Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Prezidenti Serdar Berdimuhamedowy ýurduň Garaşsyzlygynyň 33 ýyllygy mynasybetli Halk Maslahatynyň adyndan gutlady.

"Türkmenistan" gazetinde çap edilen gutlagynda Halk Maslahatynyň Başlygy şeýle belleýär:

"Çuňňur hormatlanylýan Türkmenistanyň Prezidenti!

Sizi «Pähim-paýhas ummany Magtymguly Pyragy» ýylynda uly zähmet üstünlikleri bilen garşylanýan Türkmenistanyň Garaşsyzlygynyň 33 ýyllygy mynasybetli Türkmenistanyň Halk Maslahatynyň adyndan tüýs ýürekden gutlaýaryn. Siziň janyňyzyň sag, ömrüňiziň uzak bolmagyny, Garaşsyz, hemişelik Bitarap Watanymyzyň içeri we daşary syýasatyny ösdürmekde alyp barýan döwletli işleriňizde uly üstünlikleri arzuw edýärin.

Hormatly Prezidentimiz!

Siziň parasatly baştutanlygyňyzda Berkarar döwletiň täze eýýamynyň Galkynyşy döwründe bagtyýarlykda ýaşaýan halkymyz mukaddes Garaşsyzlygymyzyň 33 ýyllyk baýramyny dabaraly çärelere besläp, uludan toýlaýar, ajaýyp üstünlikler hem-de möhüm ähmiýetli wakalar bilen şöhratlandyrýar.

Garaşsyzlyk ata-babalarymyzyň özbaşdak döwlet bolmak baradaky arzuwlarynyň amala aşmagyna, köpasyrlyk milli we ruhy gymmatlyklarymyzy dikeltmäge mümkinçilik berdi. Pederlerimiziň ýürek arzuwy bolan mukaddes Garaşsyzlygymyzyň miwelerini görmek ähli halkymyz üçin bagtyýarlykdan nyşandyr. Taryh üçin gysga döwürde ösüşiň belent sepgitlerine ýeten Türkmenistanda beýik akyldar şahyrymyz Magtymguly Pyragynyň berkarar döwlet gurmak barada eden arzuwlary hasyl boldy. Ýurdumyzda amala aşyrylýan giň gerimli özgertmeler, toplumlaýyn işler garaşsyz ösüşimiziň taryhy sene ýazgysyna aýratyn many-mazmun, öwüşgin berýär.

Belent mertebeli Prezidentimiz!

Siziň baştutanlygyňyzda täze taryhy döwürde geljekki ösüşlerimiziň kepili bolan döwlet maksatnamalary üstünlikli durmuşa geçirilýär. «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyny», beýleki milli we döwlet maksatnamalaryny amala aşyrmakda halkymyz el-ele berip, hormatly Prezidentimiz, Siziň daşyňyza jebisleşip, belent maksatlary nazarlap, ynamly öňe barýar.

Garaşsyz ýurdumyzda ylym-bilim, oba hojalyk, ulag-aragatnaşyk, medeniýet, saglygy goraýyş we beýleki ulgamlarda alnyp barylýan sazlaşykly işleriň, gazanylýan ösüşleriň şaýady bolýarys. Günsaýyn gözelleşip, ak mermere beslenýän Aşgabadyň, sebitde ilkinji «akylly» şäher bolan Arkadag şäheriniň, beýleki şäherlerdir obalaryň nurana keşbi Garaşsyzlyk bilen galkynan halkymyzyň bir supranyň başynda jem bolup, bir döwlete gulluk edende beýik işleri amala aşyrmaga ukyplydygyna şaýatlyk edýär. Döwrebap binadyr desgalar, ýoldur köprüler ýurdumyzyň şöhratly gadamlarynyň bedew badyny alamatlandyrýar.

Sarpasy belent Prezidentimiz!

Siziň baştutanlygyňyzda hemişelik Bitarap Watanymyz sebitde we dünýäde ählumumy parahatçylygy, howpsuzlygy, durnukly ösüşi üpjün etmäge goşant goşýan döwlet hökmünde uly abraýa eýe bolýar. Birleşen Milletler Guramasynyň Baş Assambleýasynyň 79-njy sessiýasynda Türkmenistanyň ileri tutýan garaýyşlarynyň beýan edilmegi, türkmen-owgan serhedinde Arkadagyň ak ýoly bilen Serhetabat — Hyrat gaz geçirijisiniň, elektrik, ulag-aragatnaşyk ulgamlarynyň gurluşygyna badalga berilmegi, Siziň Astana şäherinde geçirilen «Merkezi Aziýa — Germaniýa» sammitindäki öňe süren teklipleriňiz ählumumy howpsuzlygyň, özara bähbitli, deňhukukly hyzmatdaşlygyň berkidilmegine gönükdirilen netijeli başlangyçlaryňyzyň dünýä jemgyýetçiliginde giň goldawa eýe bolýandygyny görkezýär.

