Universal Söweş Çempionatynyň (UFC) baş direktory Deýna Waýt, rus söweşijisi Arman Sarukýanyň ýerine Islam Mahaçew bilen tutluşykda braziliýaly Renato Moýkanonyň çykyş etjekdigini habar berdi.

UFC 311 ýaryşy 19-njy ýanwar gijesi Los-Anjelesde geçiriler. Ýeňil agramda häzirki çempion Mahaçew bilen Sarukýanyň arasyndaky tutluşyk ýaryşyň esasy wakasy bolmalydy. Sarukýan arkasynyň şikesi sebäpli ýaryşdan çekilmäge mejbur boldy.

"Mahaçew indi ýeňil agramda çempionlyk guşagy ugrunda Moýkano bilen duşuşar" diýip, Waýt habar berdi.

Mahaçew 33 ýaşynda, ol 26 ýeňiş gazandy we 1 ýeňlişe sezewar boldy. Sarukýan 28 ýaşynda, onuň MMA-da 22 ýeňşi we 3 ýeňlişi bar. Ol UFC-de 11 duşuşyk geçirip, olaryň 9-syny utdy.

Moýkano 35 ýaşynda, onuň 20 ýeňşi we bäş ýeňlişi bar, bir duşuşyk deňe-deň tamamlandy.

Ýaryş göni ýaýlymda "Matç-Boýes" we Setanta Sports 1 teleýaýlymlary arkaly Aşgabat wagty bilen sagat 4:00-da başlar.

Türkmenistanly janköýerler üçin amatly bolan Belet-video milli platformasynda bu duşuşyga tomaşa etmek mümkin bolar, bu ýerde islendik enjamdan ähli tutluşyklary synlap bolar.

2018-nji ýylda Russiýada geçirilen futbol boýunça dünýä çempionatynda eminiň kömekçisi wezipesinde işlän Jahangir Saidow Aşgabatda möwsümiň öz ýanynda futbol eminleri üçin gurnalýan okuw-maslahatynda baş instruktory bolup çykyş etdi. Bu barada Türkmenistanyň Futbol federasiýasy habar berýär.

Okuw-maslahata täze möwsümde Türkmenistanyň çempionatynda we Kubogynda oýunlara eminlik etjek 40-dan gowrak emin gatnaşdy.

Okuw-maslahaty «Aşgabat» köpugurly stadionynda geçirilip, özbegistanly hünärmen Türkmenistanyň Futbol federasiýasynyň (TFF) instruktory Çarymyrat Gurbanow bilen bilelikde nazary we amaly sapaklary geçirdi. Jedelli oýun ýagdaýlaryny derňemäge we olary meýdanda dogry düşündirmek meselesine aýratyn üns berildi.

Okuw-maslahatyň netijeleri boýunça oňa gatnaşanlaryň ählisi attestasiýadan geçdiler. Okuw-maslahatyň ýapylyş dabarasynda TFF-niň Baş sekretary Serdar Geldiýew geçirilen seminaryň milli we halkara derejede eminlik işini ösdürmek üçin wajyp ähmiýetini nygtady.

TFF-niň Eminler bölümi bu çäräni milli çempionatyň we halkara ýaryşlaryň oýunlarynda işlemek üçin ýaş eminleri taýýarlamak strategiýasynyň bir bölegi hökmünde görýär.

Türkmenistanyň ýygyndysynyň iki oýunçysy Belarusyň ýokary ligasynyň klublarynda synag barlagyndan geçmek üçin bu ýurda ugradylar. Bu barada «Belarusskiý futbol» neşiri habar berýär.

Hüjümçi Meýlis Diniýew «Witebsk» klubyna bardy, ol ýerde eýýäm birnäçe wagtdan bäri onuň watandaşy - goragçy Wepa Jumaýew çykyş edip gelýär.

Ýarym goragçy Teýmur Çaryýew Žodino şäheriniň «Torpedo-BelAZ» komandasynda synag barlagyndan geçýär. 24 ýaşly ýarym goragçy Gyrgyzystanyň «Abdyş-Ata» klubynda oýnap, onuň düzüminde iki gezek şol ýurduň çempiony bolanlygy bilen bellidir.

“Ýüpek ýoly” Halkara ralli ýaryşy 12-nji iýulda Irkutsk şäherinde badalga alyp, Irkutsk oblastynyň, Burýatiýa Respublikasynyň we Mongoliýanyň çäklerinden geçip, Gorno-Altaýskda tamamlanar diýip, “РИА Новости” habar berýär.

