Ýewropa çempionynyň we Amerikanyň kubogynyň tamamlanmagyndan soň FIFA futbol boýunça milli ýygyndylaryň reýting sanawyny täzeledi.

Amerikanyň kubogyna mynasyp bolan Argentinanyň ýygyndysy we fransuzlar birinji we ikinji orundaky ýerini gorap sakladylar. Ilkinji üçlügi Ýewro ― 2024-iň çempionlary ― ispanlar eýeledi. Kolumbiýanyň ýygyndysy bolsa ilkinji 10-luga girdi.

Täzelenen sanawda türkmen ýygyndysy ozalky ornunda ― 144-nji basgançakda galdy. Türkmenistanyň futbol ýygyndysynyň ahyrky duşuşyklaryny iýun aýynda geçirendigini ýatladýarys. Türkmen futbolçylary Daşkentde Özbegistanyň ýygyndysyndan 1:3 hasabynda ýeňlip, Aşgabatda Gonkongyň ýygyndysy bilen 1:1 hasabynda deňme-deň oýnandygyny ýatladýarys.

FIFA-nyň 2024-nji ýylyň 18-nji iýulyndaky reýtingi aşakdaky ýaly:

1. (1) Argentina ― 1901,48;

2. (2) Fransiýa ― 1854,91;

3. (8) Ispaniýa ― 1835,67;

4. (5) Angliýa ― 1812,26;

5. (4) Braziliýa ― 1785,61;

20 (20) Eýran ― 1611,16;

61. (62) Özbegistan ― 1397,41;

102. (101) Gyrgyzystan ― 1213,58;

103. (102) Täjigistan ― 1212,41;

109. (109) Gazagystan ― 1193,62;

111. (111) Azerbaýjan ― 1179,88.

«Sportda dopinge garşy göreşmek hakynda» Türkmenistanyň Kanunyna üýtgetmeler girizmek hakynda Türkmenistanyň Kanuny kabul edildi.

16 maddadan ybarat bolan täze Kanunda gozgalýan mesele bilen bagly käbir düzgünler has döwrebaplaşdyrylýar.

Kanunda nygtalyşy ýaly, «Barlagyň netijesi oňyn bolmadyk halatynda türgeniň ýa-da onuň wekiliniň şulara hukugy bardyr:

1) «B» nusgalygynyň barlagynyň geçirilmegini talap etmäge;

2) gaýragoýmazdan düşündiriş bermäge;

3) eger zerur bolsa, «B» nusgalygynyň gaýtadan barlagynda bolmagyna;

4) «A» nusgalygynyň barlagynyň netijeleri boýunça barlaghanalar üçin Halkara standartynda göz öňünde tutulan maglumatlary saklaýan resminamalaryň göçürmesini almaga;

5) TDGMA-nyň dopinge garşy kadalaryna laýyklykda öz wagtynda, adalatly we tarapgöýsüz diňlenilmäge;

6) Halkara dopinge garşy topara TDGMA-nyň dopinge garşy kadalaryna laýyklykda, birinji basgançakly guramanyň çözgüdine şikaýat etmäge».

Şeýle hem Kanunyň 17-nji maddasyna laýyklykda, dopinge garşy kadalaryň bozulmagy bilen baglanyşykly jedeller TDGMA-nyň dopinge garşy kadalaryna laýyklykda çözülýär.

Ýaşajyk türkmen futbolçylary Daşkent şäherinde geçirilen «AFL Kids Cup — 2024» atly halkara ýaryşda üstünlikli çykyş edip, iki altyn, bir bürünç medala mynasyp boldular. Bu barada «Watan» habarlar gepleşiginde habar berildi.

Ýaryşda altyn medallary «Batly» we «Gökje» futbol toparlary gazandy. Bu toparlaryň birinjisi 2012-nji ýylda doglan we şondan hem kiçi ýaşly okuwçylardan, ikinjisi bolsa 2014-nji ýylda doglan hem-de şondan kiçi ýaşly mekdep okuwçylaryndan ybaratdyr. 2009-njy ýylda doglan ýetginjeklerden düzülen «Çandybil» futbol topary bolsa kümüş medal bilen ýaryşyň hormat münberine çykmagy başardy.

Soňky ýyllarda geçirilmegi däbe öwrülen «AFL Kids Cup» ýaryşy çagalaryň arasynda futboly wagyz etmekde we geljekki ýyldyzlary ýüze çykarmakda uly ähmiýete eýedir. Ýaryşy guraýjylardyr dürli ýurtlardan gelen futbol jemgyýetçiliginiň wekilleri türkmenistanly toparlaryň başarnygyna ýokary baha berdiler.

