Türkmenistanyň çagalar we ýetginjekler arasynda geçirilen klassiki, çalt (rapid) we ýyldyrym (blits) küşt boýunça birinjilige 350-den gowrak mekdep okuwçysy gatnaşdy. Bäsleşikler 16-njy dekabrdan 22-nji dekabra çenli paýtagtyň ýöriteleşdirilen küşt we şaşka mekdebinde geçirildi. Bäsleşikler 7, 9, 11, 13, 15 we 17 ýaşly toparlarda, şweýsar ulgamyna görä 9 tapgyrda gurnaldy.

Bäsleşiklere Aşgabat, Arkadag, Ahal, Lebap, Mary we Daşoguz welaýatlaryndan türgenler gatnaşdy. Şeýle hem ilkinji hususy hünärmen küşt akademiýasy "Küşt Älemi" topary ilkinji gezek hasaba alyndy.

Türkmenistanyň Küşt Federasiýasynyň metbugat gullugynyň bellemegine görä, Lebap sebitiniň wekilleri iň gowy çykyş edip, mümkin bolan 108 medalyň 67-sini gazanyp, umumy toparlaýyn hasapda birinji orny eýelediler. Olaryň 27-si altyn medal boldy.

Medal hasabynda ikinji orny Aşgabatly mekdep okuwçylary eýeledi, olar 15 medal gazandylar, olaryň 4-si altyn. Üçünji orny Mary topary eýeledi, olaryň hem 15 medaly bar, ýöne diňe ikisi altyn. Soňra ýurduň ilkinji hususy akademiýasy "Küşt Älemi" (6 medal, 2 altyn), Daşoguz welaýatynyň wekilleri (4 medal, 1 altyn) we Ahalyň wekilleri (ýekeje bürünç) ýerleşdi.

"Çagalar-ýetginjekler bäsleşiginiň ýeňijilerine kuboklar, medallar we diplomlardan başga-da, ýaryşyň hemaýatkärleri bolan Ynamdar bazary, “Resmi Kepil” ätiýaçlandyryş kompaniýasy, “Innovapak” plastik önümler öndürijisi, “Küşt Älemi” küşt akademiýasy, “ImdatBot” robot tehnologiýa merkezi, “ALSAT” bazary we “Orient” media platformasy tarapyndan gymmatly sowgatlar gowşuryldy".

Şeýle hem 2025-nji ýylda Türkmenistanyň Küşt Federasiýasynyň tutuş ýurt boýunça 30-dan gowrak ýaryş geçirip, 100-den gowrak medal toplumy bilen sylaglamagy, şeýle hem her sebitiň özünde gurnalan Gran-pri ýaryşlarynyň täze tapgyryny gurnamagy meýilleşdirýändigi bellenilýär.