giň dünýägaraýyşly, maksada okgunly ýaş nesilleri kemala getirmegiň aýrylmaz bölegi bolup durýandygyna ünsi çekdi.

Ministrler Kabinetiniň agzalary ýurtda giňden bellenilýän Bütindünýä saglyk güni mynasybetli Türkmenistanyň Prezidentine hem-de Halk Maslahatynyň Başlygyna gutlaglaryny beýan etdiler.