15-nji iýun — 11-nji iýul aralygynda suwda ýüzmek boýunça türkmen ýygyndysy Gruziýanyň Batumi şäherinde okuw-türgenleşik ýygnanyşygyny geçdi. Bu çäräniň baş maksady türkmen türgenleriniň şu ýylyň 26-njy iýuly — 11-nji awgusty aralygynda Parižde geçiriljek tomusky Olimpiýa oýunlarynyň öňüsyrasynda geçýän ykjam türgenleşikleri arkaly has-da kämilleşdirmeklerinde möhüm ähmiýete eýedir.

Olimpiýa oýunlaryna türkmen ýüzüjilerinden Musa Žalaýew (100 metr, erkin usul) hem-de Aýnura Primowa (100 metr, arkanlygyna ýüzmek) wekilçilik eder.

Okuw-türgenleşik ýygnanyşygyna Dmitriý Nowikowyň hem-de Mark Pilýuginiň ýolbaşçylygyndaky türkmen türgenleriniň 12-si gatnaşdy. Türgenleşikleriň ýörite maksatnamasy öňde boljak möhüm synaglaryň öňüsyrasynda türgenlerimiziň ykjam taýýarlygynyň ýokary derejesini üpjün etmekde aýratyn ähmiýete eýedir.

Okuw türgenleşik ýygnanyşygyna gatnaşan erkekler toparymyz Dawid Akopýan, Musa Žalaýew, Seýran Nurmyradow, Muhammetmyrat Gutlyýew, Alan Muhin hem-de Gurban Hommadow ýaly ussatlardan ybarat boldy.

Zenanlar ýygyndymyza bolsa Eneş, Ejeş hem-de Aýnur Primowalar, Anastasiýa Morginştern, Ogulmerjen Nuraýewa we Aýnur Merdanowa wekilçilik etdi.

Futbolçylaryň ýekelikdäki iň abraýly baýragy bolan «Altyn top» ugrunda ýiti göreş dowam edýär. Tamamlanan 2 ýaryşdan soň dalaşgärleriň arasyndaky göreş has-da güýjäp, faworitler ornuny çalyşdy. Mundan 1 aý ozal iň esasy 2 dalaşgär «Real Madridiň» ýyldyzlary Winisius Junior bilen Jud Bellingemdi. Olar häzir hem esasy dalaşgär hasaplanýar. Ýöne Ispaniýanyň Ýewropa çempiony bolmagyndan soň Rodri sanawyň başynda ornaşdy.  «Goal.com» saýtynyň işgärleriniň pikirine görä, Rodri edil häzirki wagtda «Altyn top» baýragynyň birinji derejeli dalaşgäri hasaplanýar. Kopa Amerikada Braziliýanyň çärýek finaldan gaýtmagyndan soň Winisius Junioryň almak mümkinçiligi azalyp, ol 2-nji orunda barýar. Angliýanyň finalda utulmagyndan soň Jud Bellingem 3-nji orna düşdi.

«Mançester Sitiniň» ýarymgoragçysy Rodri Ýewropa çempionatynyň finalynyň 2-nji ýarymynda alan şikesi sebäpli oýundan çykmaly boldy. Ýöne ol toparynyň finala çenli gelmeginde uly rol oýnady. Ispaniýanyň ýygyndysyny-da, «Mançester Siti» klubuny-da Rodriniň oýnan duşuşyklarynda ýeňmek juda kyn. Onuň Ýewropa çempionatynyň iň ökde oýunçysy saýlanmagy-da Rodriniň baýragy gazanmak mümkinçiligini has-da ýokarlandyrýar.  

Junioryň «El Klasikodaky» het-trigi, «La Ligadaky» şowly çykyşy, UEFA Çempionlar Ligasynda «Real Madridiň» çempionlygyna uly goşandy bellärliklidir. Ol Braziliýanyň ýygyndysynda Kopa Amerikada Paragwaýyň derwezesinden 2 gol geçirdi. Ýöne jerimeli ýagdaýa düşüp, toparynyň çärýek final oýnunda tribunada oturmaly boldy.

Jud Bellingem geçen möwsümiň 1-nji ýarymyň iň ökde oýunçysy bolsa-da, ol bu depgininiň möwsümiň ahyryna çenli saklap bilmedi. «Real Madrid» 1-nji ýarymda onuň gollary bilen ençeme ýeňiş gazanan bolsa, Bellingem gyşdan soň toparynyň gollaryna o diýen uly goşant goşmady. Ol çempionatda 2 wajyp gol geçirse-de, netijede Angliýanyň ýygyndysy bassyr 2-nji finalyndan boş gaýtdy.

