Türkmenistanyň futbol çempionaty ― 2023-iň kümüş medalynyň eýesi ― Aşgabadyň «Altyn asyry» öňde duran möwsümde AFK-nyň Çempionlar ligasy ― 2-niň saýlama tapgyryndan ýaryşyp başlar. Bu tapgyrda «Altyn asyryň» garşydaşy Hindistanyň «Ist-Bengal» topary bolar.

Iki toparyň arasyndaky saýlama duşuşygy 14-nji awgust güni Hindistanyň Kalkutta şäherindäki «Selt-Leýk» stadionynda geçiriler. Duşuşykda ýeňiş gazanan topar ýaryşyň toparçalaýyn tapgyryna goşulsa, utulan topar AFK-nyň Çagyryş ligasynda ýoluny dowam etdirer.

1920-nji ýylda Kalkutta şäherinde esaslandyrylan «Ist-Bengal» Hindistanyň iň gadymy klublarynyň biridir. Topar häzirki wagtda Hindistanyň çempionatynyň iň ýokarky dwiziony bolan Superligada çykyş edýär.

Hormatly adamlar!

Eziz watandaşlar!

Sizi musulman dünýäsiniň mukaddes baýramlarynyň biri bolan mübärek Gurban baýramy bilen tüýs ýürekden gutlaýaryn. Gadymy döwürlerden bäri ynsanperwerligiň, hoşniýetliligiň hem-de ruhy päkligiň dabaralanmasyny alamatlandyrýan bu baýram Berkarar döwletiň täze eýýamynyň Galkynyşy döwründe gülläp ösýän eziz Watanymyza, mähriban halkymyza bereket getirsin, bagtyýar durmuşymyza bolan buýsanjymyzy has-da artdyrsyn!

Türkmen halky müňýyllyklardan bäri tämiz we aýdyň ýörelgelere eýerip gelýän, dünýä, ýaşaýyş, ynsan, dostluk, parahatçylyk söýüjilik, hoşniýetlilik, ynsanperwerlik, döwletlilik baradaky garaýyşlaryny, ynançdyr adatlaryny, däp-dessurlaryny kämil derejä ýetiren halklaryň biridir. Ynsanyýetiň iň gözel, iň ajaýyp häsiýetlerini özünde jemlän merdana pederlerimiziň adamkärçilik, açykgöwünlilik, birek-birege hormat-sarpa goýmak ýaly ýörelgeleriň kämilleşmeginde, aýratyn-da, Gurban baýramynyň ruhy-ahlak taýdan bitewülige we tämizlige, belent ynsanperwerlige çagyrýan mukaddes baýramlaryň birine öwrülmeginde uly hyzmatlary bardyr. Garaşsyz ýurdumyzyň Ýer ýüzündäki mertebesiniň gün-günden beýgelýän, şan-şöhratynyň has-da artýan Berkarar döwletiň täze eýýamynyň Galkynyşy döwründe bu mukaddes baýram ýokary jebislikde, agzybirlikde garşy alynýar.

«Pähim-paýhas ummany Magtymguly Pyragy» ýylynda hem gurbanlyk döwlet derejesinde üç günüň dowamynda Aşgabat we Arkadag şäherleriniň baýramçylyk meýdançalarynda, medeni-dynç alyş merkezlerinde, ähli şäherlerimizdir obalarymyzda baý öwüşgindäki aýdym-sazly, medeni-jemgyýetçilik çäreleri ýaýbaňlandyrylyp bellenilýär. Her maşgalada bereketli saçaklar giňden ýazylyp, baýramçylyk tagamlary hödürlenip, Garaşsyz Watanymyzyň abadançylygynyň, külli adamzadyň bagtyýar hem-de parahat durmuşynyň hatyrasyna ýagşy dilegler edilýär.

«Watan diňe halky bilen Watandyr! Döwlet diňe halky bilen döwletdir!» diýen şygarymyzdan ugur alyp, biz ýurdumyzyň her bir raýatynyň sagdynlygy we ruhy kämilligi ugrunda yzygiderli alada edýäris. Jemgyýetimiziň ynsanperwerligiň belent ýörelgelerine laýyklykda kämilleşmegine, halkymyzyň ruhy-ahlak gymmatlyklary esasynda ösmegine aýratyn ähmiýet berýäris. Watandaşlarymyzyň yslam dünýäsiniň mukaddesliklerine zyýarat etmekleri, parz ýörelgeleri berjaý etmekleri üçin ähli şertleri döredýäris. Beýik akyldar şahyrymyz Magtymguly Pyragynyň doglan gününiň 300 ýyllygynyň halkara derejede giňden bellenilýän ýylynda hem Gurban baýramy mynasybetli Türkmenistanyň wekillerinden ybarat uly topary haj parzyny berjaý etmek üçin zyýarata iberdik.

