Gazagystanyň Şymkent şäherinde jiu-jitsu boýunça geçirilen Merkezi Aziýanyň çempionaty tamamlandy. Onda türkmenistanly türgen Jelilmuhammet Hojamyradow çempion bolmagy başardy.

77 kilograma çenli agram derejesinde garşydaşlarynyň hiç birine-de boýun egmedik Jelilmuhammet final tutluşygynda gazagystanly Žarmahan Bakirowy ýeňdi.

Ýaryşa 6 döwletden ― Gyrgyzystandan, Gazagystandan, Täjigistandan, Özbegistandan, Italiýadan we Türkmenistandan 570 türgen gatnaşdy. Merkezi Aziýanyň çempionatyna 26 türgen bilen gatnaşan Türkmenistan 17 medal gazandy. Olaryň 2-si altyn, 8-si kümüş, 7-si bürünç medaldyr.

Birleşen Milletler Guramasynyň Ilat Gaznasynyň (UNFPA) wekilhanasynyň Türkmenistanyň Bedenterbiýe we sport baradaky döwlet komiteti bilen bilelikde guramagynda Aşgabatda ajaýyp we täsirli çäre geçirildi.

Şu ýyl BMG tarapyndan saýlanan «Durnukly ösüş üçin ýaşlaryň sanly ýollary» atly global tema ýurduň sanly geljegini gurmakda ýaşlaryň ornunyň möhümdigini görkezdi.

Bu çäre 100 töweregi ýaşlary bir ýere jemledi we olaryň mümkinçiliklerini açmak bilen baglanyşykly möhüm meseleleri ara alyp maslahatlaşmak üçin möhüm platforma öwrüldi.

Şeýle hem howpsuz sanly giňişligiň emele gelmegi, sanly sowatlylygyň ösmegi, Gender deňligi ýaşlaryň Durnukly ösüş maksatlaryna ýetmäge işjeň gatnaşmagy hem-de bedenterbiýe we sagdyn durmuş ýörelgesi ýaly meseleler ara alnyp maslahatlaşyldy.

UNFPA-nyň Türkmenistandaky wekilhanasynyň başlygy Kemal Goşlyýw öz çykyşynda ýaş nesliň sanly geljegimizi emele getirmekde möhüm orny eýeleýändiklerini nygtady.

Çäräniň çäginde howpsuz sanly geljege bagyşlanan çykyş görkezildi. Mundan başga-da, myhmanlar ýaş gimnastikaçylaryň we ýakymly fleş-mobyň ajaýyp çykyşlaryny synladylar.

«Ahal» futbol topary Türkmenistanyň çempionatynyň Ýokary ligasynyň üçünji aýlawyna ýeňiş bilen başlady. Topar 19-njy tapgyryň çäginde paýtagtymyzdaky «Nusaý» stadionynda geçirilen duşuşykda «Aşgabady» 3:0 hasabynda ýeňdi.

Duşuşykda «Ahalyň» gollaryny Meýlis Diniýew, Elman Tagaýew we Hakmuhammet Bäşimow dagy geçirdi.

Bu ýeňişden soň, «Ahal» utugyny 37-ä çykaryp, ikinji orundaky «Altyn Asyr» bilen deňleşdi. AFK-nyň Çempionlar ligasy ― 2-niň saýlama duşuşygyna gatnaşmak üçin Hindistana gidendigi sebäpli, «Altyn Asyryň» 19-njy tapgyrda «Merw» bilen geçirilmeli duşuşygynyň başga güne süýşürilendigini ýatladýarys.

16 utukly «Aşgabat» bolsa ýaryş tertibiniň altynjy basgançagynda galdy.

Türkmenistanly futbol eminleri ýetginjekleriň arasynda Duşenbede geçiriljek CAFA ― 2024-iň duşuşyklaryny alyp bararlar.

Türkmenistanly futbol eminleri Duşenbe şäherinde (Täjigistan) geçiriljek 17 ýaşa çenli ýetginjekler ýygyndylarynyň arasyndaky Merkezi Aziýanyň Futbol assosiasiýasynyň duşuşyklaryny alyp barmak üçin çagyryldy.

Ýaryşa Türkmenistandan emin hökmünde Arslan Goşşanow hem-de eminleriň gözegçisi hökmünde Çarymyrat Gurbanow gatnaşar.

Sebit çempionatynyň 17 ― 24-nji awgust aralygynda geçirilýändigini ýatladýarys. Oňa Täjigistanyň, Özbegistanyň, Gyrgyzystanyň, Türkmenistanyň, Eýranyň we Owganystanyň ýetginjekler ýygyndylary wekilçilik eder.

CAFA-nyň çempionatynyň toparçalaýyn tapgyry bir aýlawdan ybarat bolar. Şol duşuşyklaryň netijesinde toparçalarda birinji orunlary eýelän ýygyndylar final duşuşygyna gatnaşar, ikinji orunlary eýelänler bolsa umumy ýaryşyň üçünji orny üçin göreşerler. Şeýle hem ýaryşyň dowamynda bäşinji-altynjy orunlary kesgitleýän duşuşyk hem geçiriler. Çempionatyň duşuşyklarynyň ählisini Duşenbe şäherindäki Merkezi respublikan stadionynda geçiriler.