“2025-nji ýylyň iýulynda Irkutsk oblastynda “Ýüepk ýoly” Halkara rallisiniň tapgyrlarynyň biri geçiriler. Ýaryş 12-nji iýulda Irkutskda dabaraly ýagdaýda başlar. Her ýyl guramaçylar ýaryşyň ugryny täzeleýärler. Şu ýyl ol iki ýurduň çäginde geçiriler – Russiýanyň we Mongoliýanyň” – diýip, habarda bellenilýär.

Şu gezek ýaryşa dünýäniň 13-den gowrak ýurdundan sport ekipažlary gatnaşar. Ralli taýýarlyk işlerine we ýaryşyň özüne 1000-den gowrak adam, şeýle hem 350-den gowrak ulag serişdeleri çekiler. Ýeňijiler bäş ugur boýunça saýlanar: ýük maşynlar, awtomobiller, motogeçijiler, motosikl we kwadrosikller.

Ýaryşyň taryhynda rus tapgyry ilkinji gezek iki bölekden ybarat bolar: birinjisi Irkutsk oblastynda geçirilip, soňra gatnaşyjylar Burýatiýa Respublikasyndan hem-de Mongoliýadan geçip, Russiýa dolanyp gelerler. Olar 22-nji iýulda Gorno-Altaýskda ýaryşy tamamlarlar.

“Ýüpek ýoly” ralli-marafony bütin dünýäde ykrar edilen ýokary çylşyrymlykly sport çäresidir. Ralli ilkinji gezek 2009-njy ýylda Russiýanyň, Gazagystanyň we Türkmenistanyň çäklerinde geçirildi.

Gazagystan 2026-njy ýylda Astanada geçiriljek “Geljegiň oýunlaryna” taýýarlyk işlerine başlady.

Gazagystan Respublikasynyň Prezidenti Kasym-Žomart Tokaýewiň tabşyrygy boýunça bu ýaryşlara taýýarlyk görmek hem-de olary geçirmek boýunça ýöriteleşdirilen Direksiýa döredildi. Direksiýanyň esasy wezipesi adaty sport görnüşeri bilen kibersporty birleşdirjek halkara multisport ýaryşyny guramakdan we geçirmekden ybaratdyr.

“Geljegiň oýunlarynyň” dünýä bileleşiginiň ünsüni çekip, ýurduň sport durmuşynda möhüm waka boljakdygyna garaşylýar.

Bu oýunlaryň konsepsiýasy fiziki işjeňligiň sanly tehnologiýalar bilen birleşýän ýaryşlaryň täze görnüşlerini ösdürip, özboluşly wakalary we ýaryşlary döretmäge gönükdirilendir.

Superkubogyň finalynda «Barselonadan» uly ýeňlişe sezewar bolanyndan soň, Madridiň «Realynyň» ýolbaşçylary toparyň baş tälimçisi Karlo Ançelottiniň wezipesini täzeden gözden geçirmegi meýilleşdirýärler.

Ispaniýanyň goal.com neşiriniň maglumatyna görä, indiki hepdede ýokary derejeli duşuşyklar geçiriler we häzirki ýagdaý seljeriler hem-de italýan hünärmeniniň geljegi kesgitlener.

Ýatlatsak, 12-nji ýanwarda Saud Arabystanynyň Jidda şäherinde geçirilen Superkubok oýnunyň netijesinde «Real» esasy bäsdeşi «Barselonadan» 2:5 hasaby bilen utuldy.

Portugaliýaly futbolçy Kriştianu Ronaldu Saud Arabystanynyň «Al-Nasr» kluby bilen täze şertnama barada ylalaşyk gazandy — diýip, «A Bola» gazeti «Al Khabar» neşirine salgylanyp habar berýär.

Er-Riýaddaky topar bilen täze ylalaşyk ýene bir möwsümlük bolup, ol 2026-njy ýylyň iýunyna çenli baglaşyldy. Şertnama laýyklykda Ronaldu ýylda 200 million ýewro gazanar, ýöne gol çekme bonusynyň we täjirçilik girdejileriň hasabyna bu möçber köpelip biler.

Ronaldu 5-nji fewralda 40 ýaşaýar. Ol 2023-nji ýylyň ýanwaryndan bäri «Al-Nasr» üçin oýnaýar we şol wagtdan bäri Saud Arabystanynyň kluby üçin 81 gol geçirip, 90 oýna gatnaşdy. Şu möwsümde 20 duşuşyk geçirip, derwezeden 17 gol salmagy başardy.

Ronaldu Portugaliýanyň ýygyndysynyň düzüminde Ýewropa çempiony, bäş gezek «Altyn topuň» eýesi boldy we resmi oýunlarda dünýä futbolynda iň köp gol geçiren futbolçydyr.

