Paýtagtymyzyň Olimpiýa şäherçesindäki Başa-baş söweş sungaty sport toplumynda türkmen türgenlerini Parižde geçiriljek tomusky Olimpiýa oýunlaryna ugratmak dabarasy geçirildi. Dabara ministrlikleriň, pudaklaýyn dolandyryş edaralarynyň, jemgyýetçilik guramalarynyň ýolbaşçylarydyr wekilleri, sport hünärmenleri, türgenler hem köp sanly talyp ýaşlar gatnaşdylar.

Sport toplumynyň girelgesinde ýaýbaňlandyrylan ajaýyp sergide türkmen sportunyň sazlaşykly ösüşleri aýdyň beýanyny tapýar.

Dabara Türkmenistanyň Prezidentiniň XXXIII tomusky Olimpiýa oýunlaryna gatnaşýan Türkmenistanyň milli ýygyndy toparynyň agzalaryna ýollan Gutlagynyň okalmagy bilen başlandy

— Milli sportuň ösen ulgamynyň kemala gelýän döwründe döwletimiziň sport abraýyny ýokarlandyrmak, ilkinji nobatda, siziň paýyňyza düşýär. Döwlet derejesinde ýaş türgenler üçin döredilýän ajaýyp şertlerimiziň netijesini ýeňişli ýollar, nusgalyk sport üstünlikleriňiz arkaly görkezmelisiňiz. Siziň Fransiýa Respublikasynyň Pariž şäherinde geçiriljek XXXIII tomusky Olimpiýa oýunlarynda üstünlikli çykyş edip, Döwlet baýdagymyzy belentde parlatjakdygyňyza berk ynanýaryn — diýip, Türkmenistanyň Prezidenti Serdar Berdimuhamedow ýurdumyzyň Pariž olimpiadasyna gatnaşjak ýygyndy toparynyň agzalaryna ýollan Gutlagynda belleýär.

Şeýle dürdäne jümleler türkmen türgenlerini täze ýeňişlere ruhlandyrdy. Bu hakykat türgenleriň sport toplumynyň giň meýdançasynda eden ynamly ýörişinde hem aýdyň şöhlelendi.

Watanymyzda amala aşyrylýan sport özgertmelerini, taryhy ýeňişleri wasp edýän ajaýyp aýdym-sazlardyr tanslar dabaranyň şowhunyny goşalandyrdy.

Çäräniň ahyrynda türkmen türgenlerini Parižde geçiriljek tomusky Olimpiýa oýunlaryna ugratmak dabarasyna gatnaşyjylaryň hormatly Prezidentimize Ýüzlenmesi kabul edildi.

Hormatly Türkmenistanyň milli ýygyndy toparynyň agzalary!

Gadyrly türgenler!

Sizi 2024-nji ýylyň 26-njy iýuly — 11-nji awgusty aralygynda Fransiýa Respublikasynyň Pariž şäherinde geçiriljek XXXIII tomusky Olimpiýa oýunlaryna gatnaşmaga hukuk gazanmagyňyz bilen tüýs ýürekden gutlaýaryn. Size Olimpiýa oýunlarynda Garaşsyz, hemişelik Bitarap Türkmenistana mynasyp wekilçilik etmegi hem-de eziz Diýarymyzyň halkara sport abraýyny täze, belent derejelere götermegi tüýs ýürekden arzuw edýärin.

Gadyrly türgenler!

Gahryman Arkadagymyzyň esaslandyran bitewi hem-de strategik döwlet syýasaty esasynda halkara sport giňişliginde eziz Watanymyzyň abraýy günsaýyn artýar. Ýurdumyzda dürli ýaryşlaryň, şol sanda halkara derejedäki ýaryşlaryň geçirilmegi sport boýunça milli strategiýanyň möhüm ugurlarynyň biri bolup durýar. Olimpiýa oýunlary, halkara sport ýaryşlary sportuň üsti bilen parahatçylyk, dostluk, ylalaşyklylyk taglymlaryny durmuşa geçirmekde özboluşly gural bolup durýar. Türkmenistan dürli derejedäki sport ýaryşlarynyň geçirilýän merkezine öwrüldi. Ýurdumyzyň ähli künjeginde sport toplumlarynyň, stadionlaryň we beýleki sport maksatly binalaryň yzygiderli gurlup ulanmaga berilmegi türgenlerimiziň dürli sport ýaryşlarynda üstünlikli çykyş etmegini, baýrakly orunlara mynasyp bolmagyny şertlendirýär.