Hemişelik Bitarap, asuda, parahat ýurtda agzybir ýaşaýan, döredýän we gurýan türkmen halkynyň maksatlary mydama bagta rowana bolýar. Bu ajaýyp taryhy eýýamda, hormatly Prezidentimiz, Siziň «Watan diňe halky bilen Watandyr! Döwlet diňe halky bilen döwletdir!» diýen ynsanperwer syýasatyňyzy Ýer ýüzünde dabaralandyrýan Garaşsyz, baky Bitarap Türkmenistanyň röwşen geljegine bolan synmaz ynam her bir türkmenistanlyny döredijilikli, halal zähmete ruhlandyrýar.

Hormatly Prezidentimiz!

Sizi berkarar döwletimiziň baş baýramy bolan Garaşsyzlygyň 33 ýyllygy mynasybetli Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Size berk jan saglyk, uzak ömür, eziz Watanymyzyň mundan beýläk-de gülläp ösmegi ugrunda alyp barýan tutumly işleriňizde uly üstünlikleri arzuw edýärin".

Türkmen ýarym goragçysy Ruslan Mingazow Gonkong Premýer-ligasynyň 4-nji tapgyrynyň oýnunda iki gol pasy berdi, bu oýunda «Kitçi» «Koulun Siti» toparyny 6:1 hasaby bilen ýeňdi.

2022-nji ýylyň mart aýyndan bäri «Kitçi» toparynda çykyş edýän 32 ýaşly Mingazow, Gonkong çempionatynyň täze möwsüminde dört oýun geçirdi, şolarda 1 gol geçirip, 6 gol pasy berdi. Onuň klub bilen şertnamasy 2025-nji ýyla çenli dowam eder.

Bu ýeňişiň netijesinde «Kitçi» 8 utuk bilen turnir tablisasynda birinji orna çykdy.

20 ýaşlylar üçin Türkmenistanyň ýaşlar futbol ýygyndysy Aziýa kubogy-2025 saýlama tapgyrynyň ilkinji oýnunda Ýaponiýanyň ýaşlar ýygyndysyna utuldy.

Türkmenistanyň ýygyndysy Mýanma, Ýaponiýa we ýaryşyň eýesi bolan Gyrgyzystanyň toparlary bilen bilelikde "I" toparyna düşdi.

Ilkinji oýunda Türkmenistan Ýaponiýa bilen duşuşdy. Oýun türkmenleriň 0:2 hasaby bilen ýeňlişi bilen tamamlandy. Ýeňijileriň düzüminde hüjümçi Soma Kanda iki gol geçirdi.

Türkmenistan ýaryşdaky indiki oýnuny 27-nji sentýabrda Gyrgyzystana garşy geçirer. Türkmenler üçin saýlama ýaryş 29-njy sentýabrda Mýanma garşy oýun bilen tamamlanar.

Türkmenistanly türgen Anamjan Rustamowa Ispaniýanyň Leon şäherinde geçirilýän Agyr atletika boýunça ýaşlaryň arasyndaky dünýä çempionatynda silterläp götermekde kiçi bürünç medala mynasyp boldy. Ol 81 kilograma çenli agram derejede ýaryşa gatnaşyp, silterläp götermekde 103 ilogram netije görkezdi hem-de üçünji orny eýeledi.

Anamjan Rustamowa iki görnüşiň jemi boýunça 230 kilogramlyk netije bilen dördünji orundan ýer aldy. Itekläp götermekde bolsa ol 127 kilogramlyk daşy galdyryp, bäşinji ýeri eýeledi.

Bu agram derejesinde birinji ýer 233 kilogram (100+133) netije görkezen ermenistanly Emma Pogosýana, ikinji orun bolsa ondan bir kilogram (104+128) yzda galan meksikaly Wanesse Ernandese nesip etdi. Hormat münberiniň üçünji basgançagyndan iki görnüşiň jemi boýunça 231 kilogram (104+127) netije gazanan eýranly Ýekta Jamali ýer aldy.

Ýeri gelende bellesek, dünýä çempionatyna 67 ýurtdan 350-den gowrak türgen gatnaşýar. Turnirde Türkmenistana Anamjan Rustamowa bilen bilelikde Şahzadbek Matýakubow wekilçilik edýär. Ol şu gün 102 kilograma çenli agram derejede öz güýjüni synar.

Budapeştde (Wengriýa) tamamlanan 45-nji Bütindünýä küşt olimpiadasynda türkmen türgenleri 11-nji tapgyrda Şweýsariýa düzgüni boýunça 188 erkekler we 169 zenanlar toparlarynyň bäsleşen dünýä küşt olimpiadasynda dünýä görkezijisinde täze derejä çykdylar. Olar ortaça görkezijä görä bäş ugra bölündi.

Türkmenistanyň 73-nji belgide ýaryşa gatnaşan erkekler we zenanlar toparlary öz ugurlarynda birinji orny eýeläp, kiçi altyn medallara mynasyp boldular. Erkekler «B» toparçada 15 utuk bilen 14 utuk toplan degişlilikde Latwiýanyň we Gazagystanyň toparlaryny ikinji we üçünji orunda galdyryp, toparçada ýeňiş gazandylar. 14 utuk toplan zenanlarymyz «C» toparçada Malaýziýa toparyndan (14 utuk) we 13 utuk bilen ilkinji üçlüge düşen Şri-Lankanyň küştçilerinden öňe saýlandylar.

