Türkmenistanyň Prezidenti Serdar Berdimuhamedowyň adyna daşary ýurtlaryň we halkara guramalaryň ýolbaşçylaryndan Halkara Nowruz güni hem-de Oraza aýy mynasybetli gutlag hatlarynyň gelmegi dowam edýär. Bu barada TDH habar berýär.

"Türkmenistan" gazetiniň şu günki sanynda çap edilen gutlaglarda şeýle diýilýär:

"Siziň Alyhezretiňiz!

Gruziýanyň halkynyň adyndan hem-de hut öz adymdan Sizi bahar paslynyň gelmegini alamatlandyrýan Nowruz baýramy bilen tüýs ýürekden gutlaýaryn. Şu nurana günlerde biziň ýurtlarymyzyň arasynda dostlukly gatnaşyklary pugtalandyrmak üçin möhüm ädimleriň ädiljekdigine ynanýaryn.

Siziň Alyhezretiňize belent hormat goýýandygymy beýan etmek bilen, işiňizde uly üstünlikleri, Türkmenistanyň halkyna bolsa parahatçylyk we abadançylyk arzuw edýärin" diýip, Gruziýanyň Prezidenti Salome Zurabişwili hatynda ýazýar.

Türki medeniýetiň halkara guramasynyň Baş sekretary Sultan Raýewden Türkmenistanyň Prezidenti Serdar Berdimuhamedowyň adyna gelen gutlag hatynda şeýle diýilýär:

"Türki medeniýetiň halkara guramasynyň (TÜRKSOÝ) adyndan hem-de hut öz adymdan Siziň Alyhezretiňizi, Türkmenistanyň ähli halkyny Nowruz baýramy bilen tüýs ýürekden gutlaýaryn. Nowruz baýramy dost-doganlygyň, parahatçylygyň we jebisligiň, tebigatyň täzeden janlanmagynyň nyşanydyr. Ol türki halklaryň ýurtlarymyza asudalyk, parahatçylyk, saglyk getirýän gadymy däp-dessurydyr.

Bu nurana baýramyň Size bagtyýarlyk getirmegini arzuw edýärin.

Pursatdan peýdalanyp, Size belent hormat goýýandygym baradaky ynandyrmalarymy ýene-de bir gezek beýan edýärin".

Moldowa Respublikasynyň Gagauziýa awtonom-çäk düzüminiň başlygy Ýewgeniýa Gusul Türkmenistanyň Prezidenti Serdar Berdimuhamedowa iberen gutlag hatynda:

"Çuňňur hormatlanylýan jenap Prezident!

Moldowa Respublikasynyň Gagauziýa awtonom-çäk düzüminiň ýaşaýjylarynyň adyndan hem-de öz adymdan Sizi we Türkmenistanyň ähli halkyny Halkara Nowruz güni bilen gutlaýaryn. Nowruz tebigatyň gaýtadan janlanmagynyň we täzelenmeginiň buşlukçysy bolmak bilen, parahatçylyk söýüjilik, ynsanperwerlik ýaly umumadamzat gymmatlyklaryny özünde jemleýär. Bu ajaýyp baýram nurana geljegi alamatlandyrýar.

Sizi Nowruz baýramy bilen tüýs ýürekden gutlap, berk jan saglyk, bagtyýarlyk, abadançylyk arzuw edýärin. Goý, bu bahar baýramy mähir we şatlyk paýlasyn hem-de ýakymly ýatlamalara, dostlukly söhbetdeşliklere, köňül rahatlygyna beslensin!

Çuňňur hormatlanylýan jenap Prezident, pursatdan peýdalanyp, Size belent hormat goýýandygym baradaky ynandyrmalarymy beýan edýärin!" diýip ýazýar.

Türkmen döwletiniň Baştutanyna gelen gutlag hatlarynyň ýene birinde:

"Siziň Alyhezretiňiz!

Mukaddes Oraza aýy mynasybetli tüýs ýürekden gutlaglarymy we iň gowy arzuwlarymy beýan etmäge şatdyryn.

Siziň doganyňyz,

Faýsal bin Naser bin Hamad AL Tani,

Katar Döwletiniň şeýhler maşgalasynyň agzasy" diýilýär.

