Aşgabadyň «Altyn asyr» futbol kluby Rumyniýanyň Braşow şäherindäki okuw-türgenleşik ýygnanyşygynda ilkinji halkara ýoldaşlyk duşuşygyny üstünlikli geçirdi. Türkmen topary Rumyniýanyň çempionatynyň ikinji diwizionynda çykyş edýän «Metaglobus» kluby bilen duşuşdy.

Jankoyer.com.tm. internet neşiriniň habar bermegine görä, oýun 1:0 hasabynda «Altyn asyryň» peýdasyna tamamlandy. Duşuşykdaky ýeke-täk gol 22-nji minutda Myrat Annaýew tarapyndan penaltiden uruldy.

Bu oýun «Altyn asyr» üçin AFK Çempionlar ligasy 2 halkara ýaryşyna taýýarlygyň bir bölegi boldy. Ýaryşyň toparçalaýyn tapgyryna çykmak üçin aýgytlaýjy oýun 14-nji awgustda Kalkutta şäherinde geçirilip, onda «Altyn asyr» Hindistanyň «Ist-Bengal» topary bilen duşuşar.

Bellenilişi ýaly, «Altyn asyr» Rumyniýadaky OTÝ-niň çäginde ýene-de birnäçe ýoldaşlyk duşuşyklaryny geçirer.

Garet Sautgeýt Angliýanyň milli ýygyndysynyň baş tälimçiliginden gitdi. Bu barada Angliýanyň Futbol assosiasiýasy habar berdi.

53 ýaşly hünärmen 2016-njy ýyldan bäri Angliýanyň milli ýygyndysyny türgenleşdirip gelýärdi. Iňlisler onuň golastynda iki gezek Ýewropa çempionatynyň finalyna çykdylar, 2018-nji ýyldaky Dünýä çempionatyny ýarym finalda, 2022-nji ýyldaky Dünýä çempionatyny bolsa çärýek finalda terk etdiler.

Sautgeýtiň Angliýanyň milli ýygyndynysyň halypasy hökmündäki soňky oýny Ýewro-2024-iň finaly boldy. Aýgytlaýjy oýunda Angliýa Ispaniýadan 2:1 hasabynda asgyn geldi.

Ýeri gelende bellesek, Garet Sautgeýt Angliýanyň milli ýygyndysyny 102 oýunda baş tälimçi hökmünde meýdança alyp çykdy.

Iňlis neşirleriniň ýazmagyna görä, Angliýanyň milli ýygyndysynyň täze baş tälimçisi bolmaga esasy dalaşgär «Çelsi» we «Braýton» klublarynyň ozalky halypasy Grem Potterdir.

5 — 15-nji iýul aralygynda Russiýa Federasiýasyndan Mongoliýa Respublikasyna uzan «Ýüpek ýoly – 2024» ralli-reýdi 11 tapgyrdan ybarat boldy. 5 243,13 kilometrlik menzile uzan halkara ýaryşyna 9 döwletden (Russiýa Federasiýasy, Belarusiya, Mongoliýa, Hytaý Halk Respublikasy, Şwesariýa, Owganystan, Sirýa Arap Respublikasy, Serbiýa, Türkmenistan)  türgenler gatnaşdylar.

Bu halkara ýaryşa jemi 50 ekipaž, şol sanda T1 bäsleşigine 3 sany, T2 ýaryşyna 6, T3 boýunça 6, T5-den 12, Açyk (OPEN) görnüşinden 5, Moto-kwadrasikelleriň ýaryşyna 18 topar gatnaşdy.

T2 görnüşinde 5 243,13 kilometrlik menzili ynamly külterlän ildeşlermiz, Türkmenistanyň Awtomobil sport federasiýasynyň türgenleri, «Türkmenawtoulaglary» agentliginiň Awtoulag serişdelerini abatlamak, ýerlemek we olara enjamlaýyn hyzmat etmek boýunça önümçilik birleşiginiň sürüjileri Merdan Toýlyýew sürüji we Şöhrat Toýlyýew ýolbelet (şuturman) hökmünde 2-nji orna, şeýle hem «SILK WAY 2024» atly kuboga eýe boldular. 