Eziz watandaşlar!

Biziň özboluşly, gaýtalanmajak maddy we ruhy gymmatlyklarymyz Gündogar bilen Günbataryň, Demirgazyk bilen Günortanyň arasynda dostlukly gatnaşyklaryň döremegine hem-de pugtalandyrylmagyna ýardam berýän altyn hazynalardyr. Ýer ýüzünde millet hökmünde tanalmagymyzyň we hormatlanmagymyzyň esasydyr, bakylyk mertebämizdir. Şoňa görä-de, milli ýörelgelerimizi, müňýyllyklaryň dowamynda toplanan tejribelerimizi ileri tutup, jemgyýetimizi ynsanperwerligiň belent ýörelgeleri esasynda has-da kämilleşdirýäris, il-günümize çäksiz söýgimiz, agzybirligimiz, tutanýerli zähmetimiz bilen şanly ösüşleri gazanyp, eziz Watanymyzy has-da şöhratlandyrýarys. Kabul eden maksatnamalarymyzy, özgertmelerimizi hem-de geljegi uly taslamalarymyzy üstünlikli amala aşyryp, Garaşsyzlygymyzyň we Bitaraplygymyzyň ýoly bilen ynamly öňe barýarys.

Biz parahatçylyk söýüjilik, hoşniýetlilik, ynsanperwerlik ýörelgelerimize, türkmen halkynyň beýik ogly hem-de akyldary Magtymguly Pyragynyň: «Ýatsa-tursa hyýalyndan çykarmaz,//Kaýsy işe maýyl bolsa adamzat» diýen pähimine eýerip, dünýä halklary we ýurtlary bilen dost-doganlyk ýollaryny gurýarys. Birleşen Milletler Guramasy, Ýewropa Bileleşigi, Şanhaý Hyzmatdaşlyk Guramasy, Garaşsyz Döwletleriň Arkalaşygy, Ýewropada Howpsuzlyk we Hyzmatdaşlyk Guramasy, Goşulyşmazlyk Hereketi, Yslam Hyzmatdaşlyk Guramasy ýaly abraýly halkara guramalar, Aziýa we Aziýa — Ýuwaş umman sebitleri, Orta we Ýakyn Gündogar, Ýewropa hem-de Amerika ýurtlary bilen dostlukly gatnaşyklarymyzy has-da pugtalandyrýarys. Bularyň ählisi mähriban halkymyzy, Garaşsyz Watanymyzy hemmetaraplaýyn ösdürmekde, Bitarap döwletimiziň dünýädäki ornuny pugtalandyrmakda täze belent sepgitlere ýetmäge ruhlandyrýar.

Eziz watandaşlar!

Hormatly adamlar!

Sizi mukaddes Gurban baýramy bilen ýene-de bir gezek tüýs ýürekden gutlaýaryn. Size berk jan saglyk, uzak ömür, bagtyýarlyk we maşgala abadançylygyny arzuw edýärin. Mübärek Gurban baýramy günlerinde beren gurbanlyk sadakalaryňyz, eziz Watanymyzyň bagtyýarlygy, il-günümiziň abadançylygy üçin eden doga-dilegleriňiz, iň gowy arzuw-umytlaryňyz Gudraty Güýçli Beýik Allatagalanyň dergähinde kabul bolsun!

Türkmenistanyň Prezidenti 

Serdar BERDIMUHAMEDOW.

17-nji Ýewropa çempionatynyň 2-nji gününiň ilkinji 2 duşuşygynda Şweýsariýanyň hem-de Ispaniýanyň ýygyndylary garşydaşlarynyň derwezelerinden 3 gol geçirdiler.

