«Roma» futbol kluby Daniýe De Rossiniň baş tälimçi wezipesinden gidendigini yglan etdi. Klubyň ýolbaşçylary Italiýanyň çempionatynyň ilkinji dört tapgyrynda topar bary-ýogy 3 utuk gazanyp, ýaryş tertibiniň 16-njy ornunda ýerleşenden soň bu karara geldiler diýip, TASS habar berýär.

Klubyň resmi beýanatynda topary islenýän ösüş ýoluna getirmek maksady bilen bu kararyň toparyň bähbidine kabul edilendigi aýdylýar. «Roma» De Rossiniň soňky aýlardaky zähmeti, höwesi we yhlasy üçin oňa minnetdarlyk bildirdi.

41 ýaşly De Rossi «Roma» toparynyň baş tälimçisi wezipesini ýakynda, şu ýylyň 16-njy ýanwarynda kabul edipdi. Ol bu wezipede portugaliýaly hünärmen Žoze Mourinýonyň ornuny aldy.

Tälimçilik karýerasyna başlamazdan ozal De Rossi «Roma» toparynyň eýýäm rowaýata öwrülen oýunçysydy. Ol 2002-nji ýyldan 2019-njy ýyla çenli klubda çykyş edip, 616 oýunda 63 pökgi geçirdi we 60 netijeli pas berdi. Topar bilen bilelikde iki gezek Italiýanyň Kubogyny we bir gezek ýurduň Superkubogyny gazandy.

De Rossi, şeýle hem, Italiýanyň milli ýygyndysynda baý tejribe toplap, 117 oýunda çykyş etdi, 21 gol geçirip, 5 netijeli pas berdi. Milli ýygyndy bilen onuň gazanan esasy üstünligi 2006-njy ýyldaky dünýä çempionatynyň ýeňşidir.

Aşgabadyň «Altyn asyr» futbol topary 18-nji sentýabrda AFK-nyň ikinji derejeli Çempionlar ligasynyň toparçalaýyn tapgyryndaky ilkinji duşuşygyny Yragyň «Eýr Fors» toparyna garşy geçirdi. Bagdatda geçirilen bu oýun 2:1 hasabynda «Eýr Forsuň» peýdasyna tamamlandy.

Türkmen topary oýnuň ikinji ýarymynda «Eýr Forsuň» Karlos Salazaryň geçiren goly bilen yzda galdy, emma toparyň derwezeçisi Batyr Babaýew birnäçe howply urgulary gaýtarmakda üstünlik gazandy. Oýnuň 70-nji minudynda Myrat Annaýewiň geçiren owadan goly bilen hasap deňleşdi. Şol sanda, Hoşgeldi Hojowowyň pasy bilen Annaýew garşydaş goragçylary aldap tapawutlandy.

Emma, duşuşygyň 89-njy minutynda «Eýr Fors» ikinji goly geçirip, ýeňşi gazandy. «Altyn asyr» oýnuň soňky minutlarynda hasaby deňlemek mümkinçiligine eýe bolup bilmedi, sebäbi emin Mihail Titowyň jerime meýdançasynda ýykylanyna garamazdan, 11 metrlik jerime urgusyny bellemedi.

Şeýlelikde, «B» toparçada Saud Arabystanynyň «Al-Tawun» topary Bahreýniň «Al-Haldiýasyny» 3:2 hasabynda ýeňip, 3 utuk gazandy, şol bir wagtda «Altyn Asyr» we «Al-Haldiýa» heniz utuk toplap bilmediler.

18-nji sentýabrda Aşgabatda Koreýa Respublikasynyň ilçihanasy tarapyndan Türkmenistanyň Milli taekwondo merkezine taekwondo lybaslary we ýörite enjamlar gowşuryldy. Jemi 180 töweregi enjam, şol sanda taekwondo lybaslary, kaskalar, galkanlar, el we aýak goraglary, şeýle hem ellikler gowşuryldy.

Çäre Olimpiýa şäherçesiniň ýapyk ýeňil atletika toplumynda geçirildi. Sport enjamlary Koreýanyň Medeniýet, sport we syýahatçylyk ministrligi hem-de Taekwondo mahabat gaznasy tarapyndan goldanyldy.

Çärä gatnaşan Koreýa Respublikasynyň ilçisi Ji Kyu-Tek, Türkmenistanda taekwondony wagyz etmek boýunça tagallalary dowam etdirjekdigine ynandyrdy. Türkmenistanyň Milli taekwondo merkeziniň direktory Bäşim Rozyýew goldaw üçin minnetdarlyk bildirdi.

Şeýle hem, iki ýurduň arasynda taekwondo babatyndaky hyzmatdaşlygyň uzak taryhy bardygyny bellemelidiris. 2010-njy ýyldan bäri Türkmenistanda her ýyl Koreýa Respublikasynyň ilçisiniň Kubogy üçin taekwondo ýaryşy geçirilýär. Bu ýyl ýaryşlar 24-25-nji awgustda geçirilip, 180-den gowrak gatnaşyjyny ýygnady.

Türkmenistanyň milli futbol ýygyndysynyň baş tälimçisi Mergen Orazow ýakynda Portugaliýadan gaýdyp geldi, ol bu ýurtda iş tejribesini kämilleşdirmek maksady bilen saparda boldy. Bu sapar türkmen futbolynyň ösüşi üçin täze mümkinçilikleri açdy hem-de örän wajyp hem peýdaly boldy. 

Mergen Orazowyň iş tejribelik meýilnamasy mazmuna baý hem örän netijeli boldy. Türkmenistanyň milli ýygyndysynyň baş tälimçisi Portugaliýanyň Futbol federasiýasynyň tehniki direktory Joze Kouseýru bilen duşuşyp, liganyň gurluşy we ýaş zehinleri ösdürmegiň usullary barada pikir alyşdy. Mundan başga-da, oňa Portugaliýanyň Futbol akademiýasyna baryp görmek miýesser etdi, ol ýerde Mergen Orazowy ýokary derejeli tälimçileri taýýarlamagyň ösen ulgamy bilen tanyşdyrdylar.

Iş tejribeliginiň esasy pursatlary Portugaliýanyň milli ýygyndysynyň baş tälimçisi Roberto Martines bilen geçirilen iki duşuşyk boldy. Mergen Orazow milli ýygyndynyň oýunlara taýýarlyk görşüni synlamak, şeýle hem oýunlaryň jikme-jik derňelişine gatnaşmak üçin ajaýyp mümkinçilik aldy.

Portugaliýada alnan tejribe: Türkmenistanda ulanylyp bilnermi

Gürrüňdeşlikde Mergen Orazow portugal futbolynyň Türkmenistanda uýgunlaşdyrylyp bilinjek birnäçe tarapyna ünsi çekdi. Ýurdumyzyň milli futbol ýygyndysynyň baş tälimçisi olaryň arasyndan bäş ball bilen oýunçylara baha bermek ulgamyny belledi, bu bahalandyrma diňe bir sport görkezijileri däl, eýsem futbolçynyň özüni alyp barşy hem girýär – diýip, ol sözüniň üstüne goşdy. «Bu ýaşyryn edilýär. Ähli kriteriýalar boýunça bäşlik alan oýunçy, eger şikes ýetmedik bolsa, gönümel dalaşgärleriň sanawyna goşulýar» – diýdi.

Orazow şeýle hem ýaş oýunçylary ösdürmek we oýunlardan ozal geçirilýän seljerme işine toparlaýyn çemeleşmek üçin ýurdumyzyň milli ýygyndysyna olary çekmegiň tejribesini belläp geçdi. «Bu taktiki taraplary jikme-jik öwrenmäge mümkinçilik berýär» –diýip, ol nygtady.

