17-18-nji awgustda Şymkent şäherinde (Gazagystan) jiu-jitsu boýunça «JJAU Regional Championship Central Asia 2024» ýaryşy geçiriler.

Ýaryşa Gyrgyzystanyň, Gazagystanyň, Täjigistanyň, Özbegistanyň hem-de Türkmenistanyň ýygyndy toparlary gatnaşar. Türgenler U16, U18 ýaş derejeleri boýunça hem-de ulularyň bäsleşiginde tutluşarlar.

Türkmenistanyň ýygyndy toparyna 14 türgen wekilçilik edýär. Bu barada «SalamNews» saýtynyň habarçysyna Türkmenistanyň Bedenterbiýe we sport baradaky döwlet komitetinden habar berdiler.

Ýaryşlar jiu-jitsunyň üç ugry boýunça ýaýbaňlandyrylar: newaza, fighting hem-de contact.

Ýaponiýada esaslandyrylan jiu-jitsu samuraýlaryň däpleriniň dowamydyr. Samuraýlar üstünlikleriniň diňe öz mümkinçiliklerini ulanyp, duşmany ýaragsyz ýeňmegiň mümkindigne ynanypdyrlar. Bu söweş sungaty garşydaşyň güýjüni özüne garşy ulanmagy özünde jemleýär.  

Türkmenistanyň "Altyn asyr" topary Hindistanyň "Ist Bengal" toparyny myhmançylykda 2024/25-nji ýylyň AFK-2 Çempionlar ligasynyň saýlama duşuşygynda ýeňip, bäsleşigiň topar tapgyryna çykdy.

Kalkuttada geçirilen duşuşyk Ýazguly Hojageldyýewiň şägirtleriniň 3:2 hasably ýeňşi bilen tamamlandy.
Ildeşlerimiziň düzüminde Murat Annaýew (18-nji minut), Selim Nurmuradow (28-nji) we Mihail Titow (52-nji) dagy gol geçirdiler.

Aşgabat klubynyň AFK-2 Çempionlar ligasynyň topar tapgyryndaky bäsdeşleri 16-njy awgustda Kuala-Lumpurda geçiriljek bije çekiş dabarasynyň netijesinde kesgitlener, “Altyn asyr" bije çekilişikde dördünji sebede düşer.​​​​​​​​​

Türkmen türgenleri SSSR-iň sport ussady Bokenbaý Saktaganowyň ýadygärligine bagyşlanan halkara boks ýaryşynda şowly çykyş etmegi başardylar. Ýaryş 6 — 10-njy awgust aralygynda Gazagystan Respublikasynyň Aktau şäheriniň «Dosan batyr» sport toplumynda geçirildi.    

Ýaryşa Türkmenistanyň, Täjigistanyň, Özbegistanyň, Garagalpak Respublikasynyň hem-de Gazagystanyň dürli şäherleriniň wekilleri gatnaşdylar.

Türkmen boksçulary medallaryň altysyna eýe boldular: bir altyn, bir kümüş hem-de dört bürünç medallar.

54 kilogram agram derejesinde Jeýhun Döwranow altyn medala mynasyp boldy.

Meýlis Şadurdyýew (57 kg) kümüş medala eýe çykdy.

Hangeldi Lukmanow (48 kg), Mekan Sabyrow (60 kg), Annageldi Jumamyradow (63,5 kg) hem-de Atageldi Seýidow (67 kg) dagy hormat münberiniň üçünji basgançagyna çykmagyň hötdesinden geldi.

Türkmen türgenleri Türkmenistanyň boks boýunça ýetginjekler ýygyndysynyň uly tälimçisi Maksut Şeripowyň hem-de milli ýygyndy toparyň baş tälimçisi Tenilbek Jumakulowyň ýolbaşçylygynda çykyş etdi. Mundan başga-da, bu ýaryşda Türkmenistanyň wekili Timur Halilow referi hökmünde işledi.  

Ýene iki günden ― 16-njy awgustda Türkmenistanyň milli futbol çempionatynyň üçünji aýlawyna badalga berler. Ozal hem habar berşimiz ýaly, möwsümiň öňdäki iki aýlawy 8 topar bilen dowam eder. Ilkinji iki aýlawda ýaryşyň içinde bolan Marynyň «Energetik» topary öz islegi bilen ýaryşdan çekildi.

Türkmenistanyň Futbol federasiýasy üçünji aýlawyň öňüsyrasynda resmi web saýtyndaky ýaryş tertibini täzeledi. Onda «Energetigiň» ýokdugy aýratyn göze ilýär. Yzda galan 16 duşuşykda 48 utuk toplan «Arkadag» futbol topary ýaryşyň başyny çekýär. 37 utukly «Altyn asyr» ikinji, 34 utukly «Ahal» üçünji orunda.

