Garyşyk söweş sungaty boýunça türkmenistanly türgen (MMA) Döwletjan Ýagşymyradow «Bellatoryň» ýarym agyr agramdaky reýtinginde bäşinji orna göterildi. Bu barada promouşeniň resmi saýtynda habar berildi.

Ýeri gelende ýatlatsak, Döwletjan Ýagşymyradow 8-nji oktýabrda «Bellator 300» turniriniň çäginde Polşaly Maseý Rozanskini ýeňlişe sezewar edipdi. Doly üç raund dowam eden şol tutluşykda eminler biragyzdan türkmen türgeniniň ýeňşini yglan edipdiler.

Döwletjan Ýagşymyradow üçin şol ýeňiş «Bellatordaky» bassyr üçünji üstünlik boldy. Onuň umumy karýerasyny hasaba alanyňda, häzirki wagtda Döwletjanyň 21 ýeňşi, 7 ýeňlişi we 1 deňligi bar.

Dubaý (BAE) şäherinde okuw türgenleşik ýygnanyşygyny geçirýän Türkmenistanyň futbol boýunça milli ýygyndysynyň ýerli “Dubai United” topary bilen geçirjek ýoldaşlyk duşuşygyndaky meýdana çykjak esasy düzümi belli boldy. Ýurdumyzyň milli ýygyndysynyň esasy düzümi şu oýunçylardan ybarat: Rasul Çaryýew, Yhlas Toýjanow, Güýçmyrat Annagulyýew, Abdy Bäşimow, Arzuwguly Sapargulyýew, Teýmur Çaryýew, Döwran Hojamämmedow, Begmyrat Baýow, Şanazar Tirkişow, Altymyrat Annadurdyýew, Elman Tagaýew.

Ýeri gelende bellesek, Türkmenistanyň futbol boýunça milli ýygyndysy 2026-njy ýylda geçiriljek dünýä çempionatynyň saýlama tapgyrynyň öňüsyrasy BAE-niň Dubaý şäherinde halkara okuw-türgenleşik ýygnanyşygyny geçirýär. Okuw-türgenleşik ýygnanyşygy 18-nji oktýabra çenli dowam eder.

Ýeri gelende bellesek, geçirilen bije çekişligiň netijesinde Dünýä çempionaty – 2026-nyň saýlama tapgyrçasynda “E” toparça düşen Türkmenistanyň milli ýygyndysy Eýranyň hem-de Özbegistanyň ýygyndy toparlary bilen güýç synanyşar. Bu toparçanyň dördünji wekili birinji saýlama tapgyrynda güýç synanyşjak Gonkong bilen Butanyň milli ýygyndylaryň arasyndaky ýeňiji bolar.

Türkmenistanyň milli ýygyndysynyň dünýä çempionatynyň saýlama tapgyryndaky ilkinji duşuşygyny 16-njy noýabrda Özbegistanyň milli ýygyndysynyň garşysyna geçirer.

Mundan ozal ýetginjekler we ýaşlar ýygyndylarynyň düzüminde çykyş eden «Ahalyň» goragçysy Hakmuhammet Bäşimow ilkinji gezek Türkmenistanyň milli ýygyndysynyň düzümine çagyryldy. Bu barada milli ýygyndynyň metbugat gullugy habar berdi.

23 ýaşly oýunçy Dubaýda geçiriljek okuw-türgenleşik ýygnanyşygyna gatnaşar. Onuň dowamynda DÇ-2026-nyň saýlama tapgyryna taýýarlyk görýän türkmen ýygyndysy BAE-niň çempionatynda çykyş edýän toparlaryň ikisi bilen ýoldaşlyk duşuşygyny geçirer.

Maglumat üçin, Hakmuhammet Bäşimow 2023-nji ýylyň ýanwaryndan bäri «Ahalyň» düzüminde oýnaýar. Ol 19-njy sentýabrda, «Al-Feýha» (Saud Arabystany) bilen oýunda AFK Çempionlar ligasyndaky debýutyny amala aşyryp, Elman Tagaýewe golly pas geçirmegi başardy hem-de toparynyň ýeňşine uly goşant goşdy.

Ýeri gelende bellesek, noýabr aýynda Aziýa yklymynda DÇ-2026-nyň saýlama tapgyryna badalga berler. Saýlama tapgyrynyň «E» toparçasyndan orun alan Türkmenistanyň ýygyndysy Eýran, Özbegistan hem-de Gonkong/Butan jübütiniň ýeňijisi bilen güýç synanyşar. Mergen Orazowyň şägirtleri saýlama tapgyryna 16-njy noýabrda Özbegistan bilen boljak oýun arkaly girişerler.