Türkmen futbolyny ösdürmegiň meýilnamalary

Iş sapary mahaly alnan tejribä esaslanyp, Orazow milli ýygyndynyň taýýarlanyşynda birnäçe üýtgeşmeleri girizmegi meýilleşdirýär. «Milli ýygynda kabul ediljek täze dalaşgärleri synamak üçin noýabr aýynda ýapyk gapylaryň aňyrsynda türgenleşik ýygnanyşyklaryny we ýoldaşlyk duşuşyklaryny geçirmek meýilleşdirilýär» – diýip, tälimçi gürrüň berdi. — Şunda ýaş oýunçylara aýratyn üns berler.

Ýygyndynyň ýakyn wagtdaky maksady — 2027-nji ýyldaky Aziýa kubogynyň saýlama ýaryşynda üstünlikli çykyş etmekdir. «Biziň maksadymyz Aziýa çempionatynyň jemleýji tapgyryna çykmak» – diýip, Orazow belledi.

Türkmenistanyň Futbol federasiýasynda täze giriziljek kadalar

Milli ýygyndydaky işler bilen bir hatarda Türkmenistanyň Futbol federasiýasynda işjeň döwrebaplaşdyrma işleri alnyp barylýar. Federasiýanyň tertipnamasyna üýtgetmeler girizilýär, Ýokary liganyň we Türkmenistanyň kubogynyň oýunlarynyň wideoarhiwi döredilýär. «Birek-biregi öwrenip, oýunlara taýýarlyk görmekleri üçin klublar ähli oýunlaryň wideolary bilen üpjün edilýär» – diýip, ýurdumyzyň milli ýygyndysynyň baş tälimçisi gürrüň berdi.

Federasiýa türkmen oýunçylaryny tanatmak üçin halkara platformalary bilen hyzmatdaşlyk etmegi meýilleşdirýär. «Bu oýunçylarymyza güýçli çempionatlaryň klublarynda çykyş etmäge ýardam berer, ol bolsa, öz gezeginde, futbolymyzyň derejesini has-da ýokarlandyrar» – diýip, Orazow bu babatda öz pikirini beýan etdi.

Uzak möhletleýin ösüş strategiýasy

Türkmenistanyň Futbol federasiýasy oýunçylary taýýarlamagyň toplumlaýyn ulgamyny işläp taýýarlaýar, ol akademiýadan başlap, ýokary derejede tamamlanmalydyr. Şunda üç derejeli ulgam: Ýokary liga, dublirleýji — ýaşlar ligasy we Birinji liga döretmek meýilleşdirilýär.

«Esasy maksat oýunçyny 17 ýaşyna çenli akademiýada tälim bermekdir, şondan soň onuň öňünde üç ýol açylar: eger ol zehinli hem fiziki taýdan taýýar bolsa, gönümel Ýokary liga gidip biler, dublirleýji–ýaşlar ligasynda ýa-da Birinji liga çykyş edip biler» – diýip, Mergen Orazow gürrüň bermek bilen, öz pikirini beýan etdi.

Şeýle hem türkmen tälimçilerini taýýarlamak we kämilleşdirmek maksady bilen portugaliýaly bilermenleri çagyrmak mümkinçiligi göz öňünde tutulýar.

Roberto Martines bilen duşuşyk: täsirler we geljek üçin mümkinçilikler

Roberto Martinesiň tejribelerini paýlaşmaga we alnyp barylýan işleriň ählisi babatda görkezen aç-açanlygy Orazowda uly täsir galdyrýar. «Hiç hili syr ýok, hiç hili päsgelçilik ýok – hemmeler paýlaşmaga-da, kömek etmäge-de taýýar» – diýip, türkmen tälimçisi gürrüň berdi.

Saparyň dowamynda Türkmenistanyň hem-de Portugaliýanyň Futbol federasiýalarynyň arasynda hyzmatdaşlyk etmek hakynda ähtnama gol çekmegiň mümkinçilikleri hem ara alnyp maslahatlaşyldy. Portugaliýaly futbol hünärmenleri türkmen futbolynyň mümkinçiliklerine ýokary baha berendikleri bellärliklidir, olar esasan hem ýurdumyzyň ýaşlar ýygyndysynyň Uelse garşy oýnuny (2:2) görüp, muňa oňyn baha berdiler.

Mergen Orazowyň Portugaliýa amala aşyran iş tejribelik sapary türkmen futboly üçin täze mümkinçilikleri açýar. Halkara futbolynda bar bolan öňdebaryjy tejribäniň ornaşdyrylmagy, oýunçylar we tälimçiler üçin okuw-türgenleşik ulgamynyň döwrebaplaşdyrylmagy, şeýle hem halkara hyzmatdaşlygynyň ösdürilmegi — bularyň barysy ýakyn ýyllarda Türkmenistanda futbolyň ösüşinde ýokary hilli özgerişiň boljakdygyna umyt döredýär.

Budapeştde geçirilýän 45-nji Dünýä Küşt Olimpiadasynda Türkmenistanyň zenanlar ýygyndysy täsirli netijeleri görkezýär. Altynjy tapgyrdan soň, türkmen küştçileri 12 mümkin bolan utukdan 8 utuk gazanyp, C kategoriýasynda ýaryş tertibiniň başyny çekýärler. Umumy hasapda 73-nji orunda ýerleşen ýygyndy, häzirki wagtda 183 milli zenanlar toparynyň arasynda 36-njy orunda durýar. 

Soňky tapgyrda, ortaça reýtingi 1956 bolan türkmen topary, ortaça reýtingi 2132 bolan Braziliýanyň ýygyndysyny 3:1 hasaby bilen ynamly ýeňdi. Leýla Şöhradowa we Eneş Arazmedowa aýratyn tapawutlandylar, olar degişlilikde üçünji we dördünji tagtalarda öz oýunlaryny ýeňdiler. 17 ýaşly Eneş Arazmedowanyň ähli dört oýnunda ýeňiş gazanyp, 100% netijäni görkezýändigini bellemelidiris.

C kategoriýasynda Türkmenistanyň ýygyndysynyň ýakyn bäsdeşi, umumy hasapda 45-nji orunda ýerleşýän we 8 utuk gazanan Malaýziýanyň ýygyndysydyr. Indiki, ýedinji tapgyrda, türkmen küştçileri 39-njy orunda ýerleşýän we ortaça reýtingi 2215 bolan Kubanyň ýygyndysy bilen bäsleşmeli bolarlar.

Türkmenistanyň erkekler ýygyndysy has güýçli B kategoriýasynda 12 mümkin bolan utukdan 6 utuk gazanyp, has ýuwaş netijeleri görkezýär.

Küşt olimpiadasy 22-nji sentýabra çenli dowam eder.

Paýtagtymyzda şu gün badalga alan tennis boýunça Türkmenistanyň Kubogy ugrunda ýaryşa Aşgabat, Daşoguz, Lebap we Mary welaýatlaryndan 113 türgen ýygnandy.

13 ýaşly 59 oglan we 54 gyz gatnaşýan bu ýaryş «Aşgabat» köpugurly stadionynyň tennis meýdançalarynda geçirilýär.

39 ýaşly milli emin, halkara «Level 1» tälimçilik derejeli Ýewgeniý Molçanowyň baş eminliginde ýekelikde, jübütlikde we garyşyk ugurlarda Kubok ugrundaky ýaryşyň ýeňijileri kesgitlener.

Türkmenistanyň Kubogy ugrunda ýaryş ýylyň iň möhüm ýaryşlaryň biridir, onuň netijesi boýunça ýurdumyzyň milli ýygyndysynyň düzümi kesgitlener.

Ýaryş 22-nji sentýabrda tamamlanar.

