«Ahal» futbol topary Türkmenistanyň kubogynyň çärýek finalynyň çägindäki duşuşykda «Köpetdagdan» üstün çykdy. Aşgabatdaky «Nusaý» stadionynda geçirilen duşuşyk «Ahalyň» 2:1 hasabyndaky ýeňşi bilen tamamlandy.

Duşuşygyň ýer eýeleri üçin garaşylmadyk netije bilen başlanandygyny aýtmak gerek. Eýýäm 3-nji minutda «Köpetdag» Şiri Annaýewiň geçiren goly bilen hasapda öňe saýlandy. Ýöne «Ahal» garşydaşyň toparyň bu üstünligi uzak wagtlap goramagyna rusgat bermedi. 20-nji minutda Meýlis Diniýew Elman Tagaýewiň meýdanyň burçundan oýna girizen pökgüsini ussatlyk bilen derwezä gönükdirip, hasaby deňledi. 71-nji minutda bolsa kapitan Elman Tagaýew özüne ynanylan 11 metrlik jerime urgusyny dürs ýerine ýetirdi we hasaby 2:1-e çykardy.

Duşuşykdan soň Meýlis Diniýew oýun baradaky pikirlerini şeýle beýan etdi: «Kyn duşuşyk boldy. Garşydaş goraga çekildi, bu bolsa bize tälimçimiziň beren görkezmelerini ýerine ýetirmekde käbir kynçylyklary döretdi. Ikinji ýarymda oýny biraz ele aldyk. Ýöne umuman alanymyzda, göwnümizdäki ýaly oýun bolmady. Has gowy göreşip bilerdik».

Şeýle hem ol kelle urgularyny edeňde, dogry ýerde durmagyň ähmiýetine ünsi çekdi. Şol bir wagtyň özünde-de Elman Tagaýewiň meýdanyň burçundan özüne ussatlyk bilen geçirendigini aýtdy. Duşuşygyň başynda goýberilen gol bilen bagly sowala bolsa toparyň ilkinji minutlarda sazlaşykly goranyp bilmändigi bilen düşündirdi.

Kynlyk bilen gazanylan ýeňşe garamazdan, Diniýew 8-nji sentýabrda geçiriljek jogap duşuşygynda toparynyň has ynamly çykyş edip, ýaryşyň indiki tapgyryna geçjekdigine ynam bildirdi. Şeýle hem ol toparyň Türkiýede örän netijeli okuw-türgenleşik ýygnanyşygyny geçirendigini aýdyp, güýçli garşydaşlaryň birnäçesine garşy netijeli oýny orta goýandyklaryna ünsi çekdi.

Çärýekfinal duşuşygynyň başga bir aýratynlygy bolsa Meýlis Diniýew tarapyndan ýokary baha berlen sary reňkli lybas boldy. «Täze lybasymyz bize üstünlik getirdi. Öňümizde jogap duşuşygy hem bar. Ondan hem özümizi kanagatlandyrýan netijäni gazanjakdygyma ynanýarys» diýip, ol sowallarymyza jogap berdi.

Ýaryşlara «Babun» lakamy bilen gatnaşýan Waleriý Grigorýan Aziýa boýunça abraýly elektron sport ýaryşlarynyň biri bolan «Your Home Your Arenanyň» «eFootball Mobile» görnüşi boýunça Türkmenistanyň ýygyndysyna bürünç medal gazandyrdy.

Yklymyň iň güýçli oýunçylaryny öz içine alan ýaryş 18-nji awgustda geçirildi. «Çopan» toparyna we Türkmenistanyň ýygyndysyna wekilçilik eden Grigorýan özüniň ajaýyp ussatlygyny görkezdi. Bu barada Türkmenistanyň Elektron sport federasiýasy habar berýär.

Türkmenistanyň wekili ýaryşyň üçünji orny ugrundaky duşuşykda gyrgyzystanly garşydaşyny 2:1 hasabynda ýeňdi.

Öň «PUBG Mobile» boýunça ýaryşan Grigorýanyň «eFootball Mobile»-da hem üstünlik gazanmagy özüneçekiji aýratynlykdyr.