Üçünji aýlawyň ilkinji duşuşygy 16-njy awgust güni «Ahal» we «Aşgabat» toparlarynyň arasynda geçiriler. 17-nji awgustda bolsa «Arkadag» topary «Şagadamy». «Nebitçi» «Köpetdagy» kabul eder. Tapgyrdaky «Altyn asyr» ― «Merw» duşuşygy «aragatnaşykçylaryň» şu gün AFK-nyň Çempionlar ligasy ― 2-niň saýlama duşuşygyna gatnaşýandygy sebäpli başga bir güne süýşürildi.

Türkmenistanyň futbol çempionatynda 19-njy tapgyryň duşuşyklary:

16-njy awgust: «Ahal» ― «Aşgabat»;

17-nji awgust: «Arkadag» ― «Şagadam»;

17-nji awgust: «Nebitçi» ― «Köpetdag».

Türkmenistanly ýetginjek türgenler 16 ― 24-nji awgust aralygynda Norwegiýanyň Lillehammer şäherinde körling boýunça geçiriljek halkara derejeli okuw-türgenleşik ýygnanyşygyna gatnaşarlar. Heniz 16 ýaşyny hem doldurmadyk türgenleriň dördüsi milli ýygyndymyzyň baş tälimçisi Sakina Gulamalyýewanyň ýolbaşçylygynda bu türgenleşiklerde Türkmenistana wekilçilik ederler.

Türkmen metbugatynyň habar berşi ýaly, ýaryşa 14 döwletiň wekilleri gatnaşar. Olar bilelikdäki okuw-türgenleşik ýygnanyşygynda sportuň Olimpiýa maksatnamasyna girýän görnüşi boýunça tejribesini artdyrarlar.

Granitden ýasalan daşlar bilen oýnalýan körling Türkmenistanda ýaş sport görnüşleriniň biri. Sportuň bu görnüşi boýunça milli federasiýa 2020-nji ýylda döredildi. Şonda bäri bu federasiýa halkara gatnaşyklarynyň hem gerimini barha giňeldip, türgenleriň tejribesiniň baýlaşmagy üçin yzygiderli aladalanýar. Lillehammerdäki türgenleşikler hem bu babatda nobatdaky ädim bolar.

Türgenleşiklerde türkmen ýygyndysyna kapitan Emina Nurmuhammedowa, onuň kömekçisi Aişa Geldimyradowa, türgenler Daňatar Muhamow we Selim Baýramow dagylar wekilçilik eder. Bu türgenleriň ählisi geçen ýyl milli federasiýa tarapyndan geçirilen çempionatyň netijeleri boýunça saýlanyp alyndy.

Azerbaýjanyň Towuz şäheriniň «Turan» futbol topary ýurduň çempionatynyň täze möwsümindäki ilkinji ýeňşini gazandy. Topar 2-nji tapgyryň çägindäki duşuşykda «Sumgaýyt» toparyny kabul edip, güýçli garşydaşyndan 1:0 hasabynda üstün çykdy.

Duşuşykdaky ýeke-täk goly 34-nji minutda ýarymgoragçy Haýal Najafow geçirdi ― diýip, «Azerisport» habar berýär.

Şeýlelikde, ilkinji iki duşuşygynda utulmadyk «Turan-Towuz» bu duşuşyklarda toplan 4 utugy bilen ýaryş tertibiniň üçünji basgançagyna geçdi.

Duşuşykdan soň «Turan-Towuzyň» baş tälimçisi, türkmenistanly hünärmen Gurban Berdiýew pikirlerini şeýle sözler bilen beýan etdi:

«Biri-birinden tapawutly iki ýarym oýnadyk. Men oýunçylarymyň birinji ýarymdaky işjeňliginden hoşal. Arakesmede hasaby goramak barada pikir alyşdyk. «Sumgaýyt» güýçli düzüminiň bardygyny oýunda subut etdi. Emeli otly meýdanda oýnamak bolsa iki topar üçin hem kynçylyk döredýär. Käbir pursatlarda bolsa oýun parahat alyp gitdik.

Biz ilkinji iki duşuşygymyzy güýçli garşydaşlar bilen geçirdik. Mundan beýläk has gowy oýny orta goýmaga çalşarys. Netijesini bolsa bilelikde göreris. Hüjümde Jona ynanýaryn, ol işjeň hereket edýär. Ýöne oňa ýene biraz wagt gerek».

Aşgabadyň «Altyn asyr» futbol topary AFK-nyň Çempionlar ligasy ― 2-niň saýlama tapgyrynyň çäginde «Ist Bengal» topary bilen 14-nji awgustda geçiriljek duşuşyk üçin Hindistanyň Kalkutta şäherine baryp, bu ýerde ilkinji türgenleşiklerini geçdi. Bu barada «Janköýer» sport neşiri habar berýär.