Ýaryşyň ahyrynda singapurly (45-nji belgili) – 3:1 we ysraýylly (20-nji belgili) garşydaşlaryndan 2.5:1.5 hasabynda yzly-yzyna iki ýeňiş gazanan Türkmenistanyň erkekler ýygyndy topary umumy sanawda 24-nji orny eýeledi. Zenanlar toparymyz soňky tapgyrda Horwatiýanyň milli ýygyndysyny (40-njy belgili) 2.5:1.5 hasabynda ýeňip, 32-nji orny eýeledi. Ol Bütindünýä küşt olimpiadasynda ýurdumyzyň küştçüleriniň gazanan iň gowy netijesidir.

Halkara grossmeýsterleri bolan Wýetnamyň, Eýranyň, Bolgariýanyň, Latwiýanyň, Gazagystanyň, Şwesiýanyň, Awstriýanyň we beýleki ýurtlaryň toparlarynyň Türkmenistanyň erkekler ýygyndy toparyndan yza galandygyny aýtmak gerek. Ýaş gyzlarymyz Italiýanyň, Awstraliýanyň, Eýranyň, Sloweniýanyň, Çehiýanyň, Belgiýanyň, Norwegiýanyň tanymal we beýleki ençeme toparlardan öňe saýlandylar.

Türkmenistanyň Küşt federasiýasynyň baş sekretary Mergen Kakabaýewiň aýtmagyna görä, türkmen toparlarynyň görlüp-eşidilmedik bu üstünligi oglanlaryň we gyzlaryň agzybirligi bilen baglanyşyklydyr.

M.Kakabaýew: «Zerur wagty toparyň her oýunçysy oýnuň ahyryna çenli jan edip oýnady we her pursatdan aňryçäk peýdalandy» – diýdi.

Munuň mysal edip 11-nji tapgyry görkezse bolar, onda erkekleriň arasynda Ysraýylyň topary bilen we zenanlaryň arasynda Horwatiýa topary bilen 1.5:1.5 hasabynda deňme-deň oýnunda Allaýar Şirliýewiň we Jahan Rejebowanyň «B» we «C» toparçalarda kiçi altyn medallaryň ykbaly çözülýärdi.

Allaýar Şirliýew 2010-njy ýyldaky Olimpiýa oýunlarynyň bürünç medalynyň eýesi, tanymal halkara grossmeýsteri Ilýa Smirine, 1915 görkezijisi bolan Jahan Rejebowa 2134 görkezijili FIDE ussady Patrisiýa Wuýnowiçe garşy oýnadylar. Oýnuň deňeçerligine we deň gutarmak ähtimallygyna garamazdan deň oýna kaýyl bolmadyk A.Şirliýew we J.Rejebowa has tejribeli garşydaşlaryny gysaja saldylar, netijede toparlarymyz öz toparçasynda birinji orny eýelediler.

Erkekler toparynda 39 ýaşly halkara grossmeýster Meýlis Annaberdiýew (2-nji tagtada) has gowy netije görkezdi, ol mümkin bolan 11 utukdan 7 utuk toplady. 25 ýaşly halkara ussady Saparmyrat Atabaýew (1-nji tagtada) ondan ýarym az utuk gazandy. 18 ýaşly Amanmuhammet Hommadow 3-nji tagtada mümkin bolan 10 utukdan 5 utuk, ýurdumyzyň çempiony 21 ýaşly Allaýar Şirliýew (4-nji tagta) mümkin bolan 8 utukdan 4,5 utuk, we 4-nji tagtada 19 ýaşly Wepaly Hallynyýazow mümkin bolan 4 utukdan 3,5 utuk topladylar.

17 ýaşly ätiýaçdaky oýunçymyz Eneş Arazmedowa zenanlar toparynda 100 göterim netije görkezip, 4-nji tagtada 5 oýunda 5 ýeňiş gazandy. Türkmenistanyň 18 ýaşly çempiony Merýem Agajanowa (2-nji tagtada) 10 oýunda 6 utuk gazandy. 17 ýaşly Leýla Şöhradowa (3-nji tagtada) we 14 ýaşly Jahan Rejebowa (4-nji tagtada) degişlilikde 10 we 9 oýunda 5,5 utuk, ýurdumyzyň 18 ýaşly wise-çempiony Lala Şöhradowa (1-nji tagtada) mümkin bolan 10 utukdan 5 utuk topladylar.

Tutuş ýaryşyň barşynda erkekler toparynyň tälimçisi, Türkmenistanyň at gazanan tälimçisi Serdar Annaberdiýewiň, zenanlar toparynyň tälimçisi, sport ussatlygyna kandidat Şahruh Turaýewiň we wekiliýetiň ýolbaşçysy FIDE-niň ussady Mergen Kakabaewiň oýunçylar bilen arman-ýadamany işländigini bellemek gerek. Tejribeli hünärmenler her oýundan öň her garşydaşyň başlangyç tilsimine we oýna garaýşyna çenli her küştçini teoretik hem psihologik taýdan gowy taýýarladylar. Ýaryşyň kyn pursatynda görnükli garşydaşlary bilen aýgytly duşuşyklardan öň ýaş oýunçylaryň ynamyny ýokarlandyrmak üçin ussat psiholog işe çekildi.

