GOÝÇÝSM (Futbol boýunça geljekki olimpiýaçylaryň ýöriteleşdirilen çagalar-ýetginjekler sport mekdebi) topary 2008-2009-njy ýyllarda doglan ýetginjekleriň arasynda futbol boýunça geçirilen Türkmenistanyň birinjiliginiň ýeňijisi boldy. 

Paýtagtymyza wekilçilik edýän topar aýgytlaýjy duşuşykda «Altyn täç» toparyndan 2:1 hasabynda üstün çykdy.

Üçünji orun ugrunda geçirilen duşuşykda «Lebap» topary «Balkany» (4:1) ýeňlişe sezewar etdi.

Final duşuşygynyň yzysüre geçirilen baýrak gowşurylyş dabarasynda bäsleşigiň dowamynda öňe saýlanan oýunçylaryň sylaglanyş dabarasy geçirildi.

Şeýlelikde, GOÝÇÝSM-iň oýunçysy Eziz Myratlyýew «Iň ökde futbolça» gowşurylýan baýraga mynasyp görüldi. «Lebap» toparynyň derwezeçisi Yzzat Erkinow «Iň ökde derwezeçi»,  «Altyn täç» toparyndan Kakamyrat Babaýew «Iň ökde goragçy», «Balkan» toparynyň oýunçysy Amanmuhammet Rejepow «Iň ökde ýarymgoragçy», GOÝÇÝSM toparynyň hüjümçisi Weýisgeldi Orazdurdyýew «Iň ökde hüjümçi» diýlip yglan edildi. Iň köp gol geçiren oýunçylaryň arasynda garşydaşlarynyň derwezesinden 9 top geçiren Orazmyrat Garajanow («Lebap») öňdeligi eýeledi. «Lebap» toparynyň tälimçisi Timur Husainow «Iň ökde tälimçä» gowşurylýan baýraga mynasyp görüldi.

Türkmenistanyň Bedenterbiýe we sport baradaky döwlet komiteti bilen Türkmenistanyň Futbol federasiýasynyň bilelikde guramagynda «Aşgabat» köpugurly stadionynda geçirilen birinjilikde paýtagtymyza hem-de welaýatlara wekilçilik eden toparlarynyň 8-si gatnaşdy. 

Türkmenistanyň Futbol federasiýasy 11-nji iýulda milli çempionatyň Ýokary ligasynyň klublarynyň ýolbaşçylary we baş tälimçileri bilen ýygnak geçirer. Bu ýygnagyň çäginde Türkmenistanyň kubogy 2024-iň ilkinji tapgyrlary üçin bije çekişligi hem guramak meýilleşdirilýär. Bu barada «Janköýer» habar berdi.

Federasiýadan Ýokary liga wekilçilik edýän klublara gelip gowşan hatda görkezilişi ýaly, şol günki ýygnakda milli çempionatynyň birinji ýarymynyň netijeleri jemlenilip, öňde duran aýlawlar, Naýbaşy kubok ugrundaky duşuşygyň geçiriljek senesi barada pikir alşylar. Şeýle hem klublaryň wekillerinden agzalan ýaryşlary ýokary derejede geçirmek üçin öz tekliplerini hödürlemek haýyş edildi.

Milli çempionatyň Ýokary ligasynda we bu liga wekilçilik edýän klublaryň ýaşlar düzümleriniň arasyndaky birinjilikde «Arkadag» toparynyň öňde barýandygyny ýatladýarys. Çempionatyň üçünji we dördünji aýlawlarynyň senenamasy düzülende, Kubok we Naýbaşy kubok ýaryşlary bilen bilelikde, türkmen toparlarynyň AFK-nyň Çempionlar ligasy 2-däki we Çagyryş ligasyndaky duşuşyklary hem göz öňünde tutular.

Türkmenistanly türgenler Makao şäherinde (Hytaý Halk Respublikasy) geçirilen Aziýanyň we okaniýanyň sambo boýunça bilelikdäki çempionatynda 21 medal gazandylar. Halkara ýaryşy dünýä döwletleriniň 20-siniň wekilleri gatnaşdy.