Owganystanyň Ministrler Kabinetiniň Başlygy Alhaj Molla Mohammad Hasan Ahund bolsa Türkmenistanyň Prezidentine ýollan gutlag hatynda:

"Owganystanyň Hökümetiniň we halkynyň adyndan Siziň Alyhezretiňizi we Türkmenistanyň halkyny mukaddes Oraza aýy bilen tüýs ýürekden gutlaýaryn. Dünýäniň ähli musulmanlary üçin doga-dileg edilýän hem-de sadaka berilýän şu mukaddes günlerde Beýik Biribardan bagtyýarlyk, agzybirlik, abadançylyk dileýärin.

Gudraty Güýçli Allatagaladan Siziň Alyhezretiňize berk jan saglyk, Türkmenistanyň doganlyk halkyna bolsa rowaçlyk we ösüş dileg edýärin" diýip ýazýar.

Türkmenistanyň Gyrgyz Respublikasyndaky Adatdan daşary we Doly ygtyýarly ilçisi N.Gölliýewiň Gyrgyzystanyň Milli Ylymlar akademiýasynyň Ç.Aýtmatow adyndaky Dil we edebiýat institutynyň direktory A. Akmataliýew bilen söhbetdeşliginde akademiki we ylmy ugurlardaky hyzmatdaşlyk ara alnyp maslahatlaşyldy.

Türkmenistanyň Daşary işler ministrliginiň habar bermegine görä, duşuşykda 2024-nji ýylyň beýik türkmen şahyry Magtymguly Pyragynyň doglan gününiň 300 ýyllygy mynasybetli Türkmenistanda "Pähim-paýhas ummany Magtymguly Pyragy" ýyly diýlip atlandyrylmagy bilen baglylykda, Gyrgyzystanda bilelikdäki çäreleri guramak hakynda pikir alşyldy.

Institutyň direktory, pursatdan peýdalanyp, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa Türki Döwletleriň Guramasynyň (TDG) Aksakgallar geňeşiniň ýakynda Aşgabatda geçirilen 15-nji mejlisiniň ýokary guramaçylyk derejesinde guralandygy üçin hoşallygyny beýan etdi diýlip, habarda bellenilýär.

Ispaniýanyň «Atletiko» kluby Italiýanyň «Inter» toparyny ýeňip, Ýewropa çempionlar ligasynyň çärýek finalyna gatnaşmaga hukuk berýän soňky ýollanma eýe çykdy.

Toparlaryň arasyndaky deslapky oýun Milan şäherinde geçirilip, onda «Inter» 1:0 hasabynda ýeňiş gazanypdy. Jogap oýnunyň esasy we goşmaça wagty bolsa «Atletikonyň» 2:1 hasabyndaky ýeňşi bilen tamamlandy.

«Interiň» düzüminde Federiko Dimarko (33), «Atletikonyň» düzüminde bolsa Antuan Grizman (35) we Memfis Depaý (87) tapawutlandy. Oýundan soňky 11 metrlik urgularda bolsa 3:2 hasabynda ispan kluby ýeňiş gazandy.

Günüň beýleki gapma-garşylygynda Germaniýanyň «Borussiýa» (Dortmund) kluby öz öýünde Niderlandlaryň «PSW» toparyny kabul edip, 2:0 hasabynda garşydaşyndan üstün çykdy. Ýer eýeleriniň gollaryna Jeýdon Sanço (3) we Marko Roýs (90+5) awtorlyk etdi. Toparlaryň arasyndaky Niderlandlarda geçirilen deslapky oýun 1:1 hasabynda deňlikde gutarypdy.

Mundan ozal, Angliýanyň «Mançester Siti» we «Arsenal», Ispaniýanyň «Real» we «Barselona», Fransiýanyň «PSŽ», Germaniýanyň «Bawariýa» klublarynyň ÝÇL-iň çärýek finalyna ýollanma alandygyny habar beripdik.

Çärýek finalyň bijeleri 15-nji martda çekiler. Tapgyryň deslapky oýunlary 9-10-njy aprelde, jogap duşuşyklary bolsa 16-17-nji aprelde geçiriler. ÝÇL-iň final oýny 1-nji iýunda Londondaky «Uembli» stadionynda geçiriler.