Hindistanyň topary erkekleriň arasynda ýaryşda degişlilikde 2-nji we 3-nji orny eýelän ABŞ-nyň we Olimpiadanyň öňki çempionlary Özbegistanyň toparlaryny ýeňip, çempion boldy. Zenanlaryň arasynda hem olar Gazagystanyň (2-nji orun) we ABŞ-nyň (3-nji orun) wekillerinden öňe geçip, hormat münberiniň ýokarky basgançagyna çykdylar.

Indiki, 46-njy Bütindünýä küşt olimpiadasy 2026-njy ýylda Özbegistanda geçiriler. Budapeştde ýeňijilere we baýrakly orunlary eýelänlere sylag gowşurylyş dabarasynda FIDE-niň başlygy Arkadiý Dworkowiç 1-nji tagtada Olimpiadada kümüş medal gazanan özbek toparynyň lideri Nodirbek Abdusattorowa ýaryşyň baýdagyny we alawyny gowşurdy.

Türkmenistanyň U-20 ýaşlar ýygyndysynyň baş tälimçisi Döwletmyrat Annaýew, Aziýa Kubogy-2025-iň saýlama ýaryşynyň öňüsyrasynda, toparyň taýýarlygy we Ýaponiýa, Gyrgyzystan we Mýanma bilen topardaky mümkinçilikleri barada gürrüň berdi. 

Topar CAFA çempionatyna we Ispaniýada hem-de Daşkentde geçirilen ýoldaşlyk duşuşyklaryna gatnaşdy. Tälimçi toparyň geljegine optimist garap, ýaşlar ýygyndysynyň Türkmenistanyň futbolynyň geljegi üçin möhümdigini belledi. 

Şeýle hem, Türkmenistanyň Futbol federasiýasyna we Döwlet sport komitetine goldawlary üçin minnetdarlyk bildirdi. 

25-nji sentýabrda, Aşgabat wagty bilen 14:00-de, ýaşlar ýygyndysy Ýaponiýa bilen duşuşar.

2024-nji ýylyň 22-23-nji sentýabrynda Ankara şäherinde Türkmenistanyň Türkiýe Respublikasyndaky Ilçihanasynyň hem-de Türki medeniýetiniň halkara guramasynyň (TÜRKSOÝ) bilelikde gurnamagynda Türkmenistanyň Garaşsyzlygynyň 33 ýyllygy mynasybetli küşt boýunça bäsleşigi geçirildi.

«Gökyay» Gaznasynyň küşt muzeýiniň binasynda geçirilen küşt ýaryşyna daşary ýurt diplomatik wekilhanalarynyň wekilleri we maşgalalarynyň agzalary, küşt oýunyň muşdaklary we köpçülikleýin habar beriş serişdeleriniň wekilleri gatnaşdy.

Şeýle hem, çäräniň çäklerinde Magtymguly Pyragynyň eserleriniň, türkmen halkynyň baý medeni mirasyny, taryhyny we däp-dessurlaryny beýan edýän sergi guraldy.

«Altyn Asyr» toparynyň hüjümçisi Mihail Titow Türkmenistanyň ýokary ligasynyň soňky 4 oýnunda 5 gol geçirdi. Düýn Titow çempionatyň 25-nji tapgyrynyň çäginde «Köpetdag» toparyna garşy oýnuň 62-nji minutynda tapawutlanyp, toparyna 3:0 hasabynda ýeňiş gazanmaga kömek etdi.

Mundan ozal, 26 ýaşly hüjümçi «Nebitçi» bilen oýunda iki gol geçirip, «Şagadam» we «Merw» toparlaryna garşy oýunlarda bir gol geçirdi.

Mundan başga-da, Titow AFK-nyň ikinji Çempionlar ligasynyň saýlama tapgyrynda «East Bengal» toparyna garşy oýunda bir gol geçirip, «Altyn Asyr» toparynyň 3:2 hasabynda ýeňiş gazanmagyna goşant goşdy.

Türkmenistandan bolan ýarym goragçy, «Kitçi» klubynyň oýunçysy Ruslan Mingazow Gonkong Premýer-ligasynyň «Gonkong Reýndžers» toparyna garşy oýnunda bir gol geçirip, dört netijeli pas berdi. Oýun «Kitçi» toparynyň 8:0 hasabyndaky ynamly ýeňşi bilen tamamlandy.

Ýeňiji toparyň düzüminde gol geçirenler: Žunino (14-nji minut), Luýiş Maşado (21-nji we 37-nji minutlar), Welton Sampaýo (40-njy we 56-njy minutlar), Ruslan Mingazow (54-nji minut), Şerzod Temirow (79-njy minut) we Pun Pui Hin (88-nji minut). Mingazow ilkinji gezek karýerasynda bir oýunda dört netijeli pas berdi. Bu oýunda Türkmenistanyň milli ýygyndysynyň ýarym goragçysy başlangyç düzümde meýdança çykyp, 63 minut oýnady.

Gonkong çempionatynyň üç tapgyryndan soň, «Kitçi» 5 utuk gazanyp, turnir tablisasynda dördünji orunda ýerleşdi.

