Italýanyň «Atalanta» we Nigeriýanyň milli ýygyndysynyň ýarym goragçysy Ademola Lukman 16-njy dekabrda Marokkoda geçen CAF Awards baýragynyň gowşurylyş dabarasynda 2024-nji ýylda Afrikanyň iň gowy futbolçysy diýlip ykrar edildi.

27 ýaşly Lukman «Atalanta» klubynyň Ýewropa ligasynda ýeňiş gazanmagyna kömek etdi, ol «Baýer bilen geçirilen final oýunda het-trik etmegi başarypdy.

Simeon Adingra («Braýton», Kot-d'Iwuar), Seru Girassi («Borussiýa», Dortmund, Gwineýa), Aşraf Hakimi («PSŽ», Marokko) we Ronwen Wilýams («Mamelodi Sendaunz», GAR) iň gowy futbolçy adyna dalaşgär boldylar.

Ýylyň iň gowy tälimçisi adyna Kot-d'Iwuaryň milli ýygyndysynyň baş tälimçisi Emers Fae mynasyp boldy, ol ýanwar aýynda Afrikanyň Kubogyny gazanypdy.

Aşgabat şäherinde Türkmenistanyň Bitaraplygynyň 29 ýyllygy mynasybetli «Diplomatiýanyň altyn oky» atly ýaýdan ok atmak boýunça ýaryş geçirildi. Oňa Türkmenistanda akkreditirlenen daşary ýurtlaryň we halkara guramalaryň diplomatik wekilhanalaryndan 40-a golaý wekil gatnaşdy.

Ýaryşyň guramaçylary hökmünde Türkmenistanyň Milli ýaý atyjylyk federasiýasy hem-de Koreýa Respublikasynyň ilçihanasy çykyş etdi. Dostlukly ýagdaýda geçirilen bäsleşikde diplomatlar ýokary ussatlyklaryny görkezdiler.

Erkekleriň arasynda Russiýanyň ilçihanasynyň ikinji sekretary Wadim Ýakowlew ýeňiş gazandy. Ikinji ýeri Patrik Rýanke (ABŞ), üçünji ýeri bolsa Anton Gonçarok (BSGG, Türkmenistan) eýeledi. Zenanlaryň arasynda ABŞ-nyň ilçihanasynyň wekili Katerina Ford ýeňşini baýram etdi. Ikinji orun Koreýa Respublikasynyň ilçihanasynyň wekili Minkung Çaýe, üçünji orun bolsa Ýaponiýanyň ilçihanasynyň wekili Mihaiko Sasaki tarapyndan eýelendi.

Guramaçylar çäräniň hemaýatkärleri bolan «Aktam», «Resmi kepil», «Arçalyk», «Ugur» kärhanalaryna hem-de koreý tagamlaryny taýýarlaýan «Wok Fud» restoranyna minnetdarlyk bildirýärler.

Bu ýaryş diňe bir diplomatlaryň arasynda iň oňat ýaý atyjylary ýüze çykarmak bilen çäklenmän, halkara diplomatiýanyň we ýurtlaryň arasyndaky dostlukly gatnaşyklary berkitmegiň täsirli guraly hökmünde sportuň möhüm ornuna ünsi çekdi.

Daşoguz welaýatynyň Bedenterbiýe we sport baradaky döwlet komitetiniň mejlisler zalynda futbol boýunça tälimçileriniň we eminleriň hünärlerini ýokarlandyrmak boýunça okuw maslahaty geçirildi.

Türkmenistanyň Futbol federasiýasynyň we Daşoguz welaýatynyň Bedenterbiýe we sport baradaky döwlet komitetiniň guran çäresine ýurdumyzyň demirgazyk sebitiniň ähli etraplaryndan 50-den gowrak tälimçiler we eminler gatnaşdylar.

