Tennis boýunça möwsümiň 2-nji «Uly tuwalga» ýaryşy bolan «Rolan Garrosda», ýagny Fransiýanyň açyk çempionatynda ýarym finalçylar belli boldy. Zenanlaryň arasynda russiýaly Mirra Andreýewa sanawyň 2-nji belgilisi, çempionlygyň esasy dalaşgärlerinden belarusly Aryna Sabalenkany 2:1 hasabynda ýeňdi. 1-nji setde Andreýewa 7:6 asgyn gelse-de, 2-3-nji setlerde 6:4 hasaplar bilen garşydaşyndan üstün çykmagy başardy. 17 ýaşyndaky Andreýewa karýerasy boýunça ilkinji gezek «Uly tuwalga» ýaryşynda ýarym finalda çykyş eder. Ol bu ýaryşda soňky 27 ýylda ýarym finala çykan iň ýaş tennisçi bolmagy başardy. Onuň ýarym finaldaky garşydaşy italiýaly Jasmin Paolini bolar. Paolini çärýek finalda gazagystanly Ýelena Rybakinany utdy. (6:2, 4:6, 6:4). Ýarym finalyň beýleki jübütinde-de sanawyň 1-nji belgilisi polşaly Iga Şwentek bilen 3-nji orunda amerikaly Koko Gauff duşuşar. Soňky çempion Şwentek çärýek finalda çehiýaly Marketa Wondrouşowany 6:0, 6:2 hasaplar bilen ýeňdi. Gauff bolsa tunisli Uns Žaberi 3 setde (4:6, 6:2, 6:3) ýeňlişe sezewar etdi.

Ýarym final duşuşyklary şu gün oýnalar. Ýeňiş gazanan tennisçiler şenbe güni finalda duşuşarlar.

Erkekleriň arasyndaky ýarym finalda-da norwegiýaly Kasper Ruud bilen germaniýaly Aleksander Zwerew, ispaniýaly Karlos Alkaras bilenem italiýaly Ýannik Sinner duşuşar. Ruud serbiýaly Jokowiçiň ýaryşdan çekilmeginden soň ýarym finala çykdy. Zwerew bolsa 4 sagat 15 minutlap dowam eden çekeleşikli geçen oýundan soň awstraliýaly Aleks de Minaury 3 setde (6:4, 7:6, 6:4) ýeňliş sezewar etdi.

Mälim bolşy ýaly, Alkaras gresiýaly Stefanos Sisipasy, Sinner bolsa bolgariýaly Grigor Dimitrowy ýeňipdi. Erkekleriň arasyndaky ýarym final duşuşyklary anna güni, ýagny ertir geçiriler.

Ozal habar berşmiz ýaly, ertir – 6-njy iýunda Daşkentde DÇ-2026-nyň saýlamasynyň çäklerinde Türkmenistanyň we Özebegistanyň milli ýygyndylary güýç synanyşarlar. Şu gün toparlaryň baş tälimçileriniň we oýunçylarynyň gatnaşmagynda metbugat ýygnagy geçirildi. Oňa gatnaşan Türkmenistanyň milli ýygyndysynyň baş tälimçisi Mergen Orazow hem-de toparyň kapitany Arslanmyrat Amanow ertirki oýun barada pikir bildirdiler.

Mergen Orazow:

«Ilki bilen, mähirli garşylandyklary üçin Özbegistanyň Futbol Assosiasiýasyna minnetdarlyk bildirýärin. Duşuşyga oňat taýýarlyk gördük. «CAFA Nation’s cup» turnirinde we Özbegistana garşy geçirilen beýleki oýunlarda özümiziň nähili oýnamaga ukyplydygymyzy görkezipdik. Özbegistan güýçli milli ýygyndy. Düzüminde ýokary derejedäki oýunçylar bar. Biziň goragda oňat oýnamagymyz we pursatlarymyzdan peýdalanmagymyz gerek» diýip, baş tälimçi Mergen Orazow pikir bildirdi.

Toparyň kapitany Arslanmyrat Amanow bolsa ertirki oýun barada şeýle pikir bildirdi: «Özbegistanyň milli ýygyndysy güýçli garşydaş, toparçanyň faworiti. Biz göreşmegi bes etmek islämizok. Ertir owadan oýun görkezmäge çalşarys. Diňe goragda däl, paslaryň kömegi bilen hüjümde hem gowy oýny orta goýmagymyz gerek».

Dünýä çempionaty ― 2026-nyň saýlama tapgyrynyň çäginde Türkmenistan bilen Gonkongyň futbol ýygyndylarynyň arasynda geçiriljek duşuşygyň petekleri satuwa çykdy.