«A» toparçada Şweýsariýanyň ýygyndysy saýlama tapgyrda üstünlikli oýun görkezen wengerleri 3-1 hasabynda ýeňip, çempionata şowly başlady. Şweýsariýalylara ýeňiş getiren gollary 12-nji minutda Kwadwo Dua, 45-nji minutda Mişel Ebişer hem-de oýna soň giren, möwsümiň agramly bölegini şikesde geçiren Bril Embolo geçirdi. Wengriýanyň ýeke-täk goluny bolsa 66-njy minutda Barnabis Warga öz adyna ýazdyrdy.

Güýçli ýygyndylaryň üçüsini özünde jemleýän «B» toparçanyň 1-nji oýnunda Ispaniýa bilen Horwatiýa duşuşdy. Berlinde geçirilen bu oýunda eýýäm 1-nji ýarymda ispanlar 3 gol geçirmegiň hötdesinden geldi. 29-njy minutda tapawutlanan Alwaro Morata çempionatyň taryhyndaky häzirlikçe iň köp gol geçiren 3-nji futbolçy boldy (8 gol). Duşuşygyň 32-nji minutynda Fabian Ruiz hasaby 2-0-a çykardy. 45+2-nji minutda-da ilkinji gezek Ýewropa çempionatynda gatnaşýan Dani Karwahal geçirdi. 2-nji ýarymda horwatlaryň tagallasy ýeterlik bolmady. Oýnuň 79-njy minutynda penaltini salyp bilmedik Petkowiç derwezesinden gaýdan topy soň tora dürs gönükdirdi. Ýöne emin bu goly VAR-yň görkezmesi boýunça hasaba alynmady. 3-0 hasabynda ýeňiş gazanan Ispaniýanyň indiki duşuşygy Italiýa bilen bolar. Duşuşykda esasy düzümde meýdança çykan Lamin Ýamal çempionatyň taryhynda oýnan iň ýaş futbolçy boldy (16 ýaş 338 gün).

Berlinde geçirilen bu oýunda eýýäm 1-nji ýarymda ispanlar 3 gol geçirmegiň hötdesinden geldi. 29-njy minutda tapawutlanan Alwaro Morata çempionatyň taryhyndaky häzirlikçe iň köp gol geçiren 3-nji futbolçy boldy (8 gol). Duşuşygyň 32-nji minutynda Fabian Ruiz hasaby 2-0-a çykardy. 45+2-nji minutda-da ilkinji gezek Ýewropa çempionatynda gatnaşýan Dani Karwahal geçirdi. 2-nji ýarymda horwatlaryň tagallasy ýeterlik bolmady. Oýnuň 79-njy minutynda penaltini salyp bilmedik Petkowiç derwezesinden gaýdan topy topardaky dagyň daşyndan soň tora saldy. Ýöne emin VAR-yň görkezmesi boýunça gol hasaba alynmady.3-0 hasabynda ýeňiş gazanan Ispaniýanyň indiki duşuşygy Italiýa bilen bolar. Duşuşykda esasy düzümde meýdança çykan Lamin Ýamal çempionatyň taryhynda oýnan in ýaş futbolçy boldy (16 ýaş 338 gün).

14-nji iýunda Türkmenistanyň Owganystandaky Baş konsullygy tarapyndan ýurdumyzda 2024-nji ýylyň «Pähim-paýhas ummany Magtymguly Pyragy» diýip yglan edilmegi hem-de beýik türkmen şahyry we akyldary Magtymguly Pyragynyň doglan gününiň 300 ýyllygy mynasybetli Hyrat welaýatynda ýaşaýan türkmen diasporasynyň wekillerinden ybarat bolan toparlaryň arasynda futzal ýaryşy guraldy. Bäsleşik Hyrat şäheriniň «Mirwais Sadek» sport toplumynda geçirildi.

Bu sport çäresine Owganystanyň Woleýbol federasiýasynyň hem-de Hyrat welaýatynyň bedenterbiýe we sport müdirliginiň ýolbaşçylary we şol welaýatda ýaşaýan türkmen diasporasynyň abraýly wekilleri myhman hökmünde gatnaşdylar.

Futzal boýunça geçirilen ýaryşy diňe bir sport baýramçylygy bolman, eýsem, dostlugyň, hoşniýetli goňşuçylygyň hem-de döwletara gatnaşyklarynyň nyşanyna öwrüldi.