Okuw maslahaty Türkmenistanyň Futbol federasiýasynyň gözükdirijisi, halkara derejeli emin, Türkmenistanyň at gazanan tälimçisi Allabergen Sapaýewiň we halkara derejeli emin Bagtyýar Atajanowyň ýolbaşçylygynda geçirildi, olar futbol eminlerini hem-de çagalar sport mekdepleriniň tälimçilerini futbol oýnunyň soňky düzgünleri we türgenleşik işleriniň häzirki zaman usullary bilen tanyşdyrdylar.

Türkmenistanyň Futbol federasiýasynyň başlygy Guwançmuhammet Öwekow we TFF-nyň Baş sekretary Serdar Geldiýew Ispaniýanyň ýokary ligasynda çykyş edýän «Wilýarreal» futbol klubynyň akademiýasynyň wekilleri bilen wideoaragatnaşyk arkaly duşuşyk geçirdiler.

Duşuşygyň barşynda çagalar we ýetginjekler futbolyny ösdürmek boýunça tejribe alyşmagyň we hyzmatdaşlyk etmegiň mümkinçilikleri ara alnyp maslahatlaşyldy. Şeýle hem tälimçileri taýýarlamak boýunça tejribe alyşmak meselesine aýratyn üns beridi – diýip, TFF-niň metbugat gullugy habar berýär.

Halkara Sambo Federasiýasynyň (FIAS) Ýerine Ýetiriji Komiteti 2025-nji ýyl üçin ýaryşlaryň senenamasyny tassyklady, oňa laýyklykda sambo boýunça dünýä çempionaty 7-9-njy noýabr aralygynda Aşgabatda geçiriler. Ýaryşlaryň jikme-jik tertibi eýýäm FIAS-nyň web sahypasynda çap edildi.

Ýaryşda erkekler we zenanlar arasynda sport sambosy, erkekler we zenanlar arasynda söweş sambosy, şeýle hem erkekler arasynda körler sambosy boýunça ýaryşlar geçiriler.

Mundan başga-da, plýaž sambosy boýunça dünýä çempionaty Singapurda, sambo boýunça Dünýä Kubogy bolsa Ermenistan we Gyrgyzystanda geçiriler. Talyp Dünýä Kubogy Serbiýada geçiriler. Yklym çempionatlary bolsa aşakdaky ýaly paýlanar: Aziýa we Okeaniýa – Özbegistan, Ýewropa – Kipr, Afrika – Gwineýa, Panamerika – Ekwador.

2025-nji ýylyň awgust aýynda Çengdu şäherinde geçiriljek Bütindünýä oýunlarynyň çäklerinde söweş sambosy boýunça ýaryşlar geçiriler, oňa saýlama 2024-nji ýylyň dowamynda geçirildi.

13-nji dekabrda Dubaý şäherindäki «Al-Maktum» stadionynda «Şabab Al-Ahli» we «Al-Wasl» toparlarynyň arasynda BAE-niň Superkubogy üçin oýun geçirildi. Duşuşygyň esasy wagty 2:2 hasabynda deňlikde tamamlanyp, ýeňiji penaltiler seriýasynda kesgitlenildi.

Eýranly türkmen asylly Serdar Azmun esasy düzümde oýna çykdy. Ol oýunda tapawutlanmadyk hem bolsa, 11 metrlik urgularyň ilkinjisini dürs ýerine ýetirdi. Penaltiler seriýasy 4:1 hasabynda «Şabab Al-Ahliniň» peýdasyna tamamlandy.

Şeýlelikde, 29 ýaşly hüjümçi «Şabab Al-Ahliniň» düzümindäki ilkinji kubogyny gazandy. Häzirki wagtda onuň topary BAE-niň premýer-ligasynda ikinji ýerde barýar.

Serdar Azmun şu möwsümde 6 gol urup, 1 gezek golly pas berdi.