Türkmenistanyň Milli elektron sport federasiýasy Dota 2, Counter-Strike 2, PUBG Mobile we eFootball ýaly dört meşhur kibersport ugry boýunça bäsleşikleri özünde jemlejek «Federasiýanyň Kubogy 2025» atly her ýylda geçirilýän ýaryşyň başlanýandygyny mälim etdi. Ýaryşyň tapgyrlaryna 1-nji fewralda badalga berlip, ol 10-njy fewrala çenli dowam eder.

Ilki bilen Dota 2 we Counter-Strike 2 ugurlary boýunça toparlar ýeňiş gazanmak ugrunda göreşerler - bu bäsleşikler 1-3-nji fewralda geçiriler.

Soňra ýurdumyzyň 8 sany güýçli toparynyň gatnaşmagynda PUBG Mobile boýunça bäsleşik geçiriler. Bu oýunlary 7-9-njy fewral aralygynda geçirmek meýilleşdirilýär.

Ýaryş tapgyrlary 10-njy fewralda geçiriljek eFootball boýunça bir günlük bäsleşik bilen tamamlanar, bu ýerde 8 oýunçy ýeňiş gazanmak ugrunda bäsleşer.

Bäsleşiklere gatnaşmak isleýänler federasiýanyň resmi saýtyna ýüz tutup, arza berip bilerler. Gatnaşyjylaryň hasaba alnyşy 2025-nji ýylyň 20-nji ýanwarynda başlap, 27-nji ýanwara çenli dowam eder.

5-10-njy ýanwar aralygynda Aşgabat ýöriteleşdirilen küşt we şaşka mekdebinde 20 ýaşa çenli oglan we gyzlaryň arasynda ýurduň çempionaty geçirilip küşt boýunça ýaşlaryň elitasy özleriniň ýeňijini kesgitledi. Bu ýaryş, gatnaşyjylaryň güýji boýunça ikinji derejeli hasaplanýar, sebäbi 2024-nji ýyldaky erkekleriň we zenanlaryň arasyndaky ýokary ligalarynyň ähli oýunçylaryny öz içine alýar.

Oglanlaryň arasynda nusgawy küşt boýunça geçirilen ýaryşda Türkmen döwlet binagärlik-gurluşyk institutynyň talyby Wepaly Halýynazow mümkin bolan 11-den 9 utuk toplap, ähli bäsdeşlerini özünde yzda galdyrdy we ýeňiş gazandy. 8,5 utuk toplap degişlilikde 2-nji we 3-nji orny Lebap welaýatyndan mekdep okuwçysy Serdar Baýramow we Türkmen döwlet bedenterbiýe we sport institutynyň talyby Amanmuhammet Hommadow eýeledi. Ýaryşyň esasy dalaşgäri hasaplanýan Hommadow başda garaşylmadyk ýagdaýda yzly-yzyna iki gezek ýeňlişe sezewar boldy, ýöne wagtynda dikelip, öňdebaryjynyň yzyndan ýetmegi başardy.

Wepaly we Amanmuhammet Wengriýanyň Budapeşt şäherinde geçirilen 45-nji Bütindünýä küşt olimpiadasynyň ýeňijileridir, bu ýerde Türkmenistanyň erkekler topary B derejede kiçi altyn medal gazanyp, 188 toparyň arasynda 24-nji orny eýeledi. Serdar bolsa 2024-nji ýylyň ahyrynda Bangkokda (Taýland) geçirilen 17 ýaşa çenli mekdep okuwçylarynyň arasynda Aziýa çempionatynda kümüş medal gazandy.

Gyzlaryň arasynda geçirilen ýaryşda, Halkara nebit we gaz uniwersitetiniň talyby Läle Şöhradowa yzly-yzyna ikinji ýyl bäsdeşlerinden üstün çykyp, mümkin bolan 11-den 9 utuk toplady. Doganlar Şöhradowalaryň ýene biri Leýla (Lebap, 18 ýaş) öňde baryjydan ýarym utuk yzda galdy we ikinji ýeri eýeledi, Gulmira Seýilhanowa (Lebap, 17 ýaş) 8 utuk bilen ilkinji üçlügi jemledi. Doganlar Läle we Leýla Şöhradowalar hem ýokarda ady agzalan Olimpiadanyň ýeňijileridir, bu ýerde Türkmenistanyň zenanlar topary C derejede kiçi altyn medal gazandy we netijede umumy sanawda 169 toparyň arasynda 32-nji ýeri eýeledi. Gülmiranyň has ýokary üstünligi, 2023-nji ýylda Daşkende (Özbegistan) 15 ýaşa çenli mekdep okuwçylarynyň arasynda Aziýa çempionatynda kümüş medal gazanmagydyr.