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Doglan günüňiz mynasybetli mähirli gutlaglarymy kabul ediň!

Sizi Russiýada ýurtlarymyzyň arasyndaky çuňlaşdyrylan strategik hyzmatdaşlyk gatnaşyklaryny ösdürmegiň tarapdary hökmünde tanaýarlar. Merkezi Aziýada we Hazar deňzi sebitinde howpsuzlygy, durnuklylygy, abadançylygy üpjün etmegiň hatyrasyna Russiýanyň hem-de Türkmenistanyň dostlukly halklarynyň bähbidine ikitaraplaýyn we halkara gün tertibiniň möhüm meseleleri boýunça bilelikdäki netijeli işimizi dowam etdirjekdigimize ynanýaryn.

Hormatly Serdar Gurbangulyýewiç, Size tüýs ýürekden berk jan saglyk, bagtyýarlyk, döwlet işiňizde üstünlikleri arzuw edýärin!

Hormatlamak bilen,

Wladimir Putin,

Russiýa Federasiýasynyň Prezidenti.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly jenap Prezident!

Sizi doglan günüňiz bilen tüýs ýürekden gutlaýaryn we iň gowy arzuwlarymy beýan edýärin.

Geçen ýyl biz Siziň bilen iki gezek duşuşyp, hytaý-türkmen gatnaşyklarynyň hemmetaraplaýyn strategik hyzmatdaşlyk derejesine çykarylandygyny, şeýle hem Hytaý bilen Türkmenistanyň “Bitewi ykbal bileleşiginiň” durmuşa geçirilýändigini yglan etdik, iki döwletiň arasynda däp bolan dostlugy, özara bähbitli hyzmatdaşlygy pugtalandyrmak üçin täze meýilnamalary kesgitledik. Men hytaý-türkmen gatnaşyklarynyň ösdürilmegine uly ähmiýet berýärin hem-de iki ýurduň halklarynyň bähbidine köpugurly hyzmatdaşlygy mundan beýläk-de ösdürmek üçin Siziň bilen bilelikde tagalla etmäge taýýardyryn.

Size berk jan saglyk, jogapkärli döwlet işiňizde üstünlikleri, Türkmenistanyň dostlukly halkyna bolsa bagtyýarlyk we abadançylyk arzuw edýärin.

Si Szinpin,

Hytaý Halk Respublikasynyň Başlygy.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Doglan günüňiz mynasybetli mähirli gutlaglarymy we iň gowy arzuwlarymy kabul ediň!

Döwlet Baştutany wezipesinde alyp barýan netijeli işiňiz hem-de oňyn Bitaraplyk syýasatyňyz Türkmenistanyň durnukly ösüşiniň, onuň raýatlarynyň rowaçlygynyň, ýurduňyzyň halkara giňişlikdäki abraýynyň pugtalanmagynyň kepili bolup durýar.

Gazagystanda doganlyk türkmen halkynyň gazanýan üstünliklerine tüýs ýürekden guwanýarlar hem-de ikitaraplaýyn hyzmatdaşlygyň dostluk, hoşniýetli goňşuçylyk, strategik hyzmatdaşlyk ruhunda mundan beýläk-de çuňlaşdyrylmagyna uly ähmiýet berýärler. Gazak-türkmen gatnaşyklaryny pugtalandyrmaga goşýan şahsy goşandyňyza, köpugurly döwletara gatnaşyklarymyzy hil taýdan täze derejä çykarmak babatda umumy asylly maksadymyza ýetmek boýunça tagallalary goldaýandygyňyza ýokary baha berýärin.

Pursatdan peýdalanyp, hormatly Serdar Gurbangulyýewiç, Size egsilmez güýç-kuwwat, maşgala abadançylygyny, Türkmenistanyň doganlyk halkynyň bähbidine alyp barýan jogapkärli döwlet işiňizde mundan beýläk-de üstünlikleri arzuw edýärin!

Hormatlamak bilen,

Kasym-Žomart Tokaýew,

Gazagystan Respublikasynyň Prezidenti.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Doglan günüňiz mynasybetli Size tüýs ýürekden gutlaglarymy we iň gowy arzuwlarymy beýan etmäge şatdyryn. Bu şanly günde Size berk jan saglyk, bagtyýarlyk, Türkmenistanyň doganlyk halkynyň durnukly ösüşiniň hem-de abadançylygyň bähbidine alyp barýan döwlet işiňizde mundan beýläk-de üstünlikleri, ýurduňyzyň halkara giňişlikde eýeleýän ornunyň yzygiderli pugtalanmagyny arzuw edýärin.

Şu ýakymly mümkinçilikden peýdalanyp, täjik-türkmen dostluk we hyzmatdaşlyk gatnaşyklaryny çuňlaşdyrylan strategik hyzmatdaşlyk ruhunda hemmetaraplaýyn ösdürmäge gyzyklanma bildirýändigimizi ýene bir gezek beýan etmek isleýärin. Bilelikdäki tagallalarymyz esasynda doganlyk halklarymyzyň bähbidine Täjigistanyň we Türkmenistanyň köpugurly gatnaşyklarynyň ösdürilmegine mundan beýläk-de ýardam etjekdigimize ynanýaryn.