23-nji sentýabrdan 8-nji oktýabra çenli aralykda Hytaýyň Hançžou şäherinde geçirilen Aziýa oýunlarynda türkmenistanly türgenler dürli derejeli medallaryň 7-sine mynasyp boldular.

Yklymyň iň iri sport baýramçylygyna 45 döwletden 15 müňe ýakyn türgen gatnaşdy. Türkmenistan bu abraýly ýaryşa 67 türgen bilen gatnaşyp, bir kümüş medala we bürünç medallaryň altysyna mynasyp boldy.

Türkmen ýygyndysynyň kümüş medalyny kuraş boýunça halkara derejeli sport ussady Tejen Tejenow gazandy. Mälim bolşy ýaly, ol 90 kilograma çenli agram derejesinde güýçli garşydaşlarynyň ençemesinden üstün çykyp, diňe finaldaky garşydaşyndan asgyn geldi.

Şeýle hem dzýudoçy Maýsa Perdäýewa, kuraşçylar Aýnur Amanowa bilen Işanmyrat Ataýew, boksçy Baýramdurdy Nurmuhammedow, erkin göreşiň wekili Döwletmyrat Orazgylyjow hem-de karateçi Baýry Baýryýew dagylar bürünç medallara mynasyp boldular.

Türkmenistanly türgen Döwletjan Ýagşymyradow Kaliforniýada geçirilen «Bellator 300» turniriniň çäginde polşaly Maseý Rozanskini ýeňlişe sezewar etdi.

Ýarym agyr agramda geçirilen tutluşyk eminleriň biragyzdan gelen netijesine görä — 30-27, 29-28, 29-28 hasabynda Döwletjan Ýagşymyradowyň peýdasyna tamamlandy.

Şeýlelikde, Döwletjan Ýagşymyradow professional karýerasyndaky 21-nji, «Bellatorda» bolsa 3-nji ýeňşini gazandy.

Türkmenistanly boksçy Baýramdurdy Nurmuhammedow şu günler Hytaý Halk Respublikasynyň Hançžou şäherinde geçirilýän 19-njy Aziýa oýunlarynda bürünç medala mynasyp boldy. Bu barada «Türkmenistan: Altyn asyr» elektron gazeti habar berýär. Türkmen türgeni Oýunlardaky aýgytlaýjy tutluşygyny Aziýa oýunlary ― 2018-iň çärýek finalçysy, taýwanly türgen Kan Çia Wei bilen geçirdi.

Boks şu Oýunlarda iň gowulara Pariž ― 2024-e ýollanma berýän 9 sport görnüşiniň biri. Şonuň üçin hem boks boýunça ýaryşlara gyzyklanma uly boldy. Şeýlelikde, Baýramdurdy Nurmuhammedow diňe bir bürünç medal gazanmak bilen çäklenmän, Parižde çykyş etmek mümkinçiligini hem artdyrdy.

Bir hakykaty aýratyn nygtamak gerek: heniz aýgytlaýjy tutluşyk başlanmanka hem boks bilermenleriniň aglabasy türkmenistanly türgeniň ýeňiş gazanjakdygyna ynam bildirdi. Bu ýönelige däldir. Çünki Magtymguly etrabynda önüp ösen 21 ýaşly boksçy Oýunlardaky ilkinji tutluşygynda Daşkent ― 2023 dünýä çempionatyna gatnaşyjy täjigistanly garşydaşy Dawud Mahkamowy 5:0 hasabynda ýeňdi. Şondan soň ol palestinaly Nidal Fokaha bilen mongoliýaly Tuguldur Býambatsgotdan hem üstün çykdy. Kan Çia Wei bolsa ýarym finaldan öň gyrgyzystanly Nuradin Rustambek uuluny, şri-lankaly Niraja Galani Gamageni we malaýziýaly Bin Çe Azmi Mohd Aswany ýaryşdan çykaryp, türkmenistanly boksçynyň garşydaşy boldy. Aýgytlaýjy tutluşygyň netijesinde ol ýaryşy bürünç medal bilen tamamlady.

