«Milan» futbol kluby Italiýanyň Superkubogy ugrunda geçirilen duşuşykda «Inter» klubuny 3:2 hasabynda ýeňip, kubogy eýeledi. Derbi duşuşygy duşenbe güni Saud Arabystanynyň Er-Riýad şäherinde geçirildi.

«Rossoneri» iki gol yza galandygyna garamazdan oýny öz peýdasyna öwürmegi başardy we klubyň täze baş tälimçisi Seržiu Konseýsaunyň ýolbaşçylygynda ilkinji kubogy gazandy.

Duşuşyk «Milan» üçin şowsuz başlady – arakesmeden öň Lautaro Martines «Interi» öňdelige geçirdi, duşuşygyň ikinji ýarymynyň başynda bolsa Mehdi Taremi «neradzurriniň» tapawudyny iki esse artdyrdy. Emma «rossoneri» bu ýagdaýa razy bolmady we hüjümlerini barha güýçlendirip başlady. Teo Hernandes 52-nji minutda tapawudy azaltdy, esasy wagtyň tamamlanmagyna on minut galanda bolsa Kristian Pulişiç hasaby deňlemegi başardy. Oýnuň ykbaly goşmaça wagtda — Temmi Abraham ýeňiş goluny geçirende çözüldi.

«Milan» üçin bu ýeňiş aýratyn ähmiýetli boldy – klub öz taryhynda sekizinji Superkubogyny we 2016-njy ýyldan bäri ilkinji kubogyny gazandy. Bellemeli ýeri, bu üstünlik klubyň täze baş tälimçisi Seržiu Konseýsaunyň ýolbaşçylygyndaky diňe ikinji duşuşykda gazanyldy.