Garyşyk söweş sungaty boýunça çykyş edýän 34 ýaşly türkmen türgeni Döwletjan Ýagşymuradowyň (21-7-1) söweş sungatynyň meşhur «PFL-2024» ligasyndaky ilkinji garşydaşy sloweniýaly Jeýkob Nedo (8-1) bolar.

Ýarym agyr agram derejesinde Ýagşymuradow bilen Nedonyň arasyndaky tutluşyk 12-nji aprelde ABŞ-nyň Newada ştatynyň Las-Wegas şäherinde geçiriler. Täze «PFL-2024» möwsüminiň ähli gatnaşyjylary Gran-Priniň çäklerinde çempionlyk kemeri hem-de 1 million dollar möçberindäki pul baýragy üçin göreşerler.

Belläp geçsek, Döwletjan Ýagşymuradow Kaliforniýada geçen «Bellator 300» ýaryşyndaky soňky tutluşygynda polşaly söweşiji-türgen Maseý Rozanskini ýeňipdi.

Professional Fighters League (PFL) — Amerikanyň garyşyk söweş sungaty boýunça ýaryşlary geçirýän öňdebaryjy guramalarynyň biridir.

«PFL» guramasy 2023-nji ýylyň noýabrynda türkmen türgeniniň 2021-nji ýyldan bäri çykyş edip gelýän «Bellator» ýaryşyny guramak hukugyny satyn aldy. «PFL-i» esaslandyryjy Don Dewis guramalaryň birleşmeginden soň, «Bellatoryň» ozalky türgenleriniň ählisiniň indi PFL ulgamynda çykyş etjekdigini mälim etdi. Olar liganyň ýaryşlaryna we guramanyň beýleki ýaryşlaryna hem gatnaşyp bilerler.

2-3-nji martda Bütindünýä tennis gününiň bellenilmegine gabat gelýän Aşgabat tennis akademiýasynyň kazyýetlerinde ýaş uly raket ussalary üçin ýaryş geçiriler, “Türkmenistan: Altyn asyr” neşiri.

Bäsleşige 8 ýaşa çenli oglanlar we gyzlar gatnaşar. Guramaçylar Türkmenistanyň tennis federasiýasy we Aşgabat tennis akademiýasydy.

Ýaryşyň maksady sagdyn durmuş ýörelgesini wagyz etmek we çagalary tennis oýnamaga çekmek.

Bütindünýä tennis güni, Halkara tennis federasiýasynyň (ITF) başlangyjy bilen 2013-nji ýyldan bäri bellenilip geçilýär. Her ýyl mart aýynyň birinji duşenbesinde geçirilýär. Bu dynç alyş, tennisiň bütin dünýäde sport hökmünde tanalmagy üçin döredildi.

Tähranda kabaddi atly hindi oýny boýunça eminler üçin üçünji halkara seminar tamamlandy. Oňa köp ýurtlardan, şol sanda Ýaponiýadan, Hytaýdan, Koreýa Respublikasyndan, Şri-Lankadan, Bangladeşdan, Taýlanddan we beýlekilerden wekiller gatnaşdylar. Türkmenistandan seminara bu meşhurlygy artýan sport görnüşini hem öz içine alýan «Hanmudo» söweş sungaty federasiýasynyň üç ussady gatnaşdy diýip, «Neýtralnyý Turkmenistan» gazeti habar berýär.

Kabaddiniň meşhurlygynyň barha artýandygyny bu hindi oýnunyň Aziýa oýunlary ýaly iri sport çäreleriniň maksatnamasyna goşulmagy hem subut edilýär. Şu ýyl kabaddiniň Halkara harby sport geňeşi (CISM) tarapyndan geçirilen ýaryşlara goşulmagy hem möhüm waka boldy.

Türkmenistan 2017-nji ýylda CISM-e agza boldy we eýýäm iki ýyldan soň Hytaýyň Uhan şäherinde geçirilen Bütindünýä tomusky harby oýunlarynda ilkinji gezek ýurduň milli ýygyndy topary çykyş etdi. Şonda türkmen harby gullukçylary dzýudo we göreş boýunça bäsleşdiler. Şu ýylyň aprel aýynda Eýranda CISM-niň nobatdaky toplumlaýyn harby oýunlary geçiriler, bu ýerde Türkmenistanyň milli ýygyndysynyň hem gatnaşmagynda ilkinji gezek kabaddi boýunça ýaryşlar guralar.