Şeýle hem biziň Türkmenistanyň Awtomobil sport federasiýasynyň türgeni Maksatmyrat Daňatarow we  onuň ýolbeledi (şturman) Türkmenistanyň Awtomobil sport federasiýasynyň türgeni, Daşoguz welaýatynyň bedenterbiýe we sport baradaky Baş müdürliginiň Daşoguz şäheriniň 5-nji  sport mekdebiniň instruktor-usulyýetçisi Didar Orazmedow 3-nji orna hem-de «SILK WAY 2024» kubogyna eýe çykdylar.

Türkmen ekipažlarynyň ikisi hem «NISSAN PATROL» kysymly awtoulagda çykyş etdiler.

Ýene sanlyja günden Fransiýanyň Pariž şäherinde badalga aljak tomusky Olimpiýa oýunlarynyň petekleriniň rekord möçberiniň satylandygyny sport baýramçylygynyň guramaçylyk komitetiniň ýolbaşçysy Toni Estange habar berdi.

Oýunlaryň başlanmagyna iki hepde galanda petekleriň 8,6 millionysy satyldy.

— Rekord 1996-njy ýylyň Atlantada geçen Olimpiýa oýunlaryna degişli bolup, şonda 8,3 million petek ýerlenipdir. Biz bolsa bu görkezijini ýaryşyň başlanmagyndan iki hepde öň yzda galdyrdyk. Häzirki wagtda Olimpiýa oýunlarynyň 8,6 million, Paralimpiadanyň bolsa bir milliondan gowrak petegi ýerlenildi. Biz rekordy täzelemegi başarandygymyza begenýäris. Muňa garamazdan, has-da uly görkezijilere ýetip biljekdigimizi nygtamak isleýärin — diýip, belleýän Estangeniň sözleri «AFP» (Agence France-Presse) tarapyndan sport jemgyýetçiligine ýetirildi.  

Guramaçylyk komitetiniň satylan petekleriň umumy sanyny 10 millionlyk bellige ýetirmek isleýändigi bellenilýär.

Tomusky Olimpiýa oýunlary 26-njy iýun — 11-nji awgust aralygynda geçer. Bu oýunlara türkmen türgenleriniň altysy wekilçilik eder.

14-nji gezek guralýan «Ýüpek ýoly» rallisiniň onunjy tapgyrynyň geçirilen güni hem gatnaşyjylar üçin garaşylmadyk synaglara baý boldy.

Bu tapgyr Mongoliýanyň Baýanhongor we Mandalgobi sebitlerini birikdirdi. Geçilmeli menzil 562, 86 kilometre barabar boldy.  

Onunjy tapgyr marafon görnüşinde geçdi: mehanikleriň hem-de kömekçi wekilleriň galandygy sebäpli, türgenler ýüze çykan näsazlyklary özbaşdak bejermeli boldular. Şol bir wagtyň özünde hem, tapgyryň menzilleri sürüjileriň hem-de şturmanlaryň örän ünsli bolmagyny talap edýän diýseň ýokary tizlikde geçilmeli sähra ýollaryndan we daşlyk ugurlardan uzady.  

Daňatarowyň nobatdaky ýeňşi

Mihail Mitýaýewi alty minutdan gowrak yzda galdyran Maksatmyrat Daňatarow ýolsuz ýerde hereket edýän ulaglaryň T2 ýaryşynyň ýeňijisi boldy. Öňdäki üçlügi bolsa umumy hasapda öňdeligi elden bermeýän Andreý Suşensow jemledi.   

«S&A Racing» toparynyň sürüjisi Andreý Suşensow ahyrky tapgyryň öňüsyrasynda bäş sagat tapawut bilen öňde barýar. Ikinji orny bolsa «Türkmenawtoulaglary» agentliginiň türgenleri — doganlar Merdan hem-de Şöhrat Toýlyýewler eýeleýär. Türkmenistanyň Awtomobil sporty federasiýasynyň ekipažy — Maksatmyrat Daňatarowyň we onuň şturmany Didar Orazmedowyň topary bolsa öňdäki üçlügi jemleýär. Şondan soňky orunlar Mihail Mitýaýewde hem-de Maýlis Abdullaýewde galýar.

Halkara ralli-reýdi 15-nji iýulda jemlener.