Hormatlamak we iň gowy arzuwlar bilen,

Emomali Rahmon,

Täjigistan Respublikasynyň Prezidenti.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Sizi doglan günüňiz bilen gutlaýaryn we iň gowy arzuwlarymy beýan edýärin.

Dostluk, hoşniýetli goňşuçylyk gatnaşyklary bilen baglanyşan halklarymyzyň bähbidine Azerbaýjan bilen Türkmenistanyň arasyndaky gatnaşyklary mundan beýläk-de ösdürmek boýunça tagallalarymyzy dowam etdirjekdigimize ynanýaryn.

Bu şanly günde Size berk jan saglyk, bagtyýarlyk, Türkmenistanyň halkynyň abadançylygynyň bähbidine alyp barýan işiňizde üstünlikleri arzuw edýärin.

Hormatlamak bilen,

Ilham Aliýew,

Azerbaýjan Respublikasynyň Prezidenti.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Sizi doglan günüňiz bilen tüýs ýürekden gutlaýaryn.

Siziň zähmetsöýerligiňiz, syýasy erkiňiz netijesinde doganlyk Türkmenistan okgunly ösýär, türkmen jemgyýetinde agzybirlik, ylalaşyklylyk üpjün edilýär, ýurduňyzda durnuklylyk we howpsuzlyk pugtalanýar.

Bilelikdäki tagallalarymyz bilen gyrgyz-türkmen hyzmatdaşlygyny has-da ösdürjekdigimize berk ynanýaryn. Işjeň syýasy dialogymyz bolsa özara gyzyklanma bildirilýän ähli ulgamlarda gatnaşyklarymyzy mundan beýläk-de pugtalandyrmak üçin ygtybarly binýat bolup hyzmat eder.

Hormatly Serdar Gurbangulyýewiç, Size berk jan saglyk, bagtyýarlyk hem-de döwlet işiňizde uly üstünlikleri, Türkmenistanyň doganlyk halkyna bolsa parahatçylyk, abadançylyk arzuw edýärin!

Hormatlamak bilen,

Sadyr Žaparow,

Gyrgyz Respublikasynyň Prezidenti.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Sizi doglan günüňiz bilen tüýs ýürekden gutlaýaryn.

Size berk jan saglyk, ýokary döwlet wezipäňizde öňde goýlan ähli maksatnamalaryň we meýilnamalaryň üstünlikli amala aşyrylmagy baradaky arzuwlarymy kabul ediň! Size we Siziň ýakynlaryňyza bagtyýarlyk, parahatçylyk, rowaçlyk, abadançylyk arzuw edýärin.

Hormatlamak bilen,

Aleksandr Lukaşenko,

Belarus Respublikasynyň Prezidenti.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Siziň Alyhezretiňiz!

Doglan günüňiz mynasybetli tüýs ýürekden gutlaglarymy we iň gowy arzuwlarymy kabul ediň! Ermenistan bilen Türkmenistanyň arasyndaky hyzmatdaşlygyň ösdürilmegine gönükdirilen bilelikdäki tagallalarymyzyň ýurtlarymyzyň halklarynyň gadymdan gelýän dost-doganlyk gatnaşyklarynyň yzygiderli pugtalandyrylmagyna ýardam etjekdigine ynanýaryn.

Pursatdan peýdalanyp, Size berk jan saglyk, Türkmenistanyň halkynyň abadançylygynyň üpjün edilmegine gönükdirilen jogapkärli işiňizde täze üstünlikleri arzuw edýärin.

Siziň Alyhezretiňize çuňňur hormat goýýandygym baradaky ynandyrmalarymy kabul ediň!

Nikol Paşinýan,

Ermenistan Respublikasynyň Premýer-ministri.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Russiýa Federasiýasynyň Hökümetiniň adyndan hem-de hut öz adymdan Sizi doglan günüňiz bilen gutlaýaryn.

Rus-türkmen dostluk, hoşniýetli goňşuçylyk, strategik hyzmatdaşlyk gatnaşyklaryny pugtalandyrmaga berýän yzygiderli ünsüňizi aýratyn bellemek isleýärin. Ýokary derejede kabul edilen çözgütleri ýerine ýetirmek maksady bilen, söwda-ykdysady, maýa goýum hyzmatdaşlygy okgunly ösdürilýär. Energetika, senagat, innowasiýa ulgamlarynda bilelikdäki taslamalar durmuşa geçirilýär, sebitara we işewürlik gatnaşyklary giňeldilýär. Ikitaraplaýyn hyzmatdaşlygyň mundan beýläk-de ösdürilmeginiň, dürli ulgamlarda täze özara bähbitli başlangyçlaryň ilerledilmeginiň Russiýanyň we Türkmenistanyň bähbitlerine doly laýyk gelýändigine berk ynanýaryn.

Hormatly Serdar Gurbangulyýewiç, Size tüýs ýürekden berk jan saglyk, jogapkärli döwlet işiňizde üstünlikleri arzuw edýärin!

Tüýs ýürekden hormatlamak bilen,

Mihail Mişustin,

Russiýa Federasiýasynyň Hökümetiniň Başlygy.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Doglan günüňiz mynasybetli tüýs ýürekden gutlaglarymy kabul ediň!