Seminaryň ahyrynda oňa gatnaşyjylaryň ählisine olaryň ýokary hünär derejeli eminligini tassyklaýan şahadatnamalar gowşuryldy. Şahadatnama mynasyp bolanlaryň hatarynda «Hanmudo» federasiýasynyň başlygy Orif Buharakow, Federasiýanyň baş sekretary Guwanç Gulgeldiýew we Mary welaýatyndan kabaddi mekdebiniň wekili Nagmat Hojamämmedow bar. Olara gowşurylan şahadatnamalar halkara kabaddi ýaryşlarynda, şol sanda CISM tarapyndan geçirilýän ýaryşlarda eminlik etmek hukugyny berýär.

Nusgawy kabaddiden başga-da, onuň kenarýaka görnüşi boýunça hem ýaryşlar bardyr. 2024-nji ýylyň sentýabr aýynda Eýranda kenarýaka kabaddisi boýunça dünýä çempionaty geçiriler we oňa Türkmenistanyň milli ýygyndysynyň gatnaşmagy göz öňünde tutulýar.

Häzirki wagtda «Hanmudo» federasiýasy 27 – 29-njy fewral aralygynda Aşgabatda geçiriljek uniwersal söweş boýunça Türkmenistanyň çempionatyna taýýarlyk görýär. Bäsleşikden öň türkmen wekiliýeti Daşkentde geçiriljek Aziýanyň el söweşi federasiýasynyň hasabat-saýlaw maslahatyna gatnaşar.

Aşgabatda Türkmenistanyň diplomatik işgärleriniň güni mynasybetli sport ýaryşlaryna badalga berildi. Oňa ýurduň Daşary işler ministrliginiň işgärleri, daşary ýurt diplomatik wekilhanalarynyň we Türkmenistanda akkreditlenen halkara guramalarynyň wekilleri gatnaşýarlar. Bu barada CentralAsia.news saýty habar berdi.

Bäsleşikler Aşgabat şäheriniň Olimpiýa şäherçesinde geçirilýär. Olarda diplomatlar woleýbol, stol tennisi, kiçi futbol we bouling boýunça ýaryşýarlar.

Bu bäslerşikler barada pikir bildiren Täjigistanyň Türkmenistandaky ilçisi Vafo Niýatbekzoda olaryň dostlugy, halkara gatnaşyklarynyň üstünlikli ösmegi üçin esas bolup durýandygyny aýtdy.

«Kiçi futbol ýaryşynda dürli ýurtlaryň garyşyk toparlary bäsleşdiler. Netijede, dostluk ýeňiş gazandy. Dostluk dünýäde üstünlikleriň we parahatçylygyň açarydyr» diýip, täjik diplomaty nygtady.

Agyr atletika boýunça Türkmenistanyň erkekler we zenanlar ýygyndysynyň tälimçileri 3 — 10-njy fewral aralygynda Özbegistanyň Daşkent şäherinde geçiriljek agyr atletika boýunça Aziýa çempionatynda ýurda wekiliçilik etjek türgenleri kesgitlediler.

Zenanlar ýygyndysynyň düzüminden Kristina Şermetowa we Ýulduz Jumabaýewa (ikisi hem 55 kilograma çenli agram derejede), Polina Gurýewa (76 kilograma çenli agram derejede) hem-de Anamjan Rustamowa (81 kilograma çenli agram derejede) orun aldy.

Erkekler ýygyndysynyň düzüminde bolsa Seýitjan Mürzäýew (61 kilograma çenli agram derejede) Bunýad Raşidow we Bektimur Reýimow (ikisi hem 73 kilograma çenli agram derejede), Maksat Meredow (81 kilograma çenli agram derejede), Gaýgysyz Töräýew (89 kilograma çenli agram derejede), Şahzadbek Mätýakubow (96 kilograma çenli agram derejede) hem-de Hojamuhammet Toýçyýew (109 kilogramdan ýokary agram derejede) Türkmenistana wekilçilik eder.

Ýeri gelende bellesek, Daşkentde geçiriljek agyr atletika boýunça Aziýa çempionaty Pariž Olimpiadasyna gatnaşmak üçin reýting utuklaryny toplamaga mümkinçilik berýär.