Türkmen türgenleriniň ikisi Al-Aýnda (BAE) geçirilen ýetginjekleriň, mekdep okuwçylarynyň we okuwçy gyzlaryň arasynda boks boýunça Aziýanyň çempionatynda bürünç medala mynasyp boldular

Ýaryşa 2008-2009-njy ýyllarda doglan ýetginjekleriň arasynda 13 agram derejesinde we 2010-2011-nji ýyllarda doglan mekdep okuwçylarynyň arasynda 15 agram derejesinde medallar ugrunda 26 ýurtdan 462 boksçy gatnaşdy.

Bu ýaryşda Türkmenistanyň milli ýygyndysyna 10 boksçy wekilçilik etdi. Olaryň ikisi kiçi ýaş toparynda, sekizisi uly ýaş toparynda çykyş etdi.

Ildeşlerimiz ýetginjekleriň arasynda geçirilen ýaryşda üstünlik gazandylar. Mary welaýatynyň Ýolöten şäherindäki 1-nji orta mekdebiň 10-njy synp okuwçysy Begenç Kakamyradow hormat münberiniň üçünji gatyna ilkinji bolup çykdy. Ol 14 boksçynyň medallar ugrunda bäsleşen 50 kilograma çenli agram derejesinde geçirilen ýaryşynda Siwa Çaýnarongy (Tailand) – 3:2 we Fang-Rýui Şaony (Taýwan) 5:0 hasabynda ýeňip, iki ýeňiş gazandy. 11-nji oktýabrda 16 ýaşaýan Begenç ýarym finalda Harş Harşdan (Hindistan) 1:4 hasabynda ýeňilip, bürünç medal bilen kanagatlanmaly boldy.

Bu agramda ýene bir bürünç medaly Oleksandr Malahow (Ukraina) eýeledi. Hindi boksçusy Harş Harş kümüş medala mynasyp boldy. Özbegistanly Muhammet Rizo Ukimow finalda 4:1 hasabynda ýeňiş gazanyp ýaryşyň çempiony boldy.

Toparymyzdan ikinji bürünç medaly Aşgabat şäherindäki 78-nji orta mekdebiň 11-nji synp okuwçysy, 16 ýaşly Sapargeldi Nurýagdyýew eýeledi. Ol 12 boksçynyň baýraklar ugrunda bäsleşen 70 kilograma çenli agram derejesinde üstünlik gazandy. 1/8 finalda Sapargeldi Birleşen Arap Emirliklerinden Nahyan Al-Gafriden aýan artykmaçlygy bilen üstün çykdy we çärýek finalda Usman Kaparowy (Gyrgyzystan) eminleriň dürli bahalary netijesinde 3:2 hasabynda ýeňdi. Ýarym finalda S.Nurýagdyýew Diýorbek Murodilloýewden (Özbegistan) 0:5 hasabynda utulyp, bürünç medal gazandy.

Türkmen boksçusy bilen birlikde Praşant Praşant (Hindistan) hem münberiň üçünji gatyna çykdy, özbek türgeni Diýorbek Murodilloýew ikinji, Muhammet Saleh Mesbahi Ro (Eýran) eminleriň biragyzdan goldan karary bilen hormat münberiniň ýokary gatyna çykdy.

Türkmenistanyň toparyny Aziýa çempionatyna tälimçiler Sapardurdy Bagyýew we Myrat Pazzyýew taýýarladylar.

13-14-nji sentýabrda Türkmenistanyň Russiýa Federasiýasyndaky konsullygynyň (Astrahan ş.) guramagynda «Газпром добыча Астрахань» medeni-sport merkezinde sportuň kiçi-futbol görnüşi boýunça Magtymguly Pyragynyň doglan gününiň 300 ýyllygyna bagyşlanan bäsleşik geçirildi. Bu barada konsullygyň metbugat gullugy «Turkmenportala» habar berdi.

Bäsleşige Astrahan we Stawropol sebitlerindäki hemişelik ýaşaýan türkmenleriň toparlary hem-de Astrahan şäheriniň ýokary okuw mekdeplerinde bilim alýan türkmenistanly talyplardan ybarat topar gatnaşdylar.

Sport ýaryşynyň başynda konsul G.Ilamanow çykyş etdi. Diplomat öz çykyşynda Magtymguly Pyragynyň türkmenleriň milli medeniýetiniň kemala gelmegindäki tutýan orny, onuň şygyrlarynda öňe sürülýän hoşniýetli goňşuçylyk, agzybirlik, maşgala gymmatlyklarynyň beýikligi, watansöýüjilik ýaly ynsanperwer ýörelgeler barada aýratyn nyggtap geçdi.

Bellenilişi ýaly, bu sport ýaryşyny guramakdan we geçirmekden esasy maksat Türkmenistan bilen Russiýa Federasiýasynyň arasyndaky dostluk we hoşniýetli goňşuçylyk gatnaşyklaryny has-da berkitmek, sagdyn durmuş ýörelgesini, bedenterbiýe we sporty ösdürmek bolup durýar.

Dostlukly ýagdaýda geçirilen ýaryşyň netijelerinden soň ýeňiji bolan toparlara kubok we medallar gowşuryldy. Has tapawutly oýun görkezen oýunçylar «Iň gowy oýunçy», «Iň gowy hüjümçi», «Iň gowy derwezeçi» diýen atlar bilen sylaglandylar.

Gazagystanyň paýtagtynda Çarwadarlaryň V Bütindünýä oýunlary  tamamlandy. Bäsleşigiň ýapylyş dabarasy Astanada geçirildi.  Çarwadarlaryň V Bütindünýä oýunlaryna 89 ýurtdan 2500 töweregi adam gatnaşdy.  Oýunlarda Türkmenistana 29 türgen wekilçilik etdi. Ildeşlerimiz umumytoparlaýyn ýaryşda 8-nji orny eýelediler. Bu ýyl guralan oýunlarda sportuň 21 sport görnüşi boýunça bäsleşildi. Bäsleşigiň baýrak gaznasy takmynan 520 müň dollar boldy.

Medal sanawynda Gazagystan 112 medal (43 altyn, 32 kümüş, 37 bürünç) gazanyp, 1-nji orny eýeledi. Gyrgyzystan 2-nji orna düşdi. Olar jemi 65 medal (19 altyn, 21 kümüş, 25 bürünç) gazandylar. Russiýanyň topary 49 medal (12 altyn, 12 kümüş, 25 bürünç) bilen, 3-nji orna mynasyp boldy.

Gazagystan ýaryşa iň wekilçilikli düzümde gatnaşdy. Ýaryşyň guramaçysy hökmünde çykyş eden bu döwlete 195 adam wekilçilik etdi. Gyrgyzystandan 172 türgen, Russiýadan 144 türgen geldi.

Dabarada Çarwadarlaryň nobatdaky oýunlarynyň 2026-njy ýylda Gyrgyzystanda geçiriljekdigi mälim edilip, ýaryşyň estafetasy simwoliki ýagdaýda olaryň wekillerine gowşuryldy. Gyrgyzystanyň bu ýaryşyň esaslandyryjysy bolup durýandygyny ýatladýarys.

 Çarwadarlaryň I Bütindünýä oýunlary  Gyrgyzystanyň Çolpon-Ata şäherindäki Issyk-Köl kölüniň kenarynda geçirilipdi. Oýunlar şol ýerde üç gezek, ýagny 2014-nji, 2016-njy we 2018-nji ýyllarda geçirildi. Çarwadarlaryň IV Bütindünýä oýunlaryny guramak Türkiýäniň Iznik şäheriniň paýyna düşdi. Şol ýaryşa 82 ýurtdan 3 müňe golaý türgen gatnaşyp, olar sportuň13 görnüşinde bäsleşipdiler. 

Golaýda Özbegistan Respublikasynyň Samarkant şäherinde adaty karate boýunça Aziýanyň we Okeaniýanyň 4-nji sebitleýin çempionaty geçirildi. Bu ýaryşa sport mekdebimizden tälimçilerdir türgenleriň 10-sy gatnaşdy. Türgenlerimiz çempionatda şowly çykyş edip, baýrakly orunlaryň 6-syna mynasyp boldular.