Hindistana ugramazyndan öň bolsa «Altyn Asyr» Aşgabatda Marynyň «Merw» futbol topary bilen ýoldaşlyk duşuşygyny geçirdi. Bu duşuşyk Ýazguly Hojageldiýewiň şägirtleriniň 2:1 hasabyndaky ýeňşi bilen tamamlandy.

«Ist Bengal» ― «Altyn asyr» duşuşygy şu şäherdäki «Salt Leýk» stadionynda geçiriler. Duşuşygyň Aşgabat wagty bilen, takmynan, 18:30-da başlanmagyna garaşylýar. «Altyn Asyr» bu duşuşykda garşydaşyndan üstün çykyp bilse, AFK-nyň Çempionlar ligasynyň ikinji derejeli ýaryşynyň toparçalaýyn bölegine goşular. Topar hindistanly garşydaşyndan ýeňilse, yklym ýaryşlardaky ýoluny AFK-nyň Çagyryş ligasyndan dowam eder.

«Aşgabat» futbol topary Birleşen Arap Emirliklerindäki okuw-türgenleşik ýygnanyşygyny üstünlikli tamamlady. Topar bu ýerdäki ahyrky ýoldaşlyk duşuşygynda ýerli «Elite Falkons» futbol toparyny 2:1 hasabynda ýeňdi.

Şeýlelikde, bu duşuşyk Tofik Şukurowyň şägirtleriniň milli çempionatyň üçünji aýlawynyň öňüsyrasyndaky ahyrky taýýarlygy boldy.

Türkmenistana gaýdyp geljek topar Ýokary liganyň 19-njy tapgyrynda 16-njy awgust güni «Ahal» bilen duşuşar.

Häzirki wagtda milli çempionatyň ýaryş tertibinde 16 utukly «Aşgabadyň» altynjy, 34 utukly «Ahalyň» bolsa üçünji orny eýeleýändigini ýatladýarys.

Iki hepdeden gowrak wagt dowam eden sport äleminiň iň uly baýramçylygy bolan tomusky Olimpiýa oýunlary uly dabara bilen tamamlandy.

100 ýyldan soň 3-nji gezek tomusky Olimpiýa oýunlaryny kabul eden Fransiýanyň paýtagty Pariždäki Sen Deni stadionynda geçirilen dabara fransuz ýüzüjisi Leon Marşanyň alawy öçürmeginden soň başlandy. Ýapylyş dabarasy özboluşly çykyşlara, täsin wideoroliklere baý boldy. Netijede, Olimpiýa baýdagy aşak düşürilip, indiki Olimpiadany guraýjy Los-Anjeles şäheriniň ýolbaşçysy Karen Bassa gowşuryldy. Ol hem baýdagy Simona Baýlz bilen bilelikde stadionyň üçeginden ýüp bilen aşak sallanan meşhur aktýor Tom Kruza berdi. Tom Kruz stadiondan motosikl bilen çykyp gitdi. Ondan soň ozal taýýarlanan wideo şekiller arkaly baýdak 2028-nji ýyldaky Olimpiýa oýunlarynyň geçiriljek ýeri Los-Anjeles şäheri tarapyndan meşhur şahsyýetleriň gatnaşmagyna kabul edildi. Dabaranyň dowamynda Los-Anjelesden Red Hot Çili Peppers, Billie Eiliş hem-de Snoop Dogg ýaly aýdym-saz dünýäsiniň ägirtleriniň kiçeňräk konserti boldy we stadionda uly ekranlar arkaly görkezildi. Dabaranyň ahyrynda bolsa feýerwerkleriň asmany bezedi we tomusky Olimpiýa oýunlary tamamlandy.

17 — 24-nji awgust aralygynda Täjigistanyň paýtagty Duşenbe şäherinde 17 ýaşa çenli futbolçylardan ybarat bolan toparlaryň arasynda Merkezi Aziýanyň futbol assosiasiýasynyň (CAFA) çempionaty geçiriler. Bu barada CAFA-nyň metbugat gullugy öz Instagram sahypasynda beýan edýär.

Ýaryşa ýygyndy toparlaryň altysy gatnaşar: Owganystan, Eýran, Gyrgyzystan, Täjigistan, Tükmenistan we Özbegistan. Toparlar her biri ýygyndylaryň üçüsini jemleýän toparçalaryň ikisine bölünerler. Bije çekişlik 15-nji awgustda bolar.

Toparçadaky duşuşyklaryň netijesinde birinji orny eýelän toparlar finalda altyn medal ugrunda çykyş etmäge hukuk gazanarlar. Toparçasynda ikinji orny eýelän ýygyndylar bolsa bürünç medal ugrunda göreşerler.