Söweş sambosy boýunça geçirilen tutluşyklarda türkmen türgenleriniň ikisi hormat münberiniň iň ýokarky basgançagyna çykdy. Olar 50 kilograma çenli agram derejesinde çykyş edne Bägül Nuryýewa bilen 59 kilograma çenli agram derejäniň wekili Ruşana Nurjowowadyr. Erkekleriň arasynda 64 kilograma çenli agram derejesinde ýaryşan Kerim Kerimow bilen zenanlaryň arasynda 54 kilograma çenli derejäniň wekili Zarina Abdyrahmanowa hem-de 80 kilogramdan ýokary agram derejesinde Sabina Agajanowa dagylar kümüş medal gazandylar. Sambonyň bu görnüşi boýunça ýurdumyzyň medal gaznasynyň üstüni Alyhan Aýdogdyýew (58 kilograma çenli), Maksat Annagylyjow (79 kilograma çenli), Agasapar Muhadow (88 kilograma çenli), Bezirgen Begenjow (98 kilograma çenli) we Gülzada Joraýewa (72 kilograma çenli) dagylar bürünç medallar bilen ýetirdiler.

Sport sambosy boýunça geçirilen ýaryşlarda Kambara Umarowa (71 kilograma çenli), Agamyrat Bäşimow (88 kilograma çenli) we Aziza Nazarowa (50 kilograma çenli) dagylar kümüş medal gazanan bolsalar, Babamyrat Baýramow (58 kilograma çenli), Sapar Döwletow (64 kilograma çenli), Nedir Allaberdiýew (79 kilograma çenli), Saýýara Rozyýewa (54 kilograma çenli), Medine Aýdogdyýewa (59 kilograma çenli), Zyba Orunowa (72 kilograma çenli), Saodat Işmuradowa (80 kilograma çenli) we Sabina Agajanowa (80 kilograma çenli) bürünç medal bilen dolanyp geldiler.

Şeýlelikde, toparlaýyn hasapda, milli ýygyndymyz üçünji orny eýeledi. Birinji orny 26 medal, şol sanda 15 altyn, 7 kümüş we 4 bürünç medal bilen Gazagystan, ikinji orny 19 medal (8-1-10) bilen Özbegistan eýeleýär.

Şu gezekki Aziýanyň çempionaty sambonyň yklymda has giňden ýaýraýandygyny görkezýär. Muny hindistanly, koreýaly we filippinli türgenleriň hem medallara mynasyp bolmagy hem tassyklaýar.

Gyrgyzystanyň futbol çempionatynyň 13-nji tapgyrynyň çäklerinde Kant şäherinde geçirilen duşuşykda «Abdyş-Ata» «Neftçini» 4:0 hasabynda ýeňdi.

Duşuşyga ätiýaçlykdaky düzümden giren türkmenistanly hüjümçi Süleýman Muhadow 89-njy minutda tapawutlanyp, toparynyň dördünji goluny geçirmegi başardy.

Duşuşykda başga bir türkmenistanly futbolçy Teýmur Çaryýew bolsa esasy düzümde oýna girip, boýdan-başa meýdanda boldy.

Bu ýeňişden soň utugyny 33-e çykaran «Abdyş-Ata» ýaryş tertibindäki ýerini berkitdi.

Gyrgyz çempionatynyň 12-nji tapgyrynda Süleýman Muhadowyň duşuşygyň iň gowy oýunçysy bolandygyny ýatladýarys.

Ýakynda «Transfermartkt» Gyrgyzystanyň çempionatyndaky oýunçylaryň transfer bahalaryny täzeledi. Ine, şonda Çaryýewiň bahasy ozalkysyndan 25 müň köpelip, 275 müň ýewro ýetdi. Häzirki wagtda Muhadowa bolsa 75 müň ýewro baha kesilýär.

Germaniýada geçirilýän 17-nji Ýewropa çempionatynda duşuşyklaryň agramly bölegi tamamlanyp, indiki 7 aýgytlaýjy duşuşyk galdy. 1/8 final duşuşyklary tamamlanyp, çärýek finala çykanlaryň ählisi belli boldy. «A» toparçadan ýer eýeleri Germaniýanyň ýygyndysy bilen bir hatarda, Şweýsariýanyň, «B» toparçadan Ispaniýanyň, «C» toparçadan Angliýanyň, «D» toparçadan Fransiýadyr Niderlandlaryň hem-de «F» toparçadan Portugaliýa bilen Türkiýäniň ýygyndylary yklym ýaryşynda iň gowy 8 toparyň arasyna atlaryny ýazdyrdylar. «E» toparçadan ýeke topara hem çärýek finala galmak miýesser etmedi.

Çärýek finalyň duşuşyklary 5-6-njy iýulda, ýagny anna hem-de şenbe günleri oýnalar. Duşuşyklar ýene-de 21:00-da hem-de 00:00-da başlanar.