Siz Türkmenistanyň iň ýokary döwlet wezipesinde gülläp ösýän kuwwatly döwleti gurmak, raýatlaryň abadançylygyny ýokarlandyrmak boýunça giň möçberli işleri durmuşa geçirýärsiňiz. Bu köpugurly işde Siziň iň gowy häsiýetleriňiz — jöwher zehiniňiz, egsilmez güýç-kuwwatyňyz, möhüm çözgütleri kabul etmäge taýýarlygyňyz ýüze çykýar. Siz ýurduňyzy ösüş, türkmen halkynyň medeni-taryhy däplerini gorap saklamak ýoly bilen mynasyp öňe alyp barýarsyňyz, dünýä giňişliginde hyzmatdaşlar bilen gatnaşyklary ynamly ýola goýýarsyňyz.

Pursatdan peýdalanyp, rus-türkmen strategik hyzmatdaşlygynyň we parlamentara gatnaşyklaryň ösdürilmegine berýän ünsüňiz üçin Size hoşallygymy bildirmek isleýärin.

Hormatly Serdar Gurbangulyýewiç, Size tüýs ýürekden berk jan saglyk, rowaçlyk we dostlukly Türkmenistanyň bähbidine alyp barýan giň gerimli işleriňizde üstünlikleri arzuw edýärin!

Size belent hormat goýýandygym baradaky ynandyrmalarymy kabul ediň!

Walentina Matwiýenko,

Russiýa Federasiýasynyň Federal Ýygnagynyň Federasiýa Geňeşiniň Başlygy.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Çuňňur hormatlanylýan Serdar Gurbangulyýewiç!

Size belent hormat goýýandygym baradaky ynandyrmalarymy hem-de doglan günüňiz mynasybetli tüýs ýürekden gutlaglarymy kabul ediň!

Siziň parasatly baştutanlygyňyzda Türkmenistan durmuş-ykdysady ösüş ýoly bilen ynamly öňe barýar, halkara işlerde möhüm orun eýeleýär hem-de dünýä giňişliginde belent abraýdan peýdalanýar.

Astrahan oblasty bilen Türkmenistanyň arasyndaky köpugurly gatnaşyklaryň pugtalandyrylmagyna we mundan beýläk-de ösdürilmegine hemmetaraplaýyn ýardam berýändigiňiz üçin tüýs ýürekden hoşallyk bildirýärin. Ýola goýlan oňyn dialogyň ikitaraplaýyn hyzmatdaşlygyň çuňlaşdyrylmagyna doly ýardam etjekdigine ynanýaryn.

Çuňňur hormatlanylýan Serdar Gurbangulyýewiç, bu şanly günde Size berk jan saglyk, abadançylyk, Türkmenistanyň halkynyň bähbidine ähli başlangyçlaryňyzyň üstünlikli durmuşa geçirilmegini arzuw edýärin!

Tüýs ýürekden hormatlamak bilen,

Igor Babuşkin,

Russiýa Federasiýasynyň Astrahan oblastynyň gubernatory.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Hormatly Serdar Gurbangulyýewiç!

Doglan günüňiz mynasybetli tüýs ýürekden gutlaglarymy kabul ediň!

Siziň düýpli bilimiňiz hem-de ýokary şahsy häsiýetleriňiz Türkmenistanyň döwlet berkararlygynyň ösdürilmegine we pugtalandyrylmagyna gönükdirilen netijeli syýasatyňyzy üstünlikli durmuşa geçirmäge mümkinçilik berýär.

Size berk jan saglyk, abadançylyk, döwlet we halkara işleriňizde mundan beýläk-de uly üstünlikleri arzuw edýärin.

Hormatlamak bilen,

Bakytžan Sagintaýew,

Ýewraziýa ykdysady komissiýasynyň kollegiýasynyň başlygy.

* * *

Onuň Alyhezreti,

Türkmenistanyň Prezidenti

jenap Serdar Berdimuhamedowa

Siziň Alyhezretiňiz!

Doglan günüňiz mynasybetli tüýs ýürekden gutlaglarymy we iň gowy arzuwlarymy kabul ediň!

Beýik Biribardan Size berk jan saglyk, uzak ömür, maşgala abadançylygyny hem-de Türkmenistanyň Baştutany hökmünde ähli başlangyçlaryňyzda uly üstünlikleri, Türkmenistanyň doganlyk halkyna bolsa bagtyýarlyk, abadançylyk, gülläp ösüş arzuw edýärin.

Siziň Alyhezretiňize belent hormat goýýandygym baradaky ynandyrmalarymy kabul ediň!

Siziň doganyňyz,

Faýsal bin Naser bin Hamad Al Tani,

Katar Döwletiniň şeýhler maşgalasynyň agzasy.

Dawut Nazmyradow, Türkmenistanyň wekili, Hytaýyň Hangzhou şäherinde tamamlanan 20-nji Aziýa karate çempionatynda bürünç medal gazandy. Ol erkekleriň 75 kg agram derejesinde kumite boýunça üstünlik gazandy, bu ýerde 19 türgen medallar ugrunda bäsleşdi. Bu barada "Türkmenistan: Altyn Asyr" neşiri habar berýär.