Futbol boýunça Gazagystanyň milli ýygyndysy mart aýynyň ortalarynda Türkmenistanyň ýygyndysy bilen ýoldaşlyk duşuşygyny geçirmegi meýilleşdirýär. Bu barada Gazagystanyň Futbol federasiýasynyň metbugat gullugy habar berdi.

Habarda bellenlmegine görä, Magomed Adiýewden tälim alýan Gazagystanyň ýygyndysy 8-nji martda Dubaý şäherinde (BAE) okuw-türgenleşik ýygnanyşygyna girişer. Şol okuw-türgenleşik ýygnanyşygynyň dowamynda 14-nji martda gazak futbolçylarynyň Türkmenistanyň ýygyndysy bilen güýç synanyşmagy meýilleşdirilýär.

Türkmenistanyň we Gazagystanyň ýygyndylary mundan ozal 3 gezek güýç synanyşyp, şolaryň 2-si deňlikde tamamlandy we 1 gezek Gazagystan ýeňiş gazandy.

Häzirki wagtda Gazagystanyň ýygyndysy FIFA-nyň reýtinginde 100-nji, Türkmenistan bolsa 141-nji orny eýeleýär.

Ýeri gelende bellesek, Türkmenistanyň milli ýygyndysy 2024-nji ýylyň mart aýynda DÇ-2026-nyň saýlama tapgyrynda Eýranyň milli ýygyndysy bilen 2 gezek duşuşar.

Mergen Orazowyň şägirtleri 21-nji martda myhmançylykda, 26-njy martda bolsa Aşgabatda Eýran bilen güýç synanyşarlar.

Gazagystanyň milli ýygyndysy bolsa indiki resmi oýnuny ÝEWRO-2024-iň saýlamasynyň pleý-off turnirinde 21-nji martda Afini şäherinde Gresiýa garşy geçirer.

Türkmenistanda bedenterbiýäni, sporty, Olimpiýa hereketini ösdürmäge, ussat türgenleri taýýarlamaga, ýaşlaryň sagdyn, berk bedenli bolmagyny, sport bilen meşgullanmaklaryny gazanmaga mundan beýläk-de aýratyn ähmiýet berler.

Bu barada wise-premýer N.Amannepesow Türkmenistanyň Ministrler Kabinetiniň geçen hepdäniň anna gününde geçirilen mejlisinde döwlet Baştutanyny ynandyrdy.

Hasabatda aýdylyşy ýaly, şu ýylda Fransiýa Respublikasynyň Pariž şäherinde geçiriljek XXXIII tomusky Olimpiýa we XVII tomusky Paralimpiýa oýunlaryna Türkmenistanyň ýygyndy toparlaryny taýýarlamak boýunça işler dowam etdiriler.

Olimpiýa oýunlarynyň şu ýylyň 26-njy iýulyndan 11-nji awgustyna çenli Fransiýanyň Pariž şäherinde geçiriljekdigini ýatladýarys. Onda 206 milli olimpiýa ýygyndylarynyň wekilleri sportuň 32 görnüşi boýunça medallaryň 329 toplumy üçin göreşerler.

Täze, 2024-nji ýylyň bosagasynda Türkmenistanyň Prezidenti Serdar Berdimuhamedow türkmen halkyna täze ýyl gutlagy bilen ýüzlendi. "Türkmenistan" gazetiniň täze ýyldaky ilkinji sanynda çap edilen gutlagynda döwlet Baştutany şeýle belleýär:

Eziz watandaşlar!

Arkadag Serdarly bagtyýar ýaşlar ýyly bolan 2023-nji ýyl tamamlanyp barýar. Ýene az salymdan biz täze — 2024-nji ýyly garşylarys.

2024-nji ýyl — Gündogar müçenamasy boýunça luw ýyly. Geçip barýan ýylda Garaşsyz, hemişelik Bitarap döwletimiziň täze taryhynda giň gerimli özgertmeler amala aşyryldy. Gahryman Arkadagymyzyň başlangyjy bilen gurlan, ýurdumyzyň taryhynda ilkinji «akylly» şäher — Arkadag şäheri dabaraly ýagdaýda açyldy. Bu şäher halkara sylaglaryň 20-den gowragyna mynasyp boldy.