Germaniýada guralan futbol boýunça 17-nji Ýewropa çempionaty tamamlanyp, Ispaniýanyň ýygyndysy yklymyň çempiony boldy. Berlindäki «Olympiastdionda» oýnalan finalda Ispaniýanyň ýygyndysy Angliýanyň ýygyndysyny 2-1 hasabynda ýeňlişe sezewar etdi.

1-nji ýarymy durnukly ýagdaýda, hüjümleriň azlygynda geçip, toparlara derwezäni sarsdyrmak başartmady. Ispanlar 2-nji ýaryma gol bilen başladylar. 47-nji minutda Lamin Ýamalyň pasyndan soň Niko Uilliams hasaby açdy. Bu goldan soň Ispaniýanyň ýygyndysy ýene-de 2-3 sany örän amatly pursady elden giderdi. Iňlisleriň tälimçisi Garet Sautgeýt oýnuň 70-nji minutynda Koul Palmeri meýdança girizdi. Ol hem 3 minutdan soň, Bellingamyň beren pasyny gol bilen netijelendirdi. Şunlukda, 73-nji minutda hasap deňlendi.

Şondan soň ispanlar täzeden hüjümlerini artdyryp başlady. Duşuşygyň esasy wagtynyň tamamlanmagyna 4 minut galanda Moratanyň deregine meýdança giren Oýarsabal ispanlariň ýeňiş goluny geçirdi. Bu gol 86-njy minutda bellige alyndy. Duşuşygyň ahyrynda iňlisler tasdanam hasaby deňläpdi. Palmeriň burçdan ýerine ýetiren urgusynda topy ilki Raýs kellesi bilen urdy. Ony derwezeçi Unaý Simon saklamagy başardy. Yzyna gaýdan top täzeden derwezä uruldy. Bu gezek Dani Olmo topy çyzykdan çykardy. Şunlukda, 2-1 hasabynda ýeňşini baýram eden Ispaniýanyň ýygyndysy 4-nji gezek yklymyň çempiony boldy. 1964-nji, 2008-nji hem-de 2012-nji ýyllardaky çempionlyklarynyň üstüne ýene birini goşan Ispaniýa bu ugurda 3 çempionlygy bolan Germaniýany yzda galdyrdy. Ispaniýanyň ýygyndysy Ýewropa çempionatynda ähli duşuşygynda-da ýeňiş gazanyp, çempion bolan ilkinji ýygyndy hökmünde hasaba alyndy.

Angliýanyň ýygyndysy bolsa bassyr 2-nji gezek finalda utulyp, şeýle statistika eýe bolan ilkinji topar diýlip kesgitlendi.

Duşuşykdan soň kubok gowşurylyş dabarasynda Niko Williams finalyň ýyldyzy diýlip saýlandy. Ispaniýaly Rodri çempionatyň iň ökde oýunçysy diýlip yglan edildi. Lamin Ýamal çempionatyň iň ökde ýaş futbolçysy baýragyna laýyk görüldi. Ispaniýaly Dani Olmo 3 gol bilen çempionatyň iň netijeli futbolçysy baýragyna laýyk hasaplanyldy.

Türkmenistanyň birnäçe rekordynyň eýesi Walentina Meredowa Pariž ― 2024 Olimpiýa oýunlarynda ýeňil atletika boýunça ýaryşlarda ýurda wekilçilik eder. Ol 100 metr aralyga ylgamak boýunça ýaryşar.

39 ýaşly türgeniň soňky ýyllarda halkara derejeli ýaryşlarda ýokary netijeleri gazanyp gelýändigini aýratyn nygtamak gerek. Ol şu ýylyň başynda Tähranda geçriilen Aziýanyň ýeňil atletika çempionatynda 60 metr aralygy 7,44 sekuntda geçip, milli rekordy täzeledi.

Parižkäki Olimpiada Walentina Meredowanyň gatnaşjak ikinji Olimpiýa oýunlary bolar. Ol 2008-nji ýylda Pekinde geçirilen Oýunlara hem gatnaşypdy. Tejribeli türgen Oýunlara Baýmyrat Aşyrmyradowyň tälim bermeginde taýýarlanýar.