Hormatly türgenler!

Sport ulgamy döwlet syýasatynyň ileri tutulýan ugry hökmünde dünýä derejesinde ösdürilýär. Gözel paýtagtymyz ak mermerli Aşgabadyň görküne görk goşýan, sebitde deňi-taýy bolmadyk, döwrebap enjamlar bilen enjamlaşdyrylan Olimpiýa şäherçesi guruldy. Ýurdumyzda türkmen türgenleriniň halkara sport ýaryşlarynda mynasyp çykyş edip, Döwlet tugumyzy belentde parlatmagy üçin ähli şertler döredildi. Türkmenistan Halkara Olimpiýa Komitetiniň, Aziýanyň Olimpiýa Geňeşiniň, Birleşen Milletler Guramasynyň Bedenterbiýe we sport boýunça hökümetara komitetiniň agzasy bolmak bilen, Olimpiýa hereketiniň ösüşine öz mynasyp goşandyny goşýar. Munuň özi ýurdumyzyň sport diplomatiýasynyň barha rowaçlanýandygyna aýdyň şaýatlyk edýär.

Hormatly Türkmenistanyň milli ýygyndy toparynyň agzalary!

Gadyrly türgenler!

Berkarar döwletiň täze eýýamynyň Galkynyşy döwründe ýurdumyzda köpçülikleýin welosipedli ýörişleriň, bedenterbiýe-sport we medeni çäreleriň yzygiderli geçirilmegine aýratyn ähmiýet berilýär. Bularyň ählisi sagdynlygyň, bagtyýarlygyň ýurdy hökmünde eziz Diýarymyzyň dünýädäki abraýyny has-da ýokarlandyrýar.

Milli sportuň ösen ulgamynyň kemala gelýän döwründe döwletimiziň sport abraýyny ýokarlandyrmak, ilkinji nobatda, siziň paýyňyza düşýär. Döwlet derejesinde ýaş türgenler üçin döredilýän ajaýyp şertlerimiziň netijesini ýeňişli ýollar, nusgalyk sport üstünlikleriňiz arkaly görkezmelisiňiz. Siziň Fransiýa Respublikasynyň Pariž şäherinde geçiriljek XXXIII tomusky Olimpiýa oýunlarynda üstünlikli çykyş edip, Döwlet baýdagymyzy belentde parlatjakdygyňyza berk ynanýaryn.

Hormatly Türkmenistanyň milli ýygyndy toparynyň agzalary!

Gadyrly türgenler!

Size XXXIII tomusky Olimpiýa oýunlarynda Garaşsyz, hemişelik Bitarap Watanymyza mynasyp wekilçilik edip, uly üstünlikleri gazanmagyňyzy ýene-de bir gezek tüýs ýürekden arzuw edýärin. Goý, halkara sport giňişliginde Türkmenistanyň Döwlet baýdagy hemişe belentde parlasyn!

Türkmenistanyň Prezidenti

Serdar Berdimuhamedow.

Türkmenistanyň Halk Maslahatynyň nobatdaky mejlisi 2024-nji ýylyň 24-nji sentýabrynda, Aşgabat şäherindäki Maslahat köşgünde geçiriler. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow şu gün Türkmenistanyň Halk Maslahatynyň Prezidiumynyň degişli Kararyna gol çekdi. Bu barada «Watan» habarlar gepleşiginde habar berildi.

Bellenilişi ýaly, resminamada:

• Türkmenistanyň Halk Maslahatynyň nobatdaky mejlisini 2024-nji ýylyň 24-nji sentýabrynda çagyrmalydygy we ony Aşgabat şäherinde, Maslahat köşgünde geçirmelidigi;

• Türkmenistanyň Halk Maslahatynyň mejlisini ýokary derejede geçirmek boýunça guramaçylyk toparyny döretmelidigi we onuň düzümini tassyklamalydygy;

• Welaýatlaryň we Aşgabat şäheriniň halk maslahatlarynyň «Türkmenistanyň Halk Maslahatynyň mejlisini çagyrmak we guramaçylykly geçirmek hakynda» Türkmenistanyň Halk Maslahatynyň Prezidiumynyň 2023-nji ýylyň 18-nji iýulynda kabul eden 1-nji Karary bilen tassyklanan, Türkmenistanyň Halk Maslahatynyň düzümine welaýatlaryň we Aşgabat şäheriniň halk maslahatlary tarapyndan teklip edilýän jemgyýetçilik wekillerini hödürlemegiň Tertibine laýyklykda, Türkmenistanyň Halk Maslahatynyň düzümine welaýatlar we Aşgabat şäheri boýunça jemgyýetçilik wekilleriniň sanawlaryny 2024-nji ýylyň 1-nji sentýabryna çenli Türkmenistanyň Halk Maslahatynyň Diwanyna bermelidigi;