Bahreýniň Manama şäherinde geçirilýän Agyr atletika boýunça dünýä çempionatynda Dawranbek Hasanbaýew 102 kg agram derejesinde silterlemekde 182 kg göterip, Türkmenistana kiçi bürünç medaly getirdi. Emma ikinji maşkda – iteklemekde – Hasanbaýew üç synanyşygynyň hiç birini amala aşyryp bilmedi we ýaryşy nolluk baha bilen tamamlady.

Bu agram derejesinde 21 ýurtdan 24 agyr atletikaçy medallar üçin bäsleşdi. Iki maşkyň jemi boýunça bürünç medaly 395 kg (183+212) netijesi bilen Ispaniýadan Markos Ruis gazandy. Kümüş medaly Katardan Ibrahym Elbah – 399 kg (174+225), altyn medaly bolsa Gazagystandan Artýom Antropow – 400 kg (170+230) gazandy.

Türkmenistanyň ýygyndy toparyny 2024-nji ýylyň dünýä çempionatynda 8 türgen wekilçilik edýär. Mundan ozal, 73 kg agram derejesinde silterlemekde kümüş medaly Bunyad Raşidow gazanypdy.

Özbegistan Respublikasynyň Prezidenti Şawkat Mirziýoýewden Türkmenistanyň Prezidenti Serdar Berdimuhamedowa gutlag haty geldi. Goňşy ýurduň Baştutany "Türkmenistan" gazetinde çap edilen gutlag hatynda türkmen kärdeşine ýüzlenmek bilen, hususan-da, şeýle belleýär:

"Sizi we doganlyk türkmen halkyny milli baýram — ýurduňyzyň hemişelik Bitaraplygynyň 29 ýyllygy bilen tüýs ýürekden gutlaýaryn. Birleşen Milletler Guramasynyň Baş Assambleýasy tarapyndan Türkmenistanyň Bitaraplyk hukuk ýagdaýynyň ykrar edilmegi dünýäniň ähli ýurtlary bilen dostlugyň we köpugurly hyzmatdaşlygyň ösdürilmegine, hoşniýetli goňşuçylyk, özara hormat goýmak, birek-biregi goldamak ýörelgelerine esaslanýan gatnaşyklaryň giňeldilmegine ýardam berýär. Biz Siziň öňdengörüjilikli daşary syýasatyňyzy, sebit durnuklylygyny üpjün etmek, gatnaşyklarymyzy çuňlaşdyrmak boýunça möhüm başlangyçlaryňyzy goldaýarys.

Tamamlanyp barýan ýylda ikitaraplaýyn hyzmatdaşlygy ösdürmekde täze taryhy sepgitlere ýetendigimizi, geljekde-de ýokary derejedäki dialogy işjeňleşdirmek arkaly strategik hyzmatdaşlygymyzy has-da giňeltmäge ukyplydygymyzy kanagatlanma bilen bellemek isleýärin. Bar bolan köpugurly mümkinçiliklerimize, uzak möhletleýin gatnaşyklarymyza laýyklykda, doganlyk halklarymyzyň abadançylygynyň bähbidine hyzmatdaşlygymyzyň has-da çuňlaşdyryljakdygyna ynanýaryn.

Mümkinçilikden peýdalanyp, Siziň Alyhezretiňize berk jan saglyk, maşgala abadançylygyny, jogapkärli döwlet işiňizde uly üstünlikleri, Türkmenistanyň dostlukly halkyna bolsa parahatçylyk, abadançylyk, durnukly ösüş arzuw edýärin".

Türkmenistanda Halkara Bitaraplyk güni hem-de ýurduň hemişelik Bitaraplyk hukuk derejesine eýe bolmagynyň 29 ýyllygy giňden bellenildi. Prezident Serdar Berdimuhamedow 12-nji dekabr güni ir bilen Aşgabatda parahatçylygyň, ynsanperwerligiň nyşany bolan Bitaraplyk binasyna gül goýmak dabarasyna gatnaşdy. Bu barada TDH habar berýär.