Şahsy kata görnüşinden Yhlas Annagurbanow, Damir Allaberdiýew we Çerkez Myratdurdyýew (toparlaýyn) 1-nji orunlara mynasyp boldular. Nurgeldi Annagurbanow we Meýlis Çaryýew 2-nji, Döwlet Berdiýew 3-nji orunlary eýelediler. En-bu görnüşinden Nurgeldi Annagurbanow (toparlaýyn) 1-nji orna mynasyp bolmagy başardy. Kihon tutluşyk görnüşinden Damir Allaberdiýew, Nurgeldi Annanepesow 2-nji orunlary eýelediler. Şahsy tutluşyk görnüşinden Selim Myratberdiýew 3-nji orna mynasyp bolup, türgenlerimiziň Garaşsyzlygymyzyň 33 ýyllyk şanly baýramyna taýýarlan sowgatlarynyň üstüni ýetirdi.

Ýaryşda tapawutlanan türgenlere Hormat hatlary we medallar gowşuryldy.

13-nji sentýabrda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onuň gün tertibine döwlet durmuşynyň birnäçe möhüm meseleleri girizildi.

Ilki bilen, Mejlisiň Başlygy D.Gulmanowa çykyş edip, milli kanunçylygy kämilleşdirmek boýunça alnyp barylýan işler barada maglumat berdi. Bellenilişi ýaly, häzirki wagtda ýurdumyzda amala aşyrylýan giň möçberli özgertmeleriň hukuk binýadyny berkitmek maksady bilen, kanunçylyk namalarynyň birnäçesine, hususan-da, raýat-hukuk gatnaşyklaryny pugtalandyrmak, administratiw hukuk bozulmalary, salgytlar, awtomobil ulagy bilen baglanyşykly hereket edýän kanunlara üýtgetmeler hem-de goşmaçalar girizilýär. Watanymyzyň mukaddes Garaşsyzlygynyň 33 ýyllygy mynasybetli geçiriljek Halk Maslahatynyň mejlisine taýýarlyk görlüşi barada-da aýdyldy. Bu ugurdaky işler Türkmenistanyň Halk Maslahatynyň Diwany, Ministrler Kabineti, degişli ministrlikler we pudaklaýyn dolandyryş edaralary, häkimlikler, jemgyýetçilik guramalary bilen bilelikde alnyp barylýar.

Daşary ýurtlaryň parlamentleri, halkara guramalar bilen netijeli gatnaşyklary pugtalandyrmagyň çäklerinde Beýik Britaniýanyň Daşary işler, Arkalaşyk we ösüş ministrliginiň Sebitleýin ösüş müdirliginiň ýolbaşçysy bilen duşuşyk geçirildi. Mejlisiň deputatlarynyň Birleşen Milletler Guramasynyň düzüm birlikleriniň wekilleri bilen duşuşyklary guraldy. Şeýle hem parlamentiň ýolbaşçysy deputatlaryň döwlet syýasatyny, kabul edilen kanunlaryň many-mazmunyny halkymyza düşündirmek, Halk Maslahatynyň taryhy, syýasy-jemgyýetçilik ähmiýeti barada geçirilýän wagyz-nesihat çärelerine gatnaşýandyklary, Garaşsyzlygyň 33 ýylynyň dowamynda ýurdumyzyň durmuşynyň dürli ugurlarynda gazanylan üstünlikleri barada köpçülikleýin habar beriş serişdelerinde çykyş edýändiklerini aýtdy.

Hormatly Prezidentimiz Serdar Berdimuhamedow täze kanun taslamalary işlenip taýýarlananda olaryň kämil, döwrebap bolmagyny gazanmagyň zerurdygyny belledi. Kanunlar döwletimiziň alyp barýan netijeli syýasatyny görkezmelidir, halkymyzyň hal-ýagdaýyny has-da gowulandyrmaga şert döretmelidir diýip, döwlet Baştutanymyz aýtdy we olaryň ähmiýetini halk köpçüligine düşündirmek işlerini dowam etdirmegiň wajypdygyny nygtady.

Ministrler Kabinetiniň Başlygynyň orunbasary H.Geldimyradow 10-11-nji sentýabrda Aşgabatda geçirilen maýa goýum forumynyň, Türkmenistanyň ykdysadyýetine ýokary tehnologiýalary we innowasiýalary çekmek boýunça halkara maslahatyň we ugurdaş sergileriň netijeleri barada hasabat berdi.

Bellenilişi ýaly, maýa goýum forumyna 44 ýurtdan, şol sanda halkara guramalaryň 22-sinden, daşary ýurt döwlet edaralarynyň we kompaniýalarynyň, Türkmenistanda işleýän diplomatik wekilhanalaryň wekilleri gatnaşdylar. Maksatnama laýyklykda, forumyň çäklerinde ýurdumyzyň ösüşine we halkara başlangyçlaryna bagyşlanan ykdysadyýet, ulag-aragatnaşyk, nebitgaz, energetika meseleleri boýunça umumy mejlisleriň 3-si, ykdysadyýetiň möhüm ugurlary boýunça mejlisleriň 7-si, “tegelek stoluň” başyndaky maslahatlaryň 4-si geçirildi. Türkmen tarapynyň wekilleri öz çykyşlarynda milli ykdysadyýetiň pudaklaryndaky maýa goýum mümkinçilikleri, durmuşa geçirilmegi göz öňünde tutulýan taslamalar, döredilen amatly maýa goýum gurşawy, halkara tejribä laýyklykda, maýadarlar üçin döredilýän hukuk, maliýe-ykdysady şertler barada giňişleýin gürrüň berdiler. Forumda çykyş eden daşary ýurtly bilermenler, iri halkara guramalaryň, kompaniýalaryň ýolbaşçylary döwletimiziň halkara abraýynyň has-da ýokarlanýandygyny we öz üstüne alan halkara borçnamalaryna ygrarlydygyny bellediler.

Forumyň wekilleri Türkmenistan bilen Owganystanyň arasynda nebit-gaz, energetika, ulag-logistika, aragatnaşyk pudaklaryna degişli iri maýa goýum taslamalarynyň açylyş we gurluşyk işlerine badalga bermek dabarasyna sanly ulgam arkaly gatnaşdylar. Maýa goýum forumynyň çäklerinde ýurdumyzyň degişli ministrlikleri, pudaklaýyn dolandyryş edaralary we kärhanalary bilen daşary ýurtly kärdeşleriniň arasynda jemi 9 sany ähtnama, 5 sany ylalaşyga, 8 sany şertnama gol çekildi. Halkara guramalaryň, maliýe institutlarynyň, daşary ýurtlaryň döwlet edaralarynyň hem-de kompaniýalaryň ýolbaşçylarydyr wekilleri bilen 80-den gowrak duşuşyk guraldy. Olaryň barşynda ykdysadyýetiň dürli pudaklary boýunça hyzmatdaşlygy ýola goýmagyň we ösdürmegiň mümkinçilikleri, özara bähbitli gatnaşyklaryň ugurlary barada pikir alşyldy.

Ylymlar akademiýasynyň Halkara ylmy-tehnologiýa parkynda geçirilen Türkmenistanyň ykdysadyýetine ýokary tehnologiýalary we innowasiýalary çekmek boýunça halkara maslahata hem-de sergä ministrlikleriň, pudaklaýyn dolandyryş edaralarynyň 28-si, ýerli hususy taraplaryň 58-si, 14 döwletden daşary ýurt kompaniýalarynyň 28-si gatnaşdy. Maslahatyň çäginde «Hi-Tech Startup Turkmenistan — 2024» atly bäsleşigiň jemlerini jemlemek dabarasy geçirildi.