Duşuşyk 11-nji iýun güni Aşgabat şäherindäki «Aşgabat» stadionynda başlanar. Onuň sagat 20:00-da başlanmagyna garaşylýar.

Duşuşygyň peteklerini stadionyň kassasyndan satyn alyp bolar.

Kassanyň iş tertibi:

Ir sagat 09:00-dan agşam 21:00-a çenli (dynç günsüz).

Petekleriň bahasy:

30 manat.

6-njy iýunda Türkmenistanyň futbol boýunça milli ýygyndy topary Dünýä çempionaty – 2026-nyň hem-de Aziýanyň Kubogy – 2027-niň saýlama tapgyrynyň çäginde myhmançylykda Özbegistanyň ýygyndy topary bilen duşuşar.  

Duşuşyk Daşkendiň «Bunýodkor» stadionynda geçer. Oýnuň başlanýandygyny yglan edýän jürlewük Aşgabat wagty bilen 19:30-da ýaňlanar

Türkmen futbolçylary ýaşyl eşikde futbol meýdanyna çyksa, özbek ýygyndysy ak köýnekçede çykyş eder.

Bu duşuşygyň Özbegistanyň «SPORT TV» teleýaýlymynda hem-de Özbegistanyň Futbol assosiasiýasynyň UZBEKISTAN FA Ýutub-kanalynda görkezilmegine garaşylýar.

Türkmen küştçileri Hindistanyň Gandinagar şäherinde geçýän 20 ýaşa çenli ýaşlaryň arasyndaky dünýä çempionatynyň ikinji oýun gününi şowly jemlediler.

Çempionatda 44 ýurtdan 200-den gowrak küştçi çykyş edýär. 11 tapgyrda şweýsar usulynda geçýän ýaryş 13-nji iýunda jemlener.

Ikinji tapgyrdan soň 2 utukdan toplan Türkmenistanyň çempiony, gyzlaryň arasynda FIDE-niň ussady Merýem Agajanowa hem-de 20 ýaşa çenli gyzlaryň arasynda ýurdumyzyň çempiony, FIDE-niň ussady Lala Şöhradowa tamamlanan tapgyrlaryň ahyrkysynda degişlilikde Hindistandan bolan has ýaş bäsdeşlerini — Modipalli Diikşithuny we Drişti Goşy ýeňlişe sezewar etdiler.

Üçünji tapgyrda Merýem gara reňkli «küşt mallary» bilen FIDE-niň gazagystanly ussadynyň garşysyna çykar. Lala bolsa 18 ýaşa çenli gyzlaryň arasynda Ýewropanyň çempiony bolan ermenistanly küştçi bilen duşuşar.   

20 ýaşa çenli ýetginjekleriň arasynda wise-çempion Ahmet Gubataýew birinji tapgyry Ermenistandan halkara grossmeýster Emin Ogonýan bilen geçiren duşuşygyny deňlikde tamamlady. Ol ikinji tapgyrda Ermenistanyň ýene bir wekili, halkara grossmeýster Mamikon Garibýany ahmyrda goýdy. Ahmet üçünji tapgyrda FIDE-niň hindistanly ussady Apoorw Kamble bilen bilen küşt tagtasynyň başynda duşuşar.

14 ýaşa çenli gyzlaryň arasynda Türkmenistanyň çempiony Jahan Rejepowa hem-de birnäçe gezek ýurdumyzyň çemmiony bolmagy başaran Azym Saryýew bolsa ikinji tapgyrda ynamly ýeňiş gazandylar.

“E” toparynda Özbegistan milli ýygyndysyna garşy 2026-njy ýyldaky Dünýä çempionatynyň saýlama turniriniň ikinji raundynyň bäşinji tapgyryna taýynlyk görmek üçin Türkmenistanyň milli ýygyndysy Daşkentde ilkinji türgenleşigini geçirdi.

Özbegistan bilen Türkmenistanyň milli ýygyndy toparlarynyň arasyndaky duşuşygyň 6-njy iýunda penşenbe güni Bunýodkor stadionynda geçiriler we Aşgabat wagty bilen 19: 30-da başlar.

1-nji iýunda Antalýada Türkmenistan bilen Grenlandiýanyň milli ýygyndy toparlarynyň arasynda dostlukly oýun geçirildi. Duşuşyk 5: 0 hasabynda türkmen toparynyň ýeňişi bilen tamamlandy.