Şeýlelikde, ýaryşyň ýeňijilerine Baş konsullygyň adyndan kuboklar we medallar, şeýle hem ýadygärlik sowgatlar gowşuryldy. Bu ýaryş türgenlerde we janköýerlerde ýatdan çykmajak täsirleri galdyrdy. Çäräniň ahyrynda bu ýere gelen myhmanlara we janköýerlere türkmen milli tagamlary hödür edildi.

Amerikanyň Milli hokkeý ligasy NHL-de Stenli Kubogy ugrundaky final duşuşyklarynyň 3-njisi geçirildi. Kanadada geçirilen «Edmonton Oýlers» – «Florida Panters» duşuşygynda myhmanlar ýeňiş gazandy. Çekeleşikli geçen oýunda «Florida Panters» garşydaşyny 4:3 hasap bilen ýeňlişe sezewar etdi. Duşuşykda ýeňiş gazanan toparyň gollaryny 18-nji minutda Raýnhart, 29-njy minutda Tarasenko, 33-nji minutda Bennett hem-de 35-nji minutda Barkow geçirdi. Ýer eýelerinden Fogeleniň (21), Brobergiň (46) hem-de Maklaudyň (54) şaýbalary ýeňşe ýeterlik bolmady.

Şeýlelikde, «Florida Panters» 3-nji duşuşygynda-da ýeňiş gazanyp, umumy hasapda 3:0 öňe saýlandy we çempionlyga bir ädim golaýlady. Olar 4-nji duşuşykda-da ýeňiş gazansa, taryhynda ilkinji gezek NHL-iň çempiony bolup, Stenli Kubogyny gazanarlar. «Edmonton Oýlers» bilen «Florida Pantersiň» arasyndaky 4-nji duşuşyk 16-njy iýunda ýene-de Kanadada geçiriler. Duşuşykda «Edmonton» topary ýeňiş gazansa, toparlaryň arasyndaky 5-nji oýun 9-njy iýunda Floridada oýnalar.

Futbol boýunça 17-nji Ýewropa çempionatyna badalga berlip, Mýunhen şäherindäki «Allianz Arena» stadionynda oýnalan Germaniýa - Şotlandiýa açylyş duşuşygynda ýer eýeleri uly hasap bilen ýeňiş gazandy. 5-1 hasabynda ýeňiş gazanan nemesler 1-nji ýarymda 3 gol geçirdiler. Onuň 10-njy minutynda Florian Wirts tapawutlanyp, 17-nji Ýewropa çempionatynyň ilkinji goluny geçirdi. Bu goldan 9 minut soň başga bir ýaş oýunçy Jamal Musiala hasaby 2-0-a çykardy. 1-nji ýarymyň ahyrynda emin şotlandiýalylardan goragçy Porteusa VAR-yň görkezmesi boýunça gyzyl kart görkezdi hem-de penaltı urgusyny belledi. Ony-da 45+1-nji minutda Kai Hawerts dürs urup, arany hasam açdy. 2-nji ýarymda-da oýnuň jylawyny doly özlerinde saklan ýer eýeleri ýene-de 2 gol geçirdiler. 2 goly hem oýna soň giren «Borussiýaly Dortmund» klubunyň oýunçylary öz atlaryna ýazdyrdylar. 68-nji minutda Fullkrug, 90+nji minutda-da Emre Jan geçirdi. Şotlandiýanyň ýeke-täk goşuny-da Germaniýany futbolçy, has takygy, 87-nji minutda Antonio Rudiger bilmezlikde öz derwezesinden girizdi.

Şunlukda, 5-1 hasabynda uly hasaply ýeňiş gazanan Germaniýanyň ýygyndysy özlerindäki çempionata ynamly başladylar.

Duşuşygyň iň ökde oýunçysy diýlip, Jamal Musiala saýlandy. Onuň dowamynda geçiren 102 pasynyň 101-sini ýoldaşlaryna takyk geçiren Toni Kroos toparynyň ýeňşine saldamly goşant goşdy.

Germaniýanyň Şotlandiýany 5-1 hasap esasynda ýeňen duşuşygy bilen açylan 17-nji Ýewropa çempionatynyň 2-nji gününde 3 duşuşyk geçiriler. Duşuşyklaryň ilkinjisi «A» toparçanyň, beýleki 2-si bolsa «B» toparçanyň oýunlary bolar.

