Türkmen türgenleri Germaniýanyň Chemnitz şäherinde geçirilen «Chemnitz Open 2024» karate-do ýaryşynda 45 medal gazandylar.

Ýaryşa 5 ýurtdan 953 türgen gatnaşyp, dürli ýaş toparlarynda kata (formal maşklary görkezmek) we kumite (döwüş) ugurlarynda güýç synanyşdylar. Türkmenistanyň toparynyň düzümine 18 türgen, 7 emin we 2 tälimçi girýär, diýip «Türkmenistan: Altyn asyr» habar berýär.

Programmanyň ähli görnüşleriniň netijeleri boýunça türkmen türgenleriniň hasabynda 21 altyn, 12 kümüş we 12 bürünç medal bar. Bu görkezijiler bilen türkmen karateçileri medallar sanawynda Germaniýanyň wekillerinden (97 altyn, 102 kümüş we 190 bürünç medal bilen) soň ikinji orny eýelediler. Türkmenistanyň toparyndan yzyndan Polşanyň (1 altyn, 3 kümüş we 2 bürünç bilen), Çehiýanyň (1 kümüş we 1 bürünç bilen) we Nepalyň (2 bürünç bilen) türgenleri galdy.

Neşiriň bellemegine görä, türkmen toparynyň üstünlik gazanmagyna iň uly goşant goşanlar: Allanur Ýalkabow (3 altyn), Öwezmyrat Sapadurdyýew (2 altyn we 2 kümüş), Rasul Atajanow (2 altyn, 1 kümüş we 2 bürünç), Magtymguly Annaýew (2 altyn, 1 kümüş we 1 bürünç), Garamämmet Garamämmedow (2 altyn we 2 bürünç) we Daýanç Keletliýew (1 altyn, 1 kümüş we 1 bürünç).

Türkmen karateçileri bu ýaryşda milli ýygyndynyň baş tälimçisi Aýdyn Çaryýew we onuň kömekçisi Baýram Ýalkabow ýolbaşçylygynda çykyş etdiler. Olaryň ýakyn meýilnamalarynda 4-8 dekabr aralygynda Italiýanyň Adratik deňziniň kenaryndaky Ýezolo şäherinde geçiriljek «Ýaşlar ligasy karate1» halkara ýaryşyna gatnaşmak bar.

Geljekki ýaryşlar diňe bir medallar üçin däl, eýsem 2026-njy ýylyň 31-nji oktýabryndan 13-nji noýabry aralygynda Senegalyň paýtagty Dakarda geçiriljek IV tomusky Ýaşlar Olimpiýa oýunlaryna gatnaşmak üçin reýting baly üçin hem örän möhümdir.