Şeýle-de, sanawda 4-nji orunda «Real Madridiň» başga bir ýyldyzy Dani Karwahal bolup, klubunyň hem-de milli ýygyndysynyň taryhy çempionlyklaryna uly goşant goşdy.

5-nji basgançakda Kopa Amerikanyň çempiony Argentinanyň ýyldyzy Lautara Martinesiň ady bar. Şeýle-de, Toni Kroos, Kilian Mbappe, Harri Keýn, Fil Foden we Niko Uilliams ilkinji onlugy tamamlaýan beýleki futbolçylardyr. Messi sanawda 16-njy orunda bolsa, Kriştianu Ronaldu ilkinji 20-lige hem girenok.

Sentýabr aýynda baýragyň dalaşgärleri, oktýabr aýynda bolsa ýeňijisi mälim ediler.

Marynyň «Merw» futbol topary 19-njy iýuldan 31-nji iýula çenli aralykda türkiýäniň Bolu şäherinde okuw-türgenleşik ýygnanyşygyny geçirer. Ýygnanyşyga 24 futbolçy we resmi wekilleriň 11-si gatnaşar.

Bu ýygnanyşygyň çäklerinde «Merw» ýoldaşlyk duşuşyklarynyň birnäçesini geçirer. Toparyň garşydaşlarynyň biri Azerbaýjanyň «Turan-Towuz» topary bolar. Bu topara meşhur türkmenistanly tälimçi Gurban Berdiýewiň tälim berýändigini ýatladýarys.

Şeýle hem «Merwiň» Türkiýäniň «Pendikspor» topary bilen hem ýoldaşlyk duşuşygyny geçirmegine garaşylýar.

«Merw» Türkmenistanyň futbol çempionatynyň üçünji aýlawyna 17-nji awgustda girişer. Şol gün topar 19-njy tapgyryň çäginde Balkanabadyň «Nebitçisi» bilen myhmançylykda duşuşar. Yzda galan iki aýlawdan soň «Merwiň» 16 duşuşykda toplan 21 utugy bilen bäşinji orny eýeleýändigini ýatladýarys.

Aşgabadyň «Altyn asyr» futbol kluby Rumyniýanyň Braşow şäherindäki okuw-türgenleşik ýygnanyşygynda ilkinji halkara ýoldaşlyk duşuşygyny üstünlikli geçirdi. Türkmen topary Rumyniýanyň çempionatynyň ikinji diwizionynda çykyş edýän «Metaglobus» kluby bilen duşuşdy.

Jankoyer.com.tm. internet neşiriniň habar bermegine görä, oýun 1:0 hasabynda «Altyn asyryň» peýdasyna tamamlandy. Duşuşykdaky ýeke-täk gol 22-nji minutda Myrat Annaýew tarapyndan penaltiden uruldy.

Bu oýun «Altyn asyr» üçin AFK Çempionlar ligasy 2 halkara ýaryşyna taýýarlygyň bir bölegi boldy. Ýaryşyň toparçalaýyn tapgyryna çykmak üçin aýgytlaýjy oýun 14-nji awgustda Kalkutta şäherinde geçirilip, onda «Altyn asyr» Hindistanyň «Ist-Bengal» topary bilen duşuşar.

Bellenilişi ýaly, «Altyn asyr» Rumyniýadaky OTÝ-niň çäginde ýene-de birnäçe ýoldaşlyk duşuşyklaryny geçirer.

Garet Sautgeýt Angliýanyň milli ýygyndysynyň baş tälimçiliginden gitdi. Bu barada Angliýanyň Futbol assosiasiýasy habar berdi.

53 ýaşly hünärmen 2016-njy ýyldan bäri Angliýanyň milli ýygyndysyny türgenleşdirip gelýärdi. Iňlisler onuň golastynda iki gezek Ýewropa çempionatynyň finalyna çykdylar, 2018-nji ýyldaky Dünýä çempionatyny ýarym finalda, 2022-nji ýyldaky Dünýä çempionatyny bolsa çärýek finalda terk etdiler.

Sautgeýtiň Angliýanyň milli ýygyndynysyň halypasy hökmündäki soňky oýny Ýewro-2024-iň finaly boldy. Aýgytlaýjy oýunda Angliýa Ispaniýadan 2:1 hasabynda asgyn geldi.

Ýeri gelende bellesek, Garet Sautgeýt Angliýanyň milli ýygyndysyny 102 oýunda baş tälimçi hökmünde meýdança alyp çykdy.