• Türkmenistanyň Halk Maslahatynyň Diwanynyň, Türkmenistanyň Mejlisi bilen bilelikde, Türkmenistanyň Halk Maslahatynyň mejlisine taýýarlyk görmek we ony geçirmek bilen bagly işlerde welaýatlaryň, etraplaryň hem-de şäherleriň halk maslahatlaryna guramaçylyk-usulyýet taýdan ýardam bermelidigi we bu işleri utgaşdyrmalydygy barada aýdylýar.

«Türkmenistanyň Halk Maslahatynyň mejlisini çagyrmak we guramaçylykly geçirmek hakynda» Türkmenistanyň Halk Maslahatynyň Prezidiumynyň Karary türkmen halkynyň şöhratly ata-babalarynyň döwleti dolandyrmakda toplan köpasyrlyk tejribesine daýanyp, olaryň parasatly wesýetlerine eýerip, döwlet we jemgyýetçilik durmuşynyň möhüm meselelerini çözmäge ilatyň wekilleriniň giňden gatnaşmagyny üpjün etmek, jemgyýetiň agzybirligini, jebisligini berkitmek, milli demokratiýany ösdürmek boýunça gazanylan üstünlikleri döredijilikli kämilleşdirmek hem-de Türkmenistanyň halkynyň bähbitlerine wekilçilik edýän ýokary wekilçilikli edarany – Türkmenistanyň Halk Maslahatynyň mejlisini guramaçylykly geçirmek maksady bilen kabul edildi.

Hormatly Prezidentimiz Serdar Berdimuhamedow hanym Ursula fon der Lýaýene Ýewropa Komissiýasynyň Başlygy wezipesine gaýtadan saýlanmagy mynasybetli tüýs ýürekden gutlaglaryny we iň gowy arzuwlaryny iberdi.

Döwlet Baştutanymyz Türkmenistanyň Ýewropa Bileleşigi bilen ýola goýlan gatnaşyklary mundan beýläk-de ösdürmäge ygrarlydygyny beýan edip, ýurdumyzyň bu gatnaşyklary Merkezi Aziýa bilen Ýewropa Bileleşiginiň arasyndaky sebitara hyzmatdaşlyk formatynyň çäklerinde hem ösdürilmegini goldaýandygyny belledi, şeýle hem özara bähbitli hyzmatdaşlygy geljegi uly ugurlar boýunça ilerletmekde tagalla etmäge taýýardygyny tassyklady.

Hormatly Prezidentimiz mümkinçilikden peýdalanyp, Ýewropa Komissiýasynyň Başlygyna tüýs ýürekden berk jan saglyk, bagtyýarlyk we abadançylyk hem-de eýeleýän wezipesinde mundan beýläk-de uly üstünlikleri arzuw etdi.

19-njy iýulda geçirilen Hökümet mejlisinde wise-premýer B.Orazdurdyýewa Türkmenistanyň ýygyndy toparyny şu ýylyň 26-njy iýuly – 11-nji awgusty aralygynda Fransiýa Respublikasynyň Pariž şäherinde geçiriljek XXXIII Tomusky Olimpiýa oýunlaryna ugratmak bilen bagly alnyp barylýan işler barada döwlet Baştutanyna hasabat berdi. Bu barada «Watan» habarlar gepleşiginde habar berildi.

Hasabatda bellenilişi ýaly, Halkara Olimpiýa Komitetiniň ýolbaşçysynyň çakylygyna laýyklykda, Olimpiýa oýunlaryna türkmen türgenleri sportuň dört görnüşi – dzýudo, agyr atletika, ýeňil atletika we suwda ýüzmek boýunça gatnaşar.

Häzirki wagtda Türkmenistanyň 19 adamdan ybarat sport wekiliýetini ugratmak dabarasyny guramaçylykly geçirmek boýunça degişli işler alnyp barylýar.