Dünýä çempionaty 2026. Saýlama turniri

Ikinji raund. "E" topary

5-nji tapgyr

• 6-njy iýun (penşenbe)
• Başlaýan wagty - 19:30
• Özbegistan - Türkmenistan
• Daşkent, Bunyodkor stadiony

4-nji iýunda Türkmenistanyň futzal boýunça Naýbaşy ligasynyň 8-nji tapgyry Aşgabat şäherinde geçirildi.

Alty futzal topary Türkmenistanyň çempionlygy ugrunda göreşýändigini ýatladýarys. Olaryň üçüsi – «Köpetdag», «Senagatbank» we «Migrasiýa» toparlary Aşgabada, ikisi – «Deňizçi» we Türkmenbaşynyň TNGIZT toparlary Balkan welaýatyna we «Turan» topary Daşoguz welaýatyna wekilçilik edýärler.

Türkmenistanyň Futbol Federasiýasynyň habaryna görä, milli çempionata gatnaşyjylar paýtagtymyzda üç tapgyr oýnarlar.

Öňki üç tapgyr Balkan welaýatyndaky «Awaza» milli syýahatçylyk zolagynda ýerleşýän «Awaza» sport toplumynda geçirildi. Soňky 7-nji tapgyryň duşuşygynda futzal boýunça Naýbaşy ligasynyň öňbaşçysy ýeňiş gazandy. «Senagatbank» topary «Turan» toparyny 5:1 hasabynda utdy. Ýeňijilerden: Yslam Çörliýew (9-njy), Rahatmyrat Nepesow (12-nji), Röwşen Orazmuhammedow (25-nji), Şamuhammet Babaýew (26-njy) we Aýmyrat Magtymow (27-nji minutlarda) tapawutlandylar. «Turan» toparynyň derwezesine pökgi salmaga derek 29-njy minutda Parahat Illiýew öz derwezesine bir pökgi saldy.

Türkmenistanyň häzirki dört gezek çempiony «Deňizçi» topary geçen ýylky çempionatda kümüş medal gazanan «Köpetdag» toparyndan 5:3 hasabynda üstün çykdy. Türkmenbaşynyň Halkara deňiz portunyň toparyndan Kiril Çaryýew (3-nji we 19-njy minutlarda), Abdylla Nursähedow (12-nji we 32-nji minutlarda) iki, Alişer Hudaýbergenow (39-njy minutda) bir pökgi geçirdiler. «Köpetdag» toparyndan Gurbangeldi Sähedow (34-nji minutda) bir pökgi geçirdi. «Deňizçi» toparynyň oýunçylary Rehimberdi Halmämmedow (15-nji) we Maksat Soltanow (34-nji minutlarda) öz derwezesine hersi bir pökgi geçirdiler.

7-nji tapgyryň başga bir duşuşygynda TNGIZT topary oýnuň gutarmagyna 2 minut galanda Taňryberdi Amangeldiýewiň tagallasy bilen «Migrasiýa» toparyny 1:0 hasabynda ýeňdi.

Futzal boýunça Naýbaşy ligasynyň Aşgabat şäherinde geçiriljek 8-nji tapgyryndan öň «Senagatbank» topary 21 utuk bilen öňde barýar. «Deňizçi» topary öňbaşçydan 3 utuk yzda. «Köpetdag» topary 10 utuk toplap üçünji orny eýeleýär. «Migrasiýa» topary 6, TNGIZT topary 5, soňky orunda «Turan» topary 1 utuk bilen ýaryşyň sanawunda ýerleşdiler.

8-nji tapgyrda: «Turan» – «Köpetdag», «Deňizçi» – «Migrasiýa» we TNGIZT – «Senagatbank» toparlary duşuşarlar.

 3-nji iýunda Aşgabadyň Olimpiýa şäherçesiniň «Başa-baş söweş sungaty» sport toplumynda paýtagtymyzyň «Arkalaşygyň täze sport mümkinçilikleriniň şäheri» diýlip yglan edilmegi mynasybetli «Aşgabat – sport mümkinçilikleriniň we üstünlikleriniň şäheri» ady bilen baýramçylyk çäreleri geçirildi.

«Başa-baş söweş sungaty» sport toplumynyň esasy girelgesiniň öňünde türkmen türgenleriň üstünlikleriniň sergisi guraldy, onda abraýly halkara ýaryşlarynda gazanylan dürli derejeli baýraklar görkezildi.

