FIFA-nyň Prezidenti Jianni Infantino Türkmenistanyň Futbol Federasiýasynyň ýolbaşçysy Guwançmuhammet Öwekow bilen duşuşdy. Duşuşykda taraplar Türkmenistanda futbolyň ösmegi we Federasiýanyň geljekki taslamalaryna FIFA-nyň goldawy barada pikir alyşdylar.

Duşuşygyň çäklerinde Türkmenistanyň Futbol Federasiýasynyň ýolbaşçysy Infantino ýörite sowgat el işleme türkmen halysyny gowşurdy.

"Türkmenistanyň Futbol Federasiýasynyň ýolbaşçysy Guwanç Öwekow bilen duşuşmak we onuň ýurdunyň futbolyny ösdürmek üçin edýän ajaýyp işleri barada bilmek hoş boldy. Biz geljekki ösüş taslamalaryny we FIFA-nyň prezident Öwekowy we onuň toparynyň Türkmenistanda futboly ösdürmek meýilnamalaryny nädip goldap biljekdigini ara alyp maslahatlaşdyk" diýip, Infantino öz sosial ulgamlarynda ýazdy.

Türkmenistanyň Futbol Federasiýasynyň ýolbaşçysy Guwançmuhammet Öwekowyň ýolbaşçylygyndaky türkmen wekiliýeti Kataryň paýtagtyna iş saparyny amala aşyryp, futbolyň ösmegi boýunça birnäçe möhüm duşuşyk geçirdi.