Hormatly Prezidentimiz hasabaty diňläp, ýurdumyzyň paýtagtynda geçirilen maýa goýum forumynyň döwletimiziň dünýä ýurtlary bilen ykdysady hyzmatdaşlygyny pugtalandyrmaga, täze işewür gatnaşyklary ýola goýmaga, ýurdumyzyň maýa goýum mümkinçilikleri bilen tanyşmaga oňyn şertleri döredendigini belledi. Şunuň bilen baglylykda, wise-premýere ýurdumyzda maýa goýum taslamalaryny durmuşa geçirmek hem-de bu ugurdaky halkara hyzmatdaşlygy mundan beýläk-de ösdürmek babatda işleri netijeli dowam etdirmek tabşyryldy.

Ministrler Kabinetiniň Başlygynyň orunbasary B.Amanow ýurdumyzda uglewodorod serişdelerine baý meýdançalary ýüze çykarmak we özleşdirmek, pudagyň maddy-enjamlaýyn binýadyny döwrebaplaşdyrmak boýunça alnyp barylýan işler barada hasabat berdi.

Bellenilişi ýaly, “Türkmengeologiýa” döwlet korporasiýasynyň sanly ulgam arkaly dolandyrylýan we dürli şertlerde işlemäge mümkinçiligi bolan 3D geofiziki enjamlar toplumy bilen üpjün edilmegi türkmen geologlaryna uglewodorod serişdelerine baý meýdançalary ýüze çykarmaga, anyk maglumatlary almaga mümkinçilik berer. Şunuň bilen baglylykda, döwlet Baştutanymyzyň garamagyna pudagyň maddy-enjamlaýyn binýadyny pugtalandyrmak boýunça degişli teklip hödürlenildi.

Hormatly Prezidentimiz hasabaty diňläp, ýerasty baýlyklary ýüze çykarmak, uglewodorod çig mal binýadyny artdyrmak boýunça alnyp barylýan işleriň depginini güýçlendirmegiň, pudagyň maddy-tehniki binýadyny berkitmek hem-de zerur bolan enjamlar bilen üpjün etmek babatda çäreleri dowam etdirmegiň zerurdygyny nygtady. Şunuň bilen baglylykda, döwlet Baştutanymyz «Türkmengeologiýa» döwlet korporasiýasyna 3D geofiziki enjamlar toplumyny ornaşdyrmak baradaky teklibini goldap, wise-premýere bu ugurda degişli işleri geçirmegi tabşyrdy.

Ministrler Kabinetiniň Başlygynyň orunbasary T.Atahallyýew ýurdumyzda möwsümleýin oba hojalyk işleriniň barşy barada hasabat berdi.

Bellenilişi ýaly, welaýatlarda bugdaý ekişi agrotehnikanyň kadalaryna laýyklykda alnyp barylýar. Ekiş möwsüminde önüm öndürijileri ýokary hilli tohumlar bilen üpjün etmek, oba hojalyk tehnikalaryny netijeli işletmek boýunça degişli çäreler görülýär. Döwlet Baştutanymyzyň ak pata bermegi bilen, ýurdumyzda pagta ýygymyna girişilip, häzirki wagtda bu iş guramaçylykly dowam edýär. Ýygnalýan hasyly kabul ediş harmanhanalarynda, pagta arassalaýjy kärhanalarda bökdençsiz kabul etmek, hasyly daşamakda ulanylýan awtoulaglary netijeli işletmek babatda zerur işler ýerine ýetirilýär. Ýurdumyzyň welaýatlarynyň maldarçylyk hojalyklarynda oba hojalyk mallaryny talabalaýyk idetmek, olaryň baş sanyny artdyrmak, önüm berijiligini ýokarlandyrmak maksady bilen, mallar üçin ot-iýmleriň ätiýaçlyk gorlaryny döretmek, ahalteke bedewleriniň baş sanyny köpeltmek, olary talabalaýyk idetmek, tohum arassalygyny gorap saklamak boýunça işler alnyp barylýar. Mundan başga-da, ekerançylyk meýdanlarynyň suw üpjünçiligini we ýerleriň melioratiw ýagdaýlaryny gowulandyrmak, suw serişdelerini tygşytly peýdalanmak üçin derýalaryň kenarlaryny berkitmek, suwaryş, şor suw akabalaryny arassalamak işleri dowam etdirilýär.

Hormatly Prezidentimiz hasabaty diňläp, welaýatlarda bugdaý ekişini bellenen möhletlerde we talabalaýyk geçirmek boýunça degişli çäreleri görmegiň, gallaçy daýhanlary ýokary hilli tohumlar bilen üpjün etmegiň, ekişde ulanylýan tehnikalary doly güýjünde işletmegiň möhümdigini belledi we ýetişdirilen pagta hasylyny ýitgisiz ýygnap almak boýunça guramaçylyk işlerini alyp barmagy tabşyrdy.

Şeýle hem wise-premýer şu ýylyň 16-njy sentýabrynda Garaşsyz Döwletleriň Arkalaşygynyň Tohumçylyk meseleleri boýunça hökümetara utgaşdyryjy geňeşiniň mejlisini, 19-20-nji sentýabrda “Oba hojalyk ekinleriniň tohumçylygynda ýetilen sepgitler we öňde durýan wezipeler” atly halkara ylmy maslahaty geçirmek boýunça görülýän taýýarlyk işleri barada hasabat berdi. Bellenilişi ýaly, geňeşiň mejlisine we halkara ylmy maslahata, degişlilikde, Garaşsyz Döwletleriň Arkalaşygynyň Baş sekretarynyň orunbasarynyň, Tohumçylyk meseleleri boýunça hökümetara utgaşdyryjy geňeşiniň agzalarynyň, oba hojalyk ekinleriniň tohumçylygy bilen meşgullanýan hem-de oba hojalyk pudagynyň beýleki ugurlarynda işleýän hünärmenleriň, ylmy işgärleriň, kompaniýalaryň wekilleriniň gatnaşmaklary meýilleşdirilýär.

Döwlet Baştutanymyz hasabaty diňläp, oba hojalyk pudagyna dünýä tejribesini ornaşdyrmagyň, bu ugurda halkara hyzmatdaşlygy ösdürmegiň möhüm ähmiýetini belledi hem-de GDA-nyň Tohumçylyk meseleleri boýunça hökümetara utgaşdyryjy geňeşiniň mejlisini, «Oba hojalyk ekinleriniň tohumçylygynda ýetilen sepgitler we öňde duran wezipeler» atly halkara ylmy maslahaty ýokary guramaçylyk derejesinde geçirmegi tabşyrdy.

Ministrler Kabinetiniň Başlygynyň orunbasary B.Annamämmedow “Pähim-paýhas ummany Magtymguly Pyragy” ýylynda giňden bellenilýän Türkmenistanyň Garaşsyzlygynyň 33 ýyllyk baýramyna, Halk Maslahatynyň mejlisine taýýarlyk görmegiň çäklerinde paýtagtymyzda alnyp barylýan işler barada hasabat berdi.

Bellenilişi ýaly, baş baýramymyzyň öňüsyrasynda Aşgabady bagy-bossanlyga büremek, paýtagtymyzyň ýaşaýjylarynyň we myhmanlarynyň medeniýetli dynç almaklary üçin has amatly şertleri döretmek, baýramçylyk çärelerini ýokary guramaçylyk derejesinde geçirmek boýunça zerur çäreler görülýär. Şunuň bilen baglylykda, medeni-durmuş maksatly binalary abatlamak, ýanaşyk ýerleri, seýilgähleri, baglary, suw çüwdürimlerini abadanlaşdyrmak, bezeg güllerini ekmek boýunça işler yzygiderli alnyp barylýar. Şäheriň baýramçylyk bezegine aýratyn ähmiýet berilýär. Şeýle hem Aşgabat şäheriniň “Parahat — 7” ýaşaýyş toplumynda 4 sany her biri 54 öýli, 9 gatly, 9 sany her biri 36 öýli, 9 gatly ýaşaýyş jaýlarynyň we seýilgähiň açylyş dabaralaryny geçirmek meýilleşdirilýär. Şunuň bilen birlikde, ýurdumyzyň durmuşynda uly ähmiýete eýe bolan taryhy waka — Türkmenistanyň Halk Maslahatynyň mejlisine hemmetaraplaýyn taýýarlyk görülýär.