Ýaryşyň duşuşyklarynyň ählisi CAFA-nyň YouTube-kanalynda (@cafassociation) göni efirde görkeziler.  

3 — 10-njy awgust aralygynda Malaýziýada «Selangor Asian 14 & Under Grade A Tournament (Southeast Asia)» halkara tennis ýaryşy geçirildi. Bu barada «SalamNews» saýtynyň habarçysyna Türkmenistanyň Tennis federasiýasyndan habar berdiler.

Malaýziýanyň Negeri-Sembilan ştatynyň Bandar-Baru-Enstek şäherinde geçýän Aziýadan zehinli ýaş tennisçileriň 64-si gatnaşyp, şolaryň 32-si oglanlar, 32-si bolsa gyzlardyr.

Türkmen tennisçisi Ilima Guseýnowa jübütleýin ýaryşda ajaýyp netije görkezdi we Eýranyň wekili Hanoý Şabanpur bilen bilelikde ikinji orna mynasyp boldy. Ýekelikdäki bäsleşikde bolsa Guseýnowa çärýekfinala ýetmegi başardy. Munuň özi şeýle derejedäki ýaryş üçin täze sepgitdir.

Ilima Türkmenistanyň milli ýygyndy toparynyň baş tälimçisi hem-de «Aşgabat» tennis akademiýasynyň wekili Miraly Gasanow halypalyk edýär.

Birinji aýlaw

Ilima Guseýnowa (TÜRKMENISTAN) / Hana Şabanpur (Eýran) — Adani Ažari (Malaýziýa) / Naba Nişan (Maldiwler) — 6:2, 6:3.

Çärýekfinal

Ilima Guseýnowa (TÜRKMENISTAN) / Hana Şabanpur (Eýran) — Romina Rafaiborijeni (Eýran) / Beatrisa Elwina (Malaýziýa) — 6:0, 6:2.

Ýarymfinal

Ilima Guseýnowa (TÜRKMENISTAN) / Hana Şabanpur (Eýran) — Senhýon Kim / Ýerin Lim (Koreýa Respublikasy) — 6:4, 1:6 (10:1).

Final

Ilima Guseýnowa (TÜRKMENISTAN) / Hana Şabanpur (Eýran) — Şiwali Gurung (Nepal) / Sa’Ýa Maula (Indoneziýa) — 3:6, 5:7. 

Şu günler paýtagtymyzda  AFK-nyň PRO derejeli tälimçilik okuwynyň jemleýji, 7-8-nji modullary dowam edýär. Jemleýji modullary 29-njy iýulda badalgasyny alan tälimçilik okuwynyň dowamynda gatnaşyjylar adatdakylary ýaly nazaryýet hem-de tejribe sapaklaryny geçdiler. Häzirki wagtda bolsa geçilen sapaklar bilen bagly tejribe synaglary dowam edýär. 14-nji awgusta çenli dowam etjek tejribe synaglaryny üstünlikli tabşyran hünärmenlerimize ýakyn geljekde AFK-nyň  PRO derejeli tälimçilik ygtyýarnamasy gowşurylar.

Tälimçilik okuwynyň nazaryýet sapaklarynyň «Ýyldyz» myhmanhanasynda, tejribe sapaklarynyň bolsa «Aşgabat» köpugurly stadionynda geçirilendigini ýatladýarys. Tälimçilik okuwynyň ilkinji alty modullarynyň geçen ýylyň dowamynda hem-de şu ýylyň başyna geçirilendigini bellemek gerek.

 Tälimçilik kursy UEFA-nyň gözükdirijisi, moldowaly Genadiý Skurtulyň ýolbaşçylygynda geçirildi. Okuw kursunyň jemleýji tapgyrlaryna gözegçi hökmünde AFK-nyň tälimçilik okuwynyň Tehniki bölüminiň ýolbaşçysy Wilhelmus Kowermars (Niderlanlar Patyşalygy) hem-de bu bölümiň gözükdirijisiniň maslahatçysynyň wezipesini ýerine ýetirýän özbegistanly hünärmen Usmon Toşew gatnaşdylar.

1988-nji ýylda Niderlandlaryň futbol ýygyndysy bilen Ýewropa çempiony bolan W.Kowermans bu barada beren beýanatynda geçirilen okuwyň netijesinden örän hoşaldygyny, onuň ýakyn geljekde türkmen futbolunyň ýokary derejelere çykmagyna oňyn şert döretjekdigini ynam bilen belläp geçdi.

Ýeri gelende bellesek, AFK-nyň PRO derejeli tälimçilik okuwyny 2023-nji ýylyň 21-nji awgusty bilen 2024-nji ýylyň 14-nji awgusty aralygynda geçirilýändigini bellemek gerek. Dört tapgyrda geçirilen tälimçilik okuwy 8 moduldan ybarat boldy.