Şeýlelikde, Baýramdurdy Nurmuhammedow şu gezekki Oýunlarda medal gazanan bäşinji türkmen türgeni boldy. Ondan ozal kuraş boýunça Tejen Tejenow bilen Işanmyrat Ataýew kümüş, Aýnur Amanow bolsa bürünç medal gazanypdy. Dzýudoçy Maýsa Pardaýewa hem ýaryşy bürünç medal bilen tamamlady.

ХIХ tomusky Aziýa oýunlarynyň şu gün säher bilen başlanan kuraş boýunça ýaryşlaryndan hoş habarlar gelip gowuşdy. Türkmen ýygyndysyndan Tejen Tejenow hem-de Aýnur Amanowa uly üstünlige ýetdi.

90 kilogramdan ýokary agram derejesindäki ýaryşda Türkmenistanyň Gurluşyk we binagärlik ministrliginiň Gurluşyk we binagärlik sport kluby hojalyk müdirliginiň türgeni Tejen Tejenow kümüş medala eýe boldy. Türkmen pälwany ýaryşyň 1/8 finalynda gazagystanly Nurdaulet Žarylgapowy ýeňdi. Çärýekfinalda Gyrgyz Respublikasyndan Bekbolot Toktogomowy ahmyrda goýmagy başardy — 3:0. Ýarymfinalda Koreýa Respublikasyndan bolan Junýon Çony ynamly ýeňen (10:0) ildeşimiz diňe finaldaky garşydaşyndan — özbegistanly Muhsin Hisomiddinowdan asgyn geldi. Munuň özi ildeşimiziň kümüş medala eýe bolandygyny görkezýär.

52 kilogram agram derejesinde çykyş edýän Lebap welaýatynyň bedenterbiýe we sport baradaky Baş müdirliginiň Türkmenabat şäheriniň 7-nji sport mekdebiniň tälimçi-mugallymy Aýnur Amanowa hormat münberiniň üçünji basgançagyna çykdy. 1/8 finalda Fam Nguen Hong Mony (Wýetnam) 10:0 hasabynda ýeňen zehinli gyz soňra Sawira Dia Fitri Rizkiantini (Indoneziýa) ýeňlişe sezewar etdi — 5:0. Çärýekfinalda koreýaly Ýonjiden (3:0) üstün çykan Aýnur ýarymfinalda özbegistanly Hilola Ortikboýewany ýeňip bilmedi we Oýunlaryň kuraş ýaryşynyň bürünç medalyna eýe boldy.

Türkmenistanly türgenler Aziýa oýunlarynyň ilkinji gününde sportuň 4 görnüşi — suwda ýazmek, dzýudo, boks we uşu-sanda boýunça ýaryşa girişdiler. Bu barada «Türkmenistan: Altyn asyr» elektron neşiri habar berdi.

100 metr aralyga erkin usulda suwda ýüzmekde Musa Jalaýew 23-nji netijäni görkezdi. Merdan Ataýew bolsa 100 metr aralyga arkanlygyna ýüzmekde finala çykyp bilmedi.

Dzýudo boýunça Aýbek Ömirow we Hekim Agamammedow ilkinji oýunlarynda ýeňiş gazandylar, ýöne ikinji tapgyrda Özbegistana we Koreýa Respublikasyna wekilçilik edýän garşydaşlaryndan asgyn geldiler. Kurbanaý Kurbanowa we Saýara Rozyýewa bolsa Aziýa oýunlaryndaky ýörişlerini birinji tapgyrda tamamladylar.

Boks boýunça Hursand Imankuliýew ilkinji söweşde Mongoliýanyň ýygyndysynyň agzasy, 2023-nji ýyldaky dünýä çempionatynyň finalçysyndan ýeňlişe sezewar bolup, ýaryşy terk etdi.

Uşu-sanda boýunça Agajumageldi Ýazymow 60 kilograma çenli agram derejesinde ýaryşyň ikinji tapgyryna çykdy. Ol mongoliýaly garşydaşynyň agramynyň bellenilen mukdardan agyr gelendigi sebäpli, tehniki ýeňiş bilen indiki tapgyryň ýollanmasyna eýe boldy.

Ýeri gelende ýatlatsak, ХIХ tomusky Aziýa oýunlary 8-nji oktýabra çenli dowam eder. Aziýa oýunlarynda türkmenistanly türgenler 3x3 basketbol, boks, erkin we grek-rim göreşi, jiu-jitsu, dzýudo, kuraş, karate, ýeňil atletika, suwda ýüzmek, agyr atletika we uşu boýunça medallar ugrunda göreşerler.