Hormatly Prezidentimiz hasabaty diňläp, Garaşsyz ýurdumyzda, şol sanda Aşgabatda döwletimiziň Garaşsyzlygynyň 33 ýyllygy mynasybetli baýramçylyk çärelerini giňden guramagyň, Türkmenistanyň Halk Maslahatynyň mejlisine ýokary derejede taýýarlyk görmegiň wajypdygyna ünsi çekdi. Döwlet Baştutanymyz wise-premýere paýtagtymyzda bezeg we abadanlaşdyrmak boýunça alnyp barylýan işleri talabalaýyk dowam etdirmegi tabşyrdy.

Ministrler Kabinetiniň Başlygynyň orunbasary B.Atdaýew Türkmenistanyň Garaşsyzlygynyň 33 ýyllygy mynasybetli ýurdumyzyň ykdysady üstünlikleriniň sergisini guramak boýunça görülýän çäreler barada hasabat berdi.

Bellenilişi ýaly, gözden geçirilişi paýtagtymyzdaky "Garagum" myhmanhanasynyň ýanynda geçirmegi meýilleşdirilýär. Onuň açylyş dabarasy 19-njy sentýabrda guralar. Sergide hormatly Prezidentimiz Serdar Berdimuhamedowyň baştutanlygynda Berkarar döwletiň täze eýýamynyň Galkynyşy döwründe ýurdumyzda dürli ugurlar boýunça amala aşyrylýan özgertmeler, Garaşsyzlyk ýyllarynda gazanylan üstünlikler öz beýanyny tapar. Forumyň çäklerinde döwlet we hususy kärhanalara täze önümleri, geljekki ösüş maksatnamalary, maýa goýum taslamalary bilen tanyşdyrmak üçin mümkinçilik dörediler. Şeýle hem haly dokamak, dutar ýasamak, küýzegärlik ýaly halk senetçiliginiň görnüşleri boýunça ussatlyk sapaklaryny guramak göz öňünde tutulýar.

Hormatly Prezidentimiz hasabaty diňläp, Garaşsyzlygymyzyň 33 ýyllygy mynasybetli geçirilýän ýurdumyzyň ykdysady üstünlikleriniň sergisine ýokary derejede taýýarlyk görmegiň wajypdygyna ünsi çekdi. Şunuň bilen baglylykda, döwlet Baştutanymyz wise-premýere sergide döwletimizde durmuşa geçirilýän özgertmeleriň, gazanylan üstünlikleri beýan edýän işleriň giňden görkezilmegini üpjün etmegi tabşyrdy.

Ministrler Kabinetiniň Başlygynyň orunbasary M.Mämmedowa Magtymguly Pyragynyň doglan gününiň 300 ýyllygy mynasybetli yglan edilen döredijilik bäsleşikleri barada hasabat berdi.

Beýik akyldar şahyrymyzyň baý edebi mirasyny düýpli öwrenmek, çeper döredijilik bilen meşgullanýan ýaşlary höweslendirmek, olaryň kalbynda dana şahyrymyzyň eserlerinde öňe sürülýän watansöýüjilik, agzybirlik, halallyk, ynsanperwerlik ýaly asylly ýörelgelere söýgi döretmek maksady bilen, Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşiginiň çäklerinde döredijilik bilen meşgullanýan ýaşlaryň arasynda “Pähim-paýhas ummany Magtymguly Pyragy” atly bäsleşik yglan edildi. Magtymguly Pyragynyň doglan gününiň 300 ýyllygy hem-de mukaddes Garaşsyzlygymyzyň 33 ýyllygy mynasybetli Türkmenistanyň Medeniýet ministrligi, Telewideniýe, radiogepleşikler we kinematografiýa baradaky döwlet komiteti tarapyndan degişli jemgyýetçilik guramalary bilen bilelikde ýaş ýazyjylaryň, dramaturglaryň, suratkeşleriň, sazandalaryň hem-de kitaphana işgärleriniň arasynda birnäçe döredijilik bäsleşikleri geçirildi. Olaryň jemleri jemlenildi hem-de ýeňijilere baýraklary gowşurmak dabaralary boldy.

Şu ýylyň 28-nji sentýabrynda Döwlet çeperçilik akademiýasynyň sergiler jaýynda şanly seneler mynasybetli yglan edilen bäsleşikleriň ýene-de birnäçesiniň jemlerini jemlemek dabarasy bolar. Bellenilişi ýaly, bu çäreleriň geçirilmegi Gündogaryň beýik şahyry we akyldary Magtymguly Pyragynyň edebi mirasyny giňden wagyz etmek, ýaş döredijileri täze üstünliklere ruhlandyrmak, milli edebiýatymyzy we medeniýetimizi has-da belent sepgitlere ýetirmek üçin ajaýyp mümkinçilikdir.

Hormatly Prezidentimiz Serdar Berdimuhamedow hasabaty diňläp, Magtymguly Pyragynyň doglan gününiň 300 ýyllygy mynasybetli halkara derejede giň gerimli işleriň alnyp barylýandygyny, bu işleriň şahyryň hormat-sarpasyny has-da belende götermäge, edebi mirasyny giňden wagyz etmäge, düýpli öwrenmäge ýardam edýändigini belledi. Şunuň bilen baglylykda, wise-premýere Magtymguly Pyragynyň 300 ýyllyk ýubileýi we mukaddes Garaşsyzlygymyzyň 33 ýyllygy mynasybetli geçiriljek döredijilik bäsleşiklerine gowy taýýarlyk görmek hem-de olary ýokary derejede geçirmek tabşyryldy.

Ministrler Kabinetiniň Başlygynyň orunbasary B.Orazdurdyýewa ýurdumyzyň ýokary okuw mekdeplerinde halkara olimpiadalary we ylmy-amaly maslahatlary geçirmäge görülýän taýýarlyk işleri barada hasabat berdi. Bellenilişi ýaly, Berkarar döwletiň täze eýýamynyň Galkynyşy döwründe ylmyň iň soňky gazananlary bilen enjamlaşdyrylan bilim edaralary gurlup ulanmaga berilýär, kämil hünärmenleri taýýarlamak boýunça maksatnamalaýyn işler durmuşa geçirilýär. Ylym-bilim ulgamynda halkara hyzmatdaşlygyň gerimini giňeltmäge ýardam berýän halkara ylmy maslahatlary, sergileri, bäsleşikleri, olimpiadalary geçirmekde oňyn tejribe toplandy.

«Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasynda», şeýle hem bilim ulgamy boýunça kabul edilen konsepsiýalarda kesgitlenen wezipeleri durmuşa geçirmek maksady bilen, Türkmenistanyň Bilim ministrligi tarapyndan 16-17-nji oktýabrda Türkmen oba hojalyk institutynda «Agroinnowasiýalar: durnukly ösüşiň röwşen ýoly» atly sanly ulgam arkaly halkara ylmy-taslamalar bäsleşigini; 1-nji noýabrda Türkmen döwlet maliýe institutynda «Maliýe hasabatlylygynyň halkara standartlary» dersi boýunça Açyk halkara internet olimpiadasyny; 6-njy noýabrda S.A.Nyýazow adyndaky Türkmen oba hojalyk uniwersitetinde «Agrosenagat toplumynyň durnukly ösüşi»; 13-nji noýabrda Ýagşygeldi Kakaýew adyndaky Halkara nebit we gaz uniwersitetinde «Himiýa we gazhimiýa innowasion tehnologiýalaryň geljegi» atly sanly ulgam arkaly halkara ylmy-amaly maslahatlary; 15-nji noýabrda Türkmen döwlet ykdysadyýet we dolandyryş institutynda maliýe dersi boýunça Açyk halkara internet olimpiadasyny, 29-njy noýabrda «Ykdysadyýetiň durnukly ösüşi: halkara tejribe we ösüşiň geljekki ugurlary» atly sanly ulgam arkaly halkara ylmy-amaly maslahaty; 18 — 20-nji noýabrda Halkara ynsanperwer ylymlary we ösüş uniwersitetinde filosofiýa, 21 — 23-nji noýabrda ykdysadyýet dersleri boýunça halkara internet olimpiadalaryny; 20-nji noýabrda Myrat Garryýew adyndaky Türkmenistanyň Döwlet lukmançylyk uniwersitetinde biologiýa dersi boýunça III halkara internet olimpiadasyny; 25 — 30-njy noýabrda Magtymguly adyndaky Türkmen döwlet uniwersitetinde himiýa dersi boýunça III halkara olimpiadasyny geçirmek meýilleşdirilýär.

Bellenilişi ýaly, bu halkara olimpiadalara, ylmy-amaly maslahatlara ýurdumyzyň ýokary okuw mekdepleriniň talyplary, professor-mugallymlary, alymlary bilen bir hatarda, Russiýa Federasiýasynyň, Hytaý Halk Respublikasynyň, ABŞ-nyň, Koreýa Respublikasynyň, Birleşen Arap Emirlikleriniň, Awstriýanyň, Germaniýanyň, Belarusuň, Malaýziýanyň, Özbegistanyň, Gazagystanyň, beýleki onlarça döwletiň abraýly ýokary okuw mekdepleriniň talyplarynyň, alymlarynyň gatnaşmagyna garaşylýar. Halkara derejeli intellektual ýaryşlarda ýeňiji bolan zehinli talyplary medallar, dürli derejeli diplomlar bilen sylaglamak göz öňünde tutulýar.

Hormatly Prezidentimiz hasabaty diňläp, ýurdumyzda bilim ulgamyny döwrebaplaşdyrmak, kämil hünärmenleri taýýarlamak boýunça maksatnamalaýyn işleriň durmuşa geçirilýändigini belledi. Döwlet Baştutanymyz halkara ylmy maslahatlaryň, sergileriň, olimpiadalaryň ylym-bilim ulgamynda hyzmatdaşlygy ösdürmäge ýardam berýändigini aýdyp, şu ýylyň oktýabr-noýabr aýlarynda ýurdumyzyň ýokary okuw mekdeplerinde halkara olimpiadalary we ylmy-amaly maslahatlary geçirmek boýunça taýýarlanan teklibi goldady hem-de wise-premýere bu ugurda degişli işleri geçirmegi tabşyrdy.

Ministrler Kabinetiniň Başlygynyň orunbasary, daşary işler ministri R.Meredow Türkmenistanyň sanly ulgamdaky halkara hyzmatdaşlygyny ösdürmek boýunça ýerine ýetirilýän işler barada hasabat berdi. Şunuň bilen baglylykda, döwlet Baştutanymyzyň garamagyna birnäçe teklipler hödürlenildi.

Ýurdumyzyň kanunçylyk binýadyny halkara hukugyň häzirki zaman kadalaryna laýyk getirmäge gönükdirilen Hereketleriň meýilnamasyny taýýarlamak teklip edilýär. Şunuň bilen baglylykda, Türkmenistanyň sanlylaşdyrmak boýunça kabul edilen konwensiýalara goşulmagynyň mümkinçiliklerini öwrenmek, milli kanunçylygymyzy halkara resminamalara laýyklykda kämilleşdirmek babatda hyzmatdaş halkara guramalar bilen degişli okuwlary we maslahatlary yzygiderli geçirmek göz öňünde tutulýar. Şu ýylyň noýabrynda Aşgabatda sanly hyzmatdaşlygy ösdürmek boýunça sebitara dialogy geçirmek teklip edilýär. Bu çäre agzalan ugurda sebitdäki döwletler hem-de kompaniýalar bilen ýurdumyzyň arasyndaky hyzmatdaşlygyň täze mümkinçiliklerine seretmäge, tejribe alyşmaga, Türkmenistanda alnyp barylýan işler bilen dünýä jemgyýetçiligini giňden tanyşdyrmaga mümkinçilik döreder.

Hasabatyň dowamynda sanly ulgamyň kiberhowpsuzlygyny üpjün etmekde dünýäniň tehnologik taýdan ösen ýurtlary bilen 2025 — 2027-nji ýyllarda hyzmatdaşlyk etmek barada Maksatnamany taýýarlamak teklip edildi.

Şunuň bilen baglylykda, bu ugurda döwletimiziň hünärmenleri tarapyndan daşary ýurtlarda kiberhowpsuzlygy üpjün etmek, maglumat tehnologiýalaryny goramak boýunça ulgamlaýyn alnyp barylýan işler bilen tanyşdyrmak, ýurdumyzyň tejribesi bilen paýlaşmak boýunça degişli işleri yzygiderli geçirmek meýilleşdirilýär. Birleşen Milletler Guramasynyň Terrorçylyga garşy göreşmek müdirligi bilen bilelikde sanly ulgamy goramak boýunça alnyp barylýan işleri mundan beýläk-de berkitmek teklip edilýär. Şunda 2024-2025-nji ýyllarda BMG-niň bu ýöriteleşdirilen düzümi tarapyndan internet ulgamynda kiberterrorçylygyň öňüni almak, wajyp infrastrukturalary kiberhüjümlerden goramak ýaly ugurlarda alnyp barylýan işlere we taslamalara ýurdumyzyň işjeň gatnaşmagy maksadalaýyk hasaplanýar.

Ýewropada Howpsuzlyk we Hyzmatdaşlyk Guramasy bilen kiberhowpsuzlyk, döwlet we bank hyzmatlaryny, şeýle-de ykdysadyýeti sanlylaşdyrmak, sanly maliýe ulgamlaryny peýdalanmakda milli hünärmenleriň sowatlylygyny ýokarlandyrmak babatda hyzmatdaşlygy ösdürmek teklip edilýär. Agzalan ugurlarda bu gurama bilen hyzmatdaşlygy mundan beýläk-de berkitmek maksady bilen, dürli sebitleýin taslamalary durmuşa geçirmegi öwrenmek, hünär kämilleşdiriş okuwlaryny yzygiderli geçirmek göz öňünde tutulýar.

Hormatly Prezidentimiz hasabaty diňläp, ýurdumyzda ykdysadyýetiň pudaklaryny döwrebaplaşdyrmakda sanly ulgamyň giňden ornaşdyrylýandygyny belledi. Döwrüň talabyna görä, hyzmatlaryň görnüşleri kämilleşdirilýär hem-de artdyrylýar. Şunuň bilen baglylykda, bu ugurdaky işleri dünýä ülňülerine laýyk alyp barmak üçin halkara tejribäni yzygiderli öwrenmek zerur bolup durýar diýip, döwlet Baştutanymyz aýtdy we wise-premýer, daşary işler ministrine birnäçe anyk tabşyryklary berdi.

Soňra Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew raýat awiasiýasy pudagynyň hünärmenleriniň hünär derejesini ýokarlandyrmak boýunça alnyp barylýan işler barada hasabat berdi.