Hormatly Arkadagymyzyň ýol-ýörelgelerine eýerip, eziz Diýarymyzda bedenterbiýäni we sporty ösdürmäge gönükdirilen asylly başlangyçlarymyz dünýäniň abraýly sport düzümleri tarapyndan giň goldawa eýe bolýar. Halkara sport federasiýalarynyň ýolbaşçylarynyň ýurdumyza iş sapary bilen gelmekleri sport hyzmatdaşlygynda täze sahypalary açýar. Dostlugyň we parahatçylygyň, sportuň hem-de ynsanperwerligiň belent ýörelgelerini rowaçlandyrýan, halklaryň agzybirligini, jebisligini pugtalandyrýan döwlet syýasatymyzyň netijesinde, Türkmenistan halkara sport ýaryşlarynyň geçirilýän mekanyna öwrüldi diýlip, hormatly Prezidentimiz Serdar Berdimuhamedowyň dabaraly çärä gatnaşyjylara iberen Gutlagynda bellenilýär. 

Çäräniň dowamynda dünýä sportunyň we syýasatynyň wekilleriniň onlaýn tertibindäki wideoçykyşlary diňlendi. Olar Türkmenistanyň sport mümkinçiliklerini hem-de halkara sport arenasyndaky geljegini tassykladylar. Çykyş edenleriň arasynda golaýda Aşgabatda bolan Halkara tennis federasiýasynyň prezidenti Dewid Haggerti hem bar.

Şeýle hem bu ýerde şu günki şanly waka mynasybetli baýramçylyk konserti we halkara ýaryşlarynda baýrakly orunlara mynasyp bolan türgenleriň görkezme çykyşlary guraldy.

Ogulşat Amanowa, agyr atletika boýunça şu ýyl Peruda geçen ýetginjekleriň arasyndaky dünýä çempionatynyň wise-çempiony

Çärede sportuň we sagdyn durmuş ýörelgesiniň wagyz edilmegi, ýurdumyzda sportuň dürli görnüşleri bilen meşgullanmak we täze sport ýeňişlerini gazanmak babatda  döredilen mümkinçilikler üçin çuňňur hoşallyk bildirip, halkara ýaryşlarynyň ýeňijileri döwlet Baştutanymyz Serdar Berdimuhamedowa we Gahryman Arkadagymyza tüýs ýürekden berk jan saglyk, Watanymyzyň we halkymyzyň bähbidine alyp barýan giň gerimli işlerinde üstünlikleri arzuw etdiler.

BMG-niň Baş Assambleýasy tarapyndan 2018-nji ýylda Türkmenistanyň başlangyjy bilen yglan edilen Bütindünýä welosiped güni mynasybetli Türkmenistanyň daşary ýurtlardaky diplomatik wekilhanalarynda welosipedli ýörişlerdir sport çäreleri geçirildi. Şeýle çäreler Magtymguly Pyragynyň doglan gününiň 300 ýyllygyna bagyşlandy.

Giň gerimli welosipedli ýörişler London, Buharest, Er-Riýad, Dubaý, Ýerewan we Tbilisi şäherlerinde, şeýle hem BAE, Russiýa, Germaniýa, Gazagystan, Fransiýa, Hindistan, Pakistan ýaly ýurtlarda geçirildi. Çäreler ýerli häkimlikleriň, sport federasiýalarynyň we beýleki hyzmatdaşlaryň goldawy bilen Türkmenistanyň ilçihanalary hem-de konsullyklary tarapyndan guraldy.

Köpçülikleýin ýörişlere ýurduň diplomatik wekilhanalarynyň işgärleri we olaryň maşgala agzalary, türkmen diasporasynyň wekilleri hem-de talyplar gatnaşdylar. Durnukly ösüş maksatlaryna ýetmäge goşant goşup, sagdyn durmuş ýörelgesini hem-de ekologiýa taýdan arassa ulag usullaryny wagyz edýän welosipedli ýörişler şäheriň merkezi köçelerinde we seýilgählerde geçirildi.

Bu çäreler halkara hyzmatdaşlygyň we dostlugyň nyşanyna öwrüldi. Ol welosiped sürmegiň saglygy berkitmekdäki hem-de daşky gurşawy goramakdaky ähmiýetini özünde jemledi.

3-nji iýunda Bütindünýä welosiped gününiň dabaralandyrylýan gününde Aşgabatda hormatly Prezidentimiz Serdar Berdimuhamedowyň gatnaşmagynda köpçülikleýin welosipedli ýöriş geçirildi.

Bu gezekki welosipedli ýöriş Çandybil şaýolunyň we Bekrewe köçesiniň çatrygynda gurlan «Welosiped» binasynyň ýanyndan badalga aldy.