Wengriýa – Şweýsariýa (18:00)
Aşgabat wagty bilen 18:00-da başlanjak oýunda Wengriýa bilen Şweýsariýanyň ýygyndylary duşuşar. Köln şäherindäki «RheinEnergieStadion»-da oýnaljak duşuşyga sloweniýaly Slawki Winçiç eminlik eder. Bu duşuşyk 2 toparyň arasyndaky 47-nji duşuşyk bolar. Yklymyň özara köp duşuşyk geçiren 2 toparynyň arasyndaky ozalky oýunlarda wengerler 30, şweýsarlar 11 gezek ýeňiş gazandy. 5 oýun deňlikde tamamlanyp, wengerleriň 151 goluna şweýsarlar 71 gol bilen jogap berdi. Iki topar Ýewropa çempionatynyň çäginde ilkinji gezek gabatlaşar.

Ispaniýa – Horwatiýa (21:00)
Günüň 2-nji duşuşygynda toparçalarda öňe saýlanýan oýunlaryň biri bolan Ispaniýa – Horwatiýa duşuşygydyr. 21:00-da başlanjak oýun angliýaly Maýkl Oliweriň eminlik etmeginde Berlindäki «Olimpiastadion»-da geçiriler. Bu olaryň özara 11-nji duşuşygy bolup, öňki 10 oýnuň 5-sinde ispanlar, 3-sinde horwatlar ýeňiş gazandy (2 oýun deňlikde tamamlandy). Gollarda 20-12 Ispaniýa öňde barýar. Bu olaryň Ýewropa çempionatlaryndaky 4-nji duşuşygy bolup, iki topar bassyr 3 çempionatdan bäri duşuşyp gelýär. 2012-nji ýylda toparçadaky oýunda Ispaniýa 1-0 (Nawas 88), 2016-njy ýylda toparçadaky duşuşykda Horwatiýa 2-1 (Kaliniç 45, Perişiç 87 – Morata 7) hasabynda ýeňipdi. 2020-nji ýylda-da 1/8 finalda 8 goluň geçirilen oýnunda esasy wagt 3-3 deňlikde tamamlanyp, Ispaniýa goşmaça wagtda 5-3 garşydaşyndan üstün çykypdy (Sarabiýa 38, Aspilikueta 57, Ferran Torres 77, Morata 100, Oýarzabal 103 – Pedri 20 ö.d., Orşiç 85, Paşaliç 90+2).

Italiýa – Albaniýa (00:00)
Günüň 3-nji we iň soňky oýny Italiýa bilen Albaniýanyň arasynda geçiriler. 00:00-da başlanjak oýnuň emini germaniýaly Feliks Swaýer bolup, duşuşyk Dortmunddaky «Westfalenstadion»-da oýnalar. Bu olaryň arasyndaky 5-nji duşuşyk bolup, mundan öňki 4 oýunda italýanlar ýeke gezek hem ýeňilmän, ählisinde-de Albaniýany ýeňmegi başardy.

Türkmenistanly meşhur futbol hünärmeni Gurban Berdiýewiň ýakynda Azerbaýjanyň «Turan» toparynyň baş tälimçisi bolmagy mümkin. Bu barada klubyň sport direktory Samed Nasibow «Sport24» neşirine maglumat berdi.

― Biz Gurban Bekiýewiç bilen onuň biz bilen işleşmegi dogrusynda gepleşikleri geçirdik, indi işiň diňe şertnama gol çekişäýmeli bölegi galdy. Ol ýakyn wagtda «Turanyň» baş tälimçisi bolup biler ― diýip, Nasubow aýdýar.

Azerbaýjanyň çempionatynyň geçen möwsüminde 48 utuk toplan «Turan» altynjy orny eýeledi.

Gurban Berdiýewiň soňky işlän toparynyň Mahaçkalanyň «Dinamosy» bolandygyny bu ýerde 2023-nji ýylyň iýul aýyndan şu ýylyň ýanwaryna çenli işländigini ýatladýarys.

Aziýanyň Futbol konfederasiýasynyň Kuala-Lumpur şäherindäki (Malaýziýa) ştab-kwartirasynda 17 ýaşa çenli ýetginjekleriň arasynda 2025-nji ýylda geçiriljek Aziýanyň kubogy üçin bije çekişlik boldy.

Bije çekişlige 43 ýygyndy gatnaşdy. Olar öz aralarynda 10 toparça bölündiler. Yklym çempionatynyň saýlama duşuşyklary şu ýylyň 19 ― 27-nji oktýabry aralygynda geçiriler.