Aziýa Karate Federasiýasy (AKF) tarapyndan gurnalan çempionata 30 ýurtdan 356 iň gowy türgen gatnaşdy. Gatnaşyjylar diňe bir kata we kumite boýunça medallar üçin däl, eýsem, noýabr aýynda Ispaniýanyň Pamplona şäherinde geçiriljek dünýä kubogyna gatnaşmak hukugy üçin hem bäsleşdiler.

Türkmenistany bu ýaryşda 12 adamdan ybarat delegasiýa, şol sanda 6 türgen, 3 emin, 2 tälimçi we ýolbaşçy wekilçilik etdi. Dawut Nazmyradow bürünç medala tarap ýolda üç ýeňiş gazanyp, ýurduna ýeke-täk medaly getirmegi başardy.

Çempionat Halkara Olimpiýa Komiteti tarapyndan ykrar edilen dünýäde iň uly karate guramasy bolan Bütindünýä Karate Federasiýasynyň (WKF) howandarlygynda geçirildi. WKF bäş yklym federasiýasyndan 200 ýurdy birleşdirýär we bütin dünýäde ýüz milliondan gowrak agzasy bar.

Budapeştde (Wengriýa) dowam edýän 45-nji Bütindünýä şaşka olimpiadasynda Türkmenistanyň zenanlar ýygyndysy altynjy ýeňşini gazandy. 9-njy tapgyrda olar 42-nji orunda ýerleşen Çernogoriýanyň (ortaça reýtingi – 2142) toparyny gara figuralar bilen 2,5:1,5 hasaby bilen ýeňdiler.

Biziň toparymyzyň ýeňşine ýurduň çempiony Meryem Agaýanowa (2-nji tagta) we 4-nji tagtada ätiýaçdaky oýunçy hökmünde çykyş eden Eneş Arazmedowa uly goşant goşdylar, olar degişlilikde zenanlaryň halkara ussady Aleksandra Milowiç we Mateýa Popowiçi ýeňdiler. Leýla Şohradowa (3-nji tagta) bolsa zenanlaryň FIDE ussady Nikolyna Kolewiç bilen deňme-deň oýnady.

Şeýle hem, Türkmenistanyň 2024-nji ýyldaky çempionatynda 5-nji orny eýelän 17 ýaşly Eneş Arazmedowa bäş oýunda hem utuk ýitirmän, Olimpiada-2024-de biziň toparymyzda 100% netijäni görkezdi.

Bu ýeňişden soň türkmen küştçi gyzlar (73-nji orunda ýerleşen; ortaça reýtingi – 1956) ýaryş tablisasynda 7 basgançak ýokary galdylar we mümkin bolan 16 utukdan 12 utuk bilen 169 zenanlar toparynyň arasynda 30-njy orny eýeleýärler, lider Gazagystandan 4 utuk yza galýarlar.

Türkmenistanyň erkekler ýygyndysy (73-nji orunda ýerleşen; ortaça reýtingi – 2332) hem "ýaryş basgançagynda" 5 orna ýokary galdy, 9-njy tapgyrda 50-nji orunda ýerleşen Kanadanyň (ortaça reýtingi – 2468) topary bilen 2:2 hasaby bilen deňme-deň oýnady. Bu oýunda halkara ussat Saparmyrat Atabaýewiň (1-nji tagta) grossmeýster Şon Rodrig-Lemýeni we ýurduň häzirki çempiony Allaýar Şirliýewiň (4-nji tagta) halkara ussat Nikolai Nariçyny ýeňişleri aýratyn bellärliklidir.

A.Ataýew we A.Şirliýewden başga-da, Olimpiadada türkmen toparyny halkara grossmeýster Meýlis Annaberdiýew (2-nji tagta), 18 ýaşly Amanmuhammet Hommadow (3-nji tagta) we ätiýaçdaky oýunçy Wepaly Halyňýazow hem görkezýärler.

Ýaryşyň tamamlanmagyna iki tapgyr galanda, Türkmenistanyň şaşkaçylary 11 utuk bilen 188 toparyň arasynda 50-nji orny eýeleýärler. Erkekler ýaryşynda Hindistanyň topary 17 utuk bilen liderlik edýär.

10-njy tapgyrda Türkmenistanyň erkekler topary 11 utuk bilen 45-nji orunda ýerleşýän Singapuryň topary bilen oýnar, bu topar öňki tapgyrda Alžiriň toparyny 3,5:0,5 hasaby bilen ýeňdi. Biziň zenanlar toparymyz bolsa öňki tapgyrda Monakonyň şaşkaçylaryny 3,5:0,5 hasaby bilen ýeňen we häzirki wagtda 11 utuk bilen ýaryş tablisasynda 36-njy orunda ýerleşýän Gresiýanyň (23-nji orunda ýerleşen) topary bilen duşuşar.

Bütindünýä küşt olimpiadasy – dürli ýurtlaryň ýygyndylarynyň iň güýçli küşt ýurdy adyna bäsleşýän toparlaýyn ýaryşdyr. Bu dünýäniň iň güýçli küştçilerini özüne çekýän iň abraýly we giň gerimli sport wakalarynyň biridir.