Bellenilişi ýaly, 22-nji iýulda Aşgabatdaky Olimpiýa şäherjiginiň «Sport» myhmanhanasynda jemgyýetçilik birleşikleriniň, Milli Olimpiýa we Paralimpiýa komitetleriniň, sportuň görnüşleri boýunça milli federasiýalaryň ýolbaşçylarynyň, talyp ýaşlaryň gatnaşmagynda Türkmenistanyň milli ýygyndy toparyny ugratmak dabarasyny geçirmek meýilleşdirilýär. Şunuň bilen baglylykda, döwlet Baştutanynyň garamagyna bu möhüm çäräni geçirmek babatda birnäçe teklipler hödürlenildi.

Prezident Serdar Berdimuhamedow hasabaty diňläp, ýurtda köpçülikleýin sporty we bedenterbiýäni ösdürmäge uly ähmiýet berilýändigini nygtady.

Döwlet Baştutany wise-premýer B.Orazdurdyýewa Fransiýa Respublikasynyň Pariž şäherinde geçiriljek XXXIII Tomusky Olimpiýa oýunlaryna gatnaşjak Türkmenistanyň milli ýygyndy toparyny dabaraly ugratmak çäresine gowy taýýarlyk görmegi hem-de ony ýokary guramaçylyk derejesinde geçirmegi tabşyrdy.

«Milan» futbol kluby ispaniýaly hüjümçi Alwaro Morata bilen şertnama baglaşdy. Bu barada italiýan klubynyň resmi saýty habar berýär. Hüjümçi topara Madridiň «Atletikosyndan» geçdi.

30 ýaşly futbolçy bilen 2028-nji ýylyň 30-njy iýunyna çenli şertnama baglaşyldy. Şertnamada ony ýene bir ýyl uzaltmak mümkinçiligi hem göz öňünde tutulýar.

Morata «Milanda» 7-lik belgili köýnekçäni geýer.

«Milan» bu transfer üçin «Atletiko» klubyna 13 million ýewro tölär.

Soňky iki ýylda «Atletikonyň» üstünlikleri üçin göreşen Morata ozal Italiýada «Ýuwentusyň» hem köýnekçesini geýipdi. Ol La Liganyň geçen möwsüminde 32 duşuşykda 15 gol geçirdi.

Ýewropa çempionynyň we Amerikanyň kubogynyň tamamlanmagyndan soň FIFA futbol boýunça milli ýygyndylaryň reýting sanawyny täzeledi.

Amerikanyň kubogyna mynasyp bolan Argentinanyň ýygyndysy we fransuzlar birinji we ikinji orundaky ýerini gorap sakladylar. Ilkinji üçlügi Ýewro ― 2024-iň çempionlary ― ispanlar eýeledi. Kolumbiýanyň ýygyndysy bolsa ilkinji 10-luga girdi.

Täzelenen sanawda türkmen ýygyndysy ozalky ornunda ― 144-nji basgançakda galdy. Türkmenistanyň futbol ýygyndysynyň ahyrky duşuşyklaryny iýun aýynda geçirendigini ýatladýarys. Türkmen futbolçylary Daşkentde Özbegistanyň ýygyndysyndan 1:3 hasabynda ýeňlip, Aşgabatda Gonkongyň ýygyndysy bilen 1:1 hasabynda deňme-deň oýnandygyny ýatladýarys.

FIFA-nyň 2024-nji ýylyň 18-nji iýulyndaky reýtingi aşakdaky ýaly:

1. (1) Argentina ― 1901,48;

2. (2) Fransiýa ― 1854,91;

3. (8) Ispaniýa ― 1835,67;

4. (5) Angliýa ― 1812,26;

5. (4) Braziliýa ― 1785,61;

20 (20) Eýran ― 1611,16;

61. (62) Özbegistan ― 1397,41;

102. (101) Gyrgyzystan ― 1213,58;

103. (102) Täjigistan ― 1212,41;

109. (109) Gazagystan ― 1193,62;

111. (111) Azerbaýjan ― 1179,88.

«Sportda dopinge garşy göreşmek hakynda» Türkmenistanyň Kanunyna üýtgetmeler girizmek hakynda Türkmenistanyň Kanuny kabul edildi.

16 maddadan ybarat bolan täze Kanunda gozgalýan mesele bilen bagly käbir düzgünler has döwrebaplaşdyrylýar.