Iňlis neşirleriniň ýazmagyna görä, Angliýanyň milli ýygyndysynyň täze baş tälimçisi bolmaga esasy dalaşgär «Çelsi» we «Braýton» klublarynyň ozalky halypasy Grem Potterdir.

5 — 15-nji iýul aralygynda Russiýa Federasiýasyndan Mongoliýa Respublikasyna uzan «Ýüpek ýoly – 2024» ralli-reýdi 11 tapgyrdan ybarat boldy. 5 243,13 kilometrlik menzile uzan halkara ýaryşyna 9 döwletden (Russiýa Federasiýasy, Belarusiya, Mongoliýa, Hytaý Halk Respublikasy, Şwesariýa, Owganystan, Sirýa Arap Respublikasy, Serbiýa, Türkmenistan)  türgenler gatnaşdylar.

Bu halkara ýaryşa jemi 50 ekipaž, şol sanda T1 bäsleşigine 3 sany, T2 ýaryşyna 6, T3 boýunça 6, T5-den 12, Açyk (OPEN) görnüşinden 5, Moto-kwadrasikelleriň ýaryşyna 18 topar gatnaşdy.

T2 görnüşinde 5 243,13 kilometrlik menzili ynamly külterlän ildeşlermiz, Türkmenistanyň Awtomobil sport federasiýasynyň türgenleri, «Türkmenawtoulaglary» agentliginiň Awtoulag serişdelerini abatlamak, ýerlemek we olara enjamlaýyn hyzmat etmek boýunça önümçilik birleşiginiň sürüjileri Merdan Toýlyýew sürüji we Şöhrat Toýlyýew ýolbelet (şuturman) hökmünde 2-nji orna, şeýle hem «SILK WAY 2024» atly kuboga eýe boldular. 

Şeýle hem biziň Türkmenistanyň Awtomobil sport federasiýasynyň türgeni Maksatmyrat Daňatarow we  onuň ýolbeledi (şturman) Türkmenistanyň Awtomobil sport federasiýasynyň türgeni, Daşoguz welaýatynyň bedenterbiýe we sport baradaky Baş müdürliginiň Daşoguz şäheriniň 5-nji  sport mekdebiniň instruktor-usulyýetçisi Didar Orazmedow 3-nji orna hem-de «SILK WAY 2024» kubogyna eýe çykdylar.

Türkmen ekipažlarynyň ikisi hem «NISSAN PATROL» kysymly awtoulagda çykyş etdiler.

Ýene sanlyja günden Fransiýanyň Pariž şäherinde badalga aljak tomusky Olimpiýa oýunlarynyň petekleriniň rekord möçberiniň satylandygyny sport baýramçylygynyň guramaçylyk komitetiniň ýolbaşçysy Toni Estange habar berdi.

Oýunlaryň başlanmagyna iki hepde galanda petekleriň 8,6 millionysy satyldy.

— Rekord 1996-njy ýylyň Atlantada geçen Olimpiýa oýunlaryna degişli bolup, şonda 8,3 million petek ýerlenipdir. Biz bolsa bu görkezijini ýaryşyň başlanmagyndan iki hepde öň yzda galdyrdyk. Häzirki wagtda Olimpiýa oýunlarynyň 8,6 million, Paralimpiadanyň bolsa bir milliondan gowrak petegi ýerlenildi. Biz rekordy täzelemegi başarandygymyza begenýäris. Muňa garamazdan, has-da uly görkezijilere ýetip biljekdigimizi nygtamak isleýärin — diýip, belleýän Estangeniň sözleri «AFP» (Agence France-Presse) tarapyndan sport jemgyýetçiligine ýetirildi.  

Guramaçylyk komitetiniň satylan petekleriň umumy sanyny 10 millionlyk bellige ýetirmek isleýändigi bellenilýär.

Tomusky Olimpiýa oýunlary 26-njy iýun — 11-nji awgust aralygynda geçer. Bu oýunlara türkmen türgenleriniň altysy wekilçilik eder.

14-nji gezek guralýan «Ýüpek ýoly» rallisiniň onunjy tapgyrynyň geçirilen güni hem gatnaşyjylar üçin garaşylmadyk synaglara baý boldy.

Bu tapgyr Mongoliýanyň Baýanhongor we Mandalgobi sebitlerini birikdirdi. Geçilmeli menzil 562, 86 kilometre barabar boldy.  