Türkmenistanly samboçy Nyýazmyrat Babekow Gyrgyzystanyň Çolponata şäherinde geçirilen Dünýä kubogynda altyn medala mynasyp boldy. Ol bu üstünligi sport sambosy boýunça 64 kilograma çenli agram derejesinde gazandy.

Ozal hem habar berşimiz ýaly, Dünýä kubogynyň ilkinji gününde türkmen türgenleri dört medal gazanypdylar. Ýaryşyň jemleýji gününde olar bu medallaryň üstüni ýene-de altysy bilen ýetirip, 10-a tegelediler.

Dünýä kubogynyň ikinji gününde Nyýazmyrat Babekowyň gazanan altyn medalyndan başga-da, sport sambosy boýunça Babamyrat Baýramow (58 kilograma çenli agram derejesi) we Aziza Nazarowa (50 kilograma çenli) bürünç, söweş sambosy boýunça Ýusup Taňryberdiýew (58 kilograma çenli) bilen Zarina Abdyrahmanowa (54 kilograma çenli) kümüş, Maksat Annagylyjow (88 kilograma çenli) bilen Gülzada Jorakulyýewa bolsa bürünç medal gazandylar.

Dünýä kubogy 26 agram derejesi boýunça geçirildi.

Şu gün Aziýanyň Futbol konfederasiýasynyň Kuala-Lumpur şäherindäki ştab kwartirasynda AFK-nyň Çagyryş ligasynyň ilkinji möwsüminiň bijeleri çekildi. Bije çekişligiň netijelerine laýyklykda, Türkmenistanyň çempiony «Arkadag» futbol topary AFK-nyň Çagyryş ligasynyň «B» toparçasynda çykyş eder.

Bu toparçada Türkmenistanyň çempionyna Kuweýtiň «Al-Arabi», Maldiw adalarynyň «Maziýa» we Gyrgyzystanyň «Abdyşata» toparlary garşydaş boldy.

«Al-Arabi» geçen möwsümde Kuweýtiň Premýer ligasynda ikinji orny eýeläp, özüne yklymyň üçünji derejeli klublaýyn ýaryşyndan orun aldy. «Maziýa» bilen «Abdyşata» bolsa wekilçilik edýän döwletleriniň futbol çempionatlarynyň iň ýokarky dwizionlarynyň çempionlarydyr. Ýöne gyrgyz toparynyň ýaryşa saýlama tapgyrdan goşluşandygyny ýatlatmak isleýäris.

«B» toparçanyň duşuşyklary 26-njy oktýabrdan 1-nji noýabra çenli aralykda merkezleşdirilen görnüşde Kuweýtde geçiriler. Günbatar sebitde toparçada birinji orny eýelän toparlar gönüden-göni adyny çärýekfinala ýazdyryp biler. Bu sebitdäki «A», «B» we «C» toparçalarynda ikinji orny eýelän toparlar bolsa çärýek finalyň nobatdaky bir ýollanmasy üçin öz aralarynda güýç synanyşarlar. Bu «Arkadag» toparynyň toparçada birinji orny eýeläp bilse, adyny çärýekfinala ýazdyrjakdygyny, ikinji orny eýelese, «A» we «C» toparçalarynda şol orny eýelän toparlar bilen duşuşykjakdygyny görkezýär.

Bije çekişligiň netijesinde AFK-nyň Çagyryş ligasynyň ilkinji möwsüminde aşakdaky toparçalar emele geldi:

Günbatar sebit:

«A» toparça: «Ist Bengal» (Hindistan), «Nejmeh» (Liwan), «Başundara Kings» (Bangladeş), «Paro» (Butan, ýer eýesi);

«B» toparça: «Al-Arabi» (Kuweýt, ýer eýesi), «Arkadag» (Türkmenistan), «Maziýa» (Maldiw adalary), «Abdyşata» (Gyrgyzystan);

«C» toparça: «Al-Ahli» (Bahreýn), «Al-Fotuwa» (Siriýa), «Al-Sib» (Oman, ýer eýesi), «Hilal Al-Kuds» (Palestina).