Çempionatyň ýeňijileri 23-nji fewraldan 8-nji mart aralygynda Çernogoriýada geçiriljek ýetginjekleriň arasyndaky dünýä çempionatynda, şeýle hem Kolombo (Şri-Lanka) şäherinde geçiriljek ýetginjekleriň arasynda Aziýa çempionatynda biziň ýurdumyza wekilçilik etmek hukugyny aldylar.

11-nji we 12-nji ýanwarda rapid we blits görnüşinde şol bir ýaş derejesinde milli çempionatlar hem geçiriler. Umuman alanyňda, guramaçylar tarapyndan gatnaşyjylaryň iň pes derejesiniň görkezijisiniň 1400 çäklendirmesiniň girizilmegine garamazdan, 100-den gowrak küştçi ýaryşlara gatnaşýar.

Çempionatyň ýeňijilerine “Resmi Kepil” ätiýaçlandyryş kompaniýasy, “Küşt Älemi” küşt akademiýasy, “Globus” kanselýariýa dükany, B2B - onlaýn bazary “ALSAT.com.tm” we ORIENT media-ulgamy ýaly hemaýatkärler tarapyndan alnan gymmat bahaly baýraklar garaşýar.

«Barselona» futbol kluby Saud Arabystanynda geçirilen Ispaniýanyň Superkubogy ugrundaky final duşuşygynda Madridiň «Realyny» ýeňdi.

Ýekşenbe güni geçirilen oýun katalon toparynyň 5:2 hasabyndaky ýeňşi bilen tamamlandy. Ýeňijileriň düzüminde Rafinýa iki gol (39-njy we 48-nji minutlar) geçirdi, Lamin Ýamal (22), Robert Lewandowskiý (36, penaltiden) we

Alehandro Balde (45+10) hersi bir goldan geçirdiler. Madridiň komandasyndan Kilian Mbappe (5) we Rodrigo (60) «Barselonanyň» derwezesinden gol geçirmegi başardylar.

«Barselona» 57-nji minutdan soň derwezeçi Woýçeh Şensnynyň meýdançadan çykarylmagy sebäpli az sanly düzümde oýnamaly boldy.

«Barselona» rekord görkezijisini täzelemek bilen, Ispaniýanyň Superkubogyny 15-nji gezek gazandy. «Real» kluby bolsa 13 gezek ýeňiji bolupdy, şol sanda bu komanda Ispaniýanyň Superkubogyna geçen ýylky ýaryşda eýe bolupdy.

Türkmenistanyň Futbol Federasiýasynyň (TFF) we Germaniýanyň Futbol Bileleşiginiň (GFS) wekilleri 2025-nji ýylyň 10-njy ýanwarynda wideoaragatnaşyk arkaly duşuşyk geçirdiler.

Onlaýn duşuşykda ýaş futbolçylary taýýarlamak we tälimçilik bilimini ösdürmek babatda hyzmatdaşlygy ýola goýmak meseleleri ara alnyp maslahatlaşyldy. Germaniýanyň bu ugurdaky öňdebaryjy tejribesini Türkmenistanda ornaşdyrmak mümkinçilikleri gözden geçirildi.

Bellemeli ýeri, TFF-niň täze ýolbaşçysynyň wezipä saýlanmazyndan soň, ýaşlar futbolyny we tälimçilik bilimini ösdürmek federasiýanyň ileri tutýan wezipeleriniň biri bolup durýar.

Taraplar bu ugurda gepleşikleri dowam etdirmek barada ylalaşyga geldiler.

FIFA-nyň halkara derejesindäki täjigistanly emin Suhrob Sattorow Türkmenistanyň ýygyndysynyň çykyş etjek Aziýa Kubogy-2025 ugrundaky zenanlar futzaly boýunça saýlama ýaryşynyň oýunlaryny eminlik etmäge bellendi. Bu barada Täjigistanyň Futbol federasiýasynyň saýtynda habar berilýär.

Sattorow Türkmenistanyň zenanlar ýygyndysyndan başga-da Özbegistanyň, Awstraliýanyň, Filippinleriň we Kuweýtiň ýygyndylarynyň çykyş etjek «C» toparyndaky oýunlarda işlär. Toparlaýyn tapgyryň ähli oýunlary 11-19-njy ýanwar aralygynda Daşkentde geçiriler.

Türkmenistanyň zenanlar ýygyndysynyň oýunlarynyň tertibi:

• 11-nji ýanwar 2025 ý. Türkmenistan - Awstraliýa (15:00)

• 15-nji ýanwar 2025 ý. Filippinler - Türkmenistan (15:00)

• 17-nji ýanwar 2025 ý. Türkmenistan - Kuweýt (15:00)

• 19-njy ýanwar 2025 ý. Türkmenistan - Özbegistan (18:00)