5-nji iýulda 21:00-da Ispaniýa bilen Germaniýanyň ýygyndylary Ştutgartda, 00:00-da bolsa Portugaliýa bilen Fransiýanyň ýygyndylary Gamburgda özara duşuşarlar.

6-njy iýulda 21:00-da Angliýa bilen Şweýsariýanyň ýygyndylary Dýusseldorfda, 00:00-da başlanjak duşuşykda-da Niderlandlar bilen Türkiýäniň ýygyndylary Berlinde ýarym finala çykmak üçin özara göreşerler.

Ýeňiş gazanan toparlar 9-10-njy iýuldaky ýarym finalda duşuşarlar. Final duşuşygy 14-nji iýulda Berlindäki «Olympiastadionda» oýnalar.  

Germaniýada dowam edýän 17-nji Ýewropa çempionatynda Niderlandlaryň ýygyndysy hem çärýek finala çykdy.

1/8 finalda Rumyniýanyň ýygyndysy bilen duşuşan Niderlandlar 3-0 hasabynda ýeňiş gazandy. Niderlandlara ýeňiş getiren gollary 20-nji minutda Kodu Gakpo, 83-nji hem-de 90+3-nji minutlarda Donýell Malen derwezä girizdi. Şunlukda, Niderlandlaryň ýygyndysy 5-nji gezek çärýek finala çykdy.

2000-nji ýylda çärýek finala çykan rumynlar 2-nji sapar şeýle hukuga eýe bolup bilmediler.

Türkmenistanyň futbol boýunça 20 ýaşa çenli ýaşlar ýygyndy topary Gyrgyz Respublikasynda geçiriljek Merkezi Aziýanyň Futbol Assosiasiýasynyň çempionatyna gatnaşar. Bu barada Türkmenistanyň Futbol federasiýasynyň resmi saýty habar berdi.

Gyrgyz Respublikasynyň Jalal-Abad şäherinde geçiriljek halkara ýaryşy 5-12-nji iýul aralygynda dowam eder. Ýakynda geçirilen bije çekişligiň netijesinde ýurdumyzyň ýaşlar ýygyndysy “B” toparçada bäsleşmäge mümkinçilik aldy. Ýaşlar ýygyndymyzyň toparçadaky garşydaşlary Eýranyň hem-de Özbegistanyň ýaşlar ýygyndylary bolar. Täjigistanyň, Gyrgyz Respublikasynyň hem-de Owganystanyň ýaşlar ýygyndylary “A” toparçany düzdüler.

Halkara ýaryşynyň öňüsyrasy okuw-türgenleşik ýygnanyşygyny geçiren ýaşlar ýygyndymyzyň hataryna ýaşlar ligamyzda çykyş edýän toparlaryň oýunçylarynyň 23-si çakylyk aldy. Olar:

Derwezeçiler: Aşirow Seýran (“Ahal”), Dawatow Dawut (“Aşgabat”), Gulow Ysmaýyl (“Energetik”);

Oýunçylar:

Annaýew Enwer, Berdiýew Hangeldi, Sarkisýan Eduard, Papyýew Magtymguly, Nepesow Orazmyrat (hemmesi “Arkadag”),

Agajumaýew Begenç, Amangeldiýew Ibraýym, Annamyradow Yslam, Bekmyradow Beglimuhammet, Esenow Gurbanmuhammet, Gaýypnazarow Medet, Garajaýew Gurbangeldi, Gowşudow Ýakupmuhammet, Ilmyradow Maksat, Muhammedow Mekan (hemmesi “Ahal”),

Berenow Magtymberdi (“Nebitçi”),

Garaýew Gurbanguly (“Şagadam”),

Kambarow Ismail (“Altyn Asyr”),

Orazow Hajymuhammet (“Köpetdag”),

Zülfakar Ali (“Nowbahor”, Özbegistan).

Ýygyndy toparyň baş tälimçisiniň wezipesini Döwletmyrat Annaýew ýerine ýetirýär.

Bu halkara ýaryşynyň ýaşlar ýygyndy toparymyz üçin 2025-nji ýylda Hytaýda geçiriljek 20 ýaşa çenli ýaşlar ýygyndylarynyň arasyndaky futbol boýunça Aziýanyň kubogynyň saýlama tapgyryna taýýarlyk hökmünde garalýar.