Gündogar sebit:

«D» toparça: «Şan Ýunaýted» (Mýanma, ýer eýesi), «Taýwan Stil» (Taýwan), «Ýong Elephants» (Laos);

«E» toparça: «Madura Ýunaýted» (Indoneziýa), «Preah Han Riç Swaý Rieng» (Kambojiýa), «SP Falkons» (Mongoliýa, ýer eýesi).

Futbol boýunça Türkmenistanyň kubogynyň çärýekfinalynyň üç duşuşygy geçirildi. Olarda «Arkadag» topary «Şagadamy», «Altyn Asyr» «Merwi», «Nebitçi» bolsa «Aşgabady» kabul etdi.

Mundan sanlyja gün «Şagadamy» Ýokary liganyň 19-njy tapgyrynda 5:1 hasaby bilen ýeňen «Arkadag» topary Türkmenbaşy şäherine wekilçilik edýän garşydaşyndan ýene-de üstün çykdy. Bu gezek 3:0 hasabynda ýeňiş gazanan «Arkadag» futbol topary jogap duşuşygy üçin uly artykmaçlyk gazandy.

Ýokary ligadaky duşuşygy ätiýaçlykdaky günleriň birine geçirilen «Altyn Asyr» bilen «Merw» şu gün Kubok ýaryşynyň çärýekfinalynda biri-birini synaga saldylar. Ýakynda Hindistanda geçirilen saýlama duşuşykda buýsandyryjy ýeňiş gazanyp, AFK-nyň Çempionlar ligasy ― 2-niň toparçalaýyn tapgyryndan orun alan «Altyn Asyr» milli ýaryşlara-da üstünlik bilen dolanyp gelip, «Merwi» 3:1 hasabynda ýeňdi.

Balkanabat şäherinde geçirilen duşuşykda bolsa paýtagtymyzyň adybir futbol topary ýerli «Nebitçiden» 2:1 hasabynda üstün çykdy.

Türkmenistanyň kubogynyň çärýekfinalynyň birinji duşuşyklary ertir geçiriljek «Ahal» ― «Köpetdag» duşuşygy bilen tamamlanar.

Türkmenistanyň kubogy ― 2024. Çärýekfinal.

20.08.2024 ý.

«Arkadag» ― «Şagadam» ― 3:0.

Gollar: 26' Şamämmet Hydyrow, 75' Arslanmyrat Amanow - 90+2’ Altymyrat Annadurdyýew.

«Altyn Asyr» ― «Merw» ― 3:1

Gollar: 7’ Röwşen Halmämmedow, 30’ Röwşen Halmämmedow, 63’ Myrat Annaýew (11m.j.u.) - 73’ Abdyresul Abdyýew.

«Nebitçi» ― «Aşgabat» ― 1:2.

Gollar: 45+2’ Elýas Akyýew - 29’ Tirkişmyrat Sarymyradow, 85’ Şyhberdi Baýnazarow.

Aşgabatda we Balkanabatda Türkmenistanyň futbol boýunça ýokary liga klublarynyň arasyndaky çempionatynyň üçünji aýlawyny başlan 19-njy tapgyryň iki oýny boldy.

Ilki paýtagtyň «Nusaý» stadionyndaky oýun tamamlandy, onda Türkmenistanyň häzirki çempiony we kubogynyň ýeňijisi «Arkadag» futbol topary Türkmenbaşynyň «Şagadam» toparyny kabul etdi. Toparlaryň ikisi-de milli çempionatyň ikinji ýarymyna berk taýýarlanypdy. «Arkadag» futbol topary Rumyniýada geçen türgenleşik ýygnagynyň çäginde ýerli toparlar bilen bäş synag oýnuny oýnady, şol ýaryşlarda ol dört ýeňiş gazanyp, «Koncordia» toparyndan 0:2 hasabynda ýeňlişe sezewar boldy.

«Arkadag» futbol topary Türkmenistanyň çempionatynyň täzeden başlanmagynyň öňüsyrasynda öz düzümine käbir üýtgeşmeleri girizdi. Derwezeçi Rahat Japarow «Ahal» futbol toparyna gaýdyp bardy, onuň ýerini bolsa «Ahal» toparyndan gelen derwezeçi Rüstem Ahallyýew eýeledi.