Garaşsyz ýurdumyzyň ähli ýerlerinde döwrebap ýaşaýyş jaýlaryny, mekdepleri, çagalar baglaryny, saglygy goraýyş, sport desgalaryny bina etdik. Medeniýet we sungat edaralaryny, seýilgähleri, önümçilik binalaryny, başga-da köp sanly desgalary ulanmaga berdik. Ýangyç-energetika toplumyna degişli iri taslamalary durmuşa geçirdik. Bagtyýar maşgalalaryň müňlerçesi ähli amatlyklary bolan ýaşaýyş jaýlaryna göçüp, toý tutdular. Bularyň hemmesi ata Watanymyzyň ykdysady taýdan kuwwatly döwletdigini aýdyň görkezýän tutumly işlerdir.

Garaşsyz ýurdumyzyň durmuşynda uly, taryhy işler rowaçlandy. 2023-nji ýylyň başynda Türkmenistanyň Halk Maslahaty döredildi.

26-njy martda bolsa Mejlisiň deputatlarynyň, welaýat, etrap, şäher halk maslahatlarynyň, Geňeş agzalarynyň saýlawlary üstünlikli geçirildi.

Oba hojalyk pudagynda-da düýpli özgertmeler amala aşyrylýar. Edermen daýhanlarymyz bugdaýyň hem pagtanyň, şeýle-de beýleki oba hojalyk ekinleriniň bol hasylyny ýygnap, Watan harmanyny beýgeldýärler. Geljekde hem daýhanlarymyzy ykdysady taýdan höweslendirmek maksady bilen, bereketli topragymyzda öndürilýän pagtanyň we bugdaýyň döwlet satyn alyş nyrhlaryny ýokarlandyrmak meselesine serederis. Pudagyň maddy-enjamlaýyn binýadyny has-da berkideris.

Ýurdumyzyň nebitgaz, ulag-aragatnaşyk we söwda-telekeçilik pudaklarynda hem köp işler amala aşyrylýar. Bu pudaklar berkarar döwletimiziň gazanýan ösüşlerine mynasyp goşant goşýarlar.

Hormatly watandaşlar!

Garaşsyz ýurdumyzda berk binýatly milli saglygy goraýyş ulgamy döredildi. Ynsan saglygyny goramak, adamlaryň ömür dowamlylygyny uzaltmak geljekde-de döwletimiziň üns merkezinde bolar. Raýatlarymyzyň saglygyny goramak, halkymyzyň abadançylygyny üpjün etmek biziň iň uly maksadymyzdyr.

Ylym-bilim bagtyýar geljegimiziň mizemez binýatlarynyň biridir. Şoňa görä-de, bu ulgamy döwrebaplaşdyrmaga, beden taýdan sagdyn, zehinli ýaş nesilleri terbiýeläp ýetişdirmäge uly ähmiýet berýäris. Ýaşlary sport bilen meşgullanmaga giňden çekmek, ýurdumyzyň halkara sport abraýyny has-da belende götermek ugrunda uly işleri alyp barýarys. Türkmenistan 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň agzalygyna saýlandy. Biz geljekde hem halkara sport düzümleri bilen ýakyndan hyzmatdaşlyk ederis, sportuň dürli görnüşlerini ösdüreris.

Bu ýylda Türkmenistanyň Magtymguly adyndaky Ýaşlar guramasy ÝUNESKO-nyň Bütindünýä Ýaşlar jemgyýetiniň resmi agzalygyna kabul edildi. Gözel Diýarymyzda dostlukly ýurtlaryň birnäçesinden wekilleriň gatnaşmagynda ýaşlar forumlary üstünlikli geçirildi.

Arkadag Serdarly bagtyýar ýaşlar ýylyna bagyşlanyp, paýtagtymyz Aşgabatda ýokary derejede geçirilen halkara ylmy-amaly maslahat we sergi ýaşlaryň durmuşynda ýatdan çykmajak waka boldy. Bu çäreleriň dowamynda ýurdumyzda hem-de daşary ýurtlarda geçirilen halkara sport ýaryşlarynda, mekdep okuwçylarynyň olimpiadalarynda, talyp ýaşlaryň bäsleşiklerinde ýeňiji bolanlary sylagladyk. Şeýle hem ykdysadyýetiň dürli ugurlarynda ýurdumyzyň ösüşine mynasyp goşant goşan ýaşlarymyzyň zähmetine mynasyp baha berdik. Ösüp gelýän nesillerimizi watançylyk ruhunda terbiýelemäge, ýaşlaryň başlangyçlaryny goldamaga mundan beýläk-de uly ähmiýet bereris.