Bellenilişi ýaly, irden Bitaraplyk binasynyň öňündäki meýdançada Mejlisiň we Halk Maslahatynyň wekilleri, Hökümet agzalary, ministrlikleriň, pudaklaýyn dolandyryş edaralarynyň, Türkmenistanyň daşary döwletlerdäki, daşary döwletleriň we halkara guramalaryň Türkmenistandaky diplomatik wekilhanalarynyň ýolbaşçylary, hormatly ýaşulular, jemgyýetçilik guramalarynyň, köpçülikleýin habar beriş serişdeleriniň wekilleri ýygnandylar.

Bitaraplyk binasynyň öňündäki baýramçylyk äheňinde bezelen meýdançada hemmeler döwlet Baştutanyny uly ruhubelentlik bilen mübäreklediler. Dabaraly ýagdaýda Türkmenistanyň Döwlet senasy ýaňlanansoň, Prezident Serdar Berdimuhamedow merdana türkmen halkynyň parahatçylyk söýüjilik, hoşniýetlilik, ynsanperwerlik ýörelgeleriniň nyşany bolan Bitaraplyk binasyna gül çemenini goýdy.

Döwlet Baştutanynyň göreldesine eýerip, soňra beýleki dabara gatnaşyjylar hem gül desselerini goýdular.

Halkara Bitaraplyk güni mynasybetli dabaralar ýurduň ähli sebitlerinde giňden ýaýbaňlandyryldy.

12 we 13-nji dekabrda Türkmenistanyň futbol boýunça Kubogynyň ilkinji ýarym finalynyň oýunlary geçiriler – diýip, TFF-sy habar berýär.

12-nji dekabrda, penşenbe güni, «Nebitçi» Balkanabatda öz meýdançasynda «Arkadag» toparyny kabul eder. Oýnuň başlanýan wagty – ýerli wagt bilen 14:00-da. Ertesi güni, 13-nji dekabrda Aşgabatda «Ahal» topary «Altyn Asyr» bilen duşuşar, oýun «Nusaý» stadionynda 15:00-da başlar.

Jogap oýunlary takmynan bir hepdeden soň 20-nji dekabrda Aşgabatda geçirilmegi meýilleşdirilýär.

Mälim bolşy ýaly, Türkmenistanyň Kubogynyň häzirki eýesi «Arkadag» toparydyr.

Türkmenistanyň Kubogy. Ýarym final. Ilkinji oýunlar:

• 12-nji dekabr, 14:00, «Nebitçi» – «Arkadag»
• 13-nji dekabr, 15:00, «Ahal» – «Altyn Asyr»

«Arkadagyň» futbolçylary 27-nji tapgyryň başga güne geçirilen oýnunda «Altyn Asyryň» toparyny myhmançylykda 4:0 hasaby bilen utup, Türkmenistanyň çempionatynyň ähli duşuşyklaryny diňe ýeňiş gazanmak bilen, möwsümi tamamlady. Gollary Şanazar Tirkişow (7-nji minutda) hem-de Begenç Akmämmedow (32, 36, 41) saldylar.

«Arkadag» bassyr ikinji ýyl Türkmenistanyň çempionatyny 100% netije bilen tamamlady. Wladimir Baýramowyň ýolbaşçylygyndaky topar içerki çempionatda hiç bir oýunda ýeňilmedi. Bu toparyň Türkmenistanyň Kubogy we AFK-nyň Çagyryş ligasy ýaly ýene iki sany birinjilik baýragy ugrundaky mümkinçiligi bar.

Türkmenistanyň çempionatynyň ikinji ornuna möwsümiň tamamlanmagyna bir tapgyr galanda «Ahal» (67 utuk) topary eýe boldy. Ilkinji iki topar geljek möwsümdäki Aziýanyň Futbol Konfederasiýasynyň ýaryşlaryna gatnaşar.