Ir bilen bu ýere ýurdumyzyň ýolbaşçylar düzümi, talyplar, halk hojalygynyň dürli pudaklarynyň işgärleri ýygnandylar. Şolaryň hatarynda ýurdumyzda işleýän diplomatik wekilhanalaryň we halkara guramalaryň ýolbaşçylary hem boldy. Ýurdumyzyň sungat ussatlarynyň Watanymyzyň gülläp ösüşini, türkmen sportuny wasp eden joşgunly aýdym-sazly çykyşlary özboluşly baýramçylyk sowgadyna öwrüldi.

Döwlet Baştutanymyz köpçülikleýin welosipedli ýörişe badalga berip, ajaýyp çärä gatnaşyjylaryň kerweniniň öňüni çekdi. Hormatly Prezidentimiziň yzysüre hemmeler paýtagtymyzyň Çandybil we Bitarap Türkmenistan şaýollary boýunça agzybirlikde herekete başladylar.

Ýeri gelende bellesek, Türkmenistanyň başlangyjy bilen 2018-nji ýylyň 12-nji aprelinde BMG-niň Baş Assambleýasynyň 72-nji sessiýasynyň 82-nji plenar mejlisinde 3-nji iýuny «Bütindünýä welosiped güni» diýip yglan etmek hakynda, 2022-nji ýylyň 15-nji martynda BMG-niň Baş Assambleýasynyň 76-njy sessiýasynyň 61-nji plenar mejlisinde «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamalaryň kabul edilmegi ýurdumyzyň dünýä jemgyýetçiligini sagdyn ýaşaýşa çagyrmakdaky, döwletleriň arasynda ekologik abadançylygy wagyz etmekdäki möhüm ädimleri boldy.

Säher bilen tomus paslynyň ýakymly howasynyň, ak mermerli Aşgabadyň ajaýyp görnüşiniň köpçülikleýin welosipedli ýörişe gatnaşyjylarda buýsanç duýgusyny döredendigini bellemek gerek. Çünki döwlet Baştutanymyzyň başyny çeken welosipedli ýörişine gatnaşyjylaryň hatarlary paýtagtymyzyň ýollary boýunça hereketini dowam etdirdiler. Şeýlelikde, bu baýramçylyk welosipedli ýörişi biziň jemgyýetimiziň jebisliginiň, türkmenistanlylaryň belent ynsanperwer gymmatlyklara üýtgewsiz ygrarlylygynyň ýene bir aýdyň subutnamasy boldy.

Hormatly Prezidentimiz Serdar Berdimuhamedow Italiýa Respublikasynyň Prezidenti Serjio Mattarella we ýurduň dostlukly halkyna Italiýanyň milli baýramy — Respublika güni mynasybetli tüýs ýürekden gutlaglaryny, iň gowy arzuwlaryny iberdi.

Döwlet Baştutanymyz şu ýakymly mümkinçilikden peýdalanyp, Prezident Serjio Mattarella berk jan saglyk, bagtyýarlyk, Italiýa Respublikasynyň dostlukly halkyna bolsa parahatçylyk, abadançylyk hem-de rowaçlyk arzuw etdi.

Türkiýäniň Antalýa şherinde okuw-türgenleşik ýygnanyşygyny geçirýän Türkmenistanyň futbol boýunça milli ýygyndysy 1-nji iýunda Grenlandiýanyň milli ýygyndy topary bilen halkara ýoldaşlyk duşuşygyny geçirdi. TFF-niň berýän habaryna görä, Türkmenistanyň milli ýygyndysy garşydaşyndan 5:0 hasabynda üstün çykdy. Ýygyndy topara ýeňiş getiren toplary Elman Tagaýew (2), Didar Durdyýew, Şanazar Tirkişow hem-de Alibek Abdyrahmanow öz atlaryna ýazdyrdylar.

Ýeri gelende bellesek, Türkmenistanyň futbol boýunça milli ýygyndysy 26-njy maýdan 4-nji iýuna çenli aralykda Türkiýe Respublikasynyň Antalýa şäherinde okuw-türgenleşik ýygnanyşygyny geçirýär. Bu ýygnanyşyk Dünýä çempionaty ― 2026-nyň saýlama tapgyrynyň çäklerinde 6-njy iýunda Özbegistanyň (Daşkent şäheri), 11-nji iýunda bolsa Gonkongyň (Aşgabat şäheri) ýygyndylary bilen geçiriljek duşuşyklara taýýarlygyň esasy tapgyryna öwrüler.

Türkmenistanyň milli toparynyň Gonkongyň milli ýygyndysy bilen boljak duşuşygynyň «Aşgabat» stadionynda geçirilýändigini ýatladýarys.