«Şagadam» topary milli çempionatyň ikinji ýarymyna täze baş tälimçi — bu wezipede klubda baş tälimçiniň kömekçisi hökmünde galan Ýewgeniý Tkaçenkonyň ornuna gelen Türkmenistanyň 73 ýaşly at gazanan tälimçisi Aly Gurbanyň ýolbaşçylygynda Türkiýäniň Kartepe şäherinde taýýarlyk görýärdi. Mundan başga-da, «Şagadam» topary dört täze oýunçy almak bilen, tomusky çalşyk döwründe işjeň işledi. Topara Aşgabatdan üç oýunçy goşuldy. Olar Şatlyk Gurbanow, Didar Tejenow we Hojanazar Gurbanow. Derwezeçi wezipesini öň Marynyň «Energetik» toparynda oýnan Muhammet Öwezow berkitdi. Mundan başga-da, esasy topara ätiýaçlyk toparyndan birnäçe oýunçy geçirildi.

«Şagadam» topary 23-nji minutda hasaby açmak bilen, oýna umytly başlady. Muny Hydyrgeldi Atjanow ýerine ýetirdi. Eýsem-de bolsa, bu netije uzaga çekmedi. 8 minutdan soň Didar Durdyýew jerime urgusy bilen deňagramlylygy dikeltdi — 1:1. 45-nji minutda bolsa Altymyrat Annadurdyýew ikinji topy tora girizdi, netijede toparlar hasap «Arkadag» futbol toparynyň peýdasyna 2:1 hasabynda arakesmä çykdylar.

Oýnuň ikinji ýarymynda Wladimir Baýramowyň şägirtleri «Şagadam» toparynyň derwezesine ýene-de üç sany jogapsyz top geçirdiler. Bu toplar Şanazar Tirkişow (60-njy minut), Arslanmyrat Amanow (66-njy minut) we Mirza Beknazarow (85-nji minut) dagynyň adyna ýazyldy.

5:1 hasabynda ýeňiş gazanan «Arkadag» futbol topary 17 oýunda aňrybaş mukdarda utuk gazandy — 51. Ikinji we üçünji orny paýlaşýan «Altyn asyr» we «Ahal» toparlary öň hatarda barýan topardan 14 utuk yzda. Ýöne Türkmenistanyň wise-çempiony bir oýny az oýnapdyr. «Şagadam» topary 24 utuk bilen dördünji orny eýeleýär.

19-njy tapgyryň Balkanabatda geçen başga bir oýnunda häzirki milli çempionatdan çykan «Nebitçi» we «Köpetdag» futbol toparlary duşuşdy. Türkmenistanyň Içeri işler ministrliginiň toparynyň oýunçylary üçin täze baş tälimçi — bu wezipede üçünji aýlawdan başlap, «Aşgabat» toparyna ýolbaşçylyk edýän Tofik Şükürowyň ornuna geçen Begenç Garaýewiň ýolbaşçylygyndaky ilkinji oýun boldy.

90 minutlyk oýunda hiç tarapdan ýeňiji öňe çykmady. Jumamyrat Jumaýewiň 30-njy minutda salan topuna ýer eýeleri 52-nji minutda Döwran Berdiýewiň takyk uran pökgüsi bilen jogap berdiler we oýun 1:1 hasabynda deňme-deň tamamlandy.

Bu oýundan soň «Nebitçi» topary 16 utuk bilen 7-nji ýeri eýeleýän «Aşgabat» toparynyň yzyndan ýetdi, 13 utuk gazanan «Köpetdag» topary bolsa sanawyň ahyrynda ýerleşýär. Ondan öň, 19-njy tapgyryň açylyş oýnunda «Ahal» topary 3:0 hasabynda «Aşgabat» toparyndan üstün çykdy.

Bu tapgyryň «Altyn asyr» bilen «Merw» toparlarynyň arasyndaky soňky oýny Türkmenistanyň wise-çempionynyň AFK-2 Çempionlar ligasynyň saýlama oýunlaryna gatnaşmagy sebäpli, soňa geçiriler.

20-nji tapgyryň oýunlary 24-nji awgustda bolar. Şol gün «Şagadam» – «Aşgabat», «Merw» – «Nebitçi», «Arkadag» – «Altyn asyr», «Köpetdag» – «Ahal» toparlary bilen oýnar.