Türkmenistanly pälwan Döwletjan Ýagşymyradow PFL Gran-prisiniň final tutluşygyny amerikaly Impa kasanganaý bilen geçirer. Bu tutluşygyň ýeňijisiniň 1 million amerikan dollary möçberindäki baş baýraga mynasyp boljakdygyny ýatladýarys.

Mundan ozal Golliwud şäherinde (ABŞ) geçirilen PFL 8 ýaryşynda Ýagşymyradowyň awstraliýaly Rob Uilkinsony eminleriň biragyzdan gelen netijesi bilen (30-27, 30-27, 30-27) ýeňendigini ýatladýarys. Şeýlelikde, ol PFL-de bassyr üçünji ýeňşini gazandy.

Ýagşymyradowyň garşydaşy Impa Kasangaý bolsa ýarymfinal tutluşygynda eminleriň gelen karary bilen (29-28, 29-28, 30-27) Joşua Silweýruny ýeňdi.

ABŞ-nyň Golliwud şäherinde garyşyk göreş boýunça PFL 8 ýaryşy geçirildi. Bu ýaryşyň esasy duşuşyklarynyň birinde türkmen göreşijisi Döwletjan Ýagşymyradow bilen awstraliýaly Rob Wilkinson duşuşdy.

PFL-iň ýarym agyr agramdaky Granpriniň ýarym finalynda geçirilen bu tutluşyk eminleriiň biragyzdan ses bermegi esasynda Ýagşymyradowyň ýeňşi bilen tamamlandy (30-27, 30-27, 30-27).

Bu Döwletjan üçin yzly-yzyna 6-njy, PFL-de bolsa 3-nji ýeňşi boldy.

Indi Ýagşymyradow finalda Impa Kasanganaý bilen Joşua Silweýranyň arasyndaky tutluşygyň ýeňijisi bilen duşuşar.

Türkmenistanyň Futbol federasiýasy resmi web saýtynda milli çempionatyň Ýokary ligasynyň 19-njy tapgyrynyň duşuşyklary barada maglumatlary paýlaşdy. Ozal hem habar berşimiz ýaly, tapgyrda «Ahal» «Aşgabady», «ARKADAG» topary «Şagadamy», «Nebitçi» bolsa «Köpetdagy» kabul eder. «Altyn asyr» bilen «Merwiň» arasyndaky duşuşyk bolsa başga bir güne geçirildi. Tapgyryň ilkinji duşuşygy ertir ― 16-njy awgustda geçiriler.

Aşakda tapgyryň duşuşyklarynyň geçiriljek ýerleri, başlanjak wagty we eminleri barada maglumatlary paýlaşýarys:

“Ahal” – “Aşgabat”

Geçirilýän ýeri: “Nusaý” (Aşgabat ş.)

Başlanýan wagty: 17:30

Duşuşygyň emini: B.Haknazarow (Aşgabat ş.)

Kömekçi eminler: Ş.Hydyrow (Balkanabat ş.), H.Abdiýazow (Daşoguz ş.)

Ätiýaçdaky emin: A.Weliýew (Änew ş.)

Gözegçi emin: R.Pälwanow (Daşoguz ş.)

17.08.2024 ý. (şenbe)

“ARKADAG” – “Şagadam”

Geçirilýän ýeri: “Nusaý” (Aşgabat ş.)

Başlanýan wagty: 17:30

Duşuşygyň emini: R.Ereşow (Türkmenabat ş.)

Kömekçi eminler: M.Şanazarow (Ýolöten ş.), K.Sapaýew (Daşoguz ş.)

Ätiýaçdaky emin: E.Ýazmyradow (Aşgabat ş.)

Gözegçi emin: G.Öwezow (Aşgabat ş.)

“Nebitçi” – “Köpetdag”

Geçirilýän ýeri: “Sport toplumy” (Balkanabat ş.)

Başlanýan wagty: 18:00

Duşuşygyň emini: J.Jumamyradow (Aşgabat ş.)

Kömekçi eminler: I.Kurambaýew (Daşoguz ş.), M.Nurberdiýew (Aşgabat ş.)

Ätiýaçdaky emin: A.Annamyradow (Balkanabat ş.)

Gözegçi emin: A.Sapaýew (Daşoguz ş.).

Türkmen türgenleri suw pökgüsi boýunça Merkezi Aziýanyň çempionatynyň bürünç medalyny eýelediler.

Ýaryş 12—15-nji awgust aralygynda Namangan şäherinde (Özbegistan) geçirildi.

Türkmen waterpoloçylary bu üstünlige Rahman Kulowyň hem-de Bezirgen Annaýewiň ýolbaşçylygynda ýetdiler.  

Ýaryşda ýere eýeleri bolan Özbegistanyň ýygyndy topary ýeňiş gazandy. Ikinji orny Gazagystanyň milli ýygyndysy eýeledi.

Türkmen toparyna ýurdumyzyň iň güýçli ýüzüjileriniň biriniň — Merdan Ataýewiň hem wekilçilik edýändigini aýratyn bellemelidiris.

