16-njy noýabrda Aşgabat şäherindäki Gyşky oýunlar sport toplumynda ýaýdan nyşana ok atmak boýunça höwesjeňler ýaryşy geçirildi, oňa metbugat ulgamynyň wekilleri – habarçylar, fotohabarçylar we meşhur bloglaryň awtorlary gatnaşdylar.

Türkmenistanyň Milli Ýaý atyjylyk federasiýasynyň howandarlygynda ýoldaşlyk ýaryşy sportuň bu görnüşini ýaşlaryň arasynda wagyz etmäge gönükdirildi. Iki topara bölünen ýaryşa gatnaşyjylar ussat ýaýdan ok atyjylardan sapak alyp, ýaryşa jogapkärçilikli girişdiler.

Ýaryş üç tapgyrdan ybaratdy. Birinji tapgyrda oňa gatnaşyjylar dürli reňkli tegelek kagyz nyşanlara ok atdylar. Ikinji tapgyrda mergenleriň wezipesi çylşyrymlaşýar, indi olar top görnüşindäki göwrümli nyşanlara ok atmalydylar. Ahyrky tapgyrda uzak aralykdan ullakan nyşana ok atyldy.

Ýaryşyň dowamynda toparlar gezekli-gezegine öňe saýlandylar. Netijede çekeleşikli göreşde habarçylar we fotohabarçylar topary ýeňiş gazandy. Ýeňijilere ýaryşyň hemaýatkärleri – «Älem Sport», «Çopan» we «Resmi Kepil», şeýle hem ýaryşyň guramaçylarynyň höweslendiriji baýraklary gowşuryldy.

Türkmenistanyň Milli Ýaý atyjylyk federasiýasynyň başlygy Wepa Sähedow ýaryşa gatnaşyjylary üstünlikleri bilen gutlady, «Pähim-paýhas ummany Magtymguly Pyragy» şygary ýylynda geçirilen ýaryşda ýeňşiň ähmiýetini aýratyn belledi.

Ýaryş ýaýdan nyşana ok atmak sportunyň ösmegine we metbugat bileleşiginiň özara gatnaşyklary berkitmäge ýardam eden şanly waka boldy.

Ýaryşyň guramaçysy Şirin Žožiýewa:

– Sportuň iň gyzykly görnüşleriniň biri bolan ýaýdan nyşana ok atmagy öwrenmek isleýänler üçin gapymyz mydama açyk. Sportuň bu görnüşi bilen meşgullanmaga hiç wagt giç däl. Islendik ýaşda gelibem gowy netijeler gazanyp bolar. Ýaýdan nyşana ok atmak kaddyňy dikeldýär, mergenligi we ünslüligiňi ösdürýär – diýdi.

Anyk maglumatlar Milli Ýaý atyjylyk federasiýasynyň resmi saýtynda berlendir.