Kanunda nygtalyşy ýaly, «Barlagyň netijesi oňyn bolmadyk halatynda türgeniň ýa-da onuň wekiliniň şulara hukugy bardyr:

1) «B» nusgalygynyň barlagynyň geçirilmegini talap etmäge;

2) gaýragoýmazdan düşündiriş bermäge;

3) eger zerur bolsa, «B» nusgalygynyň gaýtadan barlagynda bolmagyna;

4) «A» nusgalygynyň barlagynyň netijeleri boýunça barlaghanalar üçin Halkara standartynda göz öňünde tutulan maglumatlary saklaýan resminamalaryň göçürmesini almaga;

5) TDGMA-nyň dopinge garşy kadalaryna laýyklykda öz wagtynda, adalatly we tarapgöýsüz diňlenilmäge;

6) Halkara dopinge garşy topara TDGMA-nyň dopinge garşy kadalaryna laýyklykda, birinji basgançakly guramanyň çözgüdine şikaýat etmäge».

Şeýle hem Kanunyň 17-nji maddasyna laýyklykda, dopinge garşy kadalaryň bozulmagy bilen baglanyşykly jedeller TDGMA-nyň dopinge garşy kadalaryna laýyklykda çözülýär.

Ýaşajyk türkmen futbolçylary Daşkent şäherinde geçirilen «AFL Kids Cup — 2024» atly halkara ýaryşda üstünlikli çykyş edip, iki altyn, bir bürünç medala mynasyp boldular. Bu barada «Watan» habarlar gepleşiginde habar berildi.

Ýaryşda altyn medallary «Batly» we «Gökje» futbol toparlary gazandy. Bu toparlaryň birinjisi 2012-nji ýylda doglan we şondan hem kiçi ýaşly okuwçylardan, ikinjisi bolsa 2014-nji ýylda doglan hem-de şondan kiçi ýaşly mekdep okuwçylaryndan ybaratdyr. 2009-njy ýylda doglan ýetginjeklerden düzülen «Çandybil» futbol topary bolsa kümüş medal bilen ýaryşyň hormat münberine çykmagy başardy.

Soňky ýyllarda geçirilmegi däbe öwrülen «AFL Kids Cup» ýaryşy çagalaryň arasynda futboly wagyz etmekde we geljekki ýyldyzlary ýüze çykarmakda uly ähmiýete eýedir. Ýaryşy guraýjylardyr dürli ýurtlardan gelen futbol jemgyýetçiliginiň wekilleri türkmenistanly toparlaryň başarnygyna ýokary baha berdiler.

15-nji iýun — 11-nji iýul aralygynda suwda ýüzmek boýunça türkmen ýygyndysy Gruziýanyň Batumi şäherinde okuw-türgenleşik ýygnanyşygyny geçdi. Bu çäräniň baş maksady türkmen türgenleriniň şu ýylyň 26-njy iýuly — 11-nji awgusty aralygynda Parižde geçiriljek tomusky Olimpiýa oýunlarynyň öňüsyrasynda geçýän ykjam türgenleşikleri arkaly has-da kämilleşdirmeklerinde möhüm ähmiýete eýedir.

Olimpiýa oýunlaryna türkmen ýüzüjilerinden Musa Žalaýew (100 metr, erkin usul) hem-de Aýnura Primowa (100 metr, arkanlygyna ýüzmek) wekilçilik eder.

Okuw-türgenleşik ýygnanyşygyna Dmitriý Nowikowyň hem-de Mark Pilýuginiň ýolbaşçylygyndaky türkmen türgenleriniň 12-si gatnaşdy. Türgenleşikleriň ýörite maksatnamasy öňde boljak möhüm synaglaryň öňüsyrasynda türgenlerimiziň ykjam taýýarlygynyň ýokary derejesini üpjün etmekde aýratyn ähmiýete eýedir.

Okuw türgenleşik ýygnanyşygyna gatnaşan erkekler toparymyz Dawid Akopýan, Musa Žalaýew, Seýran Nurmyradow, Muhammetmyrat Gutlyýew, Alan Muhin hem-de Gurban Hommadow ýaly ussatlardan ybarat boldy.

Zenanlar ýygyndymyza bolsa Eneş, Ejeş hem-de Aýnur Primowalar, Anastasiýa Morginştern, Ogulmerjen Nuraýewa we Aýnur Merdanowa wekilçilik etdi.