«Altyn Asyr» (56) üçünji, «Şagadam» (40) dördünji, «Merw» (35) bäşinji, «Aşgabat» (28) altynjy, «Nebitçi» (27) ýedinji, «Köpetdag» (17) sekizinji orna mynasyp boldy.

Lebap welaýatly türkmen küştçüleri Maksat Awlyakuliýew we Aýa Baýramowa Bangkokda mekdep okuwçylarynyň arasynda geçirilen Aziýa Rapid çempiýonatynda iki kümüş medal gazandylar.

Rapid – bu çalt küşt oýny görnüşi bolup, her bir oýunça tutuş oýun üçin 15 minut we her ädim üçin 10 sekunt goşmaça wagt berilýär.

Tailandyň paýtagtyndaky ýaryşlara 31 ýurtdan 555 gatnaşyjy gatnaşyp, 7, 9, 11, 13, 15 we 17 ýaşlylar kategoriýalarynda güýçli oýunçy adyny almak üçin bäsleşdiler.

12-nji belgili Maksat Awlyakuliýew 9 ýaşly oglanlar kategoriýasynda kümüş medal gazandy. Ol 6 utuk toplady.

10 ýaşly Aýa Baýramowa, 9-njy belgili, 11 ýaşly gyzlar kategoriýasynda kümüş medaly gazandy. Ol mümkin bolan 7 utukdan 6 utuk toplady. 

Mähriban watandaşlarymyz Mary welaýatyndan Alihan Batyr we Lebap welaýatyndan Serdar Baýramowa medallardan bir ädim yza galdylar.

11 ýaşly oglanlar kategoriýasynda 6 utuk toplan we 1-nji we 2-nji ýerleri eýelän Hindistandan Narendra Agarwal (10-njy belgili) we Eýran Yslam Respublikasyndan Ramtin Kakawand (1-nji belgili) boldy. Bürünç medala dalaş eden dört gatnaşyjy 5,5 utuk toplady. Olaryň arasynda 4-nji belgili Alihan hem bardy. Emma goşmaça görkezijiler boýunça gara reňk bilen has köp ýeňiş gazanan Gazagystandan Ibrahym Bakyta (11-nji belgili) bürünç medal gowşuryldy, Alihan bolsa jemleýji ýagdaýda 6-njy orunda boldy.

17 ýaşly ýigitler kategoriýasynda 5,5 utuk toplan we 1-nji we 2-nji ýerleri eýelän FIDE ussady Filippinlerden Arka Kristian (3-nji belgili) we Mongoliýadan FIDE ussady Ulzikhişig Kişigbat (10-njy belgili) boldy. Bürünç medala dalaş eden 5 oýunçy, şol sanda 15-nji belgili Serdar Baýramow, liderlerden ýarym utuk yza galdy. Emma has köp ýeňiş gazanan FIDE ussady Mýanmardan Sai Han Tihi (6-njy belgili) bürünç medaly aldy. Serdar altynjy orunda tamamlandy.

Biziň türgenlerimiziň arasynda Mary welaýatyndan 7 ýaşly mekdep okuwçysy Anna Çaryýewa hem üstünlikli çykyş edip, 5 utuk bilen 6-njy orny eýeledi.

"Rapid" görnüşinde toparlaýyn hasapda Türkmenistan 31 ýurtdan 7-nji orny eýeledi. Birinji orny Gazagystan 9 medal, şolardan 5 altyn medal bilen eýeledi, ikinji orunda Hytaý boldy. Üçünji orunda bolsa Halkara Küşt Federasiýasynyň (FIDE) baýdagy astynda çykyş eden Russiýa boldy. Ilkinji onluga şeýle hem girenler: Hindistan (4-nji orun), Filippinler (5-nji orun), Özbegistan (1 altyn medal bilen 6-njy orun), Mongoliýa (8-nji orun), Wýetnam (9-njy orun) we Eýran (10-njy orun).