Türkmenistanyň 17 ýaşa çenli ýetginjekler ýygyndysy bije çekişligiň netijesinde «D» toparçanyň wekili boldy. Bu toparçada türkmen futbolçylaryndan başga-da, Taýlandyň, Hindistanyň we Bruneýiň ýygyndylary hem bar.

Saýlama duşuşyklaryň netijesinde 10 toparçanyň ýeňijisi we toparçalarda ikinji orny eýelän ýygyndylaryň iň gowy netije görkezen 5-si yklym ýaryşynyň final bölegine gatnaşar. Aziýanyň kubogy geljek ýylyň 3-nji aprelinden 20-nji apreline çenli aralykda Saud Arabystanynda geçiriler.

Bije çekişligiň netijeleri:

• «A» toparça: Eýran, Iordaniýa (Ýer eýesi ― geljekde ý.e.), Siriýa, Gonkong, Hytaý, KHDR;
• «B» toparça: Owganystan, Bangladeş, Kamboja (ý.e.), Filippinler, Makau;
• «C» toparça: Koreýa Respublikasy, Hytaý (ý.e.), Bahreýn, Butan, Maldiwler;
• «D» toparça: Taýland (ý.e.), Hindistan, Bruneý, TÜRKMENISTAN;
• «E» toparça: Özbegistan, Yrak, Taýwan (ý.e.), Palestina;
• «F» toparça: Ýaponiýa, Katar (ý.e.), Mongoliýa, Nepal;
• «G» toparça: Awstraliýa, Indoneziýa, Kuweýt (ý.e.), Demirgazyk Marian adalary;
• «I» toparça: Ýemen, Wýetnam (ý.e.), Gyrgyzystan, Mýanma;
• «J» toparça: Täjigistan, Oman, Singapur (ý.e.), Guam.

Aziýanyň Futbol konfederasiýasynyň Kuala-Lumpurda (Malaýziýa) ýerleşýän merkezi edarasynda 20 ýaşa çenli futbolçylardan düzülen ýygyndy toparlaryň arasyndaky futbol boýunça Aziýanyň Kubogy – 2025-iň saýlama tapgyrynyň bijeleri çekildi.

Çekilen bijeleriň esasynda ýygyndy toparlaryň 45-si toparçalaryň onusyna bölündi.

Türkmen ýygyndysy Ýaponiýanyň, Gyrgyzystanyň hem-de Mýanmanyň ýygyndy toparlary bilen bilelikde «I» toparçada çykyş eder.   

Saýlama tapgyryň «I» toparçasynyň duşuşyklary şu ýylyň 21 — 29-njy sentýabry aralygynda Gyrgyz Respublikasynyň Bişkek şäherinde geçer.

Ýaşlaryň arasyndaky Aziýanyň Kubogy – 2025-iň final böleginiň geljek ýylyň 5 — 23-nji fewraly aralygynda Hytaýda geçjekdigini ýatladýarys. Bu tapgyra saýlama toparçalaryň onusynyň ýeňijileri hem-de ikinji ýeri eýelän ýygyndylaryň iň gowy netijäni görkezen bäşisi çykar.

Bijeleriň netijeleri:

• «A» toparça: Wýetnam (ýer eýesi), Siriýa, Bangladeş, Butan, Guam;
• «B» toparça: Özbegistan, Bahreýn, Taýwan (ýer eýesi), Kamboja, Nepal;
• «C» toparça: Koreýa Respublikasy, Liwan, BAE, Kuweýt (ýer eýesi), Demirgazyk Marian adasy;
• «D» toparça: Awstraliýa, Saud Arabystany (ýer eýesi), Palestina, Owganystan, Makao;
• «E» toparça: Täjigistan (ýer eýesi), Oman, Malaýziýa, Şri-Lanka, KHDR;
• «F» toparça: Indoneziýa (ýer eýesi), Ýemen, Timor-Leşti, Maldiwler;
• «G» toparça: Eýran, Mongoliýa, Hindistan, Laos (ýer eýesi)
• «H» toparça: Yrak, Tailand (ýer eýesi) Filippinler, Bruneý;
• «I» toparça: Ýaponiýa, Gyrgyz Respublikasy, Mýanma, Türkmenistan.
• «J» toparça: Iordaniýa, Katar (ýer eýesi), Singapur, Gonkong, Hytaý.