Futbolçylaryň ýekelikdäki iň abraýly baýragy bolan «Altyn top» ugrunda ýiti göreş dowam edýär. Tamamlanan 2 ýaryşdan soň dalaşgärleriň arasyndaky göreş has-da güýjäp, faworitler ornuny çalyşdy. Mundan 1 aý ozal iň esasy 2 dalaşgär «Real Madridiň» ýyldyzlary Winisius Junior bilen Jud Bellingemdi. Olar häzir hem esasy dalaşgär hasaplanýar. Ýöne Ispaniýanyň Ýewropa çempiony bolmagyndan soň Rodri sanawyň başynda ornaşdy.  «Goal.com» saýtynyň işgärleriniň pikirine görä, Rodri edil häzirki wagtda «Altyn top» baýragynyň birinji derejeli dalaşgäri hasaplanýar. Kopa Amerikada Braziliýanyň çärýek finaldan gaýtmagyndan soň Winisius Junioryň almak mümkinçiligi azalyp, ol 2-nji orunda barýar. Angliýanyň finalda utulmagyndan soň Jud Bellingem 3-nji orna düşdi.

«Mançester Sitiniň» ýarymgoragçysy Rodri Ýewropa çempionatynyň finalynyň 2-nji ýarymynda alan şikesi sebäpli oýundan çykmaly boldy. Ýöne ol toparynyň finala çenli gelmeginde uly rol oýnady. Ispaniýanyň ýygyndysyny-da, «Mançester Siti» klubuny-da Rodriniň oýnan duşuşyklarynda ýeňmek juda kyn. Onuň Ýewropa çempionatynyň iň ökde oýunçysy saýlanmagy-da Rodriniň baýragy gazanmak mümkinçiligini has-da ýokarlandyrýar.  

Junioryň «El Klasikodaky» het-trigi, «La Ligadaky» şowly çykyşy, UEFA Çempionlar Ligasynda «Real Madridiň» çempionlygyna uly goşandy bellärliklidir. Ol Braziliýanyň ýygyndysynda Kopa Amerikada Paragwaýyň derwezesinden 2 gol geçirdi. Ýöne jerimeli ýagdaýa düşüp, toparynyň çärýek final oýnunda tribunada oturmaly boldy.

Jud Bellingem geçen möwsümiň 1-nji ýarymyň iň ökde oýunçysy bolsa-da, ol bu depgininiň möwsümiň ahyryna çenli saklap bilmedi. «Real Madrid» 1-nji ýarymda onuň gollary bilen ençeme ýeňiş gazanan bolsa, Bellingem gyşdan soň toparynyň gollaryna o diýen uly goşant goşmady. Ol çempionatda 2 wajyp gol geçirse-de, netijede Angliýanyň ýygyndysy bassyr 2-nji finalyndan boş gaýtdy.

Şeýle-de, sanawda 4-nji orunda «Real Madridiň» başga bir ýyldyzy Dani Karwahal bolup, klubunyň hem-de milli ýygyndysynyň taryhy çempionlyklaryna uly goşant goşdy.

5-nji basgançakda Kopa Amerikanyň çempiony Argentinanyň ýyldyzy Lautara Martinesiň ady bar. Şeýle-de, Toni Kroos, Kilian Mbappe, Harri Keýn, Fil Foden we Niko Uilliams ilkinji onlugy tamamlaýan beýleki futbolçylardyr. Messi sanawda 16-njy orunda bolsa, Kriştianu Ronaldu ilkinji 20-lige hem girenok.

Sentýabr aýynda baýragyň dalaşgärleri, oktýabr aýynda bolsa ýeňijisi mälim ediler.

Marynyň «Merw» futbol topary 19-njy iýuldan 31-nji iýula çenli aralykda türkiýäniň Bolu şäherinde okuw-türgenleşik ýygnanyşygyny geçirer. Ýygnanyşyga 24 futbolçy we resmi wekilleriň 11-si gatnaşar.

Bu ýygnanyşygyň çäklerinde «Merw» ýoldaşlyk duşuşyklarynyň birnäçesini geçirer. Toparyň garşydaşlarynyň biri Azerbaýjanyň «Turan-Towuz» topary bolar. Bu topara meşhur türkmenistanly tälimçi Gurban Berdiýewiň tälim berýändigini ýatladýarys.

Şeýle hem «Merwiň» Türkiýäniň «Pendikspor» topary bilen hem ýoldaşlyk duşuşygyny geçirmegine garaşylýar.

«Merw» Türkmenistanyň futbol çempionatynyň üçünji aýlawyna 17-nji awgustda girişer. Şol gün topar 19-njy tapgyryň çäginde Balkanabadyň «Nebitçisi» bilen myhmançylykda duşuşar. Yzda galan iki aýlawdan soň «Merwiň» 16 duşuşykda toplan 21 utugy bilen bäşinji orny eýeleýändigini ýatladýarys.