Bellenilişi ýaly, “Türkmenhowaýollary” agentliginiň Howa ulaglarynyň işgärlerini taýýarlaýan mekdebiniň binýadynda Halkara raýat awiasiýasy guramasynyň okuwyny guramak teklip edilýär. Şeýle hem ýurdumyzyň Halkara howa menzilleriniň ýük dolanyşygyny artdyrmak we ýük ammarlarynyň kuwwatyndan netijeli peýdalanmak, halkara ýük howa gatnawlarynyň sanyny artdyrmak maksady bilen, amaly okuwlary guramak meýilleşdirilýär. Şunuň bilen baglylykda, agentligiň ýolbaşçysy döwlet Baştutanymyzyň garamagyna degişli teklibi hödürledi.

Hormatly Prezidentimiz hasabaty diňläp, soňky ýyllarda ýurdumyzyň raýat awiasiýasy pudagynyň barha ösdürilýändigini, täze uçarlaryň yzygiderli satyn alynýandygyny, howa menzillerinde döwrebap şertleriň döredilýändigini, munuň bolsa halkara derejeli hünärmenleri taýýarlamagy talap edýändigini belledi. Döwlet Baştutanymyz raýat awiasiýasy pudagynyň hünärmenleriniň hünär derejesini ýokarlandyrmak we tejribelerini artdyrmak boýunça okuwlary geçirmek baradaky teklibi goldap, agentligiň ýolbaşçysyna bu ugurda degişli işleri alyp barmagy tabşyrdy.

Hormatly Prezidentimiz Serdar Berdimuhamedow Ministrler Kabinetiniň agzalaryna ýüzlenip, «Pähim-paýhas ummany Magtymguly Pyragy» ýylynda “Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasynyň” kabul edilendigini belledi. Maksatnamanyň çäklerinde ýurdumyzy durmuş-ykdysady taýdan ösdürmäge gönükdirilen birnäçe işler alnyp barylýar. Ýakynda bolsa paýtagtymyzda Türkmenistanyň maýa goýum forumy ýokary derejede geçirildi diýip, döwlet Baştutanymyz aýtdy we forumyň netijeleri boýunça seljeriş işlerini geçirip, ähli ugurlar boýunça maýa goýumlary çekmekde hasabatlary taýýarlamagyň möhümdigini nygtady.

Hormatly Prezidentimiz Hökümet agzalaryna halkara derejeli bu forumda gelnen netijeleri, anyk teklipleri jemläp, wajyp ähmiýetli desgalary işe girizmek we düýbüni tutmak dabaralarynyň taryhy ähmiýetini beýan etjek brifing görnüşli halkara maslahaty ýokary guramaçylyk derejesinde geçirmegi tabşyrdy. Şunuň bilen birlikde, döwlet Baştutanymyz Türkmenistanyň maýa goýum forumynyň jemleri boýunça ylmy taýdan esaslandyrylan okuw-usuly gollanmany taýýarlamak babatda degişli görkezmeleri berdi. Munuň özi ýurdumyzyň ykdysady ugurly ýokary okuw mekdeplerinde bilim berýän mugallymlar, talyplar üçin gymmatly gollanma bolar.

Soňra wise-premýer, daşary işler ministri R.Meredow türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň ýurdumyzda amatly maýa goýum ýagdaýyny döretmek boýunça başyny başlan giň möçberli işleriniň hormatly Prezidentimiz tarapyndan üstünlikli durmuşa geçirilýändigini aýtdy. Ýakynda paýtagtymyzda geçirilen maýa goýum forumynyň giň wekilçilikli düzümi hem-de onuň çäklerinde gazanylan ylalaşyklar onuň aýdyň güwäsidir. Türkmenistan bu möhüm forumy üstünlikli geçirmek bilen, dünýä giňişliginde ygtybarly hyzmatdaşdygyny ýene-de bir gezek görkezdi. Şunuň bilen bir hatarda, türkmen-owgan serhedinde täze energetika, ulag-kommunikasiýa, logistika desgalarynyň işe girizilmegi hem-de gurluşygyna badalga berilmegi mynasybetli dabaralaryň möhüm ähmiýeti bellenildi. Bu taslamalar hoşniýetli goňşuçylyk däplerine esaslanýan hyzmatdaşlygyň aýdyň nusgasydyr.

Pursatdan peýdalanyp, wise-premýer, daşary işler ministri mejlise gatnaşyjylaryň adyndan hormatly Prezidentimiz Serdar Berdimuhamedowy we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy bu möhüm wakalar bilen tüýs ýürekden gutlady we berk jan saglyk, uzak ömür, asylly başlangyçlarynyň rowaçlyklara beslenmegini arzuw etdi.

Döwlet Baştutanymyz halkara maýa goýum forumynyň üstünlikli geçirilendigine ünsi çekdi hem-de onuň çäklerinde guralan gepleşikleriň we gazanylan ylalaşyklaryň wajyp ähmiýetini belledi. Gahryman Arkadagymyzyň gatnaşmagynda Türkmenistanyň we Owganystanyň halklarynyň umumy bähbidine hyzmat etjek möhüm desgalaryň işe girizilmegi we düýbüniň tutulmagy ýurdumyzyň hoşniýetli goňşuçylyk ýörelgelerine esaslanýan daşary syýasatynyň üstünlikli durmuşa geçirilýändiginiň aýdyň beýanydyr diýip, hormatly Prezidentimiz aýtdy.

Mejlisde döwlet durmuşyna degişli başga-da birnäçe möhüm meselelere garaldy we olar boýunça degişli çözgütler kabul edildi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Halkara Gimnastika Federasiýasynyň (FIG) prezidenti Morinari Watanabe Aşgabada eden saparynyň dowamynda ýaş türkmen gimnastikaçysy Fatima Kambarowanyň zehinini belläp geçdi we onuň Olimpiýa oýunlarynda çykyş etmek üçin uly potensialynyň bardygyny nygtady. Bu, Türkmenistanyň milli gimnastika ýygyndysynyň görkezme çykyşyndan soň boldy.

FIG-niň ýokary derejeli wekiliýeti, şol sanda Aziýa Gimnastika Bileleşiginiň (AGU) başlygy Abdulrahman Ben Saad Al-Şatri we AGU-nyň wise-prezidenti Timur Abduwaliýew bilen bilelikde, türkmen gimnastikasy üçin taryhy waka boldy.

Milli gimnastika ýygyndysynyň baş tälimçisi Fiza Aýwazowa duşuşygy "unutmajak" diýip atlandyrdy we onuň ýurtda sportuň ösmegi üçin ähmiýetini nygtady.

Topar dürli enjamlary: halka, lenta we top ulanyp, toparlaýyn görkezme çykyşyny taýýarlady. FIG-niň ýolbaşçysynyň ünsüni aýratyn Fatima Kambarowa çekdi, ol beýleki gimnastikaçylaryň arasynda saýlandy.

Aýwazowanyň sözlerine görä, Watanabe gyzda Olimpiýa oýunlarynda çykyş etmek üçin uly potensial gördi. Bu ykrar, eýýäm Kambarowany geljegi uly sportçy hasaplaýan türkmen federasiýasynyň we tälimçiler toparynyň bahasy bilen gabat geldi.

Fatima Kambarowa halkara arenasynda eýýäm üstünlik gazandy, dürli ýaryşlarda altyn medallary aldy. Tizara Tashkentde geçirilen ýaryşlarda ol eminler topary tarapyndan "türkmen gimnastikasynyň ýyldyzy" hökmünde bellendi.

Saparyň dowamynda, Türkmenistanyň tälimçiler toparynyň ösüş mümkinçilikleri, şol sanda halkara tälimçi we emin seminarlaryna gatnaşmak meseleleri hem ara alnyp maslahatlaşyldy.

Morinari Watanabeniň Aşgabada resmi sapary 14-nji sentýabra çenli dowam eder.