«Ýüpek ýoly» rallisiniň dokuzynjy tapgyry: tizligiň şalygy

«Ýüpek ýoly» ralli-marafonynyň kerweni hereketini belent dag ugurlary boýunça dowam edýär. Bu gezekki tapgyrda türgenler 558 kilometrlik menzili külterlediler. Dag gerişlerinden, derýa-jülgelerden uzan ýol ekipažlaryň agyr tebigy şertler bilen ýüzbe-ýüz bolmagyna getirdi. Bu bolsa ýaryşyň has-da dartgynlylygyny şertlendirdi.

Ýolsuz ýerden hereket edýän ulaglaryň bäsleşigi

Mihail Mitýaýewiň ýolbaşçylygyndaky «LADA Sport ROSNEFT Raid» topary T2 ýaryşynyň bu tapgyryny ýeňiş bilen jemledi. Şondan 8 minut yza galan Türkmenistanyň Awtomobil sporty federasiýasynyň türgeni Maksatmyrat Daňatarowyň ekipažy «Ýüpek ýoly» rallisiniň bu tapgyryny ikinji orunda jemledi. Öňdeligi eýelän türgenden 10 minutlyk tapawut bilen gelen Andreý Suşensow üçünji boldy.  

Umumy hasap boýunça Andreý Suşensow ynamly öňde barýar. «Türkmenawtoulaglary» agentliginiň ekipažy — doganlar Toýlyýewler bolsa ikinji orny özlerinde saklaýarlar. Öňdäki üçlügi Maksatmyrat Daňatarowyň ekipažy jemlese, şondan soňky orunlarda Mihail Mitýaýew bilen Meýlis Abdullaýew ýerleşdi.

«Ýüpek ýoly» ralli-reýdi 15-nji iýulda jemlener.

Şu gije futbol boýunça 17-nji Ýewropa çempionatynyň Berlindäki final duşuşygy bilen tamamlanar. «Olympiastadionda» oýnaljak finalda Ispaniýa bilen Angliýanyň ýygyndylary duşuşarlar. 00:00-da başlanjak duşuşyga fransiýaly Fransua Leteksie eminlik eder.

Final duşuşygy iki toparyň arasyndaky 28-nji duşuşyk bolar. Mundan öňki 27 oýnuň 13-sinde Angliýa, 10-synda Ispaniýa ýeňiş gazanyp, 4 oýun deňlikde tamamlandy. Angliýa 45 gol geçiren bolsa, ispanlar 32 goly derwezä gönükdirdi.

Futbolyň öňdebaryjy 2 ýygyndysy yklym ýaryşynda mundan öň 2 gezek gabatlaşdylar. 1980-nji ýylda toparçalardaky oýunlarda Angliýa 2-1 ýeňipdi. 1996-njy ýylda çärýek finalda duşuşan toparlaryň şol oýnunda-da ýeňiş iňlisleriň tarapynda boldy. Esasy wagty golsuz geçen oýunda penaltileriň netijesinde Angliýa ýarym finala çykypdy. Iki topar Dünýä Kubogynda, şol sanda UEFA Milletler Ligasynda-da 2 gezekden duşuşdylar. 1950-nji ýyldaky Dünýä Kubogynda Ispaniýa 1-0 ýeňen bolsa, 1982-nji ýyldaky duşuşykda hasap açylmandy. UEFA Milletler Ligasynda bolsa 2018-nji ýylda 2 gezek gabatlaşdylar. Iki topar hem myhmançylykda ýeňiş gazanypdy.

Ýeňşe dalaşgär Ispaniýa, ýöne...
Finalda ýeňşe dalaşgär Ispaniýa hasaplanýar. Olar bu ýere 6 duşuşykda ýeňiş gazanyp, rekordy görkeziji bilen geldiler. Iňlisler 6 oýnuň 3-sinde esasy wagtda deňme-deň oýnadylar. Pleý-off tapgyryndaky 3 duşuşygynda-da ilkinji gol geçirden tarap Angliýanyň ýygyndysy boldy. Çempionat başlamazdan ozal, köpler Angliýany 1-nji derejeli faworit hökmünde görkezýärdi. Ýöne toparçalardaky oýunlardan soň, hatda pleý-off duşuşygyndan soň esasy faworit Ispaniýa boldy.