Aşgabat şäherinde 11-nji sentýabrda başlanan tennis boýunça Türkmenistanyň çempionaty dowam edýär. «Aşgabat» köpugurly sport toplumynyň tennis kortlarynda geçirilýän ýaryşa ýurduň dürli sebitlerinden dürli ýaş derejelerindäki türgenler gatnaşýar.

18 ýaşdan uly erkekleriň arasynda ýarym finala çykan tennisçiler belli boldy. Ýarym finalda Ýuriý Rogusskiý Hajymyrat Çaryýew bilen, Meýlis Orazmuhammedow bolsa Altymyrat Gurbanow bilen duşuşar. Ilima Guseýnowa bilen Sabrina Rahmanowa bolsa zenanlaryň arasynda finala çykdy. Bürünç medal ugrunda Rožan Garajaýewa bilen Aýşa Bikbulatowa güýç synanyşar.

Ýaryşyň ýeňijileri şu ýylyň 16 — 23-nji oktýabry aralygynda Türkiýede geçiriljek Dewisiň kubogyna gatnaşmaga hukuk gazanar.

Çempionatyň ýapylyş dabarasy 17-nji sentýabrda bolar.

Türkmenistanly suwda ýüzüjiler 12 — 16-njy sentýabr aralygynda Täjigistanyň Duşenbe şäherinde geçiriljek halkara ýaryşa gatnaşarlar.

ORIENT-iň habar bermegine görä, halkara ýaryşa Türkmenistandan Abdyrahman Agamyradow, Muhammetmyrat Gutlyýew, Gurban Hommadow, Seýran Nurmyradow, Roman Şabelnik, Waleriýa Mirenskaýa we Ogulmerjen Nuraýewa dagylar wekilçilik eder. Türkmen ýygyndysyna Rustem Esenow bilen Walentin Gorşkow ýolbaşçylyk eder.

Halkara ýaryşa türkmenistanly ýüzüjilerden başga-da, Gazagystanyň, Gyrgyzystanyň, Täjigistanyň we Özbegistanyň wekilleri gatnaşarlar.

Türkmenistanly pälwan Döwletjan Ýagşymyradowyň hem agza bolup durýan «Bellator» promouşeniniň satylmagy ahmal. Häzirki günlerde PFL promouşeni «Bellatory» satyn almak üçin «Paramount Global» kompaniýasy bilen gepleşikleri geçirýär.

Resmi çeşmeleriň habar bermegine görä, taraplaryň 500 million nyrhda ylalaşmaklaryna garaşylýar. «Paramount» nagt pul bilen birlikde PFL-iň «Bellatordaky» tutluşyklaryndan paý alar. Bu söwda-da PFL-ä Saud Arabystanynyň maýa goýum kompaniýasy ýardam berer.

«Bellator» 2008-nji ýyldan bäri «Paramount» kompaniýasyna degişli. Promouşene 2014-nji ýyldan bäri «Strikeforce» kompaniýasynyň ozalky ýolbaşçysy Skott Koker ýolbaşçylyk edýär.

Ýaponiýanyň Daşary işler ministrligi Türkmenistanyň Karate federasiýasyny Hormat haty bilen sylaglady. «Orient» Hormat hatynyň türkmen federasiýasyna sportuň şu görnüşini ösdürmekde bitiren hyzmatlary üçin gowşurylandygyny ýazýar.

Abraýly sylagy Türkmenistanyň Karate federasiýasynyň ýolbaşçysy Ýaşuzak Mämmetnazarowa Ýaponiýanyň Türkmenistandaky Adatdan daşary we Doly ygtyýarly ilçisi Ýamamoto Hiroýuki gowşurdy.

Ýeri gelende bellesek, Karate federasiýasy ýurtda bu sport görnüşi boýunça yzygiderli ýaryşlary gurap gelýär.

Esaslandyrylan senesinden, ýagny 1978-nji ýyldan bäri türkmenistanly karateçileriň sany 40-dan 38 müňe çenli artdy, diýip Ýaponiýanyň Türkmenistandaky ilçihanasy özüniň sosial hasabynda mälim edýär.

Degişli sylagy bermek hakyndaky çözgüt 2020-nji ýylda kabul edilipdi, ýöne ony sylaglamak dabarasy dünýäni gurşap alan koronawirus ýagdaýlary sebäpli yza süýşürilipdi.