Ýene-de 2 günden başlajak 17-nji Ýewropa çempionatyna gatnaşýan ýygyndylaryň transfer bazaryndaky bahalary esasynda olaryň gymmaty hasaplandy. «Transfermarkt» saýtynyň maglumatlaryna salgylanylyp, Türkiýäniň «AA» habarlar agentligi tarapyndan düzülen sanawda iň gymmat topar Angliýanyň ýygyndysydyr. Çempionlygyň esasy dalaşgärlerinden bolan Angliýanyň düzümindäki 26 futbolçynyň bahasy 1,52 milliard ýewro deňdir. Bu ugurda Fransiýa 1,23 milliard ýewro bilen 2-nji, 1,05 milliard ýewro gymmaty bolan Portugaliýa 3-nji ýeri eýeleýär.

100 million ýewro hem ýetmeýän gymmaty bilen Rumyniýanyň ýygyndysy sanawyň iň aşaky ornunda barýar.

Umumylykda, çempionata gatnaşýan 24 ýygyndynyň bahasy 11 milliard 381 million ýewro deňdir.

1. Angliýa – 1,52 milliard ýewro;

2. Fransiýa – 1,23 milliard ýewro;

3. Portugaliýa – 1,05 milliard ýewro;

4. Ispaniýa – 965,5 million ýewro;

5. Germaniýa – 851 million ýewro;

6. Niderlandlar – 765 million ýewro;

7. Italiýa – 705,5 million ýewro;

8. Belgiýa – 584,5 million ýewro;

9. Daniýa – 415,5 million ýewro;

10. Ukraina – 379 million ýewro;

11. Horwatiýa – 327,7 million ýewro;

12. Türkiýe – 324,1 million ýewro;

13. Serbiýa – 313,4 million ýewro;

14. Şweýsariýa – 281,5 million ýewro;

15. Awstriýa – 237 million ýewro;

16. Polşa – 210,3 million ýewro;

17. Şotlandiýa – 207,4 million ýewro;

18. Çehiýa – 185,9 million ýewro;

19. Wengriýa – 165,45 million ýewro;

20. Gruziýa – 161,05 million ýewro;

21. Slowakiýa – 156,4 million ýewro;

22. Sloweniýa – 141,55 million ýewro;

23. Albaniýa – 111,6 million ýewro;

24. Rumyniýa – 92,13 million ýewro.

Milli ýygyndylaryň arasynda Ýewropa çempionatyna taýýarlyk hökmünde görülýän ýoldaşlyk duşuşyklary geçirilmegini dowam edýär. Çempionlygyň esasy bolmasa-da, dalaşgärlerinden diýlip görkezilýän 2016-njy ýylyň ýeňijisi Portugaliýanyň ýygyndysy öz meýdançasynda Irlandiýa bilen duşuşdy. 3-0 hasabynda ýeňiş gazanan Portugaliýanyň gollaryny Žoao Feliks (18) hem-de Kristiano Ronaldo (50, 60) geçirdi. Esasy düzümde meýdança çykyp, 2 gol geçiren ençeme rekordyň eýesi Ronaldo ýene bir taryhy rekordy täzeledi. Rekordlardan doýmaýan Ronaldu ýokary derejeli ýaryşlarda (çempionatlar, ligalar, kubok ýaryşlary...) 1226-njy gezek meýdança çykyp, dünýä rekordyny öz adyna geçirdi. Bu ugurda 1225 oýun bilen braziliýaly rowaýaty derwezeçi Rojerio Seni ozalky rekordyň eýesidi. Ronaldu milli çempionatlarda 698, kubok ýaryşlarynda 101, halkara klub ýaryşlarynda 220, milli toparda-da 207 duşuşykda meýdança çykdy.

Şeýle-de, Ronaldu milli topardaky gollarynyň sanyny 130-a ýetirip, öz rekordyny ösdürdi. Ol milli ýygyndynyň köýnekçesini 207-nji gezek geýip, bu babatda hem 2-nji ýerdäki futbolçy bilen arasyny açmagyny dowam edýär.

Şol sanda Ronaldu karýerasyndaky 894-nji we 895-nji gollaryny geçirdi. Ol ýene-de 5 gezek tapawutlansa, onda onuň gollarynyň sany 900-e ýeter.