Onunjy tapgyr marafon görnüşinde geçdi: mehanikleriň hem-de kömekçi wekilleriň galandygy sebäpli, türgenler ýüze çykan näsazlyklary özbaşdak bejermeli boldular. Şol bir wagtyň özünde hem, tapgyryň menzilleri sürüjileriň hem-de şturmanlaryň örän ünsli bolmagyny talap edýän diýseň ýokary tizlikde geçilmeli sähra ýollaryndan we daşlyk ugurlardan uzady.  

Daňatarowyň nobatdaky ýeňşi

Mihail Mitýaýewi alty minutdan gowrak yzda galdyran Maksatmyrat Daňatarow ýolsuz ýerde hereket edýän ulaglaryň T2 ýaryşynyň ýeňijisi boldy. Öňdäki üçlügi bolsa umumy hasapda öňdeligi elden bermeýän Andreý Suşensow jemledi.   

«S&A Racing» toparynyň sürüjisi Andreý Suşensow ahyrky tapgyryň öňüsyrasynda bäş sagat tapawut bilen öňde barýar. Ikinji orny bolsa «Türkmenawtoulaglary» agentliginiň türgenleri — doganlar Merdan hem-de Şöhrat Toýlyýewler eýeleýär. Türkmenistanyň Awtomobil sporty federasiýasynyň ekipažy — Maksatmyrat Daňatarowyň we onuň şturmany Didar Orazmedowyň topary bolsa öňdäki üçlügi jemleýär. Şondan soňky orunlar Mihail Mitýaýewde hem-de Maýlis Abdullaýewde galýar.

Halkara ralli-reýdi 15-nji iýulda jemlener.

Germaniýada guralan futbol boýunça 17-nji Ýewropa çempionaty tamamlanyp, Ispaniýanyň ýygyndysy yklymyň çempiony boldy. Berlindäki «Olympiastdionda» oýnalan finalda Ispaniýanyň ýygyndysy Angliýanyň ýygyndysyny 2-1 hasabynda ýeňlişe sezewar etdi.

1-nji ýarymy durnukly ýagdaýda, hüjümleriň azlygynda geçip, toparlara derwezäni sarsdyrmak başartmady. Ispanlar 2-nji ýaryma gol bilen başladylar. 47-nji minutda Lamin Ýamalyň pasyndan soň Niko Uilliams hasaby açdy. Bu goldan soň Ispaniýanyň ýygyndysy ýene-de 2-3 sany örän amatly pursady elden giderdi. Iňlisleriň tälimçisi Garet Sautgeýt oýnuň 70-nji minutynda Koul Palmeri meýdança girizdi. Ol hem 3 minutdan soň, Bellingamyň beren pasyny gol bilen netijelendirdi. Şunlukda, 73-nji minutda hasap deňlendi.

Şondan soň ispanlar täzeden hüjümlerini artdyryp başlady. Duşuşygyň esasy wagtynyň tamamlanmagyna 4 minut galanda Moratanyň deregine meýdança giren Oýarsabal ispanlariň ýeňiş goluny geçirdi. Bu gol 86-njy minutda bellige alyndy. Duşuşygyň ahyrynda iňlisler tasdanam hasaby deňläpdi. Palmeriň burçdan ýerine ýetiren urgusynda topy ilki Raýs kellesi bilen urdy. Ony derwezeçi Unaý Simon saklamagy başardy. Yzyna gaýdan top täzeden derwezä uruldy. Bu gezek Dani Olmo topy çyzykdan çykardy. Şunlukda, 2-1 hasabynda ýeňşini baýram eden Ispaniýanyň ýygyndysy 4-nji gezek yklymyň çempiony boldy. 1964-nji, 2008-nji hem-de 2012-nji ýyllardaky çempionlyklarynyň üstüne ýene birini goşan Ispaniýa bu ugurda 3 çempionlygy bolan Germaniýany yzda galdyrdy. Ispaniýanyň ýygyndysy Ýewropa çempionatynda ähli duşuşygynda-da ýeňiş gazanyp, çempion bolan ilkinji ýygyndy hökmünde hasaba alyndy.

Angliýanyň ýygyndysy bolsa bassyr 2-nji gezek finalda utulyp, şeýle statistika eýe bolan ilkinji topar diýlip kesgitlendi.

Duşuşykdan soň kubok gowşurylyş dabarasynda Niko Williams finalyň ýyldyzy diýlip saýlandy. Ispaniýaly Rodri çempionatyň iň ökde oýunçysy diýlip yglan edildi. Lamin Ýamal çempionatyň iň ökde ýaş futbolçysy baýragyna laýyk görüldi. Ispaniýaly Dani Olmo 3 gol bilen çempionatyň iň netijeli futbolçysy baýragyna laýyk hasaplanyldy.