Daşary syýasatda Bitarap Watanymyzyň dünýädäki ornuny has-da berkideris. Ýer ýüzüniň döwletleri we halkara guramalary bilen hyzmatdaşlygy täze many-mazmun bilen baýlaşdyrarys.

Biz tebigata aýawly garamaga, ykdysadyýete «ýaşyl» tehnologiýalary ornaşdyrmaga uly üns berýäris. Bu barada Birleşen Milletler Guramasynyň Howanyň üýtgemegi boýunça Çarçuwaly konwensiýasyna gatnaşýan taraplaryň 28-nji maslahatynda-da öz garaýyşlarymyzy öňe sürdük. Şunuň bilen baglylykda, geljekde hem ýurdumyzda köpçülikleýin bag ekmek çärelerini geçirmek arkaly ekologiýa abadançylygyny üpjün etmäge goşant goşarys.

Şu ýyl Türkmenistanyň başlangyjy esasynda Birleşen Milletler Guramasynyň Baş Assambleýasynyň 77-nji sessiýasynyň çäklerinde «Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkeziniň orny», «Bütindünýä durnukly ulag güni», şeýle hem Baş Assambleýanyň 78-nji sessiýasynyň ýaňy-ýakynda geçirilen 49-njy plenar mejlisinde «Durnukly ösüşi üpjün etmekde ygtybarly we durnukly energiýa birikmesiniň esasy orny», «Durnukly ösüş maksatlaryna ýetmek üçin ulagyň ähli görnüşleriniň arabaglanyşygyny berkitmek» atly Kararnamalar biragyzdan kabul edildi. Munuň özi Bitarap döwletimiziň öňe sürýän umumadamzat ähmiýetli başlangyçlarynyň halkara giňişlikde uly goldaw tapýandygyny ýene-de bir gezek aýdyň görkezdi.

Hormatly watandaşlar!

Birleşen Milletler Guramasynyň bilim, ylym, medeniýet meseleleri boýunça ýöriteleşdirilen düzümi bilen ýurdumyzyň işjeň hyzmatdaşlygynyň netijesinde, akyldar şahyrymyz Magtymguly Pyragynyň golýazmalar toplumy ÝUNESKO-nyň «Dünýäniň hakydasy» maksatnamasyna, onuň doglan gününiň 300 ýyllygy bolsa 2024-2025-nji ýyllarda bu gurama bilen bilelikde bellenilip geçilýän şanly seneleriň sanawyna goşuldy.

Eziz watandaşlar!

Milli medeniýetimizi ösdürmek, mirasymyzy gorap saklamak boýunça ýurdumyzda giň gerimli işler alnyp barylýar. Tamamlanyp barýan ýylda halkara derejede dürli medeni çäreler, Medeniýet günleri yzygiderli geçirildi. Aşgabatda guralan Medeniýet hepdeligi medeniýetimizi, sungatymyzy, edebiýatymyzy baýlaşdyrmakda aýratyn ähmiýete eýe boldy. Geljek ýyl Medeniýet hepdeligini Arkadag şäherinde ýokary derejede geçireris.

2024-nji ýyl beýik akyldar şahyrymyz Magtymguly Pyragynyň doglan gününiň 300 ýyllygy mynasybetli guraljak şanly senelere beslener. Biz halkymyzyň özboluşly däp-dessurlarynyň, taryhy-medeni mirasynyň goralyp saklanmagyna, ylmy esasda çuňňur öwrenilmegine we wagyz edilmegine gönükdirilen döwlet syýasatymyzy mundan beýläk-de dowam etdireris.

Hormatly adamlar!

Halkymyzyň hal-ýagdaýyny, ýaşaýyş-durmuş şertlerini has-da ýokarlandyrmak maksady bilen, täze ýylyň 1-nji ýanwaryndan zähmet haklaryny, pensiýalary, döwlet kömek pullaryny, talyp we diňleýji haklaryny ýene-de 10 göterim köpelderis.

Ýagşy arzuw-niýetler, belent maksatlar bilen garşy alýan täze ýylymyz il-ýurt bähbitli rowaçlyklaryň ýyly bolar.

