"Türkmenistanyň iki gezek çempiony bolan «Arkadag» futbol topary ýeňişlerini dowam etdirýär.

Ýokary liganyň klublary arasynda ýurduň çempionatynyň 29-njy tapgyrynyň yza süýşürilen oýnunda Wladimir Baýramowyň şägirtleri «Ahaly» 2:1 hasaby bilen ýeňdi. Oýun paýtagtyň «Nisa» stadionynda geçirildi.

Milli çempionatyň tamamlanmagyna bäş tapgyr galanda Türkmenistanyň çempiony adyny ikinji ýyl yzly-yzyna gazanan «Arkadag» topary üçin bu oýun turnir ähmiýetine eýe bolmasa-da, kümüş medallar ugrunda göreşýän «Ahal» üstünlik gazanan ýagdaýynda wise-çempionlyga dalaş edýän «Altyn asyr» topardan 3 utuk öňe geçip bilerdi.

Ilkinji ýarymda hiç bir topar üstünlik gazanyp bilmedi. Oýnuň ikinji ýarymy başlan badyna, hereket edýän çempion 47-nji minutda Begenç Akmämmedowyň ýerine ýetiren 11 metrlik jerime urgusy bilen öňe geçdi. Milli çempionatyň häzirki möwsüminde 16-njy goluny geçiren Akmämmedow bombardirleriň üçlügine girdi.

90-njy minutda «Ahal» Ýagşysähet Döwletgeldiýewiň goly bilen hasaby deňledi. Esasy wagta goşulan 4-nji minutda Şamämmet Hydyrow «Ahalyň» derwezesine ikinji goly geçirip, toparyna ýeňiş getirdi – 2:1.

Bu ýeňiş, geçen ýyl döredilen bu futbol kluby üçin ýokary ligadaky 50-nji we häzirki milli çempionatda 26-njy ýeňşi boldy. 26 oýunda topar 126 gol geçirip, 19 gol goýberdi we iň ýakyn yzarlýanlar – «Altyn asyr» we «Ahaldan» 26 utuk öňe geçdi.

Türkmenistanyň iki gezek çempiony bolan «Arkadag» ikinji ýeňşini Dubaýda «Al-Hamriýa» klubuna garşy dostluk oýnunda gazandy – 2:1. Bu oýun AFK-2024/25 Çagyryş ligasyna – Aziýanyň üçünji derejeli klub ýaryşyna taýýarlyk çäginde geçirildi. Bu ýaryşa geografik taýdan iki zolak – Günbatar we Gündogar boýunça paýlanan 18 topar gatnaşar. Biziň toparymyza ýeňiş getiren gollary Arslanmyrat Amanow (70-nji minut) we Şanazar Tirkisow (90+2) geçirdi.

AFK-2024/25 Çagyryş ligasynyň bije çekilişiniň netijelerine görä, «Arkadag» «B» toparyna düşdi, onuň garşydaşlary Maldiwleriň «Maziýa Sports and Recreation», Gyrgyzystanyň «Abdyş-Ata» we Kuweýtiň «Al-Arabi» futbol klublary bolar. Ähli oýunlar Kuweýtde geçiriler. «Arkadag» ilkinji oýnuny 26-njy oktýabrda «Maziýa» klubyna garşy geçirer. Soňra Türkmenistanyň iki gezek çempiony 29-njy oktýabrda «Abdyş-Ata» bilen oýnar we toparlaýyn ýaryşy 1-nji noýabrda «Al-Arabi» bilen oýun bilen tamamlar.

Toparlaýyn tapgyryň netijelerine görä, çärýek finala sekiz topar çykar: Günbatar zolagynda üç topar ýeňijisi we ikinji orunlaryň arasynda iň gowusy, şeýle hem Gündogar zolagynyň her toparyndan iki iň gowy topar.