Ispaniýanyň ýygyndysynyň 5-nji, Angliýanyň bolsa 2-nji finaly boljak bu duşuşyk ýa-da täze çempiony ýüze çykarar, ýa-da iň köp çempionlyk gazanan topary. Ispaniýanyň ýygyndysy mundan öňki 4 finalyň 3-sinde çempionlyk gazanyp, bu ugurda rekordy Germaniýa bilen paýlaşýar. Ispanlar 1964-nji ýylda çempion bolup, 20 ýyldan soňky finalda Fransiýadan ýeňlipdi. 2008-nji we 2012-nji ýyllarda gazanylan çempionlyk bilen olar ýeňişsiz geçen ýyllarynyň öwezini dolupdy.

Angliýanyň ýygyndysy yklym ýaryşynda ilkinji gezek 4 ýyl öňki ýaryşda finala çykyp, Londonda Italiýadan penaltileriň netijesinde ýeňlipdi.  Futbolyň watany hasaplanýan Angliýanyň ýygyndysynyň häzirlikçe uly ýaryşlarda ýeke-täk kubogy bolup, olam 1966-njy ýylda gazanylan dünýä çempionlygydyr. Şondan bäri çempionlykdan daşda galan iňlisler kuboksyz geçen aralygy şu gezek dolmak isleýärler.

Türkmen türgenleri şu ýylyň birinji ýarymynda halkara ýaryşlarynyň 361 medalyny gazanmagy başardylar. Şolaryň 122-si altyn, 103-si kümüş, 136-sy bolsa bürünç medallardyr.

Bu barada 12-nji iýulda geçirilen Türkmenistanyň Ministrler Kabinetiniň giňişleýin mejlisinde aýdyldy.

Şol gün sport ulgamynda alnyp barylýan işler barada hasabat berlip, bedenterbiýäni we sporty ösdürmek, ussat türgenleri taýýarlamak boýunça çäreleriň dowam etdirilýändigi habar berildi.

Hokkeý boýunça geçirilen halkara ýaryş, Aşgabat şäheriniň «Arkalaşygyň täze sport mümkinçilikleriniň şäheri» diýlip yglan edilmegi ýurdumyzyň sport abraýyny has-da pugtalandyrdy.

«Ýüpek ýoly» rallisiniň sekizinji tapgyry jemlendi. Mongoliýanyň Altaý sebitinde geçen tapgyr 492,12 kilometre uzady.

Ralliniň ýolsuz ýerde hereket edýän T2 ýaryşynda «Türkmenawtoulaglary» agentliginiň türgeni Merdan Toýlyýewiň ekipažyny 13 minut, Andreý Suşensowyň toparyny bolsa 19 minut yzda galdyran Türkmenistanyň Awtomobil sporty federasiýasynyň wekili Maksatmyrat Daňatarow öňe saýlandy.

Toparlaýyn hasapdaky öňdeligi bolsa Andreý Suşensow elden bermeýär. Türkmenistanyň ekipažlary — Toýlyýewiň hem-de Daňatarowyň toparlary ikinji we üçünji orunlarda barýarlar.  

«Ýüpek ýoly» rallisi 15-nji iýulda tamamlanýar.

16-nji awgustda  ýurdumyzyň futbol çempionatynyň üçünji aýlawyna badalga berler. Şol gün bir duşuşyk geçirilip, onda «Aşgabat» – «Köpetdag» toparlary duşuşar.

Çempionatyň 19-njy tapgyry 17-nji awgustda «Ahal» – «Energetik» hem-de «Nebitçi» – «Merw» toparlarynyň arasyndaky duşuşyklar bilen jemlener. Bu barada Türkmenistanyň Futbol federasiýasy habar berdi.

Dört aýlawdan ybarat bolan futbol çempionatymyzda toparlaryň 9-sy («Arkadag» – Arkadag şäheri, «Altyn Asyr», «Aşgabat», «Köpetdag» – hemmesi Aşgabat şäheri, «Ahal» – Ahal welaýatynyň Änew şäheri, «Şagadam» – Balkan welaýatynyň Türkmenbaşy şäheri, «Nebitçi» – Balkan welaýatynyň Balkanabat şäheri, «Energetik» – Mary welaýatynyň Türkmenbaşy şäherçesi, «Merw» – Mary welaýatynyň Mary şäheri) çykyş edýär. 

Ýurdumyzyň futbol çempionatynyň jemleýji, dördünji aýlawynyň duşuşyklarynyň geçiriljek wagty soň kesgitlener.