Ýeri gelende bellesek, geçirilen bije çekişligiň netijesinde ýygyndy toparymyz “I” toparçada Ýaponiýanyň, Gyrgyz Respublikasynyň we Mýanmanyň ýygyndylary bilen duşuşar. Saýlama tapgyrynyň duşuşyklary şu ýylyň 21-29-njy sentýabrynda Gyrgyz Respublikasynda geçiriler.

Halkara ýaryşynyň senenamasy:

5-nji iýul:

17:30 I Türkmenistan – Özbegistan

22:00 I Owganystan – Gyrgyz Respublikasy

7-nji iýul:

17:30 I Täjigistan – Owganystan

22:00 I Eýran – Türkmenistan

9-njy iýul:

17:30 I Özbegistan – Eýran

22:00 I Gyrgyz Respublikasy – Täjigistan.

2024-nji ýylyň noýabr aýynda Özbegistanda ýaşlar toparlarynyň arasynda futbol boýunça Arkalaşygyň Kubogy ýaryş geçiriler. Bu baradaky çözgüt sport görnüşleri boýunçw GDA-nyň çempionatlaryna taýýarlyk görmek we geçirmek boýunça iş toparynyň 27-nji iýunda Minsk şäherinde geçirilen mejlisinde kabul edildi. Bu barada «Belta» habar berdi.

Iş toparynyň mejlisine Azerbaýjanyň, Ermenistanyň, Belarusyň, Gazagystanyň, Gyrgyzystanyň, Russiýanyň, Türkmenistanyň, Özbegistanyň we GDA-nyň Ýerine ýetiriji komitetiniň wekilleri gatnaşdylar.

Futbol boýunça Arkalaşygyň Kubogy ýaryşy 2024-nji ýylda GDA-nyň çäginde geçirilmegi meýilleşdirilýän sport ýaryşlarynyň iň abraýlylarynyň biridir. Futbol boýunça Kubokdan başga-da, Özbegistan Arkalaşygyň Açyk küşt kubogyny hem kabul eder. Mundan başga-da, awgust aýynda Belarusda erkekleriň we aýallaryň arasynda at sporty boýunça GDA-nyň çempionaty geçiriler.

Türkmen türgeni Alp Arslan Begenjow erkin göreş boýunça Aziýa çempionatynda (U23) bürünç medal gazandy.

Ýaryş 22 — 30-njy iýun aralygynda Iordaniýanyň Amman şäherinde geçdi.

Alp Arslan ýarymfinalda Gyrgyz Respublikasyndan bolan türgeni — Muhammad Abdullaýewi 12:7 hasabynda ýeňlişe sezewar etdi. Ýarymfinalda bolsa türkmen pälwany Hytaýdan Nan Çaonyň garşysyna çykdy. Bu tutluşykda hytaý türgeni güýçli geldi — 4:1.

Bürünç medal ugrundaky tutluşykda bolsa Alp Arslan Begenjow Özbegistanyň milli ýygyndy toparynyň agzasy Daler Çulibaýew bilen ýüzbe-ýüz boldy. Türkmen türgeni özbek pälwanyna ýeňiş üçin mümkinçilik goýmady. Ildeşimiz ynamly ýeňiş gazandy — 12:1.

Altyn medala hytaýly Nan Çao, kümüş medala bolsa Gazagystandan Rustem Myrzagaliýew eýe çykdy. Ikinji bürünç medaly hindi türgeni Amit Amit eýeledi.

43 ýaşly futbol hünärmeni Döwletmyrat Annaýew baş tälimçi hökmünde Türkmenistanyň ýaşlar (20 ýaşa çenli) ýygyndy toparyny Aziýa Kubogy – 2025-iň saýlama oýunlaryna taýýarlar. Bu karar Türkmenistanyň Futbol federasiýasy tarapyndan kabul edildi.

25–30-njy sentýabr aralygynda Bişkekde geçiriljek Aziýa Kubogy – 2025-iň saýlama ýaryşynda türkmen futbolçylarynyň bäsdeşleri Ýaponiýanyň, Gyrgyzystanyň we Mýanmanyň ýaşlar ýygyndylary bolar. Bular «I» toparçasyna girýärler.

Aziýa Kubogy – 2025-iň saýlama tapgyryna taýýarlygyň çäginde Döwletmyrat Annaýewiň topary 5 – 13-nji iýul aralygynda Jalal-Abat şäherinde (Gyrgyzystan) geçiriljek ýaşlar (20 ýaşa çenli) toparlarynyň arasyndaky Merkezi Aziýanyň Futbol assosiasiýasynyň (CAFA) çempionatyna gatnaşar.