20-nji awgustda futbol boýunça Türkmenistanyň kubogy ugrundaky ýaryşyň täze möwsümine badalga berler. Täze ýaryş çärýekfinal duşuşyklary bilen başlanar.

Kubok ýaryşynyň çärýekfinallary iki günläp geçiriler. Şu gün «Arkadag» topary «Şagadamy», «Nebitçi» «Aşgabady». «Altyn asyr» bolsa «Merwi» kabul eder. «Ahal» ― «Köpetdag» duşuşygy ertir geçiriler.

Türkmenistanyň Futbol federasiýasynyň Eminler bölümi duşuşyklaryň geçiriljek ýeri, başlanjak wagty we eminleri barada aşakdaky maglumatlary berýär.

Türkmenistanyň kubogy ― 2024. Çärýekfinal duşuşyklary

20.08.2024 ý.

«Arkadag» ― «Şagadam»

Geçiriljek ýeri: «Nusaý» stadiony (Aşgabat ş.).

Başlanjak wagty: 17:30.

Duşuşygyň emini: A.Begnazarow (Mary ş).

Eminiň kömekçileri: Ş.Hydyrow (Balkanabat ş.), S.Çaryýew (Mary ş.).

Ätiýaçdaky emin: M.Allaberdiýew (Aşgabat ş.).

Gözegçi emin: M.Öwezdurdyýew (Mary ş.).

«Nebitçi» ― «Aşgabat»

Geçiriljek ýeri: «Sport toplumy» (Balkanabat ş.).

Başlanjak wagty: 18:00.

Duşuşygyň emini: P.Pälwanow (Daşoguz ş.).

Eminiň kömekçileri: R.Ereşow (Türkmenabat ş.), A.Weliýew (Änew ş).

Ätiýaçdaky emin: A.Annamyradow (Balkanabat ş).

Gözegçi emin: E.Ramazanow (Aşgabat ş).

«Altyn asyr» ― «Merw»

Geçiriljek ýeri: «Sport toplumy» (Aşgabat şäheriniň Büzmeýin etraby).

Başlanjak wagty: 17:30

Duşuşygyň emini: R.Mämmedow (Aşgabat ş.).

Eminiň kömekçileri: E.Ýazmyradow (Aşgabat ş.), Ý.Jumamyradow (Aşgabat ş.).

Ätiýaçdaky emin: H.Gurbanow (Aşgabat ş.).

Gözegçi emin: G.Öwezow (Aşgabat ş.).

21.08.2024 ý.

«Ahal» ― «Köpetdag»

Geçiriljek ýeri: «Nusaý» stadiony (Aşgabat ş).

Başlanjak wagty: 17:30.

Duşuşygyň emini: A.Gurbanow (Aşgabat ş.).

Eminiň kömekçileri: E.Annamyradow (Balkanabat ş.), E.Ýazmyradow (Aşgabat ş).

Ätiýaçdaky emin: H.Gurbanow (Aşgabat ş).

Gözegçi emin: B.Allaberdiýew (Aşgabat ş).

Şu günler Aşgabatdaky «Garagum» myhmanhanasynda dowam edýän «Kids Expo: Ähli zat çagalar üçin» atly köpugurly sergisinde çagalaryň futbol dünýäsine ilkinji gadamlaryny goýmagy üçin hem mümkinçilik dörediler. Hut, şu maksat bilen, Türkmenistanyň Futbol federasiýasy sergide özüniň ýörite bölümlerini ýaýbaňlandyryldy. Bölüm çagalary sport bilen, şol sanda millionlaryň söýgüli oýny bolan futbol bilen dostlaşdyrmakda uly ähmiýete eýe bolýar.

Çaklaňja futbol meýdanyny ýadyňa salýan bölümimizde çagalarymyz ýurdumyzyň meşhur futbolçylary bilen tanşyp, olar bilen futbol oýnap bilýärler. Bu ýerde olara futbol barada, şol sanda çagalar futboly barada gyzykly gürrüňler berilýär. Ýeri gelende aýtsak, biziň futbolda juda zehinli çagalarymyz bar. Olar ýygy-ýygydan halkara derejeli ýaryşlara gatnaşyp, olarda baýrakly orunlara eýe bolýar.

Iň gyzykly taraplaryň biri hem Türkmenistanyň Futbol federasiýasynyň bölüminde elektron görnüşde futbol oýnamak üçin döwrebap enjamlar ýerleşdirilendir. Bu bölümde çagalar wagtyny hoş geçirip, futbol dünýäsine ýakynlaşyp bilýärler.

Serginiň 19-njy awgustda başlanandygyny we 22-nji awgusta çenli dowam etjekdigini ýatladýarys.

Türkmenistanyň çempiony «Arkadag» futbol topary AFK-nyň Çagyryş ligasynyň 22-nji awgustda geçiriljek bije çekişligine ikinji sebetden gatnaşar.

Ýaryşyň Günbatar sebitinde her birinde dört topardan bolan üç sany toparça emele geler. Olar bije çekişlige aşakdaky görnüşde gatnaşarlar.

1-nji sebet:

«Ist Bengal» (Hindistan),

«Al-Ahli» (Bahreýn),

«Al-Arabi» (Kuweýt);

2-nji sebet:

«Arkadag» (Türkmenistan),

«Nijme» (Liwan),

«Al-Fotuwa» (Siriýa);

3-nji sebet:

«Başundara Kingz» (Bangladeş),

«Al-Sib» (Oman),

«Maziýa» (Maldiwler);

4-nji sebet:

«Al-Hilal Al-Kuds» (Palestina),

«Abdyş-Ata» (Gyrgyzystan),

«Paro» (Butan).

Ýaryşyň Gündogar sebitinde her birinde üç topardan bolan iki toparça emele geler:

1-nji sebet:

«Madura Ýunaýted» (Indoneziýa),

«Şan Ýunaýted» (Mýanma);

2-nji sebet:

«Pre Han Riç Swaý Rýeng» (KHDR),

«Taýwan Stil» (Taýwan);

3-nji sebet:

«Ýang Elefants» (Laos),

«SP Falkons» (Mongoliýa).

Ýaryşyň toparçalaýyn tapgyrynyň duşuşyklary merkezleşdirilen görnüşde 26-njy oktýabrdan 1-nji noýabra çenli aralykda geçiriler. Gündogar sebitdäki duşuşyklar bolsa 27-nji oktýabrdan 2-nji noýabra çenli aralykda oýnalar.

Dünýä belli futbol ýyldyzy Kilian Mbappe La Ligadaky ilkinji duşuşygynda garaşylanyndan pes derejede çykyş etdi. «Malýorka» futbol topary bilen bilen geçirilen we 1:1 hasabyndaky deňlik bilen tamamlanan duşuşykda fransiýaly ýyldyza iň pes bahalaryň biri berildi.

«Flashscore» Mbappe bu duşuşykdaky çykyşy üçin 6,9 utuk berdi. Onuň utugy diňe 6,5 utukly Daniel Karwahaldan we 5,6 utukly Ferlan Mendiden köp. Mendinyň bolsa duşuşygyň ähyrky minutlarda gyzyl kart alyp, oýundan çykarylandygyny ýatladýarys.

Duşuşykdan soň Mbappe jemgyýetçilik torlarynyň birindäki hasaby arkaly janköýerlerine: «Gowy netije däl. Başymyzy galdyryp, ähli ünsümizi duşuşyklara bermeli. Hala Madrid!» diýip ýüzlendi.

Garaşylanyndan pes başlangyja garamazdan, Mbappe üçin özüni görkezmäge mümkinçilik bar. 25-nji awgust güni «Real Madrid» Santiago Bernabeu stadionynda «Wallýadolidi» kabul eder.

10-18-nji awgust aralygynda Korumduda (Yssyk-Köl, Gyrgyzystan Respublikasy) geçirilen oglanlaryñ we gyzlaryñ arasynda klassyky küşt boýunça Merkezi Aziýa çempionatynda ýaş türkmen küştçi gyzlary altyn we kümüş medallaryna eýe boldular. 

8 ýaşa çenli gyzlaryñ arasyndaky toparda mümkin bolan 9 utukdan 7,5 utuk gazanyp, Mary welaýatyndan okuwçy gyz Aýlar Hemraýewa (FIDE sanawynda - 1483) altyn medala eýe boldy. Birinji tapgyrda ýeñlişe sezewar bolan Aýlar oýuna gaýdyp bilip, öñündäki dört partiýada (döw) ýeñiş gazanmagy başardy. 6-njy tapgyrda Aýlar deñ oyun geçirip, soñky geçiren üç oýnunda, şol sanda Gazagystandan bolan bäsdeşi Ameliýa Ametowany hem-de Gyrgyzystandan bolan bäsdeşi Amina Şergaliýewany ýeñmegi başardy. Olar bolsa netijede ikinji we üçünji ýerlere mynasyp boldular.

Şu ýylyñ ýazynda Albaniýada geçirilen blis boýunça dünýä çempionatynda 8 ýaşa çenli toparda ýedi ýaşly Aýlar mynasyp 4-nji orny eýeledi. Türkmenistanyñ at gazanan tälimçisi Ejegyz Ýalkanowanyñ ýolbaşçylygynda tälim alýan zehinli gyzjagaz şu ýylyñ fewral aýynda ilkinji gezek Türkmenistanyñ çempiony boldy.

10 ýaşa çenli gyzlaryñ arasyndaky toparda mümkin bolan 9 utukdan 6,5 utuk gazanyp, aşgabatly okuwçy gyz, "Küşt älemi" ilkinji hususy küşt akademiýasynyñ okuwçydy Läle Wepaýewa (FIDE sanawynda - 1481) kümüş medala eýe boldy. 5-nji tapgyrdan soñ Läle diñe 2,5 utuga eýe bolup (1 ýeñiş, 1 ýeñliş, 3 deñ oýun), soñky dört tapgyrda dört möhüm ýeñiş gazandy, şol sanda turniryñ çempiony bolan Gyrgyzystandan Aimana Saizildaýewany (sanawda - 1549) ýeñmegi başaryp, hormat münberiniñ ikinji basgançagyna galdy. Güýçlüleriñ üçlügini Gazagystandan küştçi Inža Abibulla tamamlady.

Fewral aýynda geçirilen milli çempionatda 10 ýaşa çenli toparda Läle birinji onluga girip, biziñ ýurdumyzda ýaş gyzjagazlaryñ ýokary taýýarlyk derejesiniñ subutnamasy boldy.

Ýaş gyzjagazlaryñ jemleýji "spurtlary" türkmen küştçileriñ diñe bir oýun derejesine däl, eýsem ýokary sport ruhuna we ýeñşe bolan ymtylyşa şaýatlyk edýär. Munuñ ýene bir subutnamasy - Merkezi Aziýa çempionatlarynda biziñ türgenlerimiziñ ýokary netijeliligidir. Ýurdumyzyñ bäş ýaş wekillerine iki medal gazanyldy. Umuman, turnire 300-den gowrak küştçi gatnaşdy, şol sanda Gyrgyzystandan 128 wekil, Gazagystandan 98, Özbegistandan - 69 gatnaşyjy.

Goňşy ýurtlardan gatnaşyjylarynyñ sanawynyñ köplügine garamazdan, umumy medal hasabynda biziñ ýurdumyz mynasyp 3-nji orna eýe boldy.

Turnir wagty klassiki hasaplama boýunça 9 tapgyrlyk şweýsar ulgamy boýunça geçirildi - her oýunça 90 minutdan, birinji ýöreýişden 30 minut goşmak bilen.

Hormatly halkara sergi-ýarmarkasyna gatnaşyjylar!

Gadyrly myhmanlar!

Sizi Berkarar döwletiň täze eýýamynyň Galkynyşy döwrüniň «Pähim-paýhas ummany Magtymguly Pyragy» ýylynda ak mermerli Aşgabatda ilkinji gezek geçirilýän «Kids Ekspo: ähli zat çagalar üçin» atly halkara sergi-ýarmarkasynyň öz işine başlamagy bilen tüýs ýürekden gutlaýaryn.