15-16-njy awgustda Gyrgyz Respublikasynyň Çolpan-Ata şäherinde iri sport ýaryşy — Sambo boýunça dünýä kubogy geçirilýär.

Bu ýerde erkekler hem-de zenanlar sport we söweş sambosy boýunça agram derejeleriň 26-sy boýunça iň gowy türgen bolmak ugrunda göreş düşekçesine çykdylar. Birinji günüň netijeleri boýunça agram derejeleriň 12-si boýunça ýeňijiler hem-de baýrak eýeleri kesgitlendi.

Türkmen samboçylary bürünç medallaryň dördüsini gazanmak bilen, mynasyp netijeleri görkezmegiň hötdesinden geldiler.

Sport sambosy boýunça Babamyrat Babamyradow 58 kilogram agram derejesindäki bäsleşikde üçünji orny eýeledi. Gambar Umarow 71 kilogram agram derejesinde şeýle üstünlige ýetdi. Söweş sambosyndan bolsa Kerim Kerimow (64 kg) hem-de Agasapar Muhadow (79 kg) dagy üçünji orny eýeledi we ýurdumyzyň baýrak gaznasyny baýlaşdyrdy.

Ýaryş dowam edýär.

Polşanyň paýtagty Warşawada geçirilen 49-njy UEFA-nyň Superkubogy ugrundaky duşuşykda Ispaniýanyň «Real Madrid» topary ýeňiş gazandy. Italiýanyň «Atalanta» topary bilen duşuşan ispan kluby garşydaşyny 2-0 hasabynda ýeňlişe sezewar etdi. 

1-nji ýarymy golsuz tamamlanan duşuşygyň gollaryny 59-njy minutda Winisius Junioryň pasyndan netijeli peýdalanan Federiko Walwerde hem-de 68-nji minutda Jud Bellingamyň pasy esasynda täze transfer Kilian Mbappe geçirdi. 

Şeýlelikde, «Real Madrid» topary 6-njy gezek UEFA-nyň Superkubogyny gazanyp, kubogy iň köp alan topar boldy. Madridliler rekordyň täze eýesi bolup, olar öň bu netijäni «Milandyr» «Barselona» bilen paýlaşýardylar.

«Real Madrid» topary mundan ozal bu kubogy 2002-nji, 2014-nji, 2016-njy, 2017-nji hem-de 2022-nji ýyllarda alypdy.
Duşuşygyň iň ökde oýunçysy diýlip Jud Bellingam saýlandy.
Täze transfer, super ýyldyz Kilian Mbappe hem «Real Madrid» toparyndaky ilkinji resmi duşuşygynda gol geçirmegi başardy.

27-nji kubogyny gazanan Luka Modriç klubuň iň köp kubokly futbolçysy boldy.

17-18-nji awgustda Şymkent şäherinde (Gazagystan) jiu-jitsu boýunça «JJAU Regional Championship Central Asia 2024» ýaryşy geçiriler.

Ýaryşa Gyrgyzystanyň, Gazagystanyň, Täjigistanyň, Özbegistanyň hem-de Türkmenistanyň ýygyndy toparlary gatnaşar. Türgenler U16, U18 ýaş derejeleri boýunça hem-de ulularyň bäsleşiginde tutluşarlar.

Türkmenistanyň ýygyndy toparyna 14 türgen wekilçilik edýär. Bu barada «SalamNews» saýtynyň habarçysyna Türkmenistanyň Bedenterbiýe we sport baradaky döwlet komitetinden habar berdiler.

Ýaryşlar jiu-jitsunyň üç ugry boýunça ýaýbaňlandyrylar: newaza, fighting hem-de contact.

Ýaponiýada esaslandyrylan jiu-jitsu samuraýlaryň däpleriniň dowamydyr. Samuraýlar üstünlikleriniň diňe öz mümkinçiliklerini ulanyp, duşmany ýaragsyz ýeňmegiň mümkindigne ynanypdyrlar. Bu söweş sungaty garşydaşyň güýjüni özüne garşy ulanmagy özünde jemleýär.  

Türkmenistanyň "Altyn asyr" topary Hindistanyň "Ist Bengal" toparyny myhmançylykda 2024/25-nji ýylyň AFK-2 Çempionlar ligasynyň saýlama duşuşygynda ýeňip, bäsleşigiň topar tapgyryna çykdy.

Kalkuttada geçirilen duşuşyk Ýazguly Hojageldyýewiň şägirtleriniň 3:2 hasably ýeňşi bilen tamamlandy.
Ildeşlerimiziň düzüminde Murat Annaýew (18-nji minut), Selim Nurmuradow (28-nji) we Mihail Titow (52-nji) dagy gol geçirdiler.

Aşgabat klubynyň AFK-2 Çempionlar ligasynyň topar tapgyryndaky bäsdeşleri 16-njy awgustda Kuala-Lumpurda geçiriljek bije çekiş dabarasynyň netijesinde kesgitlener, “Altyn asyr" bije çekilişikde dördünji sebede düşer.​​​​​​​​​