Döwletmyrat Annaýewiň baý tälimçilik tejribesi bar. Ol 2019-njy ýylda «Köpetdag» topary birinji liga çykardy, soň Tofik Şükürowyň bu topar bilen ýokary ligada işlemegine kömekleşdi, baş tälimçi hökmünde «Aşgabat» futbol klubuna, şeýle hem Iordaniýada geçen Aziýa birinjiliginiň saýlama ýaryşynda Türkmenistanyň ýaşlar toparyna (U17) ýolbaşçylyk etdi.

D.Annaýew Türkmenistanyň ýaşlar ýygyndy toparynyň (U20) baş tälimçisi wezipesine bellenmezden ozal, milli futbol çempionatynyň ikinji aýlawyndan başlap, «Ahal» topary türgenleşdirdi. Onuň ýolbaşçylygynda «Türkmennebitönümleri» Baş müdirliginiň topary Türkmenistanyň çempionatynyň 8 oýnunda 6 ýeňiş gazandy, «Altyn asyr» topary bilen oýnan bir oýnuny 2:2 hasabynda deňme-deň tamamlady we diňe bir oýunda ýurduň häzirki çempiony «Arkadag» toparyndan utuldy – 0:4.

27-nji iýunda IWF-iň Şweýsariýanyň Lazonna şäherinde ýerleşýän ştab-kwartirasynda Türkmenistanyň Agyr atletika milli federasiýasynyň prezidenti Berdinyýaz Mätiýew bilen Halkara agyr atletika federasiýasynyň (IWF) baş direktory Ahilleas Sogasyň duşuşygy geçirildi. Bu barada «THP» habar berdi.

Taraplar Türkmenistanda agyr atletika boýunça halkara we sebitleýin ýaryşlary geçirmek, halkara bilermenleriniň gatnaşmagynda türgenleşik seminarlaryny guramak, türgenleri taýýarlamak bilen baglanyşykly meseleleri ara alyp maslahatlaşdylar hem-de bu ugurda hyzmatdaşlygy dowam etdirmek barada ylalaşdylar.

Duşuşykda Ahilleas Sogas türkmen emini Çary Mamedowy resmi taýdan tomusky Olimpiýa oýunlarynyň agyr atletika ýaryşlaryna eminlik etmäge çagyrdy.

Çary Mamedow 2017-nji ýylda ilkinji gezek agyr atletika ýaryşlaryna emin hökmünde gatnaşypdy. 2019-njy ýylda Las-Wegasda (ABŞ) ýetginjekleriň arasyndaky dünýä çempionaty geçirildi. Şonda oňa emin hökmünde çykyş etmäge mümkinçilik döredildi.

Pariž olimpiadasy 26-njy iýun — 11-nji awgyst aralygynda geçirilýär. Onuň agyr atletika ýaryşlary 7 — 11-nji awgust aralygynda geçer.

Türkmenistanly tennisçi Ilima Guseýnowa «ATF 14&under Shymkent GA» halkara ýaryşynyň kümüş medallaryna eýe boldy.

Ýaryş 22 — 29-njy iýun aralygynda Gazagystanyň Şimkent şäherinde geçdi.

Dartgynly bäsleşigiň çäginde bäş duşuşyk geçiren Ilima Guseýnowa şolaryň dördüsini ynamly ýeňiş bilen tamamlady.

Ol 1/16 finalda Wlad Kuzmenkony 6:1, 6:2 hasabynda ýeňlişe sezewar etdi. Şondan soňky raundda — 1/8 finalda bolsa ildeşimiz Sofiýa Kirowany (Gazagystan) 6:3, 6:4 hasabynda ahmyrda goýdy.

Çärýekfinalda bolsa Guseýnowa gazak türgenleriniň ýene biri — Medina Utepbergen bilen duşuşdy. Birinji setde 1:6 hasabynda asgyn gelendigine garamazdan, oýnuň hörpüni üýtgetmegiň hötdesinden gelen Ilima tutanýerlilik görkezdi we indiki iki seti 6:2, 6:0 hasabynda öz peýdasyna tamamlamagy başardy.

Ildeşimiz ýarymfinalda eýranly Aýlin Mohammadian Farzy ýeňdi. Duşuşyk 6:2, 6:2 hasaby bilen jemlendi. Aýgytlaýjy duşuşykda türkmenistanly tennisçi eýranly Hana Şabanpur bilen duşuşdy. Bu duşuşykda eýranly tennisçi güýçli çykdy — 6:2, 6:2.