Bagtyýar çagalygyň ýurdy, iň süýji arzuwlaryň, belent maksatlaryň hasyl bolýan Garaşsyz, hemişelik Bitarap Türkmenistan Watanymyzda durmuşymyzyň gül-gunçalary bolan çagalar döwlet tarapyndan aýratyn uly üns-alada bilen gurşalýar. Ýurdumyzyň ähli künjeklerinde döwrebap çagalar baglary, mekdepler, bedenterbiýe, sagaldyş-dynç alyş toplumlary gurlup, bagtyýar çagalaryň düýpli bilim almagy, dünýägaraýşyny giňeltmegi, olarda ýokary ahlak sypatlarynyň kemala getirilmegi üçin amatly durmuş şertleri döredilýär. Türkmenistan çagalygy adamyň ömrüniň möhüm tapgyry hökmünde ykrar edýär we ösüp gelýän ýaş nesilleri jemgyýetimizde doly derejeli durmuşa taýýarlamagy, olarda döredijilik işjeňligini, ukyp-başarnyklary ösdürmegi, ýokary ahlak häsiýetlerini, watançylyk, raýatlyk duýgularyny terbiýelemegi ileri tutulýan wezipeler hökmünde kesgitleýär.

Türkmenistanyň Söwda-senagat edarasy bilen «Türkmen Ekspo» kompaniýasynyň bilelikde guraýan bu sergi-ýarmarkasynda ýurdumyzyň we daşary ýurtlaryň önüm öndürijileriniň körpeler, mekdep okuwçylary, talyplar üçin niýetlenen ýokary hilli, ekologik taýdan arassa, döwrebap önümleri, okuw esbaplary, elektron harytlary hödürleniler. Şeýle hem sergi-ýarmarkanyň çäklerinde bu ugurda iş alyp barýan kompaniýalara özara tejribe alyşmaga mümkinçilik dörediler. Çagalar üçin dürli ugurlarda ussatlyk sapaklarynyň guralmagy, innowasion işläp taýýarlamalar, täzelikler bilen tanyşdyrylmagy bolsa bu giň möçberli çäräniň ähmiýetini has-da artdyrar.

Hormatly adamlar!

Gadyrly myhmanlar!

Häzirki döwürde Birleşen Milletler Guramasy tarapyndan yglan edilen Durnukly ösüş maksatlaryny yzygiderli we üstünlikli amala aşyrýan Garaşsyz, hemişelik Bitarap Türkmenistan ýaş nesillere döwrebap bilim-terbiýe bermek, zenanlaryň, çagalaryň saglygyny, bähbitlerini hem-de hukuklaryny goramak ýaly örän möhüm ugurlar boýunça dünýä döwletleri, abraýly halkara guramalar bilen işjeň hyzmatdaşlyk edýär.

«Kids Ekspo: ähli zat çagalar üçin» atly halkara sergi-ýarmarkasynda çagalar hyzmatlary pudagynda işleýän kompaniýalara innowasion önümlerini we hyzmatlaryny görkezmäge mümkinçilik dörediler. Sergi-ýarmarkanyň dürli öwüşginli ekspozisiýalarynyň dünýäniň ýurtlaryndan halkara hyzmatdaşlaryň, maýadarlaryň, çagalar üçin önümler pudagynyň wekilleriniň ünsüni özüne çekjekdigine berk ynanýaryn.

Bu halkara çäre Türkmenistanyň medeni we işewürlik durmuşynda möhüm waka öwrüler. Çünki ol diňe bir işewürleriň mümkinçiliklerini görkezmekleri üçin ajaýyp meýdança bolmak bilen çäklenmän, eýsem, ene-atalar we çagalar üçin hem özboluşly baýramçylyk çäresi bolar.

Hormatly sergi-ýarmarka gatnaşyjylar!

Gadyrly dostlar!

Sizi «Kids Ekspo: ähli zat çagalar üçin» atly halkara sergi-ýarmarkasynyň öz işine başlamagy bilen ýene-de bir gezek tüýs ýürekden gutlaýaryn. Size berk jan saglyk, abadan we bagtyýar durmuş, alyp barýan işleriňizde uly üstünlikleri arzuw edýärin.

Türkmenistanyň Prezidenti

Serdar Berdimuhamedow.