Mähriban Watanymyza buýsanjymyzy, aýdyň maksatlarymyzy belentde tutup, biz ýetip gelen 2024-nji ýyla «Pähim-paýhas ummany Magtymguly Pyragy» ýyly diýip at berdik. Gahryman Arkadagymyzyň öz şygrynda belleýşi ýaly, biziň her birimiz üçin akyldar şahyrymyz Magtymguly Pyragy pähim-paýhas ummanydyr.

Biz täze ýylda-da eziz Watanymyzy bagtyýarlygyň we rowaçlygyň mekanyna öwürmek ugrunda yhlas bilen zähmet çekeris.

Gadyrly watandaşlar!

Ýene az salymdan täze — 2024-nji ýyly garşy alarys. Şu pursatda men siziň ähliňize täze üstünlikleri tüýs ýürekden arzuw edýärin. Maşgala ojaklaryňyza agzybirlik, rysgal-bereket, döwletlilik ýar bolsun, bagtyýar günler dowamat-dowam bolsun!

Eziz watandaşlar!

Täze — 2024-nji ýylyňyz gutly bolsun!

Türkmenistanly dzýudoçy Hekim Agamämmedow Ýaponiýanyň paýtagtynda geçirilen «Tokyo Grand Slam-2023» «Uly tuwulga» ýaryşynda bürünç medala mynasyp boldy.

Iki günläp dowam eden bu ýaryş 84 döwletden türgenleriň 506 sanysyny bir ýere jemledi. Ýaryşda türgenler erkekleriň arasynda 7, zenanlaryň arasynda 7, jemi 14 medallar toplumy üçin güýç synanyşdylar. Gatnaşyjylaryň arasynda 5 sany Olimpiýa oýunlarynyň häzirki çempionynyň, 8 sany dünýäniň häzirki çempionynyň bolmagy onuň ýokary derejesinden habar berýär.

24 ýaşly Hekim Agamämmedow 66 kilograma çenli agram derejesinde hormat münberinden orun aldy. Bu agram derejesinde 35 ýurtdan 48 türgen medallar üçin göreşdi.

Hekim bürünç medala çenli geçilen ýolda bäş tutluşykda ýeňiş gazanmagy başardy. Ol birinji aýlawda amerikaly Ari Berlineri, ikinji aýlawda azerbaýjanly Ýaşar Najafowy, üçünji aýlawda moldowaly Radu Izworeanuny ýeňlişe sezewar etdi. Ýarym finala çykmak üçin geçirilen tutluşykda bolsa Hekim fransiýaly Daýki Bubdan asgyn gelip, goşmaça oýunlar arkaly bürünç medal üçin göreşmäge mejbur boldy.

Hekim Agamämmedow soňky iki tutluşygynda, ilki, braziliýaly Willian Limany, soňra bolsa mongoliýaly Erhembaýar Battogtohy ýeňip, hormat münberinden orun aldy.

Bu agram derejesinde ikinji bürünç medal degişli agramda dünýä reýtinginiň lideri moldowaly Denis Wiýera, kümüş medal mongoliýaly Bashu Ýondonperenleýne, altyn medal bolsa ýer eýesi Hifumi Abe nesip etdi.

Ýeňijileri sylaglamak dabarasynda Hekim Agamämmedowa bürünç medaly Mongoliýanyň Dzýudo assosiasiýasynyň prezidenti Battulga Haltmaagiýn gowşurdy we türkmen türgeniniň hormatyna «Tokyo Metropolitan Gymnasium» köşgünde Türkmenistanyň Döwlet baýdagy ýokary galdyryldy.

Ýeri gelende bellesek, Hekim Agamämmedow ýeňijilere we baýrakly orny eýelänlere dzýudo boýunça dünýä çempionatyna we Olimpiýa oýunlaryna gatnaşmak üçin reýting utugyny berýän «Uly tuwulga» ýaryşlarynda hormat münberinden orun alan ilkinji türkmenistanly türgen boldy. Bu ugurda türkmen türgenleriniň arasyndaky ozalky iň gowy netije Gülbadam Babamyradowa degişli bolup, ol 2014-nji ýylda Baku şäherinde geçirilen «uly tuwulga» turnirinde